Abaikatana mu Cikakilo Capwililika ica Kutemwa

“[Beni] abakuminkaniwa mu kutemwa.”—ABENA KOLOSE 2:2.

1, 2. Kusonga nshi ukwa kulekanya ukuleumfwika maka maka ilelo?

KUTIKENI! Ishiwi likalamba lileumfwika ukupulinkane myulu lileti: “Kalanda kuli imwe, mwe calo na bemba! pa kuti Kaseebanya naikila pali imwe, ali ne cipyu cikalamba, pa kwishibo kuti ali ne nshita inono fye.” (Ukusokolola 12:12) Lintu umwaka umo umo ulepita, ubo bukombe bulecililako ukuba ubwa kutiinya ku bekashi ba pe sonde.

² Icibambe cikalamba ica kwa Yehova pa nshita ntali caishibikwa nga kakaanya (Satana) kabili uwa lwambo (Ciwa). Lelo uyu kafutika nomba alibuula ulubali na lumbi ulushaibipila—asanguka lesa wa cipyu! Mulandu nshi? Pa mulandu wa kuti apooselwe ukufuma mu muulu kuli Mikaele na bamalaika bakwe mu bulwi bwatendeke mu muulu mu 1914. (Ukusokolola 12:7-9) Ciwa alishiba ukuti ali ne nshita fye iinono iya kushininkisha ukusonsomba kwakwe ukwa kuti kuti ayalwila pa mbali abantu bonse ukufuma ku kupepa Lesa. (Yobo 1:11; 2:4, 5) Pa kukanakwata ukuli konse ukwa kufyukila, wene pamo ne fibanda fyakwe bali ukupala ifungu lya nshimu ishikali ifilefumishe cifukushi ca fiko pa mabumba ya mutundu wa muntu abapenampena.—Esaya 57:20.

 3. Cinshi caba e kwambukila kwa kuboteleshiwa kwa kwa Satana mu nshita yesu?

³ Ifi fya kucitika, ifishimonwa ku menso ya buntunse, filondolola umulandu kubelele nomba ukubongoloka kwa mu cinkumbawile ukwa mibele isuma pa kati ka mutundu wa muntu. Filelondolola na kabili ukubombesha kwasakatuka ukwa bantu ukwa kulundikanya inko shilesunaika isho shishingakuminkaniwa. Amabumba ya mikowa na ya mitundu mu kukaluka yalasansa umo no unankwe, ukuletako amamilioni ya bashakwata mwa kwikala na bantu abasha ififulo fyabo. Te ca kupapa ukuti ubupulumushi buleingilishiwako pa cipimo cishingalinganishiwako! Nga fintu Yesu asobele, ‘ukutemwa kwa bengi aba mutundu wa muntu kuleshibantukila.’ Ukuli konse uko walolesha, ukukanakuminkaniwa no kubulwo kutemwa e fishibisha abantunse ba lelo abapenampena.—Mateo 24:12.

 4. Mulandu nshi abantu ba kwa Lesa babelele mu busanso bwaibela?

⁴ Mu cilolwa ca mibele ya calo, ipepo lya kwa Yesu pa bakonshi bakwe likwata ubupilibulo bwashikilako ilya kuti: “Nshilelomba ukuti mubafumye pano isonde, lelo ukuti mubabake ku mubifi. Tabali ba pano isonde, ifyo na ine nshili wa pano isonde.” (Yohane 17:15, 16) Ilelo, “umubifi” maka maka alefumisha icipyu cakwe pali abo “babaka amafunde ya kwa Lesa, no kukwato bunte bwa kwa Yesu.” (Ukusokolola 12:17) Akukanaba ukusakamana kwabamo kubaka kabili ukwa kutemwa ukwa kwa Yehova, Inte shakwe isha busumino kuti shafumishiwapo. Ubumi bwesu bwashintilila pa kushukila ukupayanya konse kuntu Lesa acita ku kucingililwa kwesu ukwa ku mupashi no kubakwa. Ico cisanshamo ukuibikilishako kwesu mu kumfwana no kubomba kwa maka Yakwe ukupitila muli Kristu, nga fintu umutumwa acincishe pa Abena Kolose 1:29.

