Ulupungu lwa kwa Kalinda na Loleni!—Bamagazini ba pa Nshita Yalinga Abakwate Cine

“Mwandubula, mwe Yehova, Lesa wa cishinka.”—ILUMBO 31:5.

1, 2. (a) Ni shani fintu nkashi umo ayumfwile pa lwa cintu abelengele mu Ulupungu lwa kwa Kalinda? (b) Fipusho nshi fipushiwa pa lwa bamagazini besu?

“NAMUTASHA nga nshi,” e fyalembele nkashi wa Bwina Kristu umo, “pa fyebo fyawamisha mu cipande ca Ulupungu lwa kwa Kalinda icaleti ‘Kuti Wasanga Ukusansamusha mu Nshita ya Kumanama.’a Ifishinka ifingi ifyo mwalandilepo fyali fye e kuyumfwa nali no kubomba na ko; cili kwati ici cipande calembelwe ine mu kulungatika. Umuku wa kubalilapo nabelengele cene, ifilamba fyaiswile mu menso yandi. Cili icawamisha ukwiluko kuti umbi alishiba ifyo njumfwa! Ndi uwa kutasha apakalamba pa kuba umo uwa Nte sha kwa Yehova. Ni kwi kumbi twingasanga amalayo ya bumi bwa muyayaya muli Paradise mu nshita ya ku ntanshi iipaleme, kabili, pali ino nshita ukusansamusha ku myeo yesu! Namutasha. Namutashe cibi.”

² Bushe walitala auyumfwapo muli iyo nshila? Bushe calitala acumfwikapo kuli iwe ukuti icintu cimo mu Ulupungu lwa kwa Kalinda nelyo magazini munankwe, uwa Loleni!, calembelwe iwe ukucilisha? Fintu nshi pa lwa bamagazini besu ificebusha imitima ya bantu? Ni shani fintu twingaafwa bambi ukunonkelamo ukufuma mu bukombe bwa kupususho bumi ubwaba muli bene?—1 Timote 4:16.

Bamagazini Abo Abafwilishe Cine

 3. Ni ku milandu nshi iisuma uko bamagazini ba Ulupungu lwa kwa Kalinda na Loleni! bayambukila imitima ya bakabelenga abengi?

³ Yehova ni “Lesa wa cishinka.” (Ilumbo 31:5) Icebo cakwe, Baibolo, citabo cakwate cine. (Yohane 17:17) Abantu ba mitima ya bufumacumi balankula ku cine. (Linganyeniko Yohane 4:23, 24.) Umulandu umo Ulupungu lwa kwa Kalinda na Loleni! fyayambukila imitima ya mamilioni ya bakabelenga uli wa kuti ni bamagazini bakwata bumpomfu ne cine. Na kuba, cali ni pa mulandu wa fikansa fya bucishinka ku cine ca Baibolo epo Ulupungu lwa kwa Kalinda lwatendekele ukusabankanishiwa.

4, 5. (a) Mibele nshi yalengele C. T. Russell ukusabankanya Watch Tower? (b) Ni shani fintu magazini wa Ulupungu lwa kwa Kalinda abomfiwa no “musha wa cishinka kabili uwashilimuka”?

⁴ Mu 1876, Charles T. Russell aishiletendeka ukubishanya na Nelson H. Barbour, uwa ku Rochester, New York. Russell apayenye indalama sha kubukulula ukupulintwa kwa magazini wa butotelo Herald of the Morning, mu kuba na Barbour nga kalemba wa iko umukalamba na Russell nga kaafwa kuli kalemba. Mupepi no mwaka umo na citika pa numa, nangu cibe fyo, muli Herald uwafumine uwa August 1878, Barbour alembele icipande icakeene umutengo wa kulubula uwa mfwa ya kwa Kristu. Russell, uwacepeleko pali Barbour mupepi ne myaka 30, ayankwileko mu kuba ne cipande mu wafumine uwakonkelepo uwasumbwile icilubula, ico alosesheko nga “cimo ica fisambilisho fyacilapo ukukatama ifya Cebo ca kwa Lesa.” (Mateo 20:28) Pa numa ya kubombesha kwa kubwekeshabwekeshapo ku kupelulushanya na Barbour mu Malembo, Russell mu kupelako apingwilepo ukuputulako ukulundana konse na Herald. Ukutendeka no wafumine uwa June 1879 uwa ulya magazini, ishina lya kwa Russell talyalemoneka na kabili nga kaafwa kuli kalemba. Umweshi umo pa numa, Russell wa myaka ya bukulu 27 atendeke ukusabankanya Zion’s Watch Tower and Herald of Christ’s Presence (iyaishibikwa nomba nga Ulupungu lwa kwa Kalinda Ulusabankanya Ubufumu bwa kwa Yehova), iyo ukutula pa kutendeka yasumbula icine ca mu Malembo, pamo nge cilubula.

