Icipandwa 4

Yehova ni Lesa Uusobela Ifya ku Ntanshi no Kufikilisha Ifyo Asobela

1, 2. (a) Mulandu nshi uo abantu bamo nalimo bamwena kwati takwaba uwakwata amaka pa fintu fyonse? (b) Bushe bakasesema 12 balondolola shani imibele ya kwa Yehova?

ABANTU abengi batontonkanya ukuti balafilwa ukuilama. E lyo ukulingana ne fyo babelenga mu malyashi, basondwelela no kuti abantu bonse pa calo bali fye mu bwapwa tabeshibe uko baleya. Nangu beshe shani ukupwisha amacushi pa calo, ciba fye kwati nomba e lyo balenga ifintu ukubipilako. Cisuma ukwishiba ukuti bamo pali bakasesema 12 abo tulelandapo nabo bene balesakamana, kabili balilandile ifyebo fya kusansamusha ifingatunonsha kabili ifyo twingebako na bantu bambi pa kubasansamusha.—Mika 3:1-3; Habakuki 1:1-4.

² Icishinka icikalamba ico mwalasanga muli aya mabuuku ya busesemo ca kuti Yehova, Mulopwe uwabumba fyonse, ifintu fyonse ifyo abantu bacita fyaba mu minwe yakwe kabili alafwaya sana ukuti tuleikala bwino. Na kuba, ifwe bonse kuti twalanda ukuti, “Yehova alafwaya ukuti tuleikala bwino.” Bakasesema 12 balalondolola bwino bwino ifyo “Yehova wa milalo” aba. Lesa kuti ‘akumye calo, na co casunguluka,’ lelo alaya abantu bakwe ukuti: “Uwakumya pali imwe, akumya pa mboni ya linso lya kwa Yehova.” (Sekaria 2:8; Amose 4:13; 9:5) Bushe tamutemwa nga mulebelenga ifyebo fimo muli Baibolo, mwamona ifyo Lesa alanga uluse no kwelela abantu no kuti ico acitila ifintu fyonse mulandu wa kutemwa? (Hosea 6:1-3; Yoele 2:12-14) Kwena, ifi fyebo fyalembele bakasesema tafilondolola imibele yonse iya kwa Lesa; nga mulefwaya ukwishiba imibele yonse iya kwa Lesa mufwile ukubelenga amabuuku yonse 66 aya mu Baibolo. Na lyo line, ifyo aba bakasesema 12 balembele filatwafwa ukwishiba bwino imibele isuma iya kwa Lesa ne fyo abomba na bantu.

 3. Bushe bakasesema 12 balenga shani cishibikwe ukuti Yehova ni Lesa uucita ifyo alanda?

³ Ifyo bakasesema 12 balembele kuti fyakosha icitetekelo twakwata muli Yehova ica kuti alasobela ifya ku ntanshi kabili ifyo asobela filafikilishiwa. Baalanda no kuti nangu cikabe shani Lesa akalenga isonde ukuba paradaise ilyo umwine wine akalateka. (Mika 4:1-4) Bamo pali aba bakasesema balondolola ifyo Yehova apekenye ukwisa kwa kwa Mesia no kwisa kwa cilubula icali no kulubula abantu ku lubembu ne mfwa. (Malaki 3:1; 4:5) Mulandu nshi ukwishiba fyonse ifi kwacindamina?

IFINTU FYONSE FYABA MU MINWE YA KWA MULOPWE UWATUTEMWA

4, 5. (a) Cishinka nshi icacindama pali Lesa ico bakasesema 12 bakomailapo? (b) Bushe mumfwa shani pa bwingi bwa maka ya kwa Lesa?

⁴ Ibukisheni ifyo Lesa bamusonsombele pa nsambu akwata isha kuteka, nge fyo twasambilile mu cipandwa cafumineko. Ifibumbwa fimo ifya mu muulu fyalipondokele Yehova no kuleta icimfulumfulu pano nse pa mulandu wa kuti bakeene ukuteka kwa kwa Lesa pantu baletwishika ifyo alefwaya ukucita. Kanshi nacimoneka fye apabuuta tuutu ukuti pa kuti kwingaba icumfwano ne cibote mu muulu na pano calo, kano ifibumbwa fyonse fyanakila Mulopwe Yehova. E mulandu wine kanshi Yehova afwaya ukuti mpaka fye ifibumbwa fyonse fikeshibe ukuti e walinga ukuteka. Lekeni tumone ifyo aya mabuuku 12 aya busesemo yengatwafwa ukumfwikisha bwino ici cishinka.

