Ubufyashi bwa Nsoka—Bwasansalikwa Shani?

“Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe.”—UKUTENDEKA 3:15.

 1. (a) Mulandu nshi Yehova abela Lesa wa nsansa? (b) Cinshi cintu aacita ku kutulenga ukukwatako ubuseko bwakwe?

YEHOVA ni Lesa wa nsansa, kabili ico calimulinga. E Kapeela mukalamba kabili solwesolwe mu kupeela ifintu fisuma, kabili tapali nangu cimo icingacilima ukufikilishiwa kwa mifwaile yakwe. (Esaya 55:10, 11; 1 Timote 1:11, NW; Yakobo 1:17) Afwaya ababomfi bakwe ukuipakishako ubuseko bwakwe, kabili alabapayanishisha imilandu isuma iya kubela aba buseko. E co pa nshita ya kupelelwa kwacilishapo apo umuntunse abelele pe sonde, e kuti pa numa ya kupondoka mu Edene—apayenye icishinte ca kuti twingalolesha ku nshita ya ku ntanshi mu kuba ne subilo.—Abena Roma 8:19-21.

 2. Lintu alelumbulula ubupingushi pali bacipondoka mu Edene, ni shani fintu Yehova apayenye icishinte ce subilo ku bufyashi bwa kwa Adamu na Efa?

² Umo uwa bana ba ku mupashi aba kwa Yehova, pa mulandu wa kukaanya Lesa no kumwamba, e lintu fye ailengele ukuba Satana Kaseebanya. Abantunse ba kubalilapo, Efa na mu kukonkapo Adamu, balisongelwe na wene kabili baliwile no kutoba ifunde lya kwa Yehova ilyalondolwelwe bwino bwino. Mu kulinga bapingwililwe ukufwa. (Ukutendeka 3:1-24) Nalyo line, lintu alelumbulula ubupingushi pali aba bacipondoka, Yehova alipayenye icishinte ce subilo ku bufyashi bwa kwa Adamu na Efa. Mu nshila nshi? Nga fintu calembwa pa Ukutendeka 3:15, Yehova atile: “Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe, nobe wakulabulasa ku citende.” Ubo busesemo e nshila ya kumfwikishamo Baibolo yonse pamo pene ne fya kucitika fyapita ne fya ndakai ifisanshamo icalo na babomfi ba kwa Yehova.

Cintu Ubusesemo Bupilibula

 3. Nga fintu caloshiwako pa Ukutendeka 3:15, lumbula icaba (a) Insoka, (b) “umwanakashi,” (c) “ubufyashi” bwa Nsoka, (d) “ubufyashi” bwa mwanakashi.

³ Pa kutesekesha ubupilibulo bwa buko, langulukeni imbali shalekanalekana isha ubu bwine busesemo. Uo balelandako pa Ukutendeka 3:15 ni Nsoka—te nsoka ya cine cine, lelo uwaibomfeshe. (Ukusokolola 12:9) “Umwanakashi” te Efa lelo ukuteyanya kwa kwa Yehova ukwa mu muulu, nyina wa babomfi bakwe abasubwa no mupashi aba pano isonde. (Abena Galatia 4:26) “Ubufyashi” bwa nsoka, bwaba bufyashi bwa kwa Satana, ulubuto lwakwe—ifibanda na bantunse pamo pene na mateyanyo ya bantunse ayo yalangisha imibele ya kwa Satana no kulanga ubulwani ku “bufyashi” bwa mwanakashi. (Yohane 15:19; 17:15) “Ubufyashi” bwa mwanakashi ukucilisha ni Yesu Kristu, uwasubilwe no mupashi wa mushilo mu 29 C.E. Ba 144,000 ‘abafyalwa libili . . . ku menshi na ku mupashi’ kabili ababa ni mpyani sha Bufumu bwa mu muulu na Kristu, baba lubali lwalenga bubili ulwa lulya lubuto ulwalaiwe. Aba batendeke ukulundwako ku bufyashi bwa mwanakashi ukufuma pa Pentekoste 33 C.E. no kuya ku ntanshi.—Yohane 3:3, 5; Abena Galatia 3:16, 29.

