Isukulu lya Gileadi Lyatuma Ikalasi lya Liko Ilyalenga 100

ISUKULU lya Watchtower Bible School of Gilead lyalibomba ulubali lwacindama mu kubilisha Ubufumu bwa kwa Lesa ukwa mu cibulungwa ukwa muno nshiku. Ukutula pantu Isukulu lya Gileadi lyatendekele ukukansha bamishonari mu 1943, abapita muli lyene balibomba mu fyalo ukucila pali 200. Pa March 2, 1996, ikalasi ilyalenga 100 lyalipwishishe isukulu lyabo.

Abasambi basangilwe ku sukulu mu nshita lintu imfula yabuuta iyatikama ukucila pa mamita yabili yalokele mu ncende ukwabela Watchtower Educational Center ku Patterson, New York. Te ca kupapa ukuti, imfula yabuuta yaleloka na pa bushiku balepwishe sukulu. Nangu ni fyo, iciyanda caliswile, na mabumba ayapulilemo balekutikila ukufuma ku Patterson, Wallkill, na ku Brooklyn—bonse pamo baali 2,878.

Theodore Jaracz, icilundwa ca muli Komiti wa Kusambilisha uwe Bumba Litungulula, e wali ceyamani. Pa numa ya kusengela mu kukaba abatandashi baishile ukufuma mu fyalo ifingi, alaalike bonse ukwiminina no kwimbo lwimbo 52. Iciyanda caiswilemo no kulumba kuli Yehova ilyo baleimbo lwa kuti “Ishina lya kwa Shifwe,” ukufuma mu citabo ca Imbileni Yehova Amalumbo. Ulo lwimbo, pamo na mashiwi ya kwiswila aya kwa ceyamani pa lwa kubomfya amasomo ku kulumba Yehova, fyateyenye imibele yalinga kuli programu wali no kukonkapo.

Ukufunda kwa mu Malembo Ukufuma ku Bakalamba

Ulubali lwa kubalilapo ulwa programu lwakwete amalyashi ayepi aya kulanda ku balepwishe sukulu ukupeelwa ku babomfi ba kwa Yehova abakokole. Richard Abrahamson, umo uwa babomfi ba pa maofesi yakalamba uwatendeke umulimo wakwe uwa nshita yonse mu 1940, acincishe ili kalasi ukuti: “Twalilileni Ukulateuluka.” Abacinkwileko kuti kale kale balipita mu tushita twalekanalekana utwa kuteululwa mu bumi bwabo nga Abena Kristu, ukusanshako na mu myeshi yabo isano iya kuba pa sukulu pa Gileadi. E co mulandu nshi balingile ukutwalilila ukulateuluka?

Kalanda alondolwele ukuti inumbwilo yabomfiwe na Paulo pali 2 Abena Korinti 13:11 (NW) “itubulula ukuti mibombele ya kulunduluka, ukuinashisha kwatwalilila ku kumumunga kwa kwa Yehova nelyo ukulopololwa kwa umo, ukusumbwamo bwino, pa kuti uyo muntu engafika pa fipimo fyakakala ifya kwa Yehova.” Mu mulimo wabo uwa mu fyalo fya cilendo, abapwishishe sukulu bali no kulolenkana ne fya kusonsombe citetekelo cabo ifipya. Balekabila ukusambilila ululimi ulupya, ukuiteulwila ku lutambi ulupya no musango wa mikalile, no kulaalukila ku misango yalekanalekana iya cifulo ca kubombelamo. Na kabili bakulabomba na bantu ba buntu bwapusanapusana mu mayanda ya bamishonari na mu filonganino fyabo ifipya. Nga bengabomfya mu kusakamana ifishinte fya Baibolo muli iyi mibele yonse, mu kuba no kuitemenwa kwa kuteuluka, lyene, nga fintu umutumwa Paulo alembele, na kabili kuti ‘batwalilila ukusekelela.’