⁵ Apo aba bakasesema baali ni nkombe sha kwa Yehova, balilandile sana pa cifulo cakwe icikalamba. Katulangilile, ilyo Amose alekomaila pa bucindami bwe shina lya kwa Lesa no kuti Wa maka yonse, alandile ukuti ni “Shikulu Mulopwe” imiku 21. Ici cilangilila ukuti Lesa mukalamba icine cine kabili takuli nangu cimo ico engafilwa, fyonse fyaba mu maboko yakwe. (Amose 9:2-5; moneni akabokoshi kaleti “Yehova Wa Maka Yonse.”) Yehova e walinga fye ukuteka konse konse, kabili te kuti alingane ne filubi iyo. (Mika 1:7; Habakuki 2:18-20; Sefania 2:11) Apo Yehova e wabumba ifintu fyonse, kanshi e walinga no kuteka ifibumbwa fyonse. (Amose 4:13; 5:8, 9; 9:6) Mulandu nshi ici cacindamina kuli imwe?

 6. Bushe ukufikilisha kwa bufwayo bwa kwa Lesa kwakuma shani abantu bonse?

⁶ Nga ca kuti abantu balimufyengapo, balimukaana, nangu ukumupata apabula umulandu, tamulingile ukusakamana pantu Mulopwe uwa cikuuku alatusakamana. Yehova alikwete uluko lumo ulwa kale ulo atemenwe sana ukucila pa nko shimbi, lelo nangu cali ifyo abilishe ukuti mpaka fye akaafwe imitundu ya bantu bonse ne ndimi. Ni “Shikulu wa pano isonde ponse.” (Mika 4:13) Lesa alaile ukuti ishina lyakwe ‘lyali no kukula mu nko.’ (Malaki 1:11) Apo Shifwe wa mu muulu taifisa ku bantu bonse, abantu “ba mu nko sha ndimi shonse” tabashimunuka ukwisa ku bwite bwa kumupepa.—Sekaria 8:23.

 7. Mulandu nshi cacindamina ukwishiba umwalola ishina lya kwa Yehova?

⁷ Ukwishiba ifyo Lesa aba ne fyo akacita fyalyampana sana ne shina lyakwe. (Amalumbo 9:10) Ilyo Mika ali pano calo, ishina lya kwa Lesa lyalepontelwa pantu abengi abainikweko ishina lyakwe bali abatalama. Kasesema alipuutilwemo ukulemba pa “kupulama kwe shina lya kwa Yehova,” e lyo kabili alandile ukuti ‘umuntu wa mano yene yene alatiina ishina lya kwa Lesa.’ (Mika 5:4; 6:9) Mulandu nshi? Nga mwalikwata isubilo lya kwikala imyaka iingi ninshi mufwile ukwishiba umwalola ili shina ilipilibula ukuti: “Ailenga Ukuba.” Mulandu nshi te kuti mubelengele Yoele 2:26 no kutontonkanya pa fyo mwingomfwa bwino pa kwinikwako ishina lya kwa Lesa no kulaeba abantu bambi pali Lesa uwabako fye umo mpo uwingaba conse ico engatemwa ukuba pa kuti anonshe ifibumbwa fyakwe fyonse? Lesa e wakwata fye amaka ayabula impela, kuti acita fye icili conse ico engafwaya. Kuti mwaishiba ukuti ici ca cine nga mwamona ifyo amasesemo yafikilishiwe ayo bakasesema 12 basobele.

 8. Bushe ni mu nshila nshi ishina lya kuti Yehova lyamukoselesha?

⁸ Abantu abengi balinonkelamo mu kusambilila ukuti Yehova kuti alenga conse ico alefwaya ukucitika cacitika nangu ukufikilisha conse ico alefwaya. Na kuba ifi fine e fyo Yoele alandile mu amashiwi yakwe yaishibikwa sana ayo na Bena Kristu na bo bene bakopolwele, ayatila: “Onse uukalilila kwi shina lya kwa Yehova akapokololwa.” (Yoele 2:32; Imilimo 2:21; Abena Roma 10:13) Bushe na ifwe tumfwa nga fintu Mika aumfwile uwatile, “ifwe twakulaendela mwi shina lya kwa Yehova Lesa wesu umuyayaya umuyayaya”? (Mika 4:5) Ee, ilyo tulepakaswa nangu ilyo tuli no bwafya ubuli bonse te kuti tutwishike ukuti kuti ‘twauba mwi shina lya kwa Yehova.’—Sefania 3:9, 12; Nahumu 1:7.