 4. Ni shani fintu Ukutendeka 3:15 kwayampana no kusanguka kwe sonde paradise, uwaisulamo abantu abalubuka ku lubembu ne mfwa?

⁴ Insoka ya cine cine mu Edene yabomfiwe nge ca kulandilamo kuli uyo untu ubucenjeshi bwakwe bwalengele umutundu wa muntu ukulufya Paradise. Ukutendeka 3:15 kwasontele ku nshita ya ku ntanshi lintu uyu wine uwabomfeshe insoka akashonaulwa. Lyene inshila ikesulwa na kabili pa kuti ababomfi ba buntunse aba kwa Lesa bengekala mu Paradise, abalubuka ku lubembu ne mfwa. Mwandi iyo ikaba ni nshita ya buseko!—Ukusokolola 20:1-3; 21:1-5.

 5. Mibele nshi ishibisha ubufyashi bwa ku mupashi ubwa kwa Kaseebanya?

⁵ Pa numa ya bupondoshi mu Edene, kwatendeke ukubako abantu na mateyanyo abalelangisha imibele iyapala iya kwa Satana Kaseebanya—bucipondoka, ubufi, ulwambo, no bukomi, ukubikapo fye no kulwisha ukufwaya kwa kwa Yehova no kulwisha abo bapepa Yehova. Iyo mibele yaishibishe ubufyashi, abana ba ku mupashi, aba kwa Kaseebanya. Pali aba pali Kaine, uwaipeye Abele lintu Yehova abishishe ukupepa kwa kwa Abele ukucila ukwa kwa Kaine. (1 Yohane 3:10-12) Nimrode aali e umo uo ishina lyakwe liine lyamwishibishe nga cipondoka kabili uwaishilesanguka umubamfi wakosa kabili kateka uwalelwisha Yehova. (Ukutendeka 10:9) Mu kulundapo kwaliko ukupyanana kwa mabufumu ya pa kale, ukusanshako Babele, mu kuba ne mipepele ya yako iyashimpilwe pa bufi iyaleafwilishiwa na mabuteko, kabili aya yaletitikisha bakapepa ba kwa Yehova mu bunkalwe.—Yeremia 50:29.

“Ubulwani pa Kati ka Iwe no Mwanakashi”

 6. Ni mu nshila nshi Satana aalangila ubulwani ku mwanakashi wa kwa Yehova?

⁶ Muli iyi nshita yonse, kwali ubulwani pa kati ka Nsoka no mwanakashi wa kwa Yehova, pa kati ka kwa Satana Kaseebanya no kuteyanya kwa kwa Yehova ukwa mu muulu ukwa fibumbwa fya mupashi ifya bucishinka. Ubulwani bwa kwa Satana bwalangilwe ilyo aleseebanya Yehova no kufwaya ukupumfyanya ukuteyanya kwa kwa Yehova ukwa mu muulu, ukubeleleka bamalaika ukuti bashe ncende yabo. (Amapinda 27:11; Yuda 6) Bwalilangilwe lintu Satana abomfeshe ifibanda fyakwe mu kwesha ukucilima inkombe sha bumalaika ishatuminwe na Yehova. (Daniele 10:13, 14, 20, 21) Bwalimonekeshe ukucilisha muli uno mwanda wa myaka uwalenga 20 lintu Satana afwaile ukuti onaule Ubufumu bwa buMesia pa kufyalwa kwa buko.—Ukusokolola 12:1-4.

 7. Mulandu nshi bamalaika ba bucishinka aba kwa Yehova baapatila Insoka ya mampalanya, lelo kuikanya nshi kuntu baalanga?