John Barr, umo uwa filundwa fya mwi Bumba Litungulula fisano abalandilepo pali uyu programu, afumishe umutwe wakwe uwa lyashi muli 1 Abena Korinti 4:9. Acinkwileko bakomfwa bakwe ukuti Abena Kristu baba ca kutamba kuli bamalaika na ku bantu. Atile: “Ukwishibe ci kulalundako apakalamba ku bucindami bwa nshila ya Bwina Kristu mu bumi, maka maka lintu aishibo kuti ku cintu asosa na cintu acita, kuti cayambukila nga nshi abalemonako, abashimoneka na bamoneka. Ndesubila ukuti ici cili cintu cimo icingabe cisuma nga nshi kuli imwe bonse bamunyina batemwikwa na bankashi aba mwi kalasi lyalenga 100 ilya Gileadi ukulaibukisha ilyo mwalaya ku fifutu fye sonde ifyabo kwalepesha.”

Munyina Barr acincishe abana be sukulu 48 ilyo baleafwilisha abapale mpaanga ukusambilile cine, ukulaibukisha ukuti “kubo kusekelela pa cinso ca bamalaika ba kwa Lesa pa mubembu umo uwalapila.” (Luka 15:10) Ukulosha kuli 1 Abena Korinti 11:10, alangilile ukuti imibele ya umo iya mutima ukulosha ku mitantikile ya teokrasi tayambukila fye bamunyina na bankashi abo tumona lelo na bamalaika abo tushimona. Fintu cabe ca kunonsha ukulaibukisha iyi mimwene yasaalala!

Icilundwa cimbi ice Bumba Litungulula, Gerrit Lösch, na o uwapitamo mwi Isukulu lya Gileadi, alandile pa malembo pamo nga Ilumbo 125:1, 2; Sekaria 2:4, 5; na Ilumbo 71:21 ukulanga ukuti Yehova “alishingulukako ku bantu bakwe.” Alabacingilila ku mbali shonse. Bushe Lesa akabacingilila mu kati fye ka bucushi bukalamba mweka? “Iyo,” e fyo kalanda ayaswike, “pantu Yehova kale kale aliba ‘ilinga lya mulilo,’ ica kucinga ku bantu bakwe. Umwaka wa pa numa ya nkondo uwa 1919 wasangile abashalapo aba kwa Israele wa ku mupashi mu kucincila balefwaisha ukushimikila imbila nsuma iya Bufumu mu kusaalala kwa calo ku kubo bunte ku nko shonse. Baali beminishi ba Yerusalemu wa mampalanya uwa mu muulu. Yehova alyebekesha ukucingilila kwa bulesa ukwa aba beminishi nge bumba mu kati ka nshita ya mpela. Nani kanshi engatunguluka ukubalesha? Takuli nangu umo.” Fintu caba ica kwebekesha kuli bene na kuli bonse abo babishanya na bo mu kupalamisha mu kucito kufwaya kwa bulesa!

Ulysses Glass, uwaba mu ciputulwa cipekanya amasambililo, akoseleshe ili kalasi ‘ukunoka icifulo cabo mu kuteyanya kwa kwa Yehova ukwa mu kusaalala kwa calo.’ Icifulo yaba mibele nelyo imibombele maka maka iyalingana no kulamuka kwa muntu nelyo ifyo aba. “Mwe balesubilwa ukuba bamishonari mwalisange cifulo mu kuteyanya kwa kwa Yehova ukwa mu kusaalala kwa calo,” e fyo abilishe. “Lelo, nangu cingabe ca mutengo pali ino nshita, ili fye ni ntendekelo ya bumi bwenu nga bamishonari.” Bali no kukabila ukuibikilishako ukubomfya bwino ukulamuka kwabo no kulinga mu mulimo waibela untu Yehova no kuteyanya kwakwe alebapeela.