 9. Bushe amaka ya kwa Lesa pa ntungulushi sha bantunse yaliba no mo yapelela?

⁹ Ilyo mulebelenga aya mabuuku ya busesemo, muli no kukosha icitetekelo mwakwata kale ica kuti Yehova alikwata amaka pali bakateeka na pali bonse abapanga amafunde pano nse. Kuti abalenga babomba ukulingana ne fyo afwaya. (Amapinda 21:1) Ibukisheni ifyo cali kuli Kateka Dariusi uwa ku Persia. Abalwani abalelwisha ukupepa kwa cine balefwaya ukuti abaafwe ukulesha abalekuula cipya cipya itempele lya kwa Yehova mu Yerusalemu. Nomba icacitike calipusene sana ne fyo balefwaya! Nalimo mu 520 B.C.E., Dariusi abukulwile icipope ca kwa Koreshe no kwafwilisha umulimo wa baYuda uwa kukuula. Ilyo kwaimine ubwafya na bumbi, Lesa atumine ubukombe ku Mulashi wa baYuda Serubabele ubwa kuti: “Te ku bulamba, kabili te ku maka, kano ku Mupashi wandi, e fyo asosa Yehova wa milalo. Ni wani, we lupili lukalamba? Ku cinso ca kwa Serubabele ukaba apabatama.” (Sekaria 4:6, 7) Takwakabe nangu cimo icikalesha Yehova ukonaula icalo cabipa no kulenga bantu bakwe abamupepa ukuipakisha ukwikala mu calo icikaba paradaise.—Esaya 65:21-23.

10. Bushe amaka ya kwa Lesa yakula shani, kabili mulandu nshi cacindamina ukwishiba ifi?

¹⁰ Tontonkanyeni na kabili ukuti Yehova alikwata amaka pa mwela, pa mfula, na pa fintu fimbi ifyo abumba. Nga alefwaya kuti afibomfya ifi fintu ukonawilako abalwani bakwe. (Nahumu 1:3-6) Ilyo Sekaria alekomaila pa fyo Yehova engapususha abantu bakwe, abomfeshe amashiwi ya mampalanya aya kuti: “Yehova akamonwa pa muulu pali bene, akafumye mifwi yakwe nge myele ya nkuba; Shikulu Yehova akalishe ntandala, akendela mu nkuuka sha mwela isha ku kapinda ka ku kulyo.” (Sekaria 9:14) Nga muno nshiku, bushe kuti cayansha Lesa ukushinina inko abashipepa ukuti e wapulamo? Awe nakalya!—Amose 1:3-5; 2:1-3.

ALAFIKILISHA IFILAYO

11, 12. (a) Mulandu nshi umusumba wa Ninebe walemonekela kwati te kuti ucimfiwe? (b) Ukulingana no busesemo bwa kwa Lesa, cali shani ku musumba wa Ninebe?

¹¹ Baleni tontonkanyeni ukuti mwaleikala mu myaka ya ba 800 B.C.E. ku ncende iyo beta pali ino nshita ukuti Middle East. Musumba nshi uwa lulumbi uo nalimo mwaumfwapo? Ufwile fye ukuba musumba wa Ninebe. Wali musumba uwalumbuka uwali mu Ashuri lubali lwa ku kabanga mu lulamba lwa mumana wa Tigrisi, amakilomita nalimo 900 lwa ku kabanga ka Yerusalemu. Mufwile mwalyumfwapo amashiwi ya kuti uyu musumba wali uukalamba nga nshi—nga kuushinguluka onse wali amakilomita nalimo 100! Abantu abaileko mu kutandala ku Ninebe baleti uyu musumba kuti walingana fye na Babiloni ku busuma, mwali amasano, amatempele, imisebo iikalamba, amaparka ya cintubwingi, e lyo ne ciyanda ca kubelengelamo ica lulumbi. Ukulunda pali fi, abaishiba sana ifya nkondo bashimiko kuti, uyu musumba wali ne fibumba fibili ifyatikama, cimo mu kati cimo na co ku nse, ica kuti abalwani te kuti bakwate na pa kupekela.

