Shipeni Ilyo Ukulubuka Kulepalama

“Ine ndi na iwe ku kukupokolola, cisemo ca kwa Yehova.”—YEREMIA 1:19.

1, 2. Mulandu nshi ulupwa lwa buntunse lukabila ukulubulwa?

UKULUBUKA! We shiwi ulasansamusha! Ukulubulwa cipilibula ukupokololwa, ukupusushiwa ku mibele yabipa, iya bulanda. Ici cisanshamo itontonkanyo lya kuletwa mu mibele yawamako, iya nsansa.

² Fintu ulupwa lwa buntunse lukabila apakalamba ukulubulwa kwa musango yo pali ino nshita! Abantu konse konse balifinininwa no kufuupulwa ku mafya yakosesha—aya fya bunonshi, aya mu bwikashi, aya ku mubili, aya muntontonkanya, na ya mu nkuntu. Icinabwingi tabaikushiwa kabili balilengwe nsoni ku fyo ifintu fileenda mu calo kabili kuti batemwa ukuciwamyako.—Esaya 60:2; Mateo 9:36.

“Inshita Ishayafya”

3, 4. Mulandu nshi kubelele ukukabila kwakulilako ukwa kulubulwa nomba?

³ Apantu uno mwanda wa myaka uwalenga 20 walipita mu kucululuka kwakulisha ukucila umwanda wa myaka uuli onse umbi, kuli ukukabila kwakulilako ukwa kulubuka nomba ukushatala akubako. Ilelo, abantu ukucila pali bilioni umo bekala mu bupiina nakalya nakalya, kabili abantu napamo amamilioni 25 balasanguka abapiina cila mwaka. Cila mwaka abana napamo amamilioni 13 balafwa atemwa ku bulwele bwa kondoloka ku nsala nelyo kuli fimbi ifilengwa no bupiina—e kuti ukucila pali 35,000 e bafwa cila bushiku! Kabili amamilioni ya bakulileko balafwa bwangu ku malwele yalekanalekana.—Luka 21:11; Ukusokolola 6:8.

⁴ Inkondo ne fimfulunganya fileta abekashi fyalileta ukucula ukwingi nga nshi. Icitabo ca Death by Government (Imfwa Ilengwa no Buteko) cisoso kuti inkondo, ukukansana kwa mishobo no kwa mipepele, no kwipaya abantu babo ku mabuteko “fyalisenda imyeo ya bantu ukucila pa mamilioni 203 muli uno mwanda wa myaka.” Cikonkanyapo no kuti: “Impendwa ya cine cine iya bafwa kuti yafika mu mamilioni 360. Cili kwati umuntunse napumpuntwa ne cinkunka cabweluluka ica mu mwanda wa myaka walenga 14 icaleitwa Black Plague. Ee, napumpuntwa, lelo te ku tushishi tuleta amalwele, lelo ku kufwaisha Amaka.” Kalemba Richard Harwood alandilepo ati: “Lintu mwalinganyako inkondo sha batuutu isha mu myanda ya myaka iyapita, shishalila fye ukutali.”—Mateo 24:6, 7; Ukusokolola 6:4.

5, 6. Cinshi calenga inshiku shesu ukuba ishacilapo ukumanama?

⁵ Icalunda ku mibele ya kulenga ukumanama muli ino myaka caba kufulilako ukwa misoka ya lukaakala, bucisenene, no kubongoloka kwa ndupwa. Uwali kale umulashi uulolekesha pa masomo mu United States, William Bennet atile mu myaka 30 impendwa ya bantu mu United States yalingilishiweko ukufika ku maperesenti 41, lelo ulukaakala lwasumbene ukufika ku maperesenti 560, abana ba kupula bafikile ku maperesenti 400, ukulekana kwafikile ku maperesenti 300, ne cipimo ca kuipaya kwa bapungwe cafikile ku maperesenti 200. Profesa wa ku Princeton University John DiIulio, Jr., asokele ulwa kufulilako kwa “bakasansa bacishamo, abepaya, ukucena, ukwikata kama, ukwiba, ukutoba amayanda no kulenga amafya ya mu bwikashi ayabipisha. Tabatiina no museebanya wa kwikatwa, ukukalipwa kwa kupooswa mu cifungo, nelyo ukucusha kwa kampingu.” Muli ci calo, ubukomi cintu ca cibili ku fipaya sana abali ne myaka ya bukulu 15 ukufika ku 19. Kabili abana bafulilako abashilafisha imyaka ine bafwa ku kusungwa bubi bubi ukucila ku malwele.

⁶ Imisoka ya musango yo no lukaakala tafyapelela fye mu calo cimo. Ifyalo ifingi fishimika ukuti ifintu fyapalako filacitika. Cimbi icilenga uku kwingilishiwako caba kubomfya imiti ikola iyonaula amamilioni ya bantu. Inyunshipepala ya ku Australia iya Sydney Morning Herald yatile: “Ukukonka pa kushitisha ifyanso, ukushitisha kwa bufumfuntungu ukwa miti ikola pa kati ka fyalo nomba e bukwebo bwa cibili ubuleta sana indalama.” Icilenga na cimbi caba lukaakala na bucisenene ifyayandatila televishoni nomba. Mu fyalo ifingi, inshita umwana aleisa mu kuba ne myaka ya bukulu 18, ninshi alitamba amakumi ya makana ya lukaakala pa TV ne mintapendwa ya bucisenene. Ico ca konaula apakalamba, apantu ubuntu bwesu bumumungwa na cintu twingisha mu matontonkanyo yesu libili libili.—Abena Roma 12:2; Abena Efese 5:3, 4.