Ilyashi lya kulekelesha muli ulu lubali lwa programu lyapeelwe na Wallace Liverance, uwaba mu ciputulwa cipekanya masambililo ya Gileadi uwabombele pa myaka 17 mu Bolivia. “Bushe muli no kwesha Lesa?” e fyo aipwishe ili bumba lya bana be sukulu. Ni shani balingile ukucite co? Uluko lwa Israele lwaeseshe Lesa mu nshila yalubana. (Amalango 6:16) “Mu kushininkisha, ukwesha Lesa ukupitila mu kuilishanya nelyo ukuŋwinta nelyo nalimo ukupitila mu kubulishe citetekelo mu nshila abombelamo ifintu cena calilubana,” e fyalondolwele kalanda. “Ilyo mukafika mu mulimo wenu uupya, mukalecincintila uko kukongama,” e fyo abacincishe. Ni nshila nshi, kanshi, iyalinga iya kweseshamo Lesa? “Yaba ya kucetekela conse ico alanda, ukucita ifyo fine fye alandile, e lyo lyene ukushiila mu maboko yakwe ifili no kufumamo,” e fyalondolwele Munyina Liverance. Nga fintu camonwa muli Malaki 3:10, Yehova alaalika abantu bakwe ukuti: “Shi mundabwile [“munjeshe,” NW] kuli ico.” Alaile ukuti nga baletele ica pe kumi cabo mu cipao ce tempele, aali no kubapaala. “Mulandu nshi mushingamwena umulimo wenu uwa bumishonari mu nshila yapalako?” e fyaipwishe kalanda. “Yehova afwaya imwe ukutunguluka muli uyu mulimo, e co mwesheni. Kakatileni ku mulimo wenu. Teulukeni mu nshila alefwaya muteulukilemo. Shipikisheni. Mukamone nga takamupaale.” Mwandi kufunda kushaiwamina kuli bonse abalebombela Yehova!

Pa numa ya lwimbo programu alyalwike ukufuma ku malyashi no kuya ku kukonkana kwa kulanshanya kwa kwipusha.

Ukulandapo Kubomba Ukufuma mwi Bala

Mark Noumair, uutendeke ukubombela mu ciputulwa cipekanya amasambililo ya Gileadi, aitile abana be sukulu ukuti bashimikepo ifya kukumanya ifyo bakumenye mu butumikishi ilyo balesangwa kwi sukulu. Ifi fya kukumanya fyaebekeshe ubucindami bwa kuitendekelako ilyo tuli mu butumikishi kabili fyapeele ibumba lyonse imfundo shintu bengabomfya.

Lintu bali pa sukulu, abana be sukulu muli ili kalasi lya Gileadi banonshiwe maka maka pa kulabishanya ne filundwa fya baKomiti wa Misambo ukufuma ku fyalo 42, abo na bo baali pa Educational Center ya pa Patterson ku kukanshiwa kwaibela. Ubwingi ubwa bene bapwishishe isukulu pa Gileadi imyaka ya mu kubangilila. Muli programu, kwali ukwipushako abafumine mu makalasi yalenga 3, 5, 51, ne lyalenga 92, pamo na bafumine ku Isukulu Lyatanununwa ilya Gileadi ilya mu Germany. Fintu ukulandapo kwabo kwali ukwa kunonsha!