5, 6. Ni shani fintu umutumwa Paulo ayumfwile pa lwa Bena Kristu ba ku Kolose, kabili mulandu nshi ilembo lya mutwe uwa 1995 libelele ilyalinga?

⁵ Nangu cingati Paulo mu kupalishako tatalile abamonapo mu menso, alitemenwe bamunyina ba mu Kolose. Abebele ukuti: “Kuti nafwaisha nga mwingomfwikisha ifyaba ukushika kwa kusakamikwa kwandi pali imwe.” (Abena Kolose 2:1, The New Testament in Modern English, kuli J. B. Phillips) Apantu abakonshi ba kwa Yesu tababa lubali lwa calo, “umubifi” ali no kutwalilila ukwesha ukutoba ukwikatana kwa bamunyina pa kubyala pa kati kabo umupashi wa calo. Icebo Epafra aletele ukufuma ku Kolose calangilile ukuti ici calecitika ku cipimo cimo.

⁶ Cimo ica fintu Paulo asekelelemo apakalamba kuli bamunyina ba Bwina Kristu kuti casupawilwa mu mashiwi ya kuti: “Beni abakuminkaniwa mu kutemwa.” Amashiwi yakwe yalikwata ubupilibulo bwaibela ilelo, mu calo icaisulamo ukukanaikatana no kubulwo kutemwa. Nga twasungilila ukupanda amano ukwa kwa Paulo, tukaipakisha ukusakamana kwa kwa Yehova. Tukakumanya na kabili amaka ya mupashi wakwe mu bumi bwesu, ukutwaafwa ukucincintila ukutitikisha kwa ku calo. Fintu kwaba ukwa mano uku kufunda! Muli fyo, Abena Kolose 2:2 likaba e lembo lya mutwe wesu uwa 1995.

 7. Kuminkana nshi kulingile ukusangwa pa kati ka Bena Kristu ba cine?

⁷ Muli kalata wabangilileko uwa ku bena Korinti, umutumwa abomfeshe umubili wa buntunse pamo nge cilangililo. Alembele ukuti “mwiba ukupusana” mu cilonganino ca Bena Kristu basubwa lelo ukuti “filundwa fibe no kusakamanana kumo.” (1 Abena Korinti 12:12, 24, 25) Mwandi cilangililo ca kusungusha! Ifilundwa fyesu fyashintilila pali cimo ne cinankwe, cimo cimo ukulundanishiwa ku mubili onse. Caba cimo cine na ku kubishanya kwa mu kusaalala kwa calo ukwa bamunyina, ukwapangwa na basubwa na mamilioni abenekela ukwikala pe sonde lya paradise. Tatufwile ukuiputulako ukufuma ku mubili wa Bena Kristu banensu ku kuikalila! Ukubombela ukupitila muli Kristu Yesu, umupashi wa kwa Lesa ukonkolokela kuli ifwe mu cipimo cikalamba ukupitila mu kubishanya kwesu na bamunyinefwe.

Ukuminkana Kwasuntinkana no Kwishiba

8, 9. (a) Cinshi caba icifwaikwa ca citendekelo ku kusangwila kwesu ku kuminkana mu cilonganino? (b) Ni shani fintu wanonka ukwishiba pa lwa kwa Kristu?

⁸ Cimo ica fishinka fikalamba ifya kwa Paulo cali ca kuti ukuminkana kwa Bwina Kristu kwasuntinkana no kwishiba, ukucilisha uko kwakuma kuli Kristu. Paulo alembele ukuti Abena Kristu balingile “babe abakuminkaniwa mu kutemwa, no kufika ku bucindami bonse bwa mwisulo wa kukutuluka ku kwishibe ca nkama ca kwa Lesa, ico ni Kristu wine.” (Abena Kolose 2:2) Twalishiba icine—ifishinka—ukutula apo twatendekela ukusambilila Icebo ca kwa Lesa. Pamo ngo lubali lwa kunonka ukumfwikisha kwa bwingi bwa ifi fishinka ifilinga mu mifwaile ya kwa Lesa, tulamona ulubali lwa mpikwe ulwa kwa Yesu. “Muli uyo mwafiswa ifyuma fyonse ifya mano ne fya kwishiba.”—Abena Kolose 2:3.

