Ubumi bwa kwa Yesu no Butumikishi

Bafilwa Ukubika Yesu mu Citeyo

YESU aciba alesambilisha mwi tempele kabili e lyo fye aceba abalwani bakwe aba butotelo ifilangililo fitatu ifyo ifyasansalika ububifi bwabo. AbaFarise bafulwishiwa kabili bapandana amano ukumubika mu citeyo ukumulenga ukusose cintu icingamwikatisha. Bapekanya ipange no kutuma abasambi babo, na bena Herode, ku kwesha ukumulengo kuipununa.

“We Kasambilisha,” e fintu aba bantu basosa, “natwishibo kuti uli wa cine, kabili usambilishe nshila ya kwa Lesa mu cishinka, no kutiino muntu nangu umo; pantu tawaba na kapaatulula ka bantu. E ico utwebe, Uleti shani? Bushe catuwamino kutuule mituulo kuli Kaisare, nalimo ukukanatuula?”

Yesu tatumpikwe no kukopekwa. Aishibo kuti nga ca kuti asosa ukuti, ‘Iyo, tamuwamine nelyo calungama ukutuulo uyu mutuulo,’ aleba no mulandu wa busangu ukulwisha Roma. Nalyo line, nga asoso kuti, ‘Ee, mufwile ukutuulo uyu mutuulo,’ abaYuda, abapumya ukunakila kwabo kuli Roma, balemupata. E co ayasuko kuti: “Cinshi ico mulentunkila, mwe ba bumbimunda? Nangeni indalama ya mutuulo.”

Lintu bamutwalila imo, abepusho kuti: “Fya kwa ani icipasho ici ne cilembo ici?”

“Fya kwa Kaisare,” e fintu bayasuka.

“E ico peeleni ifya kwa Kaisare kuli Kaisare, ne fya kwa Lesa kuli Lesa.”

Cisuma, lintu aba bantu baumfwe ici casuko calamuka, bapapa. Kabili baya no kumusha eka.

Ukumona ukufilwa kwa baFarise ukusange icintu ica kulwisha Yesu, abaSaduke, abasoso kuti takwaba kubuuka, bamutununuka no kumwipusho kuti: “We Kasambilisha, Mose atile, Umuntu nga afwa imbula bana, munyina akapyane umukashi, no kufyalila munyina ubufyashi. Awe kuli ifwe kwali aba bwananyina abaume cinelubali. Kabili uwa ntanshi alyupile, no kufwa; kabili ico tali na bana, ashile umukashi kuli munyina. Ifyo fine no wa cibili, no wa citatu, ukufika pa wa cinelubali. Na pa numa ya bonse umwanakashi alifwile. E ico, mu kubuuka kwa bafwa bushe akabo mukashi wa kwa ani mu ba cinelubali? Pantu bonse balimukwete.”

Mu kwasuka Yesu atila: “Bushe te pali ici mwalubila, pa kubulaishiba amalembo, nangu maka ya kwa Lesa? Pantu ilyo babuuka ku bafwa, taboopa nangu kuufiwa, lelo bali nga bamalaika ba mu mulu. No lwa bafwa, ukuti babuushiwa: bushe tamwabelenga mwi buku lya kwa Mose, pa Cimpusa, ifyo Lesa asosele kuli wene, ati, Ni ne Lesa wa kwa Abrahamu, kabili Lesa wa kwa Isaki, kabili Lesa wa kwa Yakobo? Wene te Lesa wa bafwa, lelo wa ba mweo: mwalilubisha.”

Na kabili amabumba yapapushiwa ne casuko ca kwa Yesu. Nelyo fye bamo aba bakalemba basumina ukuti: “Mwe Kasambilisha, mwasose cisuma.”

Lintu abaFarise bamona ukuti Yesu atalaalika abaSaduke, baisa kuli wene mwi bumba limo. Ku kumwesha na kabili, umo uwa bene aipusho kuti: “We Kasambilisha, lifunde nshi ilikulu lya mu Malango?”

Yesu ayasuko kuti: “Lya ntanshi ni ili: Umfwa, we Israele, [Yehova] Lesa wesu [Yehova] umo; kabili uletemwa [Yehova] Lesa obe ku mutima obe onse, na ku mweo obe onse, na ku mano yobe yonse, na ku maka yobe yonse. Ilyakonkapo ni ili: Uletemwo mubiyo nga we mwine. Ifunde limbi ilyacisha aya takuli.” Na kuba, Yesu alundapo kuti: “Muli aya mafunde yabili e mwashintilila Amalango yonse na Bakasesema.”

“Mwe Kasambilisha! Mwasose cine,” e fyasumina kalemba. “Wene umo; kabili takuli umbi kano wene. Kabili ukumutemwa ku mutima onse, na ku mucetekanya onse, na ku maka yonse, no kutemwo munankwe ngo mwine, kwacilako kuli fyonse ifyaocewa fya musuma na malambo.”

Ukwiluko kuti kalemba ayasuka mu kulamuka, Yesu amwebo kuti: “Tauli kutali ku bufumu bwa kwa Lesa.”

Inshiku shitatu nomba—pa Mulungu, pali Cimo, na pali Cibili—Yesu alefunda mwi tempele. Abantu balikutike kuli wene no buseko, lelo intungulushi sha butotelo ishakalifiwa shilefwaya ukumwipaya. Mateo 22:15-40; Marko 12:13-34; Luka 20:20-40.

◆ Lipange nshi abaFarise bapekanya ku kubika Yesu mu citeyo, kabili cinshi cingafumamo nga ca kuti engasuko kuti ee nelyo iyo?

◆ Ni shani fintu Yesu afulunganya amesho ya baSaduke ku kumubika mu citeyo?

◆ Kwesha nshi na kabili kuntu abaFarise bapanga ku kwesha Yesu, kabili cinshi cafumamo?

◆ Mu kati ka butumikishi bwakwe ubwa kupelako mu Yerusalemu, ni nshiku shinga shintu Yesu asambilisha mwi tempele, kabili mu kuba na kwambukila nshi?