Bashimike fintu bamishonari bayumfwa pa kumona mu ncende babombela impendwa ya bakalumba ba kwa Yehova baingilishiwako ukufuma ku bancepela ukufika ku makumi ya makana. Bashimike ifyo baabombako umulimo wa kutwala imbila nsuma ku mekalo yasalangana mu mpili sha Andes na ku mishi ukwatula umumana wa Amazon. Balandile pa lwa kucitilo bunte ku bashaishiba kubelenga no kulemba. Bashimike pa fyo abene bene bashombweke ukusambilile ndimi ishipya na cintu abalepwishe sukulu mu cituntulu bengenekela pa lwa nshita cikasenda pa kuti bakalecitilo bunte no kupeela amalyashi mu lulimi pamo nge ciChinese. Balilangilileko ne nshila ya fyo bengashimikila mu ciSpanish na mu ciChinese. Balikomailepo ukuti bamishonari balacilapo kufumamo cimo lintu basambilila te lulimi fye lweka lelo na kabili ifyo abantu batontonkanya. Bashimike pa lwa mikalile ya kucula kwabipisha mu fyalo fipiina kabili batile: “Bamishonari balingile ukwishibo kuti iyi mibele ilingi line yaba ni pa mulandu wa kuti abantu balibaliila pa mutwe. Mishonari kuti acita bwino sana nga engalayumfwa ifyayumfwile Yesu—aleikatilwa abantu inkumbu, abaali nge mpaanga ishishaba na kacema.”

Pa numa ya lwimbo programu atwalilile ne lyashi kuli A. D. Schroeder, icilundwa ce Bumba Litungulula. Alikwete ishuko lya kuba umo uwa bakafundisha babalilepo pe Isukulu lya Gileadi lintu lyaiswilwe mu 1943. Pamo nge nsondwelelo yalinga iya uyu programu, alandile pa mutwe wa kuti “Ukwawila Yehova nga Shikulu Mulopwe.” Ilyashi lya kwikasho kusakamana ilya kwa Munyina Schroeder pe Ilumbo lyalenga Ps 24 lyaebekeshe bonse mwi bumba fintu fye ishuko lyakula ilya kwawila Yehova nga Shikulu Mulopwe.

Pa numa ya kupeela amadiploma, no lwimbo lwa kwisalila, Karl Klein uwa mwi Bumba Litungulula asondwelele ne pepo lya kufuma ku mutima. Mwandi aali ni programu musuma kabili uwa kupembesula lwa ku mupashi!

Mu nshiku shakonkele pa kupwishe sukulu, abaali mwi kalasi lyalenga 100 batendeke ukulaya ku mulimo wabo uwa bumishonari mu fyalo 17. Lelo te lyo baletendeka ubutumikishi bwabo. Kale kale bali nabakwata ubwishibilo bwashikatala ubwa fintu ubutumikishi bwa nshita yonse ubwa Bwina Kristu bwaba. Lintu balembeshe mwi sukulu lya Gileadi, baali, aba myaka ya bukulu 33 pali avareji kabili baali nabapoose myaka ukucila pali 12 mu butumikishi bwa nshita yonse. Bamo muli bene baali filundwa fya lupwa lwa Bethel ulwa Watch Tower Society ulwa mu cibulungwa conse. Bambi balibombelepo nga bakangalila benda. Ubwingi bwa bana be sukulu baali kale kale nababombako umulimo wa ku fyalo fya cilendo—mu Afrika, mu Bulaya, South America, ifishi fya muli babemba, e lyo na mu ncende umulandwa indimi sha cilendo mu fyalo fyabo mwine. Lelo nomba baleilunda kuli bamishonari bambi abengi abo baba abacankwa ukusoso kuti ‘Tuli no kubombela ukuli konse mu calo uko tukakabilwa.’ Ukufwaisha kwabo ukwa kufuma ku mutima kuli kwa kubomfya imyeo yabo ku kukusha ishina lya kwa Yehova.

[Akabokoshi pe bula 27]

Ifipendo fye Kalasi:

Impendwa ya fyalo fyaimininweko: 8

Impendwa ya fyalo batuminweko: 17

Impendwa ya basambi: 48

Avareji wa myaka ya bukulu: 33.75

Avareji wa myaka mu cine: 17.31

Avareji wa myaka mu butumikishi bwa nshita yonse: 12.06

[Icikope pe bula 26]

Ikalasi Lyalenga 100 Ilya Bapwishishe Sukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.