¹² “Ala te kuti ucimfiwe!” Abantu abengi e fyo bafwile balelanda pa musumba wa Ninebe. Lelo bakasesema abafumine mu luko ulunono nga nshi ulwa bena Yuda babikilepo fye ukulanda ukuti Yehova ali no konaula uyu “musumba wa mulopa.” Nomba pa mulandu wa kuti abantu balyumfwile ifyo Yona abasokele, uyu musumba e fyo wabalile wapusuka ubupingushi bwa kwa Lesa. Lelo, abena Ninebe batendeke na kabili imisango yabo iyabipa iya kale. Nahumu asobele ukuti: “Ninebe . . . , ulupanga lukakufita . . . Takuli ukwambala ku kufunaika kobe.” (Nahumu 3:1, 7, 15, 19; Yona 3:5-10) Pali iyi ine nshita, Lesa atumine Sefania ukuyasobela ukuti Ninebe yali no kushala icibolya. (Sefania 2:13) Bushe uyu musumba uwalemoneka ngo ushingacimfiwa pali ilya nshita waali no konaika pa kuti icebo ca kwa Yehova cifikilishiwe? E fyacitike mu 632 B.C.E. ilyo abena Babiloni, abena Sukuti, na bena Madai bashingile Ninebe. Mu kupumikisha, mulamba aliwishishe ifibumba, awe e fyo na ba kusansa baingile. (Nahumu 2:6-8) Uwali umusumba wa lulumbi, mukwai nomba washele fye ifitantaala fyeka fyeka mu kashita fye akanono. Ukushinta na lelo, fino tulelanda uyu musumba waba fye icibolya.a Uyu “musumba wa kwanga” tawali na maka ya kulesha amashiwi ya kwa Lesa ukufikilishiwa!—Sefania 2:15.

13. Bushininkisho nshi ubwa masesemo yafikilishiwe ayo mwingabelenga mu mabuuku ya bakasesema 12?

¹³ Ifyacitikile Ninebe ca kumwenako fye ca busesemo bumo ubwafikilishiwe. Lolesheni pali mapu ya muno nshiku iya ku Middle East. Bushe kuti mwapamona apabela Amone, Ashuri, Babiloni, Edomu, nelyo Moabu? Nakalya! Nangu ca kuti ishi nko shali ishalumbuka pa nshita imo, bakasesema 12 basobele ukuti shali no kuloba. (Amose 2:1-3; Obadia 1, 8; Nahumu 3:18; Sefania 2:8-11; Sekaria 2:7-9) Ishi nko shaile shileloba fye lumo lumo shasuka shapwa. Yehova atile baali no kuloba, ne ca cine balilobele! Na kabili ifyo aba bakasesema basobele pa baYuda ukuti baali no kubwela ukufuma mu busha ku Babiloni, fyalifikilishiwe, balibwelele!

14. Mulandu nshi uo mulingile ukucetekela amalayo ya kwa Yehova no mweo onse?

¹⁴ Mwaumfwa shani pa bushininkisho mwamona ubwa kuti Yehova alikwata amaka ya kusobela ifya ku ntanshi? Mulingile ukucetekela ukuti Yehova akafikilisha ifyo alaya, pantu ni Lesa “uushingabeepa.” (Tito 1:2) Na kabili, Lesa alatweba mu Cebo cakwe ifyo tulingile ukwishiba. Kuti mwapeela ubumi bwenu bonse mu kubomba umulimo wa kwa Yehova no kucetekela ukuti icebo cakwe ica busesemo ca cine. Amasesemo yalembwa mu mabuuku 12 te ya kutulangilila fye amasesemo yafikilishiwe kale. Amasesemo ayengi yalefikilishiwa muno nshiku, e lyo yambi na yo yali no kufikilishiwa nomba line. E ico, ifyalembwa muli aya mabuuku 12 kuti fyakosha icitetekelo cenu ukuti amasesemo yasobela ifya muno nshiku ne fya ku ntanshi yali no kufikilishiwa. Mulebikako amano kuli aya masesemo ya bakasesema 12.