⁵ Pa myaka yapitapo 114, Ulupungu lwa kwa Kalinda, ukupala loya walamuka, lwaliimika ulwine ngo lucingilila icine ca Baibolo ne cifundisho. Mu kupita kwa nshita, lwalinonka ukucetekela kwa mamilioni ya bakabelenga batasha. Na nomba lucili lulafwilisha icilubula na maka. (Ku ca kumwenako, moneni ulwafumine ulwa February 15, 1991.) Kabili lwatwalilila ukuba icibombelo cikalamba ica “musha wa cishinka kabili uwashilimuka” ne Bumba lyakwe Ilitungulula ku kubilisha Ubufumu bwa kwa Yehova ubwaimikwa no kwananya ica kulya ca ku mupashi “mu nshita iyene.”—Mateo 24:14, 45.

6, 7. Mifwaile nshi iyalondolwelwe iya The Golden Age, kabili cinshi cilangisha ukuti abantu batontonkanya balyankwile ku bukombe bwa iko?

⁶ Ni shani pa lwa magazini wa Loleni!? Ukutula pa kutendeka kwakwe, Loleni! na o wine alyafwilisha icine. Uwaleitwa mu kutendekelako The Golden Age, uyu magazini apangilwe ku kwananishiwa ku cintubwingi. Ukulosha ku mifwaile yakwe, uwafumine uwa kubalilapo, uwa October 1, 1919, alondolwele ukuti: “Imifwaile ya uko ili kulondolola mu lubuuto lwa mano ya Bulesa ubupilibulo bwa cine ubwa finjelengwe ifya kasuba ka nomba no kushininkisha ku mintontonkanya ipelulula ukupitila mu bushininkisho bushingatwishikwa kabili ubwa kushinina ukuti inshita ya kupaalwa kwakulilako ukwa mutundu wa muntu nomba naipalama.” Abantu abapelulula balyankwileko ku bukombe bwa The Golden Age. Pa myaka yafulilako, ukwananishiwa kwa uko kwali ukwakulilako apakalamba ukucila kulya ukwa Ulupungu lwa kwa Kalinda.b

⁷ Nangu cibe fyo, ukucebusha kwa Ulupungu lwa kwa Kalinda na Loleni! kwalicila pa cishinka ca kuti basabankanya fye icifundisho ca cine no kulondolola ubupilibulo bwa mu busesemo ubwa mibele ya calo. Bamagazini besu balicebusha imitima ya bantu pa mulandu na umbi maka maka pe kumi lya myaka ilyapita nelyo amakumi ya myaka ayapitapo yabili.

Ifipande fya pa Nshita Yalinga Fyaambukila Ubumi bwa Bantu

 8. Kuteuluka nshi mu kulemba Yuda acitile, ukucincisha bakabelenga bakwe ukucincintila ukusonga nshi mu kati na nkati ka cilonganino?

⁸ Mupepi ne myaka 30 pa numa ya mfwa no kubuushiwa kwa kwa Yesu Kristu, kalemba wa Baibolo Yuda alolenkene ne mibele ya kusonsomba. Abantu ba bucisenene, aba mitima ya bunama balisokelele mu kati ka Bena Kristu. Yuda apangile ukulembela Abena Kristu banankwe pa lwa mulandu wa cifundisho—ipusukilo ilyo Abena Kristu basubwa bakwata mu cinkumbawile. Mu cifulo ca ico, ukutungululwa no mupashi wa mushilo, acisangile icafwaikwa ukucincisha bakabelenga bakwe ukucincintila ukusonga kwa kubosha mu kati ka cilonganino. (Yuda 3, 4, 19-23) Yuda aiteulwilile ku mibele no kupayanya ukufunda kwa pa nshita yalinga ukwalingene no kukabila kwa bamunyina ba Bwina Kristu.

