Mulesekelamo mu Mulimo Mubomba

1-3. (a) Bushe abantu abengi bomfwa shani pa ncito babomba? (b) Mepusho nshi twalayasuka muli cino cipandwa?

ABANTU mwi sonde lyonse balabombesha pa kuti baleisakamana no kusunga indupwa shabo. Abengi tabatemwa incito babomba, kabili bamo balatiina ukuya ku ncito cila bushiku. Ifi nga e fyo caba na kuli imwe, finshi mulingile ukucita pa kuti mulesekelamo mu ncito mubomba? Finshi fingalenga mwatemwa incito mubomba?

² Yehova atweba ati: “Umuntu onse alingile ukulya no kunwa, no kusekelamo mu kubombesha kwakwe konse. Ubu e bupe bwa kwa Lesa.” (Lukala Milandu 3:13) Yehova atubumbile ukuti tulefwaya ukubomba. Afwaya tuletemwa imilimo tulebomba.—Belengeni Lukala Milandu 2:24; 5:18.

³ Nomba finshi fingalenga tulesekelamo mu milimo tubomba? Ni ncito nshi Abena Kristu bashilingile ukwingila? Finshi tufwile ukucita pa kuti twilabika fye amano ku kubomba incito lelo tulebika amano na ku kupepa Yehova? Kabili mulimo nshi uwacindamisha uo tulingile ukulabomba?

4, 5. Bushe Yehova amona shani ukubomba?

⁴ Yehova alitemwa ukubomba. Baibolo pa Ukutendeka 1:1 itila: “Pa kutendeka Lesa apangile umuulu e lyo ne sonde.” Ilyo Lesa apwishishe ukupanga isonde ne fintu fyonse ifyabamo, alandile ukuti fyonse ifyo abumbile ‘fyaliweme nga nshi.’ (Ukutendeka 1:31) Kabumba wesu alitemenwe ifyo apangile.—1 Timote 1:11.

⁵ Yehova acili alebomba. Yesu atile: “Tata acili alebomba.” (Yohane 5:17) Nangu ca kuti tatwaishiba fyonse ifisuma ifyo acita, twalishibako fimo. Yehova alasala abakalateka no Mwana wakwe Yesu Kristu mu Bufumu. (2 Abena Korinti 5:17) Na kabili Yehova alatungulula abantu no kubasakamana. Apo imbila nsuma ilabilwa mwi sonde lyonse, abantu abengi nga nshi baleishiba Yehova, kabili baleba ne subilo lya kwikala umuyayaya ilyo isonde likaba paradaise.—Yohane 6:44; Abena Roma 6:23.

6, 7. Bushe Yesu alemona shani ukubomba?

⁶ Yesu alitemwa ukubomba nga filya fine Wishi akutemwa. Ilyo ashilaisa pano calo, ‘alishibishe imilimo’ ilyo alebombela pamo na Lesa ukubumba ifintu fyonse mu muulu na pano calo. (Amapinda 8:22-31; Abena Kolose 1:15-17) Na lintu Yesu ali pano calo, alitwalilile ukubombesha. Ilyo ali umulumendo, alisambilile umulimo wa bukabasa, nalimo alepanga ifipuna na mayanda. Yesu alishibe bwino sana uyu mulimo ica kuti abantu bamwishibe ukuti ni “kabasa.”—Marko 6:3.

⁷ Lelo umulimo wacindamisha uo Yesu alebomba pano calo wa kubila imbila nsuma no kusambilisha abantu pali Yehova. Abombele uyu mulimo pa myaka itatu na hafu, kabili alebombesha, aletendeka ku macaca mpaka ubushiku. (Luka 21:37, 38; Yohane 3:2) Yesu aleenda intamfu iitali mu misebo iya lukungu alebila imbila nsuma ku bantu abengi nga nshi.—Luka 8:1.

8, 9. Finshi fyalengele Yesu alesekelamo mu mulimo alebomba?

