Bushe Ulingile Ukupepa Kuli Yesu?

ABANTU bamo balanguluka ukuti caliba fye bwino ukupepa kuli Yesu. Mu Germany abengi ku bwaice basambilishiwa ukuti ilyo bashilalya ica kulya balingile ukuleme minwe no kutasha Yesu Kristu.

Ukulingana na Baibolo, Yesu mu cituntulu akwata icifulo casumbuka sana mu muulu. Nangu cibe fyo, bushe ico cipilibula ukuti tulingile ukupepa kuli wene? Nakalimo nobe waba pa kati ka abo abalungatika amapepo yabo kuli Yesu, pa mulandu wa kumutemwa, lelo bushe cinshi Yesu umwine atontonkanya pa lwa mapepo ya musango yo?

Ica kubalilapo, mulandu nshi ifi fipusho fyaiminako no kwima? Pantu Baibolo itila Yehova Lesa aba ni “Komfwa we pepo.” Tacaba ca kupapa nangu panono, lyene, ukuti ababomfi ba kwa Lesa mu nshita sha pa kale, pamo nga bena Israele, bapepele fye kuli Yehova Lesa, Uwa maka yonse.—Ilumbo 5:1, 2; 65:2, NW.

Bushe ifintu fyalyalwike lintu Yesu, Umwana wa kwa Lesa, aishile pe sonde ku kutuula umutundu wa muntu ukufuma ku lubembu ne mfwa? Awe iyo, amapepo yaacili yalelungatikwa kuli Yehova. Lintu aali pe sonde Yesu umwine libili libili apepele kuli Wishi wa ku muulu, kabili asambilishe bambi ukucita cimo cine. Tala tontonkanya pa lwe pepo lya cilangililo, ilyo inshita shimo ilitwa Ipepo lya kwa Shikulu nelyo ilya We Shifwe, ilyaba ni limo ilya mapepo yaishibikwa nga nshi mu calo. Yesu tatusambilishe ukupepa kuli wene; atupeele icilangililo ici: “Shifwe wa mu muulu, ishina lyenu libelwe akatiina.”—Mateo 6:6, 9; 26:39, 42.

Lekeni nomba tulande pali uyu mulandu mu kukumanina ukupitila mu kubebeta cintu ipepo mu cituntulu lyaba.

Ipepo Cinshi?

Ipepo ilili lyonse lyaba musango wa kupepa. The World Book Encyclopedia ishininkishe ci, ukulondololo kuti: “Ipepo lyaba musango wa kupepa umo umuntu pambi engalumbulula ukuipeelesha, ukutootela, ukuyebelela, nelyo ukupaapaata kuli Lesa.”

Pa kashita kamo Yesu atile: “Calembwa, aciti, Ulepepa [Yehova, NW] Lesa obe, kabili wene eka e o ulepyungila.” Yesu alambatile ku cine ca kutendekelako ica kuti ukupepa—na muli ifyo amapepo—kulingile ukulungatikwa kuli Wishi, Yehova Lesa epela.—Luka 4:8; 6:12.

Ukwishibe Cifulo ca kwa Yesu mu Mapepo Yesu

Yesu afwilile umutundu wa muntu nge lambo lya cilubula, Lesa alimubuushishe, kabili alisansabikwe pa cifulo casumbuka. Nga fintu pambi wingelenganya, ifi fyonse fyalileteleko ukwaluka ukukuma ku mapepo yengapokelelwa. Mu nshila nshi?

Umutumwa Paulo alondolola ukusonga kukalamba uko icifulo ca kwa Yesu cakwata pe pepo mu mashiwi yakonkapo: “E ico na Lesa amusansabike, no kumupeele shina ilyacila amashina yonse; ukuti kwi shina lya kwa Yesu ikufi lyonse likafukame, ilya mu muulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe.”—Abena Filipi 2:9-11.