 9. Cinshi cabimbwamo mu kupayanya ifipande fya pa nshita yalinga ifya muli bamagazini besu?

⁹ Mu kupalako, ukupekanya ifipande fya pa nshita yalinga muli bamagazini besu cishingamo ca kusonsomba. Inshita shilaaluka, kabili na bantu bene—ukukabila kwabo ne fintu batemwa te fintu fyali nelyo fye imyaka ikumi nelyo amakumi yabili iyapitapo. Kangalila wenda mu nshita sha nomba line alandilepo ukuti: “Lintu nasangwike Inte ku numa muli ba1950, imitununukile mu kusambilila Baibolo na bantu mu kutendekelako yaleba pa cifundisho—ukubasambilisha icine pa lwa Bulesa Butatu, umulilo wa helo, umweo, na fimbipo. Lelo ino nshita, cilemoneka kwati, kuli impika ishingi nga nshi na mafya mu bumi bwa bantu ica kuti tuli no kubasambilisha ifya kwikala ubumi bwabo.” Mulandu nshi cibelele fi?

10. Mulandu nshi cishilingile ukutupapusha ukuti kwaliba ukubotelela kwa panono panono mu milandu ya buntunse ukutula 1914?

¹⁰ Ukukuma ku “nshiku sha kulekelesha,” Baibolo yasobele ati: “Abantu babifi kabili abafutika bakalundulukila ku kubipo kucila, abalufya kabili abalufiwa.” (2 Timote 3:1, 13) Muli ifyo, tacilingile ukutupapusha ukuti kwaliba ukubotelela kwa panono panono mu milandu ya buntunse ukutula apo inshita ya mpela yatendekele mu 1914. Satana, uo inshita yakwe iisheleko ili iyaipipisha ukucila na kale lyonse, alefumisha ubukali bwakwe pali sosaite wa buntunse ukucila na kale lyonse. (Ukusokolola 12:9, 12) Nge ca kufumamo, imibele ne fyakatamikwa fya lupwa fili ifyapusanininako ukufuma ku fintu fyali imyaka fye 30 nelyo 40 iyapitapo. Abantu mu cinkumbawile tabalemenena ku butotelo nga fintu baali amakumi ya myaka ayapitapo. Imisoka ili iyafulisha nga nshi ica kuti abantu bakwete inshila sha kuicingililamo ishishaishibikwe imyaka fye 20 nelyo 30 iyapitapo.—Mateo 24:12.

11. (a) Misango nshi iya mitwe ya malyashi yaba mu mintontonkanya ya bantu, kabili ni shani ibumba lya musha wa cishinka kabili uwashilimuka lyaankulako ku kukabila? (b) Peela ica kumwenako ca cipande ca mu Ulupungu lwa kwa Kalinda nelyo Loleni! icayambukilo bumi bobe.

¹¹ Te ca kupapa, lyene, ukuti imilandu ya mu nkuntu, iya kwangalila capamo, ne ya lupwa ili mu mintontonkanya ya bantu abengi. Ibumba lya musha wa cishinka kabili uwashilimuka lyalyankulako ukwabulo mwenso mu Ulupungu lwa kwa Kalinda na Loleni! pa kusabankanya ifipande fya pa nshita yalinga ifyo fyabomba no kukabila kwine kwine ukwa bantu kabili uko mu cine cine ukwaambukila ubumi bwabo. Langulukeni ifya kumwenapo fimo.

12. (a) Mulandu nshi ifipande pa lwa ndupwa sha bafyashi baba beka fyapekanishiwilwe mu Ulupungu lwa kwa Kalinda mu 1981? (b) Ni shani fintu nkashi umo alumbulwile ukutasha kwakwe pa fipande pa lwa ndupwa sha bafyashi baba beka?