⁸ Yesu alemona ukubomba umulimo wa kwa Lesa nge fya kulya. Uyu mulimo walelenga aleba na maka kabili walemukosha. Inshiku shimo Yesu alebombesha ica kuti talekwata ne nshita ya kulya. (Yohane 4:31-38) Alebomfya nshita yonse ku kusambilisha abantu pali Wishi. E mulandu wine aebele Yehova ati: “Ine nalimucindamika pano isonde, pantu nimpwisha umulimo uo mwampeele ukubomba.”—Yohane 17:4.

⁹ Ukwabula no kutwishika, Yehova na Yesu balabombesha kabili balasekelamo mu milimo babomba. Tufwaya ‘ukulapashanya Lesa,’ kabili tufwaya ‘ukulakonka sana mu ntampulo sha kwa Yesu.’ (Abena Efese 5:1; 1 Petro 2:21) E co tubombesesha mu milimo yonse iyo tubomba.

10, 11. Finshi fingalenga twayaluka mu fyo tumona incito tubomba?

¹⁰ Apo tuli bantu ba kwa Yehova, tulabombesha pa kuti tuleisakamana kabili tulesakamana ne ndupwa shesu. Tufwaya twatemwa incito tubomba, lelo cilafya ukuitemwa. Kanshi finshi tulingile ukucita nga tatusekelamo mu incito tubomba?

¹¹ Tulingile ukwaluka mu fyo tumona incito tubomba. Nalimo te kuti twalule ukwa kubombela ne nshita tubomba, lelo kuti twayaluka mu fyo tumona incito tubomba. Icingatwafwa ukwaluka kwishiba ifyo Yehova afwaya tulecita. Ku ca kumwenako: Yehova afwaya umutwe wa lupwa alebombesha pa kuti alepekanishisha aba mu lupwa lwakwe ifyo bakabila. Na kuba Baibolo itila umuntu uushisakamana aba mu lupwa lwakwe ‘alibipa ukucisha no ushatetekela.’ (1 Timote 5:8) Nga ca kuti muli mutwe wa lupwa, mulebombesha pa kuti mulesakamana ulupwa lwenu. Nampo nga mwalitemwa incito mubomba nelyo iyo, mwalishiba ukuti nga mulefwaila aba mu lupwa lwenu ifyo bakabila ninshi mulelenga Yehova alesekelela.

12. Busuma nshi bwaba mu kubombesha no kuba aba cishinka?

¹² Mulebombesha kabili muleba aba cishinka. Nga mulecita ifi mukalasekelela mu mulimo mubomba. (Amapinda 12:24; 22:29) Na kuba abamwingisha incito bakamucetekela. Abakalamba ba ncito balatemwa sana ababomfi ba cishinka pantu tabeba indalama, ifipe, kabili tabangala pa ncito. (Abena Efese 4:28) Ne cacindamisha, Yehova aleshiba nga mulebombesha kabili nga muli aba cishinka. Kuti mwaba na “kampingu umusuma” pantu ninshi namwishiba ukuti mulecita ifilelenga Lesa uo mwatemwa alesekelela.—AbaHebere 13:18; Abena Kolose 3:22-24.

13. Finshi fimbi fingacitika nga tuli aba cishinka pa ncito?

¹³ Mufwile ukwishiba ukuti nga muli ne mibele iisuma pa ncito, abantu bakalalumbanya Yehova. Uyu e mulandu na umbi uo tulingile ukutemenwa incito tubomba. (Tito 2:9, 10) Nga muli ne mibele iisuma nalimo uo mubomba nankwe kuti alafwaya ukusambilila Baibolo.—Belengeni Amapinda 27:11; 1 Petro 2:12.

14-16. Finshi tulingile ukutontonkanyapo ilyo tulesala incito ya kubomba?