⁹ Bushe ifyo e fyo uyumfwa pa lwa kwa Yesu no lubali lwakwe mu mifwaile ya kwa Lesa? Abengi mu Kristendomu balaba abayangufyanya ukulumbula Yesu, ukuitunga ukumupokelela no kuti balipusushiwa. Lelo bushe mu cituntulu balimwishiba? Nakalya, pantu icinabwingi basumina mu cifundisho cishili ca mu malembo ica Bulesa Butatu. Tawaishiba fye icine muli kuno kuloshako lelo mu kupalishako walikwata ukwishiba kwasaalala ukwa cintu Yesu asosele no kucita. Amamilioni balyafwiwa ukucite ci ukupitila mwi sambililo lyabamo ifyebo ukubomfya icitabo Umuntu Wakulisha Uwabalile Abako Uwa Mweo. Lelo tulekabila ukutwalilila ukulenga ukwishiba kwesu pa lwa kwa Yesu ne nshila shakwe ukushika.

10. Ni mu nshila nshi umo icine cafiswa cisangilwamo kuli ifwe?

¹⁰ Inumbwilo ya kuti “ifyuma fyonse ifya mano ne fya kwishiba” ‘fyafiswa’ muli Yesu tacipilibulo kuti ukwishiba kwa musango yo te kuti tukumfwikishe. Ukucila, capala ngo mukoti uwaisuka. Tatuli na kuya tulefwailisha umwalole mpanga ukulatwishika apa kutendekelo kwimba. Kale kale twalishiba—ukwishiba kwa cine cine kutendekela na cintu Baibolo isokolola pa lwa kwa Yesu Kristu. Ilyo tulecililako ukutesekesha mu kukumanina kwacilapo ulubali lwa kwa Yesu mu kubomba kwa mifwaile ya kwa Yehova, tulasanga icuma ca mano ya cine no kwishiba kwalungikwa. E co icintu tulekabila cili kulaimba lyonse mu kushikilako, ukulafumyamo amabwe yaumo mutengo ayalundwako nelyo ifintu fya mutengo wa patali ifyaba muli iyi ntulo iyo kale kale twaimbamo.—Amapinda 2:1-5.

11. Ni shani pambi twingengilishako ukwishiba kwesu na mano pa kwetetula pali Yesu? (Langilila mu kuba no kusamba kwa kwa Yesu amakasa ya basambi, nelyo bomfya ifya kumwenapo fimbi.)

¹¹ Ku ca kumwenako, kuti pambi twalishiba ukuti Yesu alisambile amakasa ya batumwa bakwe. (Yohane 13:1-20) Bushe twalitala, nangu ni fyo, atwetetula pe sambililo alesambilisha ne mibele ya mutima alangishe? Ukucite fyo, kuti twafukulamo icuma ica mano ayo yengalenga ifwe—ee, ayengatusesha—ukwalula ifyo tubomba na munyina nelyo nkashi uyo ubuntu bwakwe bwatukalifya pa nshita ntali. Nelyo lintu twapeelwa umulimo uyo tushatemwisha, kuti pambi twaankulako mu kupusanako ilintu twailuka ubupilibulo bwashika ubwa kwa Yohane 13:14, 15. Ifyo e fintu ukwishiba na mano fitwambukila. Cinshi pambi cingaba ukwambukila pali bambi ilyo mu kupalamisha tulepashanya ukwishiba kwaingilishiwako ukwa kwa Kristu? Nalimo umukuni ‘ukaba uwacilapo ukuminkaniwa mu kutemwa.’a

Ukupumbulwa Kuti Kwaonaula Ukuminkana

12. Kukuma ku kwishiba nshi tulekabila ukuba abapempwila?

¹² Nga ca kuti ukwishiba kwalungikwa kulacilenga ukwanguka ku ‘kuba kwesu abauminkaniwa mu kutemwa,’ cinshi cifuma muli ico “iciitwa Ukwishiba, lelo takuli Kwishiba iyo”? Ciba fye cintu capusanako—ukukansana, ukukanaumfwana, no kupaasuka ukufuma ku citetekelo. E co tufwile ukuibaka ku kwishiba kwa bufi, nga fintu Paulo asokele Timote. (1 Timote 6:20, 21) Paulo na kabili alembele ukuti: “Ndesose fi ukuti umuntu emucenjesha ku kukopeka; Cenjeleni ukuti umuntu emubeleleka mu kutemwa amano ayali longolo lwa fye, umwalole cishilano ca bantu, umwalole mipashi ya kapona ya pano isonde, no mwalola Kristu iyo.”—Abena Kolose 2:4, 8.