¹² Imilandu ya lupwa: Lintu amalipoti ya mu kusaalala kwa calo yalangishe ukwingilishiwako kwa lubilo lubilo mu mpendwa ya ndupwa sha mufyashi umo, ifipande fya musango upya pa mutwe “Indupwa sha Bafyashi Baba Beka—Ukushomboka ne Mpika” fyalipekanishiwe mu lwafumine ulwa March 15, 1981, Ulupungu lwa kwa Kalinda. Ifipande fyakwete imifwaile ya minkubili: (1) ukwaafwa abafyashi baba beka ifya kubomba ne mpika shaibela isho balolenkana na sho na (2) ukwaafwa bambi ukwishiba bwino pa kuti bengaba ‘abalangulukilako’ kabili “ukupempule” ndupwa sha bafyashi baba beka mu cine cine. (1 Petro 3:8; Yakobo 1:27) Bakabelenga abengi balilembele ku kulumbulula ukutasha kwabo pa fipande. “Mu cine cine caletele ifilamba mu menso yandi lintu namwene inkupo,” e fyalembele umufyashi umo uwaba eka, “kabili lintu nakupukwile magazini no kubelenga ifyebo, umutima wandi wasempawikemo ukutasha kuli Yehova pa kupayanya ifyebo fya musango yu pa nshita fyalekabilwa.”

13. Kulandapo nshi ukwashika pa lwa kupopomenwa ukwasabankanishiwe muli Loleni! mu 1983, kabili cinshi kabelenga umo asosele pa lwa kwene?

¹³ Imilandu ya mu nkuntu. Umutwe wa kupopomenwa walilanshanishiwapo mu Ulupungu lwa kwa Kalinda na Loleni! ukutula muli ba1960. (1 Abena Tesalonika 5:14) Lelo ukulanguluka kupya kabili ukwashininkishiwa pa lwa uyu mutwe kwalicitilwe mu kukonkana kwa “Kuti Walwisha Icintefwila!” (Ukupopomenwa) muli Loleni! wa March 8, 1983. Amakalata ya kutasha mu kwangufyanya yalipongolokele mu Watch Tower Society ukufuma icalo conse. “Kuti nalumbulula shani mu kulemba ukuyumfwa kwa mutima wandi?” e fyalembele nkashi umo. “Ndi ne myaka ya bukulu 24, kabili pa myaka yapitapo ikumi, nalikwata ifiputulwa fya nshita ifingi ifya kupopomenwa. Lelo nomba ndeyumfwa uwapalamina kuli Yehova kabili ndi uwa kutasha ukuti alyankula ku kukabila kwa bapopomenwa mu kuba ne fi fipande fyabamo ukutemwa, kabili nafwaile ukumwebe fyo.”

14, 15. (a) Ni shani fintu umulandu wa kucenda abana wabombelwapo muli bamagazini besu? (b) Fipande nshi ifya bamagazini ifyacincimwishe uwa mu fyangalo fya kutentema pali bakabalwe?

¹⁴ Imilandu ya kwangalila capamo. Baibolo yasobele ukuti mu “nshiku sha kulekelesha” abantu baali no kuba “abaitemwa, . . . abaumalala, . . . ababulo kuiteka, abankalwe; . . . abashatemwa busuma.” (2 Timote 3:1-3) Kanshi, tacilingile ukutupapusha ukuti ukucenda abana kulacitwa pa cipimo cakulisha ilelo. Uyu mutwe walilanshanishiwepo ukwabulo kulamba mu cipande “Ukwaafwa ku Finakabupalu fya Kulaalana kwa pa Lupwa” mu Ulupungu lwa kwa Kalinda ulwa April 1, 1984. Imyaka cinelubali pa numa, ifipande fyakonkana “Ukundape Filaso fya Kucenda Abana” muli Loleni! wa October 8, 1991, fyalipekanishiwe mu kusakamanishisha ku kupayanya ukumfwikisha ne subilo ku finakabupalu pamo pene no kubuutusha bambi pa kuti bengapeela ukwaafwa kwa kutungilila. Ifi fipande fyakonkana fyaleteleko ukwankulako kwakulisha ukufuma kuli bakabelenga ukushatala akubako mu lyashi lya kale lyonse ilya bamagazini besu. Kabelenga umo alembele ati: “Ukwebekesha kwakulisha pa kupuupuutuka kwandi kwaba matontonkanyo ya kusansamusha no kuloshako kwa mu Malembo ifyaba muli ifi fipande. Ukwishiba ukuti Yehova talanguluka ine ngo wa fye kwali kwiluluka kwakulisha. Ukwishiba ukuti nshali neka kwali ukwa kusansamusha na ko kwine.”

