Yehova—“Umusalifi ku Bulwi”

ABA maka baipangasha aba mu mulalo wa bena Egupti balilofiwe. Muli Bemba Wakashika, imibili ya bensha amaceleta ne ya ba pali ba kabalwe yalepooswa ku matamba, ne fibombelo fya bulwi fyasafishe ululamba. Ukutungululwa na Mose, abaume ba kwa Israele basekelele mu lwimbo lwa kucimfya: “Ndeimbila Yehova, ico napulama apakalamba; kabalwe no watentemapo nabapoosa muli bemba. Yehova musalifi ku bulwi: Yehova e shina lyakwe.”—Ukufuma 15:1, 3.

Ukucimfya kwa kwa Yehova pali Bemba Wakashika kwali mu cituntulu kulangilila kwa bukulu bwakwe mu bulwi. Israele aali nasha Egupti uwaipangasha mu bulwi lelo mu kuba na maka yanono aya kulwa. Ku ntumba ye kumbi iyo yaleba intumba ya mulilo ubushiku, Yehova aali nabatungulula ukufuma ku Ramesese ukufika “ku mpela ya matololo” pa Etamu. (Ukufuma 12:37; 13:18, 20-22) Lyene Yehova asosele kuli Mose ati: “Eba abana ba kwa Israele ukuti babwele no kucite nkambi ku cinso ca Pihahirote pa kati ka Migidole na bemba, ku cinso ca Baali-sefone. . . . Farao aleebo lwa bana ba kwa Israele, ati, Bene nabafundauka mu calo, . . . no kuleka asupile ku numa yabo.” (Ukufuma 14:1-4) Mu cumfwila, Israele alyalulwike no kwenda ukuya ku Pihahirote. Inengu sha kwa Farao shacitile lipoti icalemoneka ukufundauka, kabili nga fintu casobelwe, Farao alonganike umulalo wakwe ku kusupila.—Ukufuma 14:5-9.

Iciteyo—Kuli Israele Nelyo Kuli Farao?

Abapindililwa ku mpili mu mbali, bemba ku ntanshi, na bena Egupti ku numa, abena Israele batiinishiwa bamoneke ukwikatwa, e co balilile kuli Lesa ku kwaafwa. Ukulonganika abantu, Mose asosele ukuti: “Mwitiina, iminineni ndi, no kumono kupususha kwa kwa Yehoba, uko alecita kuli imwe lelo; pantu ifyo mwamona abena Egupti lelo, tamwakabwekeshepo ukubamona kabili umuyayaya. Yehova alemulwila, na imwe mutalale.” (Ukufuma 14:10-14) Ukulingana no bo bulayo, “intumba ye kumbi yafumine ku ntanshi yabo no kuyaiminina ku numa yabo; aingile pa kati ka nkambi ya bena Egupti ne nkambi ya bena Israele; . . . no yo tapalamine kuli uyo ubushiku bonse.”—Ukufuma 14:15-20.

Nga fintu Yehova akambishe, Mose apamine inkonto yakwe pali bemba no “kumwakanya pa kati” pa kuti abena Israele bengafyuka. Kabili icipapwa ca fipapwa calicitike! (Ukufuma 14:16, 21) Umwela wakosa ukufuma ku kabanga watendeke ukwakanya amenshi ya pali Bemba Wakashika, ukupanga impito iyapabuka ukulinga uluko lonse—amamilioni yatatu—ukupita abaipangasha ku bulwi. Ku kuso na ku kulyo kwa mulongo wa bena Israele, amenshi “yatikama” yaiminine ukupala ifibumba fikalamba fibili.—Ukufuma 15:8.

Abena Israele, ukwafwilishiwa no lubuuto ukufuma ku ntumba ya mulilo, bafyukile pa mushili waumikwe no mwela. Ukufika ku lucelo, uwa kulekelesha uwa bena Israele aali naibuka bushilya bwa bemba. “Abena Egupti balisupiile, no kwingila balebakonka mu kati ka bemba, bakabalwe bonse ba kwa Farao, amaceleta yakwe, na ba pali bakabalwe bakwe.” Aba kusupila babutukile mu citeyo!—Ukufuma 14:23.

“[Yehova afulungenyo] mulalo wa bena Egupti. Kabili akakile imipeto ya maceleta yabo, no kuleka bayakumbe no bwafya.” Mose nomba atambike ukuboko kwakwe pali bemba, na “bemba abweleele kuli bucishawasha.” Ifibumba fya menshi fyalibongolweke no kutendeka ukufimbilikisha abena Egupti. Baeseshe ukufulumuka, “e lyo Yehova [abakuntiile] mu kati ka bemba.” Tapali uwapusunswike! Mu kwanga abena Israele baimbile ulwimbo lwabo ulwa kucimfya kuli Yehova.—Ukufuma 14:24–15:3; Ilumbo 106:11.

