Imbila Nsuma Bafwaya Ukuti na Imwe Mumfweko

ILYO Yesu ali pe sonde, abasambi bakwe baishile kuli wene no kumwipusha ati: “Cinshi iciishibilo ca kwisa kwenu, ne ca kupwa kwa pano isonde?” Abaswike ukuti kukaba inkondo ishikakuma ifyalo ifingi, ifipowe, ifikuko, ifinkukuma, ukufulisha kwa bupulumushi, bakasambilisha ba mu mipepele ya bufi abakalufya abengi, ukupatwa no kupakaswa kwa bakonshi bakwe aba cine, no kushibantukila kwa kutemwa ubulungami mu bantu abengi. Lintu ifi fintu fyatendeka ukucitika, cali no kulangilila ukubapo kwa kukanamoneka ukwa kwa Kristu no kuti Ubufumu bwa mu muulu buli mupepi. Iyi yali no kuba imbila—imbila nsuma! E lyo Yesu alundileko na aya mashiwi ku ciishibilo ukuti: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mateo 24:3-14.

Kwena ifilecitika pe sonde nafibipa, lelo filangilila icintu icisuma, e kutila ukubapo kwa kwa Kristu. Ifilumbwilwe pa muulu fyatendeke ukucitika mu mwaka walandilwepo sana uwa 1914! Uyu mwaka waishibishe impela ya Nshita ya Bena fyalo no kutendeka kwa kwaluka ukufuma ku mitekele ya buntunse ukuya ku Mitekele ya kwa Kristu iya Myaka Ikana (1,000).

Amalumbo 110, ifikomo 1 na 2, na Ukusokolola 12:7-12 filangilila ukuti kwali no kubako inshita ya kwalukilamo ukwa mitekele. Palya calangililwa ukuti Kristu ali no kwikala ku kwa kulyo kwa kwa Lesa mu muulu ukufikila inshita ya kuti abe mfumu. Lyene pali no kukonka inkondo mu muulu na Satana ukuposwa pe sonde, ukuleta akalanda pe sonde, no kuti Kristu ali no kuteka mu kati ka balwani bakwe. Ububifi bonse bukapwishishiwa mu “bucushi bukalamba,” ubukafika mu nkondo ya Armagedone ikakonkwapo no kuteka kwa mutende ukwa myaka 1,000 ukwa kwa Kristu.—Mateo 24:21, 33, 34; Ukusokolola 16:14-16.

Baibolo itila, “Lelo ishibe ci, ukuti mu nshiku sha kulekelesha mukesaba inshita ishayafya. Pantu abantu bakaba abaitemwa, abatemwe ndalama, aba mataki, aba miiya, aba miponto, aba bucintomfwa ku bafyashi, abashitootela, abashashila, abaumalala, abatalama, aba lwambo, ababulo kuiteka, abankalwe; bakaba abashatemwa busuma, bashikamfutu, bacintalika, abatuumikwa, abatemwo kwangala ukucisho kutemwa Lesa; abantu abakwate mimonekele ya bukapepa, lelo abakaana amaka ya buko. Ku babe fi talukako.”—2 Timote 3:1-5.

Bamo kuti bapaasha abati te lelo ifi fitendeke, lelo icishinka cili ca kuti tafyatala aficitikila pa cipimo cimo cine. Ukulingana na bakalemba ba malyashi ya kale na balanda pa fyacitike, takwatala akubako inshita imbi pe sonde ukupala iyatendeke mu 1914 ukuya ku ntanshi. (Moneni ibula 7.) Amalanda yalicilapo ukukula ukucila kale lyonse. Ukulunda pali co, nga kulosha ku mbali shimbi isha ciishibilo ca nshiku sha kulekelesha, tufwile ukutontonkanya na pali fi fishinka: Ukushimikila kwa mwi sonde lyonse pa lwa kubapo kwa kwa Kristu na pa lwa Bufumu kulebombwa pa cipimo cishatala acimonwapo ku kale. Ukupakaswa pa mulandu wa kushimikila takwatala akulingana no ko Inte sha kwa Yehova shapakaswako. Abengi balipaiwe mu nkambi sha kucushiwilwamo isha baNazi. Ukufika na lelo Inte sha kwa Yehova shicili shalibindwa mu fyalo fimo, kabili mu fyalo fimbi baliikatwa, ukupooswa mu fifungo, ukucushiwa, no kwipaiwa. Ifi fyonse ni fimo ifya mu ciishibilo Yesu alandilepo.