⁷ Umwanakashi wa kwa Yehova, ibumba lya bamalaika ba bucishinka, na o wine alipatile iyi Nsoka ya mampalanya. Satana aali naonaula ishina lisuma ilya kwa Lesa ukupitila mu lwambo; kabili atwishike bumpomfu bwa fibumbwa fya mucetekanya fyonse ifya kwa Lesa, ukusanshako na bamalaika bonse, kabili mu kucincila aleesha ukupinuna bucishinka bwabo kuli Lesa. (Ukusokolola 12:4a) Bamalaika ba bucishinka, bakerubi, na baserafi baleyumfwa abaselaushiwa kuli uyo uwailengele umwine ukuba Kaseebanya kabili Satana. Nalyo line, balipembelela ukuti Yehova engabombelapo mu nshita yakwe kabili mu nshila yakwe.—Linganyako Yuda 9.

Ukukalukila Ubufyashi bwa Mwanakashi wa kwa Lesa

 8. Nani untu Satana aalepembelela?

⁸ Pali iyi nshita, Satana aali uwalola ukupembelela Ubufyashi bwa mwanakashi ubwalaiwe, ubo Yehova atile bwali no kulasa Insoka ku mutwe. Lintu malaika ukufuma ku muulu abilishe ukuti Yesu, uwali nafyalwa mu Betlehemu, aali e “Mupusushi, uyo ni Kristu Shikulu,” kwali kwebekesha kwakosa ukwa kuti uyu aali no kuba e Bufyashi bwa mwanakashi ubwasobelwe.—Luka 2:10, 11.

 9. Pa numa ya kufyalwa kwa kwa Yesu, ni shani fintu Satana alangishe ubulwani bwakaluka?

⁹ Ubulwani bwabipisha ubwa kwa Satana mu kwangufyanya bwalimoneke lintu abeleleke bakapendula ba ntanda ukwimo bulendo ubo pa kubalilapo bwabatwele ukuyapita ku Mfumu Herode mu Yerusalemu lyene pa numa ukuya ku ŋanda mu Betlehemu uko basangile umwana munono Yesu na nyina, Maria. Inshita inono pa numa ya ico Imfumu Herode yakambishe ukuti bakalume banono bonse aba myaka ibili na bashilafikako aba mu Betlehemu ne mishi yashingulwikeko bepaiwe. Mu kucite ci, Herode alangishe ulupato lwa busatana kuli bulya Bufyashi. Herode mu kumonekesha alishibe bwino bwino ukuti aleesha ukulofya umweo wa wali no kuba Mesia. (Mateo 2:1-6, 16) Ilyashi lya kale likalilako ubunte ukuti Imfumu Herode yali iyapaasuka, incenjeshi, kabili iyalebekelwa mu bukomi—mu cine cine umo uwa bufyashi bwa Nsoka.

10. (a) Pa numa ya kubatishiwa kwa kwa Yesu, ni shani fintu Satana umwine wine aeseshe ukufulunganya imifwaile ya kwa Yehova ukukuma ku Bufyashi bwalailwe? (b) Ni shani fintu Satana abomfeshe intungulushi sha fya mapepo isha ciYuda mu kusanga cintu alefwaya?