13, 14. (a) Mulandu nshi bamunyina ba ku Kolose babelele mu busanso ukukuma ku kwishiba? (b) Mulandu nshi bamo ilelo pambi bengayumfwila ukuti tabali mu busanso bwapalako?

¹³ Abena Kristu ba ku Kolose bashingulwikwe no kusonga kwabelama ukwa capalile ukwishiba lelo takwali kwishiba iyo. Abantu abengi mu kati no kushinguluka Kolose bakatamike apakalamba amano ya buntunse aya ciGreek. Kwaliko na kabili abapokelele ubuYuda abafwaile Abena Kristu ukusunga Ifunde lya kwa Mose, pamo nga imitebeto ya liko ne fifwaikwa fya fya kulya. (Abena Kolose 2:11, 16, 17) Paulo talekaanya bamunyina ukunonka ukwishiba, lelo balekabila ukucenjela ukuti nangu umo ebabeleleka, ukubomfya ukupaasha kwa kunashanasha ku kubashinina ukupokelela imimwene fye ya buntunse iya bumi ne ncitilo. Kuti watesekesho kuti nga ca kuti bamo mu cilonganino baleka ukutontonkanya kwabo no kupingulapo ukutungululwa ne mfundo sha musango yo ishishili sha mu malembo ne nshila sha bumi, kuti capusana no kuminkana no kutemwa pa kati ka filundwa fya mu cilonganino.

¹⁴ ‘Ee,’ e fyo pambi wingatontonkanya, ‘namona ubusanso abena Kolose balolenkene na bo, lelo ine nshili mu busanso bwa kusongwa ne mfundo sha ciGreek, pamo nga iya mweo uushifwa nelyo lesa wabamo butatu; nelyo ukumona ubusanso bwa kubelelekwa na maholide ya cisenshi aya butotelo bwa bufi yantu nafyukako.’ Cawama. Calibe cisuma ukupampamina pa kupulamo kwa cine caanguka icasokololwa ukupitila muli Yesu kabili icaba mu Malembo. Nangu cibe fyo, bushe kuti pambi caba ukuti twaliba mu busanso ku mano ya buntunse yamo nelyo imimwene ya buntunse iyaanana ilelo?

15, 16. Mimwene nshi iya pa bumi iyo pambi ingambukila ukutontonkanya kwa Mwina Kristu?

¹⁵ Imibele imo iya mutima iya musango yo yalibako pa nshita yalepa iya kuti: “Kuli kwi nomba ukulaya kwa kwisa kwakwe? Bashifwe balibikwa ku kutuusha kwabo, lelo nalyo line icili conse citwalilila filya fine fye nga fintu caba lyonse.” (2 Petro 3:4, The New English Bible) Uko kuyumfwa kuti pambi kwalandilwa na mu mashiwi yambi, lelo imimwene ni imo ine. Ku ca kumwenako, umo kuti pambi apelululo kuti, ‘Lintu fye natendeke ukusambilile cine amakumi yapitapo aya myaka, impela yali “ca mupepi nga nshi.” Lelo icili tailafika, kabili katwishi nga pali no wishibe.’ Ca cine, takuli muntu uwaishiba lintu impela ikafika. Lelo, mona imimwene intu Yesu acincishe: “Cenjeleni, loleni kabili pepeni; pantu tamwaishiba ilyo inshita ikesabako.”—Marko 13:32, 33.

¹⁶ Fintu cingabamo busanso ukupokelela imimwene ya kuti, ukukanaishiba lintu impela ikesa, tulingile ukucita amapange ya kukwata ubumi bwafumba kabili ubwa “kucibondola”! Iyo nshila kuti yabelebeshiwa mu kupelulula kwa kuti, ‘kuti nacitako na fimo ifikansuminisha (nelyo ifikasuminisha abana bandi) ukukwata umulimo wa mucinshi uwa malipilo yawamisha kabili uukanenga ukuipakisha ubumi bwa bwanalale. Kwena, nkalasangwa ku kulongana kwa Bwina Kristu no kukwata ukwakanamo mu mulimo wa kushimikila, lelo takuli umulandu wa kuti ndeibikilishishako nelyo ukucita amalambo yakalamba.’—Mateo 24:38-42.