¹⁴ Kwena Baibolo tayalanda incito isho Umwina Kristu alingile ukwingila ne sho ashilingile ukwingila. Lelo mu Baibolo mwaliba amashinte ya mafunde ayo twingabomfya pa kusala incito. (Amapinda 2:6) Kuti twabomfya amashinte ya mafunde ya mu Baibolo no kuyipusha amepusho yakonkapo.

¹⁵ Bushe iyi ncito ikalenga nkalecita ifyo Yehova ashifwaya? Natusambilila ifintu ifyo Yehova apata, pamo nga ukwiba no kubepa. (Ukufuma 20:4; Imilimo 15:29; Abena Efese 4:28; Ukusokolola 21:8) Kanshi tulingile ukuba abacenjela pa kuti tatulebomba incito iingalenga twafilwa ukukonka amafunde ya kwa Yehova.—Belengeni 1 Yohane 5:3.

¹⁶ Bushe iyi ncito ilatungilila ifyo Yehova ashifwaya? Ku ca kumwenako, kuti mwacita shani nga mwasanga incito ya kupokelela abantu pa kiliniki apo baponesha amafumo? Kwena tamuli ububi nangu bumo mu kubomba iyi incito. Nomba mwalishiba ifyo Yehova amona ukuponya ifumo. Kanshi nangu ca kuti te imwe muleponesha abantu amafumo, Yehova akalamumona ukuti na imwe bene namukumwako ku membu bacita.—Ukufuma 21:22-24.

17. Finshi fingatwafwa ukulasapo ukucita ifingalenga Lesa alasekelela?

¹⁷ Nga tulebomfya amashinte ya mafunde ya mu Baibolo kuti twaba nga abantu abo ilembo lya AbaHebere 5:14 lyalondolola ukuti, “abo ukupitila mu kubelesha balikwata amano aya kulekanya icalungama ne calubana.” Mulingile ukuyipusha amuti: ‘Bushe nga naingila iyi ncito, bambi bakapunwishiwa? Bushe iyi ncito ikalenga nkalesha umwina mwandi na bana no kuya ku calo cimbi mu kubomba? Bushe ifintu fikaba shani nga nabasha?’

18. Mulandu nshi cingafisha ukubika amano ku kupepa Yehova?

¹⁸ Muli shino “inshita ishayafya nga nshi,” kuti cayafya ukubika intanshi ukupepa Yehova. (2 Timote 3:1) Calyafya ukusanga incito no kuisunga. Tufwile ukulasakamana indupwa shesu, lelo twalishiba ukuti tulingile ukubika intanshi ukupepa kwesu. Tatulingile ukubika sana amano ku kunonka icuma. (1 Timote 6:9, 10) Kuti twacita shani pa kuti ‘twishibe bwino bwino ifyacilapo ukucindama,’ e lyo pa nshita imo ine tulefwaila ne ndupwa shesu ifyo shikabila?—Abena Filipi 1:10.

19. Bushe ukutetekela Yehova kuti kwatwafwa shani ukukanabika fye amano ku ncito tubomba?

¹⁹ Muletetekela Yehova no mutima wenu onse. (Belengeni Amapinda 3:5, 6.) Twalishiba ukuti Lesa alishiba ifyo tukabila kabili alatusakamana. (Amalumbo 37:25; 1 Petro 5:7) Icebo cakwe citweba aciti: “Mu mikalile yenu mwilatemwa indalama, lelo muteke imitima ku fintu ifyo mukwete. Pantu [Lesa] atila: ‘Nshakakushe nakalya nangu ukukulekelesha nakalya.’” (AbaHebere 13:5) Yehova tafwaya twaikalila fye ukusakamana pa fyo twakulasunga indupwa shesu. Pa miku iingi alilanga ukutila kuti apeela abantu bakwe ifyo bakabila. (Mateo 6:25-32) Te mulandu ne ncito tubomba, tulingile ukulaisambilisha Icebo ca kwa Lesa lyonse, ukulabila imbila nsuma, no kulasangwa ku kulongana.—Mateo 24:14; AbaHebere 10:24, 25.

