Bakabilisha ba Bufumu Bacita Lipoti

Impaanga sha kwa Yesu Shakutika kwi Shiwi Lyakwe

ILYO umulimo wa kushimikila uletanunukila ku mbali shonse ishe sonde, Yehova ukupitila muli bamalaika bakwe alatungulula ababomfi bakwe ku bapale mpaanga. Balomfwa ishiwi lya kwa Yesu no kusambilila ukumubombela mu kuba no bumi bwa ciyayaya mu cilolwa. Yesu asosele pali Yohane 10:27, 28, ukuti: “Impaanga shandi shumfwe shiwi lyandi, na ine nalishiishiba, na sho shilankonka; na ine mpeela kuli shene umweo wa muyayaya.” Moneni fintu aba mitima ya bufumacumi mu Madagascar baumfwile kwi shiwi lya kwa Yesu.

Umo uwa Nte sha kwa Yehova apeele amakope ya fitabo fya Kuti Waikala Kuli Pe na pe muli Paradise Pe Sonde na Ubwaice Bobe—Ukukwatilamo Ifyawamisha kuli shiŋanga wa fya cipatala uwaishile mu kubebeta wishi uwalwele.

Dokota aali muProtestanti kabili uwakukaanya apakalamba ku Nte, lelo alibelengele icitabo no kubebeta amalembo muli Baibolo wakwe wine. Umukashi wakwe, Katolika kabili pa nshita imo ine dokota, abelengele icitabo ca Ubwaice imiku iingi pantu atile camoneke kwati fye calembelwe wene. Ubulondoloshi bwa Sosaite ubwashimpwa pali Baibolo ubwa bucindami bwa 1914 bwaebekeshe bonse babili. Umulume atununwike Inte uwamupeele ifitabo. Nte umupeele Life—How Did It Get Here? By Evolution or by Creation? kabili atantike ukutandalila wene no mukashi ku kwasuka ifipusho fyabo. Lintu abatandalile, atendeke isambililo lya lyonse ilya Baibolo na aba baupana babili na bana babo batatu. Ukulunduluka mu kumfwikisha Baibolo kwalyangufyenye.

Pa numa ye sambililo lya kubalilapo, ulupwa lonse lwatendeke ukusangwa ku kulongana pa Ŋanda ya Bufumu kabili mu kwangufyanya pa numa ya ico lwalembeshe mwi Sukulu lya Butumikishi bwa Teokratiki. Imyendele ya bana yaliwamineko apakalamba. Ukufuma kwi sambililo lyabo ilya Baibolo, basambilile ukuti ukusefya kwa nshiku sha kufyalwa na maholide yambi aya butotelo tafyali fya Bwina Kristu; na muli ifyo, balilekele ukufibaka. Umulume alikeene ukupeela umulopa ku muntu wakwe, nangu cingati umutwe wali ucili taulalandwapo mwi sambililo lya Baibolo. Mu kwangufyanya uniformu iya karate yalilekele ukumoneka mu wardrobe yakwe; alitumine ku wakubila kukubililamo ifya kufwala fya bana bakwe. Alyocele bamagazini bakwe bonse ne fitabo fya kulengwilako utushita. Imyeshi fye itatu pa numa ya kutendeka ukusambilila, bonse babili umulume no mukashi balilekele ukuya ku macalici yabo umo umo no kulumbulula ukufwaisha kwabo ku kwakana mu mulimo wa kushimikila. Nomba balibatishiwa.

◻ Umwanakashi mu Thailand alefwayafwaya icine. Nangu cingati aali muBuddha, tabalile aipeelesha ku butotelo bwakwe pantu alimwene ubumbimunda bwacishamo no bufunushi. Pa mbali ya ico, kwaliko imyata yalekanalekana iyo asangile ukuba iya makankamike. Alitendelwe ulwa conse ica fyene.

Lyene, umwina mupalamano atashishe ukuti eshe Abena Kristu kabili alimusendele kwi calici lya Pentecostal. Mu kati ka mapepo, nangu cibe ifyo, umwanakashi alikwete ukufwaisha kwakosa ukwa kufumamo no kuya ku ŋanda pa mulandu wa congo, ilyo bonse abasangilweko balepepa mu kuba ne congo capongomoka. Uyo wali e muku wa kupelako uyo asangilwe kuli lilya icalici.

Pa numa, aeseshe icalici lya ciRoma Katolika. Nangu cibe fyo, pa numa ya kusangwako imiku yafulilako, na kabili amwene ulwa bumbimunda no bufunushi, capamo no musango wa bumi ubwa kucibondola ubwa kwa shimapepo. Abele uwaselaushiwa no kuleka ukuyako. Shimapepo afwaishe ukwishibo mulandu umwanakashi ailile. Pa numa ya kwishiba umulandu, asosele mu nshila ya kusenteka ukuti: “Nga ulefwaisha ukuilunda ku bantu bakoshe ifunde mu cine cine, kabiye ku Nte sha kwa Yehova.” Umwanakashi aipwishe ukuti: “Baba kwi?” Shimapepo ayankwileko ukuti: “Bapalama ku cikuulwa cisakamana ukupayanya kwa menshi.” Ubushiku bwakonkelepo alibafwaile ukwabula ukubasanga. Mu kulengwe nsoni, nangula ni fyo atontonkenye lyonse ulwa Nte sha kwa Yehova.

Kasuba kamo aumfwile umo uwa bena mupalamano bakwe alesosa kuli umbi mu kusenteka ukuti: “Mu kwangufyanya ukaba umo uwa Nte sha kwa Yehova!” Pa kumfwa fye fyo, umwanakashi abutukileko ku mwina mupalamano no kwipusha ukuti: “Bushe kwalibako Inte sha kwa Yehova kuno mupepi?” “Ee,” e cali icasuko. “Bamo balaisa mu bwina mupalamano mu kushimikila ukufuma ku ŋanda ne ŋanda. Ulebeshibila ku mifwalile yabo iya busaka kabili iyapempenkana.” Apo pene fye alibutwike ukuya mu kubafwaya. Mu kubalilapo tabasangile, lelo lintu alebwelela ku ŋanda ku mwakwe, amwene abanakashi babili abafwele mu kupempenkana balelanshanya no muntu umo. Alibatununwike no kubepusha nga ca kuti bali ni Nte sha kwa Yehova. Lintu basosele ukuti bali ni Nte, apaapeete ukuti: “Napaapaata mwise ku mwandi. Ndefwaya ukulanda na imwe.”

Isambililo lya Baibolo lyalitendeke, kabili ukwabula ukusakamana ukukaanya no kupumya ukufuma ku filundwa fya lupwa, uyu mwanakashi alitendeka ukusangwa ku kulongana no kucitilo bunte ku bantu bakwe.

Yesu mu cine cine alishiba impaanga shakwe kabili aleshilonganika mu kuteyanya kwakwe ku kupusunsuka ukwingila mu calo cakwe icipya ica bulungami.