17, 18. Mimwene nshi intu Yesu na batumwa batucincishe ukukwata?

¹⁷ Te kuti cikaanweko, nangu cibe fyo, ukuti Yesu na batumwa bakwe batashishe ukwikala kwesu mu kuba ne mibele ye pamfya pa lwa kukwata imbila nsuma ukushimikilwa, ukuibikilishako no kuba abaitemenwa ukucita amalambo. Paulo alembele ati: “Mwe ba bwananyina, ndetila, naipipe nshita iyashalako; abali na ’bakashi babe nga ’bashaba na bo, . . . na ’bashita babe nga ’bashikwete, na ’babombelako ku fya pano isonde babe nga ’bashibombelako; pantu imibele ya pano isonde ilepita.”—1 Abena Korinti 7:29-31; Luka 13:23, 24; Abena Filipi 3:13-15; Abena Kolose 1:29; 1 Timote 4:10; 2 Timote 2:4; Ukusokolola 22:20.

¹⁸ Ukukaanatubulula nangu panono ukuti tucipange ngo buyo bwesu ukukwata ubumi bwa bwanalale, Paulo alembele pe samba lya kupuutwamo ukuti: “Tatwaletele kantu pa kwisa pano isonde, kabili tatwingafumyapo kantu. Awe pa kuba ne fya kulya ne fya kufwala, tuteke imitima kuli ifyo fine. . . . Pilikito kupilikita kusuma kwa citetekelo, ikata ku mweo wa muyayaya uo waitilwemo, ilyo walumbwile ukulumbula kusuma ku menso ya nte ishingi.”—1 Timote 6:7-12.

19. Ni shani fintu icilonganino cambukilwako lintu ababa muli cene bapokelela imimwene ya bumi intu Yesu akoseleshe?

¹⁹ Lintu icilonganino capangwa na Bena Kristu bapimpa abo mu kuluma batukuta ‘ukupeela ukulumbula kusuma,’ ukuminkana kwisako fye mu cifyalilwa. Tabanakilako ku mibele ya mutima iya kuti, “Uli ne fisuma ifingi ifikalaaluke myaka iingi; utauluke, ulye, unwe, [uipakishe, NW].” (Luka 12:19) Ukucila, baba abaikatana mu kubombesha kumo kwine, abaitemenwa ukucita amalambo pa kukwata ukwakanamo kwakumanina ukufika pantu bengapesha muli uyu mulimo ushakatale aubwekeshiwapo.—Linganyako Abena Filipi 1:27, 28.

Ukusakamana pa lwa Kukopeka

20. Ni mu lubali nshi lumbi umo Abena Kristu pambi bengalufiwa?

²⁰ Kwalibako, kwena, inshila shimbi umo Umwina Kristu ‘engacenjeshiwa ku kukopeka’ nelyo ulongolo lwa fye ulo lupumfyanya ‘ukuminkana mu kutemwa.’ Iofesi lya Watch Tower Society mu Germany lyalembele ukuti: “Ica kucitika cimo catungulwile ku fikansa, bakasabankanya na baeluda fye ukulabishapo ulubali lumo pa musango wa kundapa amalwele uwalebomfiwa na munyina.” Balundilepo ukuti: “Pa mulandu wa kulekanalekana kwasaalala ukwa nshila shibomfiwa ne mpendwa ikalamba iya balwele, ulu luli lubali ulwa kukansaninapo kabili, nga ca kuti inshila sha kundapa shikwete icitontonshi ca mipashi, kuti pambi caletako ubusanso.”—Abena Efese 6:12.