20. Finshi tulingile ukucita pa kuti twangushe imikalile yesu?

²⁰ Amenso yenu yalelolesha fye pa cintu cimo. (Belengeni Mateo 6:22, 23.) Aya mashiwi yalola mu kuti mufwile ukwangusha imikalile pa kuti mulebika sana amano ku kubombela Yehova. Twalishiba ukuti tatulingile ukubika sana amano ku kukwata indalama, ku mikalile iisuma, nelyo ku fipe ifyo balepanga muno nshiku ukucila ukubika amano kuli bucibusa bwesu na Lesa. Nomba finshi fingatwafwa ukubika intanshi ifyacindamisha? Tuleesha na maka ukukanaba ne nkongole. Nga ca kuti mwalikwata inkongole, mufwile ukucitapo cimo pa kuti shicepeko nelyo kuti mwababwesesha shonse. Nga tatucenjele, nga twabika amano ku kufwaya ifyuma nalimo te kuti tulekwata amaka ne nshita iikalamba iya kupepa, iya kuisambilisha ne ya kubila imbila nsuma. Mu cifulo ca kufusha ifya kucita pa kuti tukwate ifyuma, tulingile ukusambilila ukuteka imitima ku fyo tukabila pamo nge “fya kulya ne fya kufwala.” (1 Timote 6:8) Te mulandu ne fyo imikalile yesu yaba, tufwile ukulaibeebeeta libili libili pa kuti twishibe ifyo twingacita pa kuti tulebombela sana Yehova.

21. Mulandu nshi tulingile ukusalila ifyo tufwile ukubika intanshi?

²¹ Mulebika intanshi ifyacindamisha. Tufwile ukulabomfya bwino inshita, amaka, ne fyuma fyesu. Nga tatucenjele, ifishacindamisha pamo nga amasambililo nelyo indalama, kuti fyalatupwila inshita. Yesu atile: “Intanshi mulefwaya ubufumu.” (Mateo 6:33) Ifyo tusalapo ukucita, ifyo twatemwa ukucita, ifyo tucita cila bushiku, ne fyo tupanga ukucita e filanga ifyo twabika intanshi.

22, 23. (a) Mulimo nshi uwacindamisha uo fwe Bena Kristu tulingile ukulabomba? (b) Finshi fingatwafwa ukulasekelamo mu mulimo tubomba?

²² Umulimo uwacindamisha uo twakwata, kubombela Yehova. Inshila imo iikalamba iyo tubombelamo Yehova, kubila imbila nsuma. (Mateo 24:14; 28:19, 20) Tufwile ukulabombesha mu mulimo wa kwa Yehova nga filya Yesu alebombesha. Bamo baliya ku kubombela uko ababila imbila nsuma bacepa. Bambi balasambilila ululimi lumbi pa kuti baleshimikila abalanda ulo lulimi. Mulelandako na bacitapo ifi twalandapo, kabili mulebepusha ifyo bacitile pa kuti bafikilishe ifyo balefwaya ukucita. Bakamweba ukuti baliba ne nsansa nga nshi ukucila ifyo bali kale.—Belengeni Amapinda 10:22.

²³ Muno nshiku, fwe bengi tulabomba amaawala ayengi nampo nga tubomba incito imo nelyo nga tubomba incito ishingi pa kuti tulepekanishisha indupwa shenu ifyo shikabila. Yehova alishiba ifyo mubombesha, kabili alatasha pa fyo tucita pa kuti tulesakamana ulupwa lwesu. Kanshi natulebombesha pa kuti tulepashanya Yehova na Yesu te mulandu ne ncito tubomba. Kabili natuleibukisha ukuti ukubombela Yehova no kubila imbila nsuma iya Bufumu bwa kwa Lesa e mulimo uwacindamisha. Uyu mulimo ulalenga tulesekelela nga nshi.