Ifyo Umupashi wa kwa Lesa Wingakusonga

“MU KUTENDEKA Lesa abumbile imyulu ne sonde. Isonde lyali ilyabulwamo akantu kabili ilya fye, ne mfifi yali pa mulu we tenga; kabili Umupashi wa kwa Lesa waleselasela pa mulu wa menshi.” (Ukutendeka 1:1, 2, Revised Standard Version) Ubu bulondoloshi bwa mu Malembo bwebekesha inshila yapulamo intu uuli onse uuli umumi amwenamo ukufuma ku mupashi wa mushilo. Uyo mupashi wali uubomba mu kati ka kubumba, kabili ca kutootela ku mibombele ya uko, isonde lyabele umushi wa kusekesha uwa mutundu wa muntu.

Lelo abantu kuti bamwenamo apakalamba ukufuma ku mupashi wa mushilo. Ipinda lyapuutwamo lisosa ukuti: “Bweleleni ku kwebaula kwandi, moneni, ndemupongolwelo mupashi wandi, ndelenge fyebo fyandi ukwishibwa kuli imwe.” (Amapinda 1:23) Mu kasuba kesu “ifyebo” fyalonganikwa ifya kwa Lesa fyalibako muli Baibolo wa Mushilo, ukulembwa na baume ‘abapuutilwemo no mupashi wa mushilo.’ (2 Petro 1:21; Marko 12:36; 2 Timote 3:16) Ilyo lyonse umuntu wafuuka abelenga Baibolo, alamwenamo ukufuma ku mupashi wa mushilo.

Umupashi wa Mushilo no Mulimo wa Kushimikila

Lintu umo uwa Nte sha kwa Yehova atandalila pa ŋanda yobe ukulanda pa lwa mbila nsuma iya Bufumu, umupashi wa mushilo kuti wasonga ubumi bobe mu nshila imbi. Twaishiba shani? Cisuma, lintu Yesu Kristu atendeke ukushimikila imbila nsuma, abomfeshe ku mwine amashiwi ya kwa kasesema Esaya, ukusosa ukuti: “Umupashi wa kwa Yehova waba pali ine, pa kuti ansubile ku kubile mbila nsuma ku balanda, . . . ku kubilisho mwaka wa luse lwa kwa Yehova.” (Luka 4:18, 19, NW; Esaya 61:1, 2) Ee, Yesu alisubilwe no mupashi wa mushilo ku kushimikila imbila nsuma.

Mu kulundapo, Yesu asobele ukuti ukushimikila kwa mbila nsuma kwali no kutwalilila pa numa ya mfwa yakwe. Aseseme ukuti: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Inshita iipi pa ntanshi Yesu talanina ukuya ku mulu, apeele abakonshi bakwe uyu mulimo: “Kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya [mupashi] wa mushilo: mulebasambilisha ukubaka fyonse ifyo namwebele.” (Mateo 28:19, 20) Pa numa ya kunina kwa kwa Kristu ukuya ku mulu, kanshi, abasambi bakwe batwalilila umulimo wasuminishiwa no mupashi uwa kushimikila no kusambilisha. Inte sha kwa Yehova ilelo bapashanya abo basambi ba mu kubangilila mu kushimikila imbila nsuma mu kusaalala kwa calo.

Ulubatisho no Mupashi wa Mushilo

Lintu umuntu umo aankula bwino ku mbila nsuma, Yesu asosele ukuti alingile ukubatishiwa “mwi shina lya kwa Tata ne lya Mwana ne lya [mupashi] wa mushilo.” E co abasambi abapya balasongwa mu kulundapo ku mupashi wa mushilo. Inumbwilo “mwi shina lya” mu cine cine ipilibula “ku kusuminisha kwa” nelyo “ukwishiba icifulo ca.”a E ico, ukubatishiwa mwi shina lya kwa Tata kupilibula ukupokelela ukwabulo kutwishika bumulopwe bwa kwa Lesa mu bumi bwesu. Ukubatishiwa mwi shina lya Mwana kupilibula ukupokelela Yesu pamo nga Kalubula, ica Kumwenako, ne Mfumu. Kabili ukubatishiwa mwi shina lya mupashi wa mushilo kusanshamo ukushintilila pa mupashi no kunakila ku maka ya uko.b

Umupashi wa Mushilo mu Bumi Bobe

Ku ca bulanda, ukubulwo bufumacumi, bucisenene, ulukaakala, no kubulwe funde kwa cinkumbawile ifyo tumona mu fyalo fya “Bwina Kristu” fipusana ne cishinka ca kuti abengi aba abo baitunga ukuba Abena Kristu mu cituntulu balacincintila umupashi wa mushilo. Lelo abo abanakila kuli wene balapaalwa apakalamba. Ku cintu cimo, babuula mu kukatama cintu babelenga muli Baibolo yapuutwamo no mupashi no kubomfya cene mu bumi bwabo. Muli fyo, balikwata amano, ukushilimuka, ubupingushi, ukucenjela, ukwishiba, na maka ya kutontonkanya. (Amapinda 1:1-4) Ifi fyaba fibombelo fyacindama mu nshita shesu ishacushiwa.