¹⁰ Pa numa Yesu abe nasubwa no mupashi wa mushilo mu 29 C.E. na pa numa Yehova abe nalanda ukufuma mu muulu ukusuminisha Yesu ngo Mwana wakwe, Satana libili libili aeseshe ukulenga Yesu ukunakila ku matunko, muli ifyo ukufwaya ukucilima imifwaile ya kwa Yehova iyakumine ku Mwana wakwe. (Mateo 4:1-10) Pa numa ya kufilwa ukucite co, ayalukile ku kubomfya ifibombelo fya bantunse na kabili ku kusanga cintu alefwaya. Pali abo abomfeshe ku kulenga ukuti Yesu atwishikwe, pali intungulushi sha mipepele isha bumbimunda. Babomfeshe ubufi no lwambo, uwaba e musango wa fibombelo ifibomfiwa na Satana umwine wine. Lintu Yesu aebele uwa bulebe ati, “Teko mutima; imembu shobe nashilekelelwa,” bakalemba, ukwabula no kupembelela ukumona nga ca kuti uyu muntu mu cine cine naposhiwa, bapingwile Yesu ukuti aali wa miponto. (Mateo 9:2-7) Lintu Yesu aundepe abantu pe Sabata, abaFarise balimusenwike nga katoba we funde lye Sabata kabili bamuumanine akapi ukuti bamonaule. (Mateo 12:9-14; Yohane 5:1-18) Lintu Yesu afumishe ifibanda, abaFarise bamupeele umulandu wa kubombela pamo na “Beelsebuli kateka wa fiwa.” (Mateo 12:22-24) Pa numa Lasaro abuushiwe ku bafwa, abantu abengi batetekele Yesu, lelo bashimapepo bakalamba na baFarise na kabili bapandene amano umwa kuti bengamwipaila.—Yohane 11:47-53.

11. Inshiku shitatu pa ntanshi talafwa, ni bani Yesu aishibishe nga ulubali lwa bufyashi bwa Nsoka, kabili mulandu nshi?

¹¹ Pa Nisani 11, 33 C.E.,Yesu, nangu line alishibe bwino bwino cintu balepanga ukucita, ukwabulo mwenso aingile mu kati na nkati ka ncende ye tempele lya mu Yerusalemu kabili abilishe ubupingushi pali bene apabuuta. Ukubabika pamo, bakalemba na baFarise ilingi line nga nshi balilangishe umusango wabo; e co Yesu atile: “Kalanda kuli imwe, mwe bakalemba na ’baFarise, ba bumbimunda! pantu mwisalilo bufumu bwa mu muulu ku cinso ca bantu; pantu tamwingilamo mwe bene, nangu kuleka abaleingila bengile.” Yesu mu kulungatika abilishe ukuti baali lubali lwa bufyashi bwa Nsoka, ukusoso kuti: “Mwe nsoka! mwe bufyashi bwa mafwafwa, mukapusuka shani ku kupingulwo kuya ku Gehena?” (Mateo 23:13, 33) Amashiwi yakwe yabwelela ku numa ku busesemo bwa pa Ukutendeka 3:15.

12, 13. (a) Ni shani fintu bashimapepo bakalamba na bakalemba balangishe ubushininkisho bwalundwapo pa lwa wali shibo wa ku mupashi? (b) Nani ailundile kuli bene? (c) Mu kufikilishiwa kwa Ukutendeka 3:15, ni shani fintu Ubufyashi bwa mwanakashi bwalashilwe ku citende?

¹² Lintu baumfwile amashiwi ya kwa Yesu, bushe calibapitile ku mutima, ica kuti bapaapeete ukuti Lesa ababelele inkumbu? Bushe balilapile pa bubifi bwabo? Iyo! Marko 14:1 ashimika ukuti ubushiku fye bwine ubwakonkelepo, pa kukumana mu lubansa lwa kwa shimapepo mukalamba, “bashimapepo bakalamba na bakalemba balafwayo mwa [kwikatila Yesu] ku bucenjeshi, no kumwipaya.” Batwalilile ukulangisha imibele ya mutima iya bukomi iya kwa Satana, untu Yesu mu kubangilila alondolwele nge nkomi. (Yohane 8:44) Mu kwangufyanya Yuda Iskariote, untu Satana alengele ukuba umusangu aliilundile kuli bene. Yuda alishiile Ubufyashi bwa mwanakashi wa kwa Lesa ubwatambalala no kuilunda ku bufyashi bwa Nsoka.