Bushe amashiwi ya kuti “kwi shina lya kwa Yesu ikufi lyonse likafukame” yapilibula ukuti tuli no kulapepa kuli wene? Iyo. Ilongo lya mashiwi ya ciGreek ilyasanshiwamo pano “lilangilila ishina pali ilyo abo abafukamika amakufi bekatanina, apekatanina ukupepa konse (πᾶν γόνυ). Ishina ilyo Yesu apokelela lisesha bonse ku kucindikisha kwaikatana.” (A Grammar of the Idiom of the New Testament, kuli G. B. Winer) Mu cine cine, pa kuti ipepo lipokelelwe, lifwile ukupepelwa ‘mwi shina lya kwa Yesu,’ lelo, nangu ni fyo, lilungatikwa kuli Yehova Lesa no kuleta ubukata kuli wene. Pali uyu mulandu, Paulo asoso kuti: “Mu fintu fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela.”—Abena Filipi 4:6.

Kwati fye fintu akashila katungulula ku cifulo uleya, e fyo na Yesu e “nshila” itungulula kuli Lesa Wa maka yonse. “Ni ’ne nshila ne cine no mweo: takuli uwisa kuli Tata, kano aishila muli ine,” e fyo Yesu asambilishe abatumwa bakwe. (Yohane 14:6) Muli ifyo, tulingile ukupepa amapepo yesu kuli Lesa ukupitila muli Yesu kabili te mu kulungatika kuli Yesu umwine.a

Bamo pambi kuti baipusha abati, ‘lelo bushe Baibolo tailandapo ukuti umusambi Stefani no mutumwa Yohane balilandile na Yesu mu muulu?’ Ca cine. Ifi ifya kucitika, nangu cibe fyo, tafyasanshishemo amapepo, pantu Stefani na Yohane umo umo bamwene Yesu mu cimonwa kabili balandile na wene mu kulungatika. (Imilimo 7:56, 59; Ukusokolola 1:17-19; 22:20) Ibukisha ukuti ukulanda mu kwine kweka nangu fye kulanda na Lesa te kupanga ipepo. Adamu na Efa balilandile na Lesa, ukupeelo bwelelo pa lwa lubembu lwabo ulukalamba, lintu Abapingwile pa numa ya lubembu lwabo mu Edene. Kulya kulanda na wene muli ilya nshila takwali lipepo. (Ukutendeka 3:8-19) Kanshi, kuti caba cilubo ukulosha kuli kulya kulanda na Yesu ukwa kwa Stefani nelyo Yohane ngo bushininkisho bwa kuti mu cituntulu balipepele kuli wene.

Ni Shani Fintu Ishina lya kwa Yesu ‘Lilililwako’?

Bushe ucili naukwata ukutwishika kwakoselela, ukulanguluka ukuti caliba fye bwino ukupepa kuli Yesu? Umwanakashi umo alembeele iofesi limo ilya musambo wa Watch Tower Society ukuti: “Ku ce shamo, ncili nshilashininwa ukuti Abena Kristu ba kwamba tabapepele kuli Yesu.” Akwete mu muntontonkanya amashiwi ya kwa Paulo pali 1 Abena Korinti 1:2, apo umutumwa alumbwile “bonse . . . konse konse, abalilila Shikulwifwe Yesu Kristu.” Nangu cibe fyo, umo alingile ukumona ukuti mu lulimi lwa kutendekelako, inumbwilo ‘ukulililako’ kuti yapilibula ifintu fimbi pa mbali ye pepo.

Ni shani fintu ishina lya kwa Kristu ‘lyalililweko’ konse konse? Inshila imo yali ya kuti abakonshi ba kwa Yesu wa ku Nasarete bapokelele Yesu apabuuta nga Mesia kabili “Umupusushi wa ba pano isonde,” ukubomba ifipesha amano ifingi mwi shina lyakwe. (1 Yohane 4:14; Imilimo 3:6; 19:5) Muli ifyo, The Interpreter’s Bible yalondolola ukuti inumbwilo “ukulilila kwi shina lya kwa Shikulwifwe . . . ipilibula ukusumina bushikulu bwakwe te kupepa kuli wene.”