SHIFWE UUSAKAMANA ABANTU

15. Bushe ifyacitikile Mika kuti fyamwafwa shani nga ca kuti mule-esha ukupwisha ubwafya mukwete?

¹⁵ Bucishinka bwa kwa Lesa tatubumwena fye ku fyo akacita ku fyalo nangu ku filecitika mu calo conse epela. Ifyo Yehova asobela no kufikilisha, na imwe bene kuti fyamukuma. Kuti fyamukuma shani? Kwena limo kuti muleesha na maka ukupwisha amafya ayo mukwete. Mwalishiba ukuti tamulingile ukufwaya fye umuntu wa kuti nga aumfwa ubwafya mukwete capwila na po pene, lelo mulingile ukufwaya uo mwingacetekela ukuti ali no kumwafwa. Muli ba 700 B.C.E., Mika afwile alinakile ukwikala na bantu abali aba cilumba mu Yuda. Cali kwati e muntu wa kulekeleshako uwali ne cishinka pa calo, ica kuti na balupwa bakwe kumo taabacetekele. Aleti konse uko aya, ayasanga fye ni bantalamisoka, incenjeshi sha bantu, kabili ababi. Nangu cali ifi, Mika alikoseleshiwe ku malayo ya kwa Lesa aya kuti alasakamana abantu bakwe aba cishinka nangu abantu bambi bacite ifintu fya musango shani. Na imwe kuti mwakoseleshiwa nga fintu cali kuli Mika, maka maka nga ca kuti mwe bapepa Yehova mwasanga ukuti muli fye abanono nangu nga muli fye mweka, e lyo abashala bonse tabacindika Lesa.—Mika 7:2-9.

16. Cinshi cingalenga ukuti mucetekele ukuti Lesa alamona aba mafisakanwa na ba lufyengo no kuti akapokolola abalungama?

¹⁶ Nga fintu caba na muno nshiku, abakankaala na bashimucindikwa mu Yuda na mu Israele bali no bucenjeshi na kapatulula. Icalelenga ukuti kuleba ubusha bwabula ukulolamo, mulandu wa kuliila abantu pa mutwe pa kubasonkesha imisonko iikalamba no kulabapokolola impanga. Abapiina balebacusha no kubakalukila. (Amose 2:6; 5:11, 12; Mika 2:1, 2; 3:9-12; Habakuki 1:4) Lesa alandiile muli bakasesema bakwe ukutila tatemwa amafisakanwa no lufyengo kabili akakanda incitatubi abashilapila. (Habakuki 2:3, 6-16) Alisobela ukuti “[akakalulule] nko ishakulisha ukufiko kutali” kabili ababomfi bakwe abo atemwa “bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.” (Mika 4:3, 4) Tontonkanyeni ifyo abantu bakapokololwa! Lesa alisobela e lyo kabili twalimona no kuti ifintu fimbi ifingi ifyo asobela alifikilisha. Bushe te kuti musumine ukuti no bu bwine ubulayo buli no kufikilishiwa?

17, 18. (a) Mulandu nshi Lesa alaila abantu bakwe ifintu ifisuma? (b) Bushe tulingile ukumona shani ukusalapula kwa kwa Yehova?

¹⁷ Icilenga ukuti Yehova alefikilisha ifyo alaya, te kufwaya fye ukuti abantu balemona amaka akwata aya kusobela. Ico acitila ifi mulandu wa kutemwa kwakwe ukwashimpwa pa mafunde yalungama, pantu “Lesa kutemwa.” (1 Yohane 4:8) Ibukisheni ifyo cali kuli Hosea, uwali pe sonde mu myaka ya ba 700 B.C.E. Nga filya muka Hosea, Gomere, aali impulumushi, e fyo na bena Israele bali kuli Yehova. Filya balepepa ifilubi cali kwati balecita ubucende; baleti uku balepepa Baali e lyo balepepa na Lesa wa cine Yehova. Na kabili mu mampalanya ‘bacitile ubucende’ na bena Ashuri na bena Egupti. Bushe Yehova acitile shani? Hosea aali no kukonka umukashi wakwe impulumushi no kuyamubwesha. Yehova alefwaya abantu bakwe ukubwelela kuli ena, pantu alibatemenwe. Atile: “Ku mikungo ya muntu e ko nalebakulila, ku fikakilo fya kutemwa; . . . no kubatekele ca kulya.” (Hosea 2:5; 11:4) Nga baumfwilile Lesa no kulapila balapila, aali no kubeleela, no kutendeka ukumfwana nankwe na kabili. (Hosea 1:3, 4; 2:16, 23; 6:1-3; 14:4) Bushe tamumfwa bwino nga mwamona icikuuku ca kwa Yehova? Yipusheni amuti, ‘Nga ca kuti Yehova ali ne cikuuku ku numa, bushe na ine te kuti ncetekele ukutemwa kwakwe, ifyo aba ne cikuuku ca fikapo kabili ica cishinka?’—Hosea 11:8.

