ICIPUSHO 6
Kuti Nacita Shani pa Kuti Nshilekonkelela Abanandi?
BUSHE KUTI WACITA SHANI?
Tontonkanya pali ici: Abalumendo babili abo Brian asambilila na bo baisa uko ali. Aumfwa na maka yapwa pantu mu mulungu fye umo balimupatikishapo ukuti apeepeko fwaka pa miku ibili, nomba alikeene. Uyu walaba muku walenga butatu.
Umulumendo wa kubalilapo atila:
“Na lelo uli fye weka? Bushe walimwishiba umunandi uyu naisa nankwe?”
Abala ashinisha umunankwe pa kulanda aya mashiwi, uku ninshi alefumya na fimo mwi tumba, atambika na Brian.
Brian amona ukuti ifili mu minwe ya uyu umulumendo ni fwaka, kabili aumfwa sana umwenso.
Brian akaana atila “Awe, nalikweba kale ukuti nshipeepa . . . ”
Umulumendo uo ali nankwe atila: “Niwe camwenso ayi!”
Brian ashipa atila: “Te ine camwenso!”
Lyena umulumendo umbi aikata Brian pa kubeya e lyo amweba mwi shiwi ilyanakilila ati, “Peepako fye na iwe.”
Umulumendo wa kubalilapo apalamika fwaka pa kanwa ka kwa Brian e lyo amutepelesha ati: “Tatwakebeko nangu umo. Tapali uukeshiba.”
Bushe nga cali niwe kuti wacita shani?
TALA TONTONKANYA!
Bushe aba balumendo babili nabeshiba ububi buli mu fyo balecita? Bushe balekonkelela fye abantu bambi nelyo bene baleipingwila ifya kucita? Nalimo iyo. Ilingi line icilenga balecita ifi, kukonkelela abanabo pa kuti fye baleumfwana nabo.
Bushe nga niwe ifya musango uyu fyacitikiile, kuti wakonkelela abanobe nelyo kuti wakaana?
ULEITEYANYA
Baibolo itila: “Uwasalapuka nga amona ububi alabelama, lelo imbulwa mano shena shiya fye no kukandwa.”—Amapinda 22:3.
Ilingi line kuti wailuka ukuti kwalaba ubwafya. Ku ca kumwenako: Nalimo kuti uleya mu nshila e lyo wamona ibumba lya bana be sukulu banobe balepeepa fwaka. Nga ca kuti nauiteyanya, kuti waishiba ifya kucita.
TONTONKANYA
Baibolo itila: “Kwateni kampingu musuma.”—1 Petro 3:16.
Yipushe auti, ‘Bushe mu kuya kwa nshita nkomfwa shani nga ca kuti ndekonkelela abanandi?’ Kwena ca cine pali ino nshita nga wakonkelela abanobe, kuti bakutemwa. Nomba bushe mu kuya kwa nshita ukalaumfwa shani? Bushe kuti watemwa ukukonkelela abana be sukulu banobe pa kuti fye bakutemwe?—Ukufuma 23:2.
SALAPO
Baibolo itila: “Uwa mano alatiina.”—Amapinda 14:16.
Mu fyo tusalapo ukucita mulafuma ifisuma nelyo ifibi. Baibolo yalilanda pa bantu bamo abasalile bwino ifya kucita pamo nga Yosefe, Yobo, na Yesu. Lyena yalilanda na pa bantu abashasalile bwino ifya kucita pamo nga Kaini, Esau, na Yuda. Inga iwe finshi ukasalapo ukucita?
Baibolo itila: “Ba uwa cishinka.” (Amalumbo 37:3) Nga ca kuti nautontonkanya pa fingacitika nga wacita icabipa kabili nausala ne fya kucita, ninshi te kuti cafye ukulanda ifyo ulefwaya cibe, kabili kuti waumfwa na bwino.
Taulingile ukusakamikwa ukuti ulingile ukulondolwela abanobe ifyebo ifingi. Kuti wakaana fye ukuti taulefwaya, kabili nga ulefwaya beshibe ukuti nangu cibe shani tawabakonkelele, nalimo kuti watila:
“Ine ifi nshifwaya!”
“Ine nshicitako ifya musango uyu!”
“Inga mwalaba shani bane, ine nshicitako ifyo!”
Pa kuti belakupatikisha, taufwile ukuwayawaya pa kwasuka kabili abanobe balingile ukumona ukuti nangu cibe shani tawasumine. Nga wacita ifyo, tapakakokole, abanobe bakaleka ukukupatikisha!
IFYA KUCITA NGA BALEKUPUMYA
Nga ca kuti ulekonkelela abanobe ukaba nge roboti ilyo batungulula fye
Inga ca kuti abanobe balekupumya? Inga ca kuti abanobe bakweba ati: “Ico wakanina ni co niwe camwenso.” Ufwile ukwishiba ukuti ifi fine e fyo abacaice bacita nga balefwaya abanabo balebakonkelela. Finshi ulingile ukucita? Kwaliba ifintu fibili ifyo wingacita.
Kuti wasumina fye ukuti ifyo balanda fya cine. (“Ca cine ndi no mwenso.” Lyena kuti wabeba ico uleumfwila umwenso.)
Kuti wakaana no kubalondolwela ico wakanina. (“Nalemona kwati walicenjela sana ica kuti te kuti upeepe fwaka.”)
Nga batwalilila, ulingile ukufumapo. Ufwile ukwibukisha ukuti nga wakokola ukufumapo nabo bakulaya balecilamo fye ukukupumya. Nga wafumapo ninshi ulebalanga ukuti teti bakwalule.
Ukulanda fye icishinka nangu ucite shani, abanobe bakalafwaya ulebakonkelela. Nomba walikwata insambu sha kulaitungulula. Ulingile ukubeba ifyo ushingacitako kabili ufwile ukulacita ifyo ulanda. Niwe ufwile ukusalapo nampo nga kubakonkelela nelyo iyo.—Yoshua 24:15.