 7. Ni mu nshila nshi ubusesemo bwa mu Baibolo bwasobele imibele ya ndakai iyabipa?

⁷ Ubusesemo bwa Baibolo bwalisobele mu kulungika uku kwaluka kwabipisha ukwa fintu mu mwanda wesu uwa myaka. Bwasosele ukuti kwali no kuba inkondo sha mu calo conse, ifikuko fya malwele, ifipoowe, no kufulilako kwa bupulumushi. (Mateo 24:7-12; Luka 21:10, 11) Kabili lintu twalanguluka ubusesemo bwalembwa pali 2 Timote 3:1-5, cili kwati mulekutika ku lyashi lya pa mulabasa ilya cila bushiku. Bwishibisha inkulo yesu ukuti e “nshiku sha kulekelesha” kabili bulondolola abantu nga ‘baitemwa, abatemwe ndalama, aba bucintomfwa ku bafyashi, abashashila, abaumalala, ababulo kuiteka, abankalwe, abatuumikwa, abatemwo kwangala ukucisho kutemwa Lesa.’ Ifyo fine fye e fyaba icalo ilelo. Nga fintu William Bennett asumine ati: “Kuliko ubushininkisho ubwingi nga nshi ubwa . . . fintu ukutumpuluka kubotelele.” Calisoswa fye no kuti ukutumpuluka kwapwilile pa nkondo ya calo iya kubalilapo.

 8. Mulandu nshi Lesa aletele Ilyeshi mu nshiku sha kwa Noa, kabili ni shani fintu ici cayampana ku nshiku shesu?

⁸ Imibele ilelo naibipisha ukucila na fintu yali pa ntanshi ya Lyeshi lya mu nshiku sha kwa Noa, lintu “pano isonde paiswilepo ulufyengo.” Lilya, abantu mu cinkumbawile balikeene ukulapila ku nshila shabo ishabipa. Muli fyo, Lesa atile: “Pe sonde paisulapo ulufyengo ulwafuma kuli bene; kabili, mona, ine ndebonawila kumo ne sonde.” Mulamba apwishishe cilya calo ca lukaakala.—Ukutendeka 6:11, 13; 7:17-24.

Abantunse te Kuti Balubule

9, 10. Mulandu nshi tushilingile ukusuubilila mu bantunse ukuti bakatulubula?

⁹ Bushe amatukuto ya muntunse kuti yatulubulako kuli iyi mibele yabipa? Icebo ca kwa Lesa casuka ati: “Mwitetekela bakankaala, nangu mwana wa muntu uo takuli ukupususha muli wene.” “Te kwa muntu uuleya ukushikimika amatampulo yakwe.” (Ilumbo 146:3; Yeremia 10:23) Amakana ya myaka uku twafuma yalishinina ukuti ifyo fishinka. Abantunse balyesha imibombele yonse iingelenganishiwa iya bupolitiki, iya fya bunonshi, ne ya bwikashi, lelo imibele ibipilako fye. Akuba inshila ya kupikulwilamo iya buntunse, ino nshita nga twaliimona. Mu cifulo ca ico, icicitika ca kuti “abantu bacito lukambo ku bantu ku kubabifya.”—Lukala Milandu 8:9; Amapinda 29:2; Yeremia 17:5, 6.

¹⁰ Imyaka fye inono ku numa uku, uwali kale impanda mano ya bashilika uwa ku United States Zbigniew Brzezinski atile: “Insondwelelo ishingasengaukwa iya kubebeta ukuli konse ukwapaatukako ukwa kukongama kwa mu calo conse kuli kwa kuti iciwowo ca mu bwikashi, icimfulumfulu ca bupolitiki, ubwafya bwa mu fya ndalama, no kukansana kwa pa kati ka nko mu kupelako fili no kuba ifyaanana apakalamba.” Alundileko no kuti: “Icintiinya cilolenkene no mutundu wa muntu [cili] cimfulumfulu ca mu calo conse.” Uko kupimununa kwa mibele ya mu calo kuli ukwa cine na kucilisha ilelo. Ukulanda pa lwa ino nkulo iyabamo ukufulilako kwa lukaakala, umukululo wa bakalemba ba Register wa ku New Haven, Connecticut babilishe ati: “Imibele ilemoneka ukucila mu cipimo ica kuti tatwingaimika.” Iyo, imibele yabotelela iya cino calo tayakemikwe, pantu ubusesemo pa lwa shino “inshiku sha kulekelesha” na kabili bwatile: “Abantu babifi kabili abafutika bakalundulukila ku kubipo kucila, abalufya kabili abalufiwa.”—2 Timote 3:13.

11. Mulandu nshi imibele ilebipilako ishakawamishiwe ku matukuto ya bantunse?

¹¹ Abantunse te kuti bawamye iyi mibele pantu Satana e “mulungu wa nshita ino.” (2 Abena Korinti 4:4) Ee, “pano isonde ponse palaala mu maka ya Mubifi.” (1 Yohane 5:19; moneni kabili Yohane 14:30.) Baibolo yalilungika ukusosa pa lwa nshiku shesu ati: “Kalanda kuli imwe, mwe calo na bemba! pa kuti Kaseebanya naikila pali imwe, ali ne cipyu cikalamba, pa kwishibo kuti ali ne nshita inono fye.” (Ukusokolola 12:12) Satana alishiba ukuti ukuteka kwakwe ne calo cakwe fili mupepi no kupwa, e co apala “inkalamo iilelila, ukufwaya untu engalya.”—1 Petro 5:8.

Ukulubuka Nakupalama—Ni Bani Bakalubulwa?

12. Ni bani bakalubulwa mu kulubuka kulepalama?

¹² Imibele ileya ilebipilako fye pe sonde bushininkisho bukalamba ubwa kuti ukwaluka kukalamba—ukulubulwa kwawamisha icine cine—nakupalama nga