¹³ Ulucelocelo pa Nisani 14, ifilundwa fya cilye ca mipepele ica ciYuda fyasendele Yesu ngo mufungwa kuli kateka wa ciRoma. Kuno ni bashimapepo bakalamba e baali ku ntanshi mu kubilikisha ukuti Yesu apoopelwe. Lintu Pilato aipwishe ati: “Bushe imfumu yenu e yo [ndepoopela, NW]?” cali ni bashimapepo bakalamba e bayaswike abati, “Tatukwete mfumu, kano Kaisare.” (Yohane 19:6, 15) Mu cine cine, mu nshila yonse baishininkishe ukuti baali lubali lwa bufyashi bwa Nsoka. Lelo mu kushininkisha tabaali beka. Icalembwa capuutwamo pali Mateo 27:24, 25 cishimika ukuti: “Pilato . . . abuulile amenshi, asamba ku minwe yakwe pe bumba.” E lyo abantu bonse batile: “Umulopa wakwe ube pali ifwe, na pa bana besu.” Kanshi abaYuda abengi aba muli ilya nkulo baishibishe abene ngo lubali lwa bufyashi bwa Nsoka. Ilyo kalya kasuba takalawa, Yesu aali citumbi. Ukupitila mu kubomfya ubufyashi bwakwe ubumoneka, Satana aali nalasa Ubufyashi bwa mwanakashi wa kwa Lesa ku citende.

14. Mulandu nshi ukulaswa kwa Bufyashi bwa mwanakashi ku citende kushapilibwilile ukucimfya kwa kwa Satana?

¹⁴ Bushe Satana alicimfishe? Awe nakalya! Yesu Kristu aali nacimfya icalo kabili alicimfishe kateka wa ciko. (Yohane 14:30, 31; 16:33) Aali nasungilila bucishinka bwakwe kuli Yehova ukufika fye na ku mfwa. Imfwa yakwe pamo ngo muntunse wapwililika yapayenye umutengo wa cilubula uwalekabilwa ku kushita insambu sha bumi isho Adamu alufishe. E co aiswile inshila ya kuti abo abakatetekela muli kulya kupayanya kabili abakomfwila amafunde ya kwa Lesa benganonka umweo wa ciyayaya. (Mateo 20:28; Yohane 3:16) Yehova abuushishe Yesu ukufuma ku bafwa no kumupeela umweo wa bumunshifwa mu muulu. Mu nshita yapimwa iya kwa Yehova, Yesu akashonaula Satana no kumufumyapo. Pa Ukutendeka 22:16-18, calisesemwa ukuti Yehova akalango bubile pa ndupwa shonse isha pano nse abakabombelapo mu kulinga pa kuti bengapaalwa ukupitila muli bulya Bufyashi bwa bucishinka.

15. (a) Pa numa ya mfwa ya kwa Yesu, ni shani fintu abatumwa bakwe batwalilile ukusansalika ubufyashi bwa Nsoka? (b) Bukalushi nshi bwacililako ubo ubufyashi bwa Nsoka bwalanga ukufika na mu kasuba kesu?

¹⁵ Pa numa ya mfwa ya kwa Yesu, Abena Kristu basubwa no mupashi balitwalilile ukusansalika ubufyashi bwa Nsoka, nga fintu Shikulwibo acitile. Pa kukumbwamo no mupashi wa mushilo, umutumwa Paulo asokele pa lwa “Muntu wa bupulumushi” uyo ukubapo kwakwe kwali no kuba “umwalolo kubomba kwa kwa Satana.” (2 Abena Tesalonika 2:3-10) Uyu “muntu” uwaba libumba caisasangwa ukuti aba ni bashimapepo ba mu Kristendomu. Ubufyashi bwa Nsoka, mu kukonkapo, bwapakese abakonshi ba kwa Yesu Kristu icabipisha. Mu busesemo bwalembwa pa Ukusokolola 12:17, umutumwa Yohane asobele ukuti Satana aali no kutwalilila ukulwa na basheleko ku bufyashi bwa mwanakashi wa kwa Lesa ukufika fye na mu kasuba kesu. Ico cine fye e cacitika. Mu fyalo ifyafulilako, Inte sha kwa Yehova balibindwa, ukusanswa ku mabungwe, ukubikwa mu fifungo, nelyo ukupooswa mu nkambi sha kucushiwilwamo pa mulandu wa kwiminina kwabo mu kushangila ku lubali lwa Bufumu bwa kwa Lesa ne nshila shakwe isha bulungami.