¹⁸ Aya mabuuku 12 aya busesemo na kabili kuti yamwafwa ukwishiba ukuti mu kutemwa kwa kwa Lesa mwaba no kulungika abantu. Yehova alaile abantu bakwe ababembu ukuti ‘ukufita takabafite.’ (Amose 9:8) Lesa nga amona ukuti alingile ukubakanda, talesuulako fye, lelo abantu nga baishiba ukuti akabakanda fye pa nshita iinono, ne mitima yabo ifwile yaleikala! Malaki 1:6 alinganya Yehova ku mufyashi umwaume uwaba no kutemwa. Mwalishiba ukuti umufyashi limbi kuti asalapula abana abo atemwa nga alefwaya ukubalungika. (Nahumu 1:3; AbaHebere 12:6) Lelo, ukutemwa kwa kwa Shifwe wa mu muulu kwena kulamulenga ukukokola ukukalipa, kabili Malaki 3:10, 16 na yo ine ilanda cimo cine ukuti akapaala ababomfi bakwe.

19. Bushe kuibebeta kwa musango nshi tulingile ukuibebeta?

¹⁹ Malaki atendeka ibuuku lyakwe na mashiwi ya kuti: “Yehova atila, Nalimutemwa.” (Malaki 1:2) Ilyo muletontonkanya pa mashiwi Lesa aebele abena Israele, muipushe mwe bene amuti: ‘Bushe kwaliba ifyo ncita ifingalenga Lesa ukumpata? Finshi ifyaba mu kutemwa kwa kwa Lesa ifyo ningatemwa ukwishiba kabili ifyo ningatemwa ukunonkelamo?’ Nga mwaishiba bwino ifyaba ukutemwa kwa kwa Lesa, icitetekelo cenu mu kutemwa kwakwe ukwa pe na pe cakulakoselako fye.

UKWELELA KUTWALA KU KUPUSUKA

20. Bushe ukwelela kwa kwa Lesa kutwala shani ku kupusuka?

²⁰ Ilyo mulebelenga aya mabuuku ya busesemo, muli no kumona kutila limo limo Yehova alesobela na macushi. Mulandu nshi? Ilingi line, ico alecitila ifi kufwaya ukuti abantu bakwe balapile. E mulandu wine alekele bambi bambi ukwisaonaula Samaria mu 740 B.C.E. na Yerusalemu mu 607 B.C.E. Ifyo Lesa asobele fyalicitike, lelo umuye nshiku alilekele abantu bakwe abalapile ukubwelelamo ku calo cabo. Cine fye, aya mabuuku yakomaila pa kuti Lesa alabelela uluse abalapila ku membu no kuleka babwelela kuli ena. (Habakuki 3:13; Sefania 2:2, 3) E co Mika alandile ukutila: “Ni uyani umulungu uwaba nga imwe? uulekelela amampuulu, uuleko bupulumushi pa bashalako ba cikwatwa cakwe. Tasaamiko mutima wakwe pe, pantu untu abekelwo luse.” (Mika 7:18; Yoele 2:13; Sekaria 1:4) Amasesemo yafikilishiwa kale e yalangilila ukuti aya mashiwi ya cine.

21. (a) Finshi bakasesema 12 balandilepo pali Mesia? (b) Masesemo nshi pali Mesia ayo mwatemwa?