¹⁵ Uwa mu fyangalo fya kutentema pali bakabalwe mu Melbourne, Australia, atumine foni kwi ofesi lya Watch Tower Society ilya mu Sydney intamfu yalepa, ukulumbulula ukukalifiwa kwakwe ku fyashingulukako ku fyangalo fya kutentema pali bakabalwe. Atile e lintu fye abelengele Loleni! wa March 8, 1993, pa lwa “Ubucende bwa Kwikata Kama—Ica Kukumanya ca Kutiinya ica Mwanakashi” kabili alifililwe ukusumino kuti magazini wa mutengo ifi e ko aba. Aipwishe ifipusho pa maminiti mupepi na 30 kabili alicincimushiwe pa fyasuko fyapeelwe.

16. Ni mu nshila nshi wingalangilila ukutasha kobe pali bamagazini besu?

¹⁶ Ni shani pa lwa iwe? Bushe ubumi bonse bwalyambukilwako ku cipande ca mu kulungatika icasabankanishiwe mu Ulupungu lwa kwa Kalinda nelyo Loleni! Nga ni fyo, ukwabulo kutwishika walikwata itontonkanyo lyashika ilya kutasha pali bamagazini besu. Ni shani fintu wingalangisha ukutesekesha kobe? Mu kushininkisha ukupitila mu kubelenga uufuma umo na umo we mwine. Na kabili kuti wayakana mu kupeela aba bamagazini baumo mutengo ukwananishiwa kwacilishapo ukusaalala. Ni shani fintu ici cingacitwa?

Akana Bene na Bambi!

17. Cinshi ifilonganino fingacita ku kwingilishako ukwananya bamagazini?

¹⁷ Ica kubalilapo, kuli icintu cimo ico icilonganino cimo na cimo cingacita. Informant (nomba iili Ubutumikishi Bwesu Ubwa Bufumu) iyafumine iya October 1952 yatile: “Inshila yacilapo ukufumamo cimo iya kwananishishamo bamagazini yaba kufuma ku ŋanda ne ŋanda na kwi tuuka ne tuuka. E co Sosaite itasha ukuti ishi nshila sha kwananishishamo bamagazini shileba ulubali lwa lyonse ulwa mibombele ya Bushiku bwa Magazini.” Uko kupanda amano kucili kulabomba ilelo. Ifilonganino kuti pambi fyatantika Ubushiku bwa Magazini ubwa lyonse, ubushiku bwabikwa pa mbali maka maka ku kucito bunte bwa magazini. Ku filonganino ifingi, Ifibelushi fyasontwa ukwabulo kutwishika fikaba ni nshita shisuma. Ee, lekeni icilonganino cimo na cimo cimike pa mbali inshiku shaibela nelyo ifyungulo bushiku ku kucito bunte bwa magazini—ukufuma ku ŋanda ne ŋanda, ukufuma kwi tuuka ne tuuka, mu mulimo wa mu musebo, na mu mpito sha magazini. Ukulundapo, cinshi iwe, pamo nga kasabankanya wa Bufumu, wingacita ku kwaafwa ukwingilishako ukwananishiwa kwa magazini?

18, 19. (a) Ni shani fintu ukuba uwaibukila ulwa Ulupungu lwa kwa Kalinda na Loleni! kwingakwaafwa ukushalika bamagazini? (b) Busuma nshi ubwa mipeelele iipi, iya kufika fye pa cishinka pa kutambika bamagazini? (c) Cinshi cilangisha umutengo wa kulenga bamagazini ukwingila mu mayanda ya bantu?