Yehova Alwila Yoshua

Yehova ashininkishe ukuba “umusalifi ku bulwi” mu mbuli shimbi. Bumo bwali bulwi pa Ai. Ukusansa kwa kubalilapo pa musumba kwalifililwe pa mulandu wa ncitilo yabipisha iya kwa Akani. Lintu uyu mulandu walungikwe, Yehova apeele amakambisho ya bulwi kuli Yoshua.—Yoshua 7:1, 4, 5, 11-26; 8:1, 2.

Ukumfwila amakambisho ya kwa Yehova, inshita ya bushiku Yoshua alilalilile ku numa ya musumba, ku masamba ya uko. Umulalo wakwe uukalamba waseshiwe ku kapinda ka ku kuso ku mukonko ku nse fye ya Ai kabili wamoneke uwaipekanya ku kusansa kwa ku ntanshi. Abaume ba ku Ai baliketwe mu citeyo. Ilyo bacili abasamwa mu kutunguluka kwabo ukwa kusansa kwa ku numa, balikwankwenye ukuconcomoka ukufuma mu musumba ukulwisha abena Israele. Ukubepekesha ukubwelela ku numa, abena Israele bafulumukile “mu nshila ya ku matololo,” ukukulila abalwani ukutaluka ukufuma ku Ai.—Yoshua 8:3-17.

Pa nshita fye iyalinga, Yehova asosele kuli Yoshua ati: “Tambika akafumo akali mu minwe yobe, losha ku musumba; pantu ndeupeela mu minwe yobe.” Pali ici cishibilo, abaume balalilile basanshile umusumba, ukuupama ku lupanga no kuoca ku mulilo. Ukumona icushi, umulalo wa balwani ku nse walibongolwelwe umupwilapo. Yoshua, ukwalukila ku kusansa, aikete umulwani pa kati ka milalo ibili. Ukucimfya kwa buntu? Iyo. Abena Israele bacimfishe pa mulandu wa kuti, nga fintu Yoshua pa numa asosele kuli bene ukuti: “Yehova Lesa wenu e walemulwila.”—Yoshua 8:18-27; 23:3.

Ubulwi pa Kishone

Ubukalamba bwa kwa Yehova mu bulwi na kabili bwalilangishiwe pa Mukuku wa Kishone, mupepi na Megido. Imfumu ya bena Kanaani Yabini yacitile Israele ulumanimani pa myaka 20. Umulalo wakwe, pe samba lya kutungulula kwa kwa Sisera, wasanshishemo amaceleta ya nkondo 900 ne cela mu mipeto ya yako—mu kumonekesha umulalo ushingacimfiwa muli shilya nshiku.—Abapingushi 4:1-3.

Nangu ni fyo, ukupitila muli kasesema mwanakashi Debora, Yehova aitile Umupingushi Baraki ukulonganika abaume ba bulwi amakana ikumi pa mulu wa Lupili lwa Tabore ku kusonsomba imilalo ya kwa Yabini. Sisera mu kwangufyanya alikalifiwe kuli uku kufusha kwa mulalo, ukukwankwanya ukufuma ku Haroshete ukuya ku mumana wa mukuku uwa Kishone, pa kati ka Lupili lwa Tabore na Megido. Ukwabulo kutwishika apelulwile ukuti pano pa mushili wabatama, abashilika ba kwa Israele aba pa nshi abashaipangasha bwino tabali na kukwata ishuko ukulwisha amaceleta yakwe. Tatontonkenye, nangula ni fyo, pa lwa kulwisha Umulwani wa mu mulu.—Abapingushi 4:4-7, 12, 13.

Yehova akambishe Baraki ukusela ukufuma mu mitentemuko yacingililwa iya Tabore ukuya mu mawanga ya mukuku, ukucebusha imilalo ya kwa Sisera mu bulwi. Lyene Yehova alipamine! Mulamba wa mu kupumikisha wayalwile impanga ya bulwi mu lutikiti lwa busanso, ukupasa imilalo ya kwa Sisera. Mu cimfulumfulu cakonkelepo, abashilika ba kwa Israele aba pa nshi mu kwanguka bacimfishe abalwani babo umupwilapo. “Kabili umulalo onse wa kwa Sisera wawilile ku kanwa ka lupanga; takwasheleko nangu umo.” Amenshi yapooswa aya Kishone yatikishe amaceleta ya bena Kanaani kabili pambi yakukulwile ifitumbi fimo.—Abapingushi 4:14-16; 5:20, 21.