²¹ Ilyo Yehova alelanda pa nshila yacindama nga nshi iya kwelela abantu umupwilapo, asobele ukwisa kwa kwa Mesia, uwali no kutuula ubumi bwa buntunse nge “cilubula icalinganako” pa mulandu wa bantu ababembu. (1 Timote 2:6) Amose asobele pa fyo Mesia, mwana Davidi ali no kuwamya ifintu. (Amose 9:11, 12; Imilimo 15:15-19) Mika ena alilandiile fye na libela uko Yesu ali no kufyalilwa, uwali no kwisapeela ubumi kuli bonse abali no kucetekela ilambo Lyakwe. (Mika 5:2) Sekaria na o wine alandile pa “Musambo,” e kutila Yesu, uwali no “[kwikala] pa cipuna cakwe ca bufumu no kuteka.” (Sekaria 3:8; 6:12, 13; Luka 1:32, 33) Icitetekelo cenu ukwabula no kutwishika cikakoselako nga nshi nga mulebebeta amasesemo ya musango yu na yambi.—Moneni akabokoshi kaletila “Amasesemo Ayakalamba Pali Mesia.”

22. Bushe icitetekelo cenu muli Yehova cikoshiwa shani ku fyo bakasesema 12 balanda pali ena?

²² Ilyo mulebelenga ubukombe bwa bakasesema 12, icitetekelo cenu mu kucimfya kwa kwa Lesa ukwa kulekeleshako cikakula. Yehova e ukatulwila, kabili ali no kulenga mu calo mukabe umulinganya. Icebo ca kwa Lesa ca muyayaya. Alebukisha ifyo apangana na bantu bakwe, alasakamana ababomfi bakwe, kabili alabapokolola ku bantu ba lufyengo bonse. (Mika 7:8-10; Sefania 2:6, 7) Yehova tayaluka. (Malaki 3:6) Ala, tulasansamuka pa kwishiba ukuti takwaba icingansha Lesa nangu icingamulesha ukufikilisha ifyo afwaya! Nga atila ubushiku bwakwe ubwa bupingushi bukesa, ninshi ni fyo fine bukesa. E ico, beni abalola ilyo mulelolela ubushiku bwa kwa Yehova! “Yehova akabe mfumu pano isonde ponse; muli ubo bushiku Yehova akaba umo, ne shina lyakwe limo.” (Sekaria 14:9) Ifi e fyo asobela; no kufikilisha ali no kufikilisha.

[Futunoti]

BUSHE ICITETEKELO CENU CAKOSHIWA SHANI

• pa mulandu wa maka ubwingi ayo Yehova akwata?—Yoele 1:15.

• pa mulandu wa mulinganya wa kwa Lesa?—Sekaria 8:23.

• pa mulandu wa bupilibulo bwe shina lya kwa Lesa?—Mika 5:4.

KUTI MWAKOSHA SHANI BUCIBUSA BWENU NA LESA

• nga muletontonkanya pa maka akwata aya kufikilisha ifilayo fyakwe?—Yoele 2:11.

• nga mwatontonkanya pa kutemwa kwakwe ukwafikapo?—Hosea 11:4; 14:4; Sefania 3:17.

• nga mwatontonkanya pa luse lwakwe ne fyo elela abantu?—Hosea 2:23; Mika 7:18.

[Akabokoshi pe bula 45]

YEHOVA WA MAKA YONSE

Ilumbo lya kuti Lesa mu ciHebere ni Shad·daiʹ, nangu “Uwa maka yonse.” Ili lumbo lisangwa fye umuku umo muli aya mabuuku 12 aya busesemo, lisangwa fye pali Yoele 1:15. Bamo batila ubupilibulo bwine bwine ubwa ili lumbo bwa kuti “kosa” nangu “shangila.” Ilumbo na limbi ilyaba nge li ilya kuti ‘Yehova wa milalo,’ lisangwa imiku 107 muli aya mabuuku 12. Amaka calola mu kuti ubukangalume nangu amaka ya kubomba umulimo alefwaya. Na kabili lyalola mu kuti ukupwisha ubwafya ubwaima nangu ubulwani. Ifi Yehova aba uwa maka yonse ninshi alikwata amaka ya kucita conse ico alefwaya, no kufikilisha ifyo alaya.

[Charti ne Cikope pe bula 55]

AMASESEMO AYAKALAMBA PALI MESIA

Ubusesemo Busangwa Pali Ukufikilishiwa

Ukwitwa ukufuma mu Egupti Hosea 11:1 Mateo 2:14, 15

1 Abena Korinti 15:3-8

[Icikope pe bula 48]

Umusumba wa Ninebe walemoneka kwati te kuti ucimfiwe, nomba bushe ubusesemo bwa kwa Yehova bwafikilishiwe shani?