¹⁸ Ukuba uwaibukila pa lwa “Ulupungu lwa kwa Kalinda” na “Loleni!” e lutampulo lwa kubalilapo. Belengela kabela bamagazini. Ilyo ulebelenga icipande cimo na cimo, ipushe we mwine auti, ‘Ni kuli ani ici cipande cingaba ica kulengo buseko?’ Tontonkanya ulwa mashiwi wingasosa ku kubalamuna ubuseko mu cipande. Pa mbali ya kwafwilisha Ubushiku bwa Magazini ubwa lyonse, mulandu nshi te kusendelako amakope yamo pa kuti wingashukila ishuko lya mu nshita ilili lyonse ukwakana bene na bambi—pa bulendo nelyo pa kushita na lintu ulelanda na babomfi banobe, abena mupalamano, ifibusa fya pa sukulu, nelyo bakafundisha?

¹⁹ Ba ne mipeelele iyaanguka e mitubululo yalenga bubili. Watchtower iya December 1, 1956, yalondolwele ukuti: “Imipeelele iipi, iya kufika fye pa cishinka e yawamisha lintu uletambika bamagazini. Ubufwayo buli kushalika amakope ayafulilako. ‘Yakalaisosela’ ayene.” Bakasabankanya bamo balicisanga ukuba ica kufumamo cimo ukusoobolamo imfundo imo ukufuma mu cipande, ukuibika mu mashiwi yanono, no kutambika bamagazini. Lintu bapokelelwa mu ŋanda, bamagazini abene kuti “balanda” kuli bambi ukulunda pa muntu uwabapokelele ukufuma kuli iwe. Mu Ireland umusambi wacaice uwa pa universiti abelengele Ulupungu lwa kwa Kalinda ulwafumine ulwa September 1, 1991, ulo wishi aali napokelela ukufuma ku Nte. Ifipande pa lwa kumfwana ne mitwe imbi fyabalamwine ubuseko bwakwe. Mu kwangufyanya fye lintu abelengele uyu magazini, atumine Inte foni, ukutumina ku nambala yatantikwe mu citabo ca manambala ya foni. Isambililo lya Baibolo lyalitampilwe, kabili uyu mukashana alibatishiwe pe Bungano lya Citungu ilya “Ukusambilisha kwa Bulesa” mu July 1993. Mu kushininkisha, lekeni tulenge bamagazini ukufika mu mayanda, umo “bengalanda” ku bantu! Kangalila wenda umo apeele imitubululo na imbi yaanguka ati: “Fumya bamagazini mu cola cobe ica fitabo.” Mu cine cine, nga ca kuti ico wasosa tacimishe ubuseko bwa kwa mwine ŋanda, lyene nakalimo icikope cabo ica kucebusha ica pa nkupo cikakushalikilako bamagazini.

20, 21. (a) Ni shani fintu wingaba uwakondenkana lintu uleakana mu mulimo wa magazini? (b) Cinshi pambi wingacita pa kushalika bamagazini bafulilako cila mweshi?

²⁰ Imitubululo yalenga butatu ili ya kuba uwakondenkana. (Linganyako 1 Abena Korinti 9:19-23.) Pekanya imipeelele iipi. Kwata icipande cimo mu muntontonkanya ico cikaba ica kucebusha ku baume, cimbi ku banakashi. Ku misepela kuti pambi walangisha icipande ca “Abacaice Bepusha Ukuti . . .” Ba uwakondenkana, na kabili, ukukuma ku lintu wakana mu mulimo wa magazini. Mu kulunda ku Bushiku bwa Magazini, kuti pambi wasanga ukuti ukucitilo bunte kwa mu cungulo bushiku kulapeela ishuko lya mu nshita ilishaiwamina ku kutambika bamagazini ukufuma ku ŋanda ne ŋanda.

