Rahabu Alitetekele Yehova

Natutontonkanye ukuti tuli mu musumba wa Yeriko uwali mu calo ca Kanaani. Muli uyu musumba mwali abantu abashalepepa Yehova kabili e mwaleikala Rahabu.

Ilyo Rahabu ali umwaice, alyumfwile ifyo Mose apaatwile amenshi pali Bemba Wakashika no kufumya abena Israele mu Egupti. Na kabili alyumfwile ifyo Yehova ayafwile abena Israele ukucimfya abalwani babo mu nkondo. Lelo pali iyi nshita, Rahabu alyumfwile ukuti abena Israele bali fye mupepi no musumba wa Yeriko.

Bushiku bumo ninshi paya palefiita, abena Israele babili baingile mu Yeriko mu kulengula umusumba. Baile ku ng’anda ya kwa Rahabu kabili abebele ukuti bengile no kutuusha. Ubushiku, imfumu ya mu Yeriko bayebele ati abaume babili nabengila mu musumba kabili bali mu ng’anda ya kwa Rahabu. E co imfumu yatumine abaume ukuyabekata. Rahabu alifishile abaume babili pa mutenge wa ng’anda yakwe kabili aebele abaume abo imfumu yatumine ukuti: ‘Ca cine abaume bacisa kuno, lelo kale bafumine mu musumba. Nga mwabakonka nomba line mwalabasanga!’ Bushe walishiba icalengele Rahabu ukuti abafise? —Ni co alitetekele Yehova kabili alishibe ukuti Yehova aali no kupeela abena Israele icalo ca Kaanani.

Ilyo aba baume babili bashilafuma pa ng’anda ya kwa Rahabu, balimulaile ukuti ena no lupwa lwakwe tabakafwe ilyo umusumba wa Yeriko ukalaonaulwa. Bushe walishiba ifyo bamwebele ukucita?— Bamwebele ati: ‘Ukake iyi intambo yakashika pe windo. Nga wacita ifi ninshi iwe no lupwa lobe mukapusuka.’ Rahabu alicitile filya fine fye bamwebele. Bushe walishiba ifyaishilecitika?—

Ilyo papitile inshiku ishinono, abena Israele balitendeke ukushinguluka umusumba wa Yeriko mu mutalalila. Baleshinguluka umusumba umuku umo cila bushiku pa nshiku 6. Lelo pa bushiku bwalenga 7, bashingulwike umusumba imiku 7. Lyena balipundile sana. Yehova alengele ifibumba fya Yeriko ukubongoloka. Ing’anda iyashele fye ni ilya apali intambo yakashika iyo bakakiile pe windo! Bushe nauimona pa cikope?— Rahabu no lupwa lwakwe balipuswike!

Finshi twingasambilila kuli Rahabu?— Rahabu alitetekele Yehova pa mulandu wa kuti alisambilile ifintu ifisuma pali Yehova. Na iwe ulesambilila ifintu ifisuma pali Yehova. Bushe walitetekela Yehova nga filya Rahabu amutetekele?— Twalishiba ukuti walimutetekela!