Ukusansalikwa kwa Muno Nshiku Ukwa Bufyashi bwa kwa Satana

16. Muno nshiku, ni bani baasansalikwa pamo nga ababa ulubali lwa bufyashi bwa Nsoka, kabili baasansalikwa shani?

¹⁶ Mu kupashanya Yesu Kristu, Abena Kristu ba cine balitwalilila ukusansalika Insoka no bufyashi bwa iko ukwabulo mwenso. Mu 1917, Abasambi ba Baibolo, nga fintu Inte sha kwa Yehova shaishibikwe pali iyo nshita, basabankenye icitabo ca The Finished Mystery, umo basansalike ubumbimunda bwa bashimapepo ba Kristendomu. Ici cakonkelwepo no kusuminishanya kwakosa ukwapulintilwe mu 1924, ukwakwete umutwe wa kuti Ecclesiastics Indicted. Amamilioni 50 yalyananishiwe mwi sonde lyonse. Mu 1937, J. F. Rutherford, uwali pali yo nshita presidenti wa Watch Tower Society, alumbulwile ukusansalika kwa maka ukwa bufyashi bwa kwa Satana mu malyashi ayaleti “Exposed” [“Bwasansalikwa”] na “Religion and Christianity” [“Imipepele no buKristu”]. Mu mwaka wakonkelepo, ilintu amabumba pa mabungano 50 yalekutika, apeele ilyashi ilya kuti “Face the Facts” [“Ukulolenkana ne Fishinka”] mu nsale shibomfya amatamba ya radio ukufuma ku London, England. Umweshi umo pa numa, ukubomfya kwatanunuka ukwa radio mu United States kwasendele ilyashi lyaleti “Fascism or Freedom.” [“Bufasizimu nelyo Ubuntungwa”]. Pali aya malyashi palundilwe no kusansalika kwa maka mu fitabo pamo nga Enemies [Abalwani] na Religion [Imipepele] e lyo na mu katabo kaleti Uncovered [Basansalikwa]. Mu kumfwana ne cali nacisabankanishiwa ukutendeka muli ba 1920, icitabo ca kuti Ukusokolola—Akalume ka Kuko Kakalamba Nakapalama!,a nomba icapulintwa mu ndimi 65, cishibisha intungulushi sha bupolitiki ishabotelela na bashimakwebo bakalamba aba bufumfuntungu abafunuka, ukuti baba pa kati ka filundwa fyaba pa ntanshi ifya bufyashi bumoneka ubwa Nsoka. Lintu intungulushi sha bupolitiki shakwata icibelesho ca kubepa libili libili ku kulufya abatekwa babo, ukukanalanga umucinshi ku kushila kwa mulopa, no kutitikisha ababomfi ba kwa Yehova (na muli ifyo ukulangisha ulupato ku bufyashi bwa mwanakashi wa kwa Lesa), mu kushininkisha shiishibisha ishine ngo lubali lwa bufyashi bwa Nsoka. E fyo caba na kuli bashimakwebo bakalamba aba bufumfuntungu, abo ukwabula no kusakamikwa na kampingu wabo nangu panono, babepo bufi pa kuti benganonkelamo indalama, abapanga nelyo ukushitisha ifintu ifyaishibikwa ukuti filalwalika.