Ukulingana ne fyo casobelwe pa Ukusokolola 11:18, Inte sha kwa Yehova balashilwisha ku ‘nko shakalipa,’ kabili ici cikalenga ukuti “ubukali” bwa kwa Yehova bukeshile isho nko. Ili line lembo lisosa no kuti Lesa “akonaula abaleonaule calo.” Takwatala akuba inshita imbi umo amaka ye sonde aya kutungilila ubumi yaonaulwa ukucila ino. Nangu cibe fyo, ndakai ifintu fyalyaluka! Basayantisiti abengi balisoka ukuti nga ca kuti abantu batwalililapo fye ukukowesha icalo, cikaba icishingekalwamo. Lelo Yehova “acibumbile ku kwikalwamo,” kabili ali no kufumyamo abakowesha isonde ilyo bashilati bapwilikishe ukulyonaula.—Esaya 45:18.

AMAPAALO UBUFUMU BUKALETA PE SONDE

Abengi abasumina muli Baibolo, abatila bonse abakapusuka bakaya ku muulu kuti bapapa sana ukumfwa ukuti abatekwa ba Bufumu bwa kwa Lesa bakekala pano pene pe sonde. Baibolo ilangilila ukuti ni mpendwa yapimwa fye e bakaya ku muulu no kuti abakekala pe sonde bakaba ibumba likalamba ilishingapendwa. (Amalumbo 37:11, 29; Ukusokolola 7:9; 14:1-5) Ukusesema kwa mwi buku lya mu Baibolo ilya kwa Daniele kulangilila ukuti Ubufumu bwa kwa Lesa ubukatekwa na Kristu bukateka isonde lyonse.

Mulya Ubufumu bwa kwa Kristu bwaimininwako ku libwe lyaputwilwe ku lupili ulwimininako bumulopwe bwa kwa Yehova. Lyapoolele no kutobaula icimpashanya icimininako Ifyalo fyakwatisha amaka ifya pe sonde, kabili “ilibwe ilyapoolele icimpashanya lyaisabo lupili lukalamba no kwisusha pano isonde ponse.” Uku kusesema kutwalilila ukusosa ukuti: “Mu nshiku sha shamfumu ishi Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”—Daniele 2:34, 35, 44.

Ni pali ubu bwine Ubufumu na pa Malembo yalanda pa lwe subilo lya mweo wa muyayaya pe sonde lyawamishiwa kabili ilyayemfiwa e po Inte sha kwa Yehova shifwaya ukulanda na imwe. Abantu abengi abali aba mweo nomba, ne mintapendwa ya baba mu nshishi bakaba ne shuko lya kwisaikalamo ku ciyayaya. Lyene, ilyo Kristu Yesu akateka pa myaka 1,000, imifwaile ya kwa Yehova iya kubalilapo iyo abumbile isonde no kubikapo abantunse ba kubalilapo babili ikafikilishiwa. Uyu Paradise wa pe sonde takatale aba uwa kutendusha. Nga fintu fye Adamu apeelwe umulimo mwi bala lya Edene, e fyo na bakekala pe sonde bakakwata imilimo iingi iya kulisakamana, ukusakamana ifimenwa, ne nama. “Bakaipakisha umulimo wa minwe yabo pa myaka iingi.”—Esaya 65:22, Revised Standard Version; Ukutendeka 2:15.

Kuti twabelenga Amalembo ayengi ku kulangilila imibele ikabako lintu ipepo Yesu atusambilishe likaasukwa ilya kuti: “Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:10) Lelo, pali ino nshita ifyo ilembo lyakonkapo lilelondolola fili ifyakumanina. Litila: “Naumfwile ne shiwi likalamba lya mu cipuna ca bufumu, lileti, Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya. Kabili uwaikala pa cipuna ca bufumu atile, Moneni, ifintu fyonse nafilenge fipya. Kabili atile, Lemba: pantu ifyebo ifi fya cishinka kabili fya cine.”—Ukusokolola 21:3-5.

[Amashiwi pe bula 15]

“Inshita ishayafya,”

LELO “e lyo mpela ikesa”

[Icikope pe bula 18]

Netherlands

[Icikope pe bula 18]

Nigeria