²¹ Imitubululo yalenga bune ili kwimika ubuyo bwa pa lobe. Ica mu kati icaletila “Bamagazini Basonta ku Nshila ya ku Bumi,” icamoneke mu Ubutumikishi Bwesu Ubwa Bufumu ubwa May 1984, calondolwele ukuti: “Pamo nge mitubululo, bakasabankanya kuti pambi bakwata ubuyo bwa, tutile, bamagazini 10 pa mweshi, ukushintilila pa mibele yabo; bapainiya balingile ukutukutila 90. Kwena, bakasabankanya bamo kuti pambi baba na maka ya kushalika bamagazini bafulilako, pa mweshi na muli ifyo bakemika ubuyo bwa pa lwabo ubwasumbuka. Nangu cibe fyo, pa mulandu wa butuntulu bwabipa, umusango wa cifulo, nelyo imilandu imbi iisuma, ubuyo bwa bambi kuti pambi bwaba ubwacepako. Lelo umulimo wabo kuli Yehova ucili fye uwacindama. (Mat. 13:23; Luka 21:3, 4) Icintu cacindama ca kukwata ubuyo bwa pa lobe.”

22. Ni mu nshila nshi twingalangishisha ukuti twaliba aba kutasha kuli Yehova pali aba bamagazini ba pa nshita yalinga abakwate cine?

²² Fintu tuli aba kutasha ukuti Yehova, “Lesa wa cishinka,” alibomfya ibumba lya musha wa cishinka kabili uwashilimuka ne Bumba lyakwe Ilitungulula ku kutupayanishisha aba bamagazini ba pa nshita yalinga! (Ilumbo 31:5) Ilyo lyonse cili kufwaya kwa kwa Yehova, aba bamagazini bakatwalilila ukubomba no kukabila kwine kwine ukwa bantu. Bakatwalilila ukwikatilila ifishinte fya kwa Yehova ifyasumbuka ifya mibele isuma. Tabakaleke ukusumbula icifundisho ca cine. Kabili bakakoselela mu kupeela ukusakamana ku kufikilishiwa kwa busesemo ubo bwishibisha inshiku shesu nge nshita lintu Ubufumu bwa kwa Lesa buleteka no kufwaya kwa kwa Lesa kulecitwa pano nse ukucila na kale lyonse ku mpendwa ileingilishiwako iya bakapepa ba cine aba kwa Yehova. (Mateo 6:10; Ukusokolola 11:15) Mwandi cuma caumisho mutengo ico twakwata mu Ulupungu lwa kwa Kalinda na Loleni! Lekeni tushukile ishuko lya mu nshita ilili lyonse ukwakana na ba mitima yafuuka aba bamagazini bakatama abambukila ubumi bwa bantu no kutwala pa ntanshi icine ca Bufumu.

[Amafutunoti]

Cinshi Cili Icasuko Cobe?

◻ Cinshi cilanga ukuti Ulupungu lwa kwa Kalinda na Loleni! ni bamagazini bakwate cine?

◻ Ni shani fintu Ulupungu lwa kwa Kalinda na Loleni! fyaambukila ubumi bwa bantu?

◻ Cinshi ifilonganino fingacita ku kwingilishako ukwananya bamagazini?

◻ Mitubululo nshi ingakwafwa ukushalika bamagazini bafulilako?

[Akabokoshi pe bula 22]

Ifipande Fimo Ifyo Fyaambukila Ubumi bwa Bantu

Pa myaka yapita bakabelenga abengi balilemba ku kulumbulula ukutasha pa fipande fya kulungatika ifyasabankanishiwe mu Ulupungu lwa kwa Kalinda na Loleni! Pe samba patantikwe imitwe inono ukufuma pa yafulisha iyaambukile bakabelenga besu. Bushe ifi fipande nelyo fimbi fyalyalula ubumi bobe?

Ulupungu lwa kwa Kalinda

“Pokelelo Kwaafwa kwa kwa Lesa pa Kucimfya Ifilubo fya mu Bumfisolo” (April 15, 1985)

“Ukubelesha Ukuipeelesha kwa Bukapepa Ukulola ku Bafyashi Bakalamba” (June 1, 1987)

“Amasomo mu Kuba ne Mifwaile” (November 1, 1992)

Loleni!

“Kuti Walwisha Icintefwila!” (March 8, 1983)

“Ilyo Untu Watemwa Afwa . . . ” (November 8, 1986)

“Cingilileni Abana Benu!” (October 8, 1993)

[Icikope pe bula 23]

Mu Canada—ukushimikila ku ŋanda ne ŋanda mu kuba na bamagazini

[Icikope pe bula 24]

Mu Myanmar—ukutambika bamagazini abasonta ku nshila ya bumi