Ukupokelela Kristu no kukwata icitetekelo mu mulopa wakwe uwasuumiwa, ifiletako ukulekelelwa kwa membu, na ko kwine kwalingana no ‘kulilila Shikulwifwe Yesu Kristu.’ (Linganya Imilimo 10:43 ku Imilimo 22:16.) Kabili tulalumbula ishina lya kwa Yesu ilyo lyonse tulepepa kuli Lesa ukupitila muli wene. E co, ilintu tulangisha ifyo kuti twalilila kwi shina lya kwa Yesu, Baibolo tailangilila ukuti tulingile ukupepa kuli wene.—Abena Efese 5:20; Abena Kolose 3:17.

Cintu Yesu Engatucitila

Yesu mu kumfwika alaile abasambi bakwe ukuti: “Conse ico mukalombela mwi shina lyandi, nkacicita.” Bushe ici cifwaya ukupepa kuli wene? Iyo. Ukulomba kulungatikwa kuli Yehova Lesa—lelo ukupitila mwi shina lya kwa Yesu. (Yohane 14:13, 14; 15:16) Tupaapaata Lesa ukuti Umwana Wakwe, Yesu, engabomfya kuli ifwe amaka yakwe yafulisha no bulashi.

Ni shani fintu Yesu omfwana na bakonshi bakwe aba cine ilelo? Ubulondoloshi bwa kwa Paulo ubwa cilonganino ca Bena Kristu basubwa kuti bwabomba nge cilangililo. Alingenye cene ku mubili na Yesu Kristu ku mutwe. “Umutwe” upayanishisha ifilundwa fya mubili wa ku mupashi ifyo balekabila ukupitila mu “mfyufyu ne mishipa,” nelyo ipitilo no kutantika kwa kupayanishishamo icilonganino cakwe ica kulya ca ku mupashi no butungulushi. (Abena Kolose 2:19) Mu nshila yapalako, ilelo Yesu abomfye “fya bupe ku bantu,” nelyo abaume bafikapo lwa ku mupashi, ukutungulula mu filonganino, nelyo mu kulungika bambi nga caba icakabilwa. Takwabako ukupayanya ku filundwa fya cilonganino ukumfwana mu kulungatika na Yesu nelyo ukupepa kuli wene, lelo mu kushininkisha balingile—ee, bafwile—ukupepa kuli Wishi wa kwa Yesu, Yehova Lesa.—Abena Efese 4:8-12.

Ni Shani Fintu Ucindika Yesu?

We cifulo cintu Yesu akwata ukukuma kwi pusukilo lya bantunse! Umutumwa Petro apundile ati: “Ne pusukilo talili muli umbi nakalya, nangu lishina limbi takuli mwi samba lya muulu ilyapeelwa mu bantu, umo tuli no kupusukila.” (Imilimo 4:12) Bushe waliba uwaibukila ulwa bucindami bwe shina lya kwa Yesu?

Pa kukanalungatika amapepo kuli Yesu, tatulecefya icifulo cakwe. Ukucila, Yesu alacindikwa lintu twapepela mwi shina lyakwe. Kabili kwati fye fintu abana bacindika abafyashi babo pa kuba aba cumfwila, ne fwe tulacindika Yesu Kristu ukupitila mu kumfwila amafunde yakwe, ukucilisha ifunde lipya ilya kutemwana.—Yohane 5:23; 13:34.

Amapepo Yapokelelwa

Bushe ulafwaisha ukupepa amapepo yapokelelwa? Lyene lungatika yene kuli Yehova Lesa, kabili cite fyo ukupitila mwi shina lya Mwana wakwe, Yesu. Ishiba ukufwaya kwa kwa Lesa, kabili leka amapepo yobe yabelebeshe uko kumfwikisha. (1 Yohane 3:21, 22; 5:14) Sanga ubukose ukufuma mu mashiwi ya Ilumbo 66:20 aya kuti: “Abe uwacindikwa Lesa uushafumisheko ipepo lyandi kuli wene, nangu kufumyo luse lwakwe kuli ine.”

Nga fintu twamona, amapepo yaba musango wa kupepa uko ukwaba kwa kwa Lesa Wa maka yonse eka. Pa kulungatika amapepo yesu yonse kuli Yehova Lesa, tulangilila ukuti twalikatamika ukukambisha kwa kwa Yesu ukwa kupepa ati: “Shifwe wa mu muulu.”—Mateo 6:9.

[Futunoti]