Icilangililo Ca Babomfi Ba Mwi Bala Lya Myangashi

Yesu e lyo fye aebele abantu mu Perea ukuti “abengi aba ntanshi bakaba aba kulekelesha, na ba kulekelesha bakaba aba ntanshi.” (Mateo 19:30) Nomba pa kukomaila pali ici cishinka, Yesu abebele icilangililo ca babomfi ba mwi bala lya myangashi. Atile:

“Ubufumu bwa mu muulu bwaba kwati mwine we bala, uwafumine kacelocelo ku kufwaya ababomfi aba kubomba mwi bala lyakwe ilya myangashi. Ilyo aumfwene na babomfi ukuti aali no kubalipila denari umo pa bushiku bumo, abatumine mwi bala lyakwe ilya myangashi. Kabili ilyo afumine nalimo pe awala lyalenga butatu, amwene bambi abashakwete incito nabeminina pa maliketi; kabili abebele ati, ‘Na imwe bene kabiyeni mwi bala lya myangashi, kabili ndemupeela amalipilo ayalingile.’ Awe balile. Alifumine na kabili nalimo pe awala lyalenga 6 ne lyalenga 9 no kucita cimo cine. Pa kulekelesha, nalimo pe awala ilyalenga 11, alifumine no kusanga na bambi nabeminina, kabili abepwishe ati, ‘Nga cinshi mwiminine pano akasuba konse ukwabula incito?’ Bamwaswike abati, ‘Pantu tapali uwa kutwingisha incito.’ Na o abebele ati, ‘Na imwe bene kabiyeni mwi bala lya myangashi.’”—Mateo 20:1-7.

Abo Yesu aleshimikila icilangililo bafwile balishibe ukuti Yehova Lesa eo alelandapo ilyo alandile pa “Bufumu bwa mu muulu” na pa “mwine we bala.” Amalembo yatila Yehova e mwine we bala lya myangashi, ne li ibala, luko lwa bena Israele. (Amalumbo 80:8, 9; Esaya 5:3, 4) Apashenye abaali mu cipangano ce Funde ku babomfi ba mwi bala lya myangashi. Na lyo line, Yesu talelanda pa fyacitike ku kale, lelo alelanda pa fyalecitika ilyo ali pano calo.

Bashimapepo abaali nga baFarise abaipwishe Yesu icipusho pa kulekana pa kuti fye bamweshe, balitwalilile ukubombela Lesa. Baali nga balya ababomfi ababombele akasuba konse kabili abaali no kulipilwa denari imo.

Bashimapepo na bantu bambi abaali muli ili ibumba balemona abaYuda bamo kwati tabalebombela sana Lesa. Balebamona nga babomfi ba mwi bala lya myangashi ababombeele Lesa pa nshita fye iinono. Mu cilangililo ca kwa Yesu, aba baali nga baume abatendeke ukubomba pe “awala lyalenga butatu” (09:00 hrs) nelyo abatendeke ukubomba pe awala lyalenga 6, ilyalenga 9 ne lyalenga 11 (17:00 hrs).

Abaume na banakashi abalekonka Yesu balebamona nga ‘batiipwa.’ (Yohane 7:49) Ne calengele, ni co abengi baali balondo be sabi e lyo bambi balebomba imilimo iyasuulilwe. Lyena mu 29 C.E., “umwine we bala lya myangashi” atumine Yesu ku kwita aba bantu basuulilwe ukuti babe abasambi ba kwa Kristu pa kuti balebombela Lesa. Baali nga “bakulekelesha” abo Yesu atile batendeke ukubomba mwi bala lya myangashi pe awala lyalenga 11.

Pa kusondwelela ici icilangililo, Yesu alondolwele ifyacitike pa mpela ya ubu ubushiku. Atile: “Ilyo cali icungulo, umwine we bala lya myangashi aebele kapitao wakwe ati, ‘Ita ababomfi no kubalipila amalipilo yabo, ukutendekela pa ba kulekelesha no kwisafika pa ba ntanshi.’ Ilyo abatendeke ukubomba pe awala lyalenga 11 baishile, abapeele cila muntu denari umo. E ico ilyo aba ntanshi baishile, baletontonkanya ukuti alabapeela amalipilo ayengi; lelo na bo bene amalipilo abapeele ni denari umo. Awe ilyo bapokelele, batendeke ukuilishanya ku mwine we bala abati, ‘Aba abalekelesha babombele fye iawala limo; lelo mwabapeela shimo shine na ifwe, fwe babombeshe akasuba konse no kupya ku kasuba!’ Lelo ayaswike umo pali bena ati, ‘Mune, nshikulufyenye iyo. Bushe tatwacumfwana ati ndekulipila denari umo? Senda denari obe, kabiye. Ndefwaya ukupeela uyu uwa kulekelesha denari umo wine nga iwe. Bushe nshikwete insambu sha kucita ifyo ndefwaya ku fintu fyandi? Bushe napamo ni co waba ne linso ilibi e co wamfulilwa apo ine ndi muntu umusuma?’ E fyo na ba kulekelesha bakaba aba ntanshi, na ba ntanshi bakaba aba kulekelesha.”—Mateo 20:8-16.

Abasambi bafwile baletontonkanya pa mashiwi ya kulekelesha ayo Yesu alandile mu cilangililo. Bushe bashimapepo abaYuda abaleimona ukuti e ba “ntanshi” baishileba shani aba “kulekelesha”? Kabili bushe abasambi ba kwa Yesu baali no kuba shani aba “ntanshi”?

Abasambi ba kwa Yesu abo abaFarise na bantu bambi balemona ukuti e ba “kulekelesha,” baishileba aba “ntanshi” ukupoka amalipilo. Ilyo Yesu afwile, Lesa alikeene abena Israele, kabili asalile uluko ulupya ulwitwa ati, “Israele wa kwa Lesa.” (Abena Galatia 6:16; Mateo 23:38) Ulu uluko e lo Yohane Kabatisha alelandapo ilyo alandile pa baali no kubatishiwa no mupashi wa mushilo. Abaali aba “kulekelesha” baishileba aba ntanshi ilyo babatishiwe no mupashi wa mushilo kabili balipeelwe ishuko lya kuba inte sha kwa Yesu ukufika “ku mpela ya pano isonde.” (Imilimo 1:5, 8; Mateo 3:11) Abasambi nga balilwike ico Yesu alelandapo mu cilangililo, e lyo baali no kwishiba ukuti intungulushi sha mapepo, ishali isha “kulekelesha” shali no kulababacusha.