ISAMBILILO 4
Alengele Bawishi E lyo na Yehova Babe ne Nsansa
Finshi Yefta alelaya Yehova?
Umwana wa kwa Yefta alicitile ifyo wishi alaile Yehova nangu ca kuti calyafishe
Bushe naumumona uyu mukashana pa cikope?— Mwana wa kwa Yefta. Baibolo tayatweba ishina lyakwe, lelo yalitweba ukuti alilengele wishi na Yehova baba ne nsansa. Natusambilile pali uyu mukashana e lyo na pali wishi, Yefta.
Yefta ali umuntu umusuma kabili ilingi line alesambilisha umwana wakwe pali Yehova. Na kabili ali umuntu uwa maka kabili intungulushi iisuma. E ico abena Israele bamwebele ukuti abatungulule pa kulwisha abalwani babo.
Yefta apepele kuli Lesa ukuti amwafwe ukucimfya abalwani babo. Yefta alaile ukuti nga acimfya abalwani, aali no kupeela Yehova umuntu uwali no kubalilapo ukufuma mu ng’anda yakwe ku ku mupokelela. Uyu muntu aali no kulaikala e lyo no kubombela pe hema mpaka ne mfwa. Ihema cali cifulo apo abantu balepepela Lesa. Caliweme pantu Yefta alicimfishe abalwani. Ilyo abwelele ku ng’anda, bushe nawishiba uwabalilepo ukumupokelela?—
Mwana wakwe umukashana. E mwana fye akwete nomba ali no kumupeela kuli Yehova. Ici calengele Yefta omfwe ububi. Lelo ibukisha ukuti Yefta alilaile Yehova. Ilyo line fye umwana wakwe atile: ‘Tata, mwalilaya kuli Yehova, kanshi citeni ifyo mwalandile.’
Cila mwaka, umwana wa kwa Yefta baleya mu kumutandalila ku banankwe
Umwana wa kwa Yefta na o alyumfwile ububi. Apo aali no kulabombela pe hema, taali no kuupwa kabili taali no kukwata abana. Lelo alefwaisha sana ukucita ifyo wishi alaile e lyo no kusekesha Yehova. Ukucita ifi kwali ukwacindama sana ukucila ukuupwa no kukwata abana. E co alifumine pa ng’anda no kuya mu kwikala pe hema mpaka ne mfwa.
Bushe ifyo acitile fyalengele wishi na Yehova babe ne nsansa?— Ee, alilengele baba ne nsansa. Nga waliba ne cumfwila kabili nga walitemwa Yehova nga filya umwana wa kwa Yefta acitile, na iwe ukalenga abafyashi bobe na Yehova bakabe ne nsansa sana.