17. Lishuko nshi ilya mu nshita ilicili ilyaisuka ku bantu umo umo abalumbuka abengafuma mu micitile ya ici calo?

¹⁷ Te bonse abantu abakantaikwa ku mipepele ya mu calo, amapolitiki, nelyo amakwebo abakesapendelwa pamo mu kupelako ngo lubali lwa bufyashi bwa Nsoka. Bamo muli aba baume na banakashi balesa mu kukumbwa Inte sha kwa Yehova. Babomfya amaka yabo ku kubaafwa kabili mu nshita yalinga balapokelela fye no kupepa kwa cine. (Linganyako Imilimo 13:7, 12; 17:32-34.) Kuli bonse aba musango yo, kwaliya ubwite bwa kuti: “Nomba, mwe shamfumu, shilimukeni; salapukeni, mwe bapingushi ba pano isonde; bombeleni Yehova mu katiina, kabili angeni mu kututuma. Mufyompeni mu cishinka, epali aba no bukali, kabili mwalobela mu nshila; pantu kuti bwapya bwangu ubukali bwakwe—balishuka bonse abooba muli wene!” (Ilumbo 2:10-12) Mu cine cine, caliba icakatamisha kuli bonse abafwaya ububile bwa kwa Yehova ukubombelapo nomba, ilyo Kapingula wa mu muulu ashilaisalako ku mwinshi!

18. Nangu line tababa lubali lwa bufyashi bwa mwanakashi, ni bani nangu ni fyo ababa ni bakapepa ba kwa Yehova?

¹⁸ Ni abo fye beka abakapanga Ubufumu bwa mu muulu e baba ulubali lwa bufyashi bwa mwanakashi. Impendwa ya aba inono. (Ukusokolola 7:4, 9) Nalyo line, kwaliba ibumba likalamba ilya bambi, ee, amamilioni, abo pamo nga bakapepa ba kwa Yehova bapembelela umweo wa muyayaya pali paradise wa pe sonde. Ukupitila mu milandile na mu micitile, basosa ku basubwa ba kwa Yehova ati: “Tuleya na imwe, pantu natuumfwo kuti muli na Lesa.”—Sekaria 8:23.

19. (a) Kusalapo nshi abantu bonse bafwile ukusala? (b) Ni kuli bani ukucilisha uko ukulomba kwacincila kulepeelwa ukwa kuti babombe mano mano ilyo ishuko lya mu nshita liciliko?

¹⁹ Ino nomba e nshita iyo umutundu wa muntu onse ufwile ukusalapo. Bushe balefwaya ukupepa Yehova no kusumbula bumulopwe bwakwe, nelyo bushe bali no kusuminisha Satana ukuba kateka wabo ukupitila mu kucita ifintu ifimutemuna? Abantu mupepi na mamilioni yasano ukufuma mu nko shonse baliminina ku lubali lwa kwa Yehova, mu kubishanya na bashalapo aba bufyashi bwa mwanakashi, impyani sha Bufumu. Bambi amamilioni 8 balilangisha ubuseko mu kusambilila Baibolo na bene nelyo ukusangwa ku kulongana kwabo. Kuli aba bonse, Inte sha kwa Yehova shileti: Umwinshi ucili nawisuka! Iminineni ku lubali lwa kwa Yehova ukwabulo kutwishikwa. Pokeleleni Kristu Yesu ngo Bufyashi bwalaiwa! Mu kusekelela bishanyeni no kuteyanya kwa kwa Yehova ukumoneka. Shi namukapokeleleko amapaalo yonse fye ayo Ali no kupayanya ukupitila mu kuteka kwa Mfumu, Kristu Yesu.

[Futunoti]

Bushe Uleibukisha?

◻ Nani aba e Nsoka iyaloshiwako pa Ukutendeka 3:15? Kabili umwanakashi nani?

◻ Mibele nshi ishibisha ubufyashi bwa Nsoka?

◻ Ni shani fintu Yesu asansalike ubufyashi bwa Nsoka?

◻ Ni bani baasansalikwa pamo ngo lubali lwa bufyashi bwa Nsoka muno nshiku?

◻ Cinshi cifwaikwa ukubombwapo ne pamfya pa kusengauka ukupendelwa pamo no bufyashi bwa Nsoka?

[Icikope pe bula 10]

Yesu asansalike intungulushi sha mapepo isha bumbimunda ukuti baali bufyashi bwa Nsoka