Ukucimfya Ukulwisha Goge ne Bumba Lyakwe

Ifi ifya kuponako fyapayanye ukumwena libela ukwa kucimfya kwa kwa Yehova ukukalamba ukuli no kwisa. Ubuleshininda pa cifutu ca calo buli bulwi ubo bukacitika “pa numa ya myaka.” Ukulingana no busesemo bwa kwa Esekiele, Goge, icishibisho ca kwa “kateka wa pano isonde,” Satana Ciwa, akalonganika umulalo wa kwingilila uwa pa kati ka nko. Akalungatika imilalo yakwe ku kusansa “impili sha kwa Israele” isha mampalanya, uko e kuti, impanga yasumbulwa iya ku mupashi iya Bena Kristu “Israele wa kwa Lesa.”—Esekiele 38:1-9; Yohane 12:31; Abena Galatia 6:16.

Cinshi catunka Goge ukucita uku kusansa pa bantu ba kwa Lesa? Ubusesemo busonta ku mibele yabo iya mutende, iya lubanda lwa ku mupashi. E fisosa Goge ati: “Nkaninine calo ca mishi ya cansale, nkaila ababa tondolo abaikalo mutelelwe bonse bene, abaikala umushabe linga, kabili umupindo na makooma tabakwata. Ukapango kutape ca kutapa no kusampe ca kusampa . . . [ica] bantu . . . abamone fitekwa ne fyuma.”—Esekiele 38:10-12.

Mu cinkumbawile, abantu ba kwa Yehova tababa na fyuma mu nshila ya ku mubili. Nangu cibe fyo, baliletako ifyuma fya ku mupashi ifyapaka nge ca kufumamo ca mulimo wabo uwa kushimikila uwa mu kusaalala kwa calo. “Ibumba likalamba . . . [ukufuma] ku luko lonse” lyalilonganikwa, nomba ililefika mu mpendwa ukucila pa mamilioni yane. (Ukusokolola 7:9, 10) Icuma mu cine cine! Satana—uwakalifiwa kuli ulu lubanda lwa ku mupashi—esha ukulofya abantu ba kwa Lesa.

Lelo pa kwisa pa calo ca kwa Israele ica mampalanya, Goge, asansa, mupepi na Yehova Lesa umwine. “Icipyu candi cikema mu myona yandi,” e fyasosa Yehova, uukalandwila abantu bakwe. Imilalo ya kwa Goge ikasunguluka mu cimfulumfulu. “Lukasuke ulupanga lwa muntu wakwe onse lube muli munyina.” Yehova lyene akalekelako amaka yakwe aya konaula—“ne mfula iisansantika na mabwe ya citalawe, umulilo na mabwe ya mingu.” Kwati ni pali Bemba Wakashika, Ai, na Kishone, Yehova na kabili akalwila abantu bakwe no kushisha ishina lyakwe. “Nkaikusha no kuishisha no kuilengo kwishibwa ku menso ya nko ishingi; e lyo shikeshibo kuti ni ne Yehova.”—Esekiele 38:18-23.

Icalembwa cakatama ica lyashi lya kale ica mbuli sha kwa Yehova mu nshita sha pa kale citupeela umulandu wa kucetekela umupwilapo muli uku kucimfya kwa nshita ya ku ntanshi mu kati ka “bucushi bukalamba.” (Mateo 24:21, 22) Lyonse ukuba mu kulama, Yehova kuti atontonkanya ukucila abalwani bakwe no kuteulwila imibele kwi pusukilo lya bantu bakwe. Mu cine cine, cikashininkisha nga fintu Esaya aseseme ukuti: “Yehova afuma nge mpalume, abuusho kucincila kwakwe ngo muntu wa bulwi; awelesha, cene, abilikisha, acita bumpalume pa balwani bakwe.” (Esaya 42:13) Mu menso ya Nte shakwe, ku ciyayaya conse akaba YEHOVA, “UMUSALIFI KU BULWI”!—Ukufuma 15:3.

[Mapu pe bula 25]

(Nga mulefwaya ukumona mapu, moneni muli magazini)

Inshila ya Ukufuma mu Egupti

GOSHENE

Memfisi

Ramesese

Sukote

Migidole

Pihahirote

Etamu

[Ifikope pe bula 26]

Pano, mu ncende ya Ai, Yehova atungulwile Yoshua na bantu Bakwe no kucimfya kwa kusungusha

Amenshi ya Kishone yaimine mu kwangufyanya, ukusangwila ku kucimfiwa kwa balwani ba kwa Yehova

[Abatusuminishe]

Photos: Pictorial Archive (Near Eastern History) Est.