21. Ni shani pambi Umwina Kristu engalufya icilolwa calungama ilelo?

²¹ Abena Kristu bafwaya ukutwalilila abomi kabili aba butuntulu busuma pa kuti bengalapepa Lesa. Nangu cibe fyo, muli ino micitile twalitekwa no bukote no kulwala ififuma mu kukaanapwililika. Ukucila ukulakomaila pa milandu ya butuntulu bwa bumi, tufwile ukutontomesha pa kupikulula kwine kwine, ukwa kuli ifwe no kwa kuli bambi. (1 Timote 4:16) Kristu e ca kutontapo ica uko kupikulula, nga fintu fye e wali ca kutontapo ica kufunda kwa kwa Paulo ku bena Kolose. Lelo ibukisha, Paulo alangilile ukuti bamo kuti pambi baisa mu kuba no “kukopeka” ukututalusha kuli Kristu, nakalimo ukulosha ku nshila sha kupiminako amalwele, ukundapa, nelyo imiliile.—Abena Kolose 2:2-4.

22. Mibele nshi yashikatala tulingile ukukwata ukulosha ku kutunga kwafulisha ukukuma ku nshila sha kupiminamo amalwele no kundapa?

²² Abantu ukushinguluke cibulungwa balapokelela ukukonkana kwa fya kusabankanya no tupepala twa kutasha imisango yalekanalekana iya kundapa ne nshila sha kupiminamo amalwele. Shimo isha shene shilabomfiwa mu kusaalala kabili shalipokelelwa; shimbi shalilengululwa mu kusaalala kabili shaba pe samba lya kutunganishiwa.b Umuntu umo umo alishingamwa ku kupimununa cintu akacita ukukuma ku butuntulu bwakwe ubwa bumi. Lelo abo bapokelela ukufunda kwa kwa Paulo ukusangwa pa Abena Kolose 2:4, 8 bakakwata ukucingililwa ku kucenjeshiwa ku “kukopeka” nelyo “ulongolo lwa fye” ifyo fipumbula abengi abo, pa kubulisha isubilo lya Bufumu, baba abapeleelwa ukufwayo kwilulukwa. Nangu fye nga ca kuti Umwina Kristu ali uwashininwa ukuti ukundapa kumo kulamoneka ukusuma kuli wene, talingile ukulasumbula kwene muli bumunyina bwa Bwina Kristu, pantu kuti casanguka lyashi lya kulanshanya kwasaalala kabili ilya kukansaninapo. Muli fyo kuti alangisha ukuti alicindikisha ubucindami bwa kuminkana mu cilonganino.

23. Mulandu nshi maka maka tukwatile umulandu wa kusekelela?

²³ Paulo aebekeshe ukuti ukuminkana kwa Bwina Kristu lishintililo lya kusekelela kwa cine cine. Mu kasuba kakwe impendwa ya filonganino mu cine cine yali iyacepako ukucila ilelo. Nalyo line aali na maka ya kulembela abena Kolose ukuti: “Nelyo nshabako mu mubili, lelo mu mutima naba pamo na imwe, ndesekelela pa kumono kwikala kwenu kwa busaka busaka, no kuuma ndi kwa citetekelo cenu ca muli Kristu.” (Abena Kolose 2:5; mona kabili Abena Kolose 3:14.) Fintu waba uwacilapo bukulu umulandu wesu uwa kusekelela! Kuti pambi twamona ubushinino bwa cine cine ubwa kuminkana ukwikala busaka busaka, no kuuma ndi kwa citetekelo mu cilonganino cesu cine, icibelebesha imibele ya cinkumbawile iya bantu ba kwa Lesa mu kusaalala kwe sonde. E co mu nshita inono iisheleko mu micitile ilipo, lekeni umo umo uwa ifwe apampamine pa ‘kuba abakuminkaniwa mu kutemwa.’

[Amafutunoti]

Bushe Wacimona?

◻ Cinshi cili e lembo lya mwaka wa 1995 ilya Nte sha kwa Yehova?

◻ Mulandu nshi Abena Kristu ba ku Kolose bakabile ukuba abakuminkaniwa mu kutemwa, kabili mulandu nshi na ifwe ilelo tulekabila ukuba abakuminkana?

◻ Mibele nshi yabelama iya pa bumi intu Abena Kristu maka maka balekabila ukuba abapempwilako ilelo?

◻ Mulandu nshi Abena Kristu balingile ukubela abaibukila ukukanalufiwa no kukopeka ukukuma ku butuntulu bwa bumi ne nshila sha kupiminamo amalwele?

[Ifikope pe bula 17]

Bushe amapange yobe aya nshita ya ku ntanshi yashimpwa pa kubapo kwa kwa Yesu?