Umupashi wa mushilo na kabili ulaafwa abantu umo umo aba musango yo ukucimfya impika shayafya. Mu nshita sha pa kale, Lesa alangile abantu bakwe ifyo bali na maka ya kupwishishisha umulimo wayafya. Yehova asosele ukuti wali no kucitwa “te ku bulamba, kabili te ku maka, kano ku [mupashi wakwe].” (Sekaria 4:6) Nga ca kuti twainashisha kuli Lesa no mupashi wakwe, na ifwe bene tukafwiwa ukupwishishisha imilimo no kucimfya ifipindami ifyo pambi fingaba ifikalamba kuli ifwe.—Mateo 6:33; Abena Filipi 4:13.

Mu kulundapo, umupashi wa kwa Lesa ulatwaafwa ukuipakisha ubuntungwa ubushaishibikwa ku calo mu cinkumbawile. Umutumwa Paulo alembele ukuti: “Ukuli [umupashi] wa kwa [Yehova, NW], e kuli ubuntungwa.” (2 Abena Korinti 3:17) Abo abanakila ku mupashi wa kwa Lesa balaipakisha ubuntungwa ukufuma ku butotelo bwa bufi, ukutiine mipashi, umwenso wa nshita ya ku ntanshi, ne fya kusangwilako fimbi ifingi ifiteka ubusha. Umupashi wa kwa Lesa mu cine cine waba maka ayalosha ku busuma! Kuti waalula fye na bantu. Baibolo ikumya pali ici lintu isosa ukuti: “Ifisabo fya [mupashi] kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima; takuli mbela ya kupinkana na bacite fi.” (Abena Galatia 5:22, 23) Ifyo ici calo cingapusanako nga ca kuti uuli onse ainashishe ku kusonga kwa mupashi wa kwa Lesa!

Pamo nge bumba, Abena Kristu bene bene na kabili balaipakisha “buumo bwa [mupashi] mu cikakilo ca mutende.” (Abena Efese 4:3) Ukwikatana no mutende fyaba fisabo fishimonaika ilelo. Lelo filabako uko umupashi wa kwa Lesa ubomba. Mu cine cine, pa kati ka Nte sha kwa Yehova icikakilo ca kwikatanya ica mupashi wa mushilo calileta abantu ba mishobo yonse, indimi, ne nko mu ‘kubishanya kwa bumunyina’ ukwine kwine.—1 Petro 2:17.

Umupashi wa kwa Lesa na Iwe

Bushe ulamona ukumwenamo kwa kukwata amano yapeelwa na Lesa na ya kuipakisha ubuntungwa bwa cine? Bushe te kuti cibe ica kupapusha ukukwata ukwaafwa kwa bulesa mu kupikulula impika no kulundulula ukutemwa, ukusekelela, umutende, ukutekanya, icongwe, ubusuma, icishinka, ukunakilila, no kuteko mutima? Lyene inashishe ku maka ya mupashi wa kwa Lesa. Lelo ni shani fintu umuntu engacita ici?

Leka Icebo ca kwa Lesa, Baibolo, cisonge umuntontonkanya obe no mutima. Bishanya na abo abasuminisha umupashi wa mushilo ukusonga ubumi bwabo. Buula intampulo nomba ku kusambilila no kucita ukufwaya kwa bulesa. Lyene, “Lesa . . . esushe muli imwe ukusekelela konse no mutende onse mu kutetekela kwenu, ukuti mube abafulisho kucetekela ku maka ya [mupashi] wa mushilo.”—Abena Roma 15:13.

Baibolo yapuutilwemo no mupashi wa kwa Lesa

Umupashi wa kwa Lesa ulafwilisha umulimo wa kushimikila Ubufumu

Kuti twapepela umupashi wa kwa Lesa

Umupashi wa mushilo ulabapo lintu Abena Kristu balongana ku mifwaile ya ku mupashi

[Amafutunoti]