Yesu Kristu E Mesia Batile Akesa

PA KUTWAFWA ukwishiba Mesia, Yehova Lesa apuutilemo bakasesema abengi abalembwa mu Baibolo ukulondolola ifyo Umulubushi ali no kuba. Balembele pa fyali no kuba ukufyalwa kwakwe, umulimo wakwe, e lyo ne mfwa yakwe. Aya masesemo ya mu Baibolo yonse yalifikilishiwe muli Yesu Kristu nga filya fine fye yasobelwe. Pa kuti tushininkishe ici, natumone amasesemo yamo yamo ayalanda pa kufyalwa kwa kwa Mesia na pa fyo alekula.

Kasesema Esaya asobele ukuti Mesia ali no kufuma mu lupwa lwa Mfumu Davidi. (Esaya 9:7) Ca cine, Yesu afyalilwe mu lupwa lwa kwa Davidi.—Mateo 1:1, 6-17.

Mika, kasesema wa kwa Lesa na umbi, asobele ukuti uyu mwana akaba kateka no kuti akafyalilwa mu “Betlehemu Efrata.” (Mika 5:2) Ilyo Yesu afyelwe, kwali imisumba ibili mu Israele iyaleitwa ati Betlehemu. Umo wali mupepi na Nasarete ku kapinda ka ku kuso aka israele, e lyo umbi wali mupepi na Yerusalemu, mu Yuda. Umusumba wa Betlehemu uwali mupepi na Yerusalemu waleitwa ati Efrata. Yesu afyalilwe muli uyu musumba nga filya fine fye ukusesema kwasosele!—Mateo 2:1.

Ubusesemo bumbi ubwa mu Baibolo bwatile Umwana wa kwa Lesa aketwa “ukufuma . . . ku Egupti.” Ilyo Yesu ali akanya bamutwele ku Egupti. Bamubweseshe ilyo Herodi afwile, ne ci calengele ubusesemo bwafikilishiwa.—Hosea 11:1; Mateo 2:15.

Pa mukululo uli pe bula 200, amalembo yali pa mutwe uleti “Ubusesemo” yalelanda pali Mesia. Shi linganyeni aya malembo ne filandilwe pa mutwe uleti “Ukufikilishiwa.” Ukucite co kwalalenga mucetekele sana ukuti Icebo ca kwa Lesa ca cine.

Ilyo mulebebeta aya malembo, ibukisheni ukuti amalembo ayalelanda pa busesemo yalembelwe ninshi kushele imyaka iingi sana ukuti Yesu afyalwe. Yesu asosele ukuti: “Fyonse ifyalembelwa ine mu mafunde ya kwa Mose na muli Bakasesema na mu Malumbo, fili no kufishiwapo.” (Luka 24:44) Nge fyo mwingamona muli Baibolo wenu, fyonse fye fyalifikilishiwe bwino bwino!

[Charti pe bula 200]

AMASESEMO YALANDA PALI MESIA

ICACITIKE UBUSESEMO UKUFIKILISHIWA

Afyalwa mu mukowa wa kwa Yuda Ukutendeka 49:10 Luka 3:23-33

Afyalwa kuli nacisungu Esaya 7:14 Mateo 1:18-25

Yehova atile Mwana wakwe Amalumbo 2:7 Mateo 3:17

Abengi tabamucetekele Esaya 53:1 Yohane 12:37, 38

Cibusa wakwe amufutuka Amalumbo 41:9 Yohane 13:18, 21-30

Bamufutukila pa sha silfere 30 Sekaria 11:12 Mateo 26:14-16

Bapendwila ifya kufwala fyakwe Amalumbo 22:18 Mateo 27:35

Apontelwa ilyo ali pa cimuti Amalumbo 22:7, 8 Mateo 27:39-43

Ashiikilwe pamo na bakankaala Esaya 53:9 Mateo 27:57-60

Abuushiwa ilyo ashilabola Amalumbo 16:10 Imilimo 2:24, 27

Abikwa ku kulyo kwa kwa Lesa Amalumbo 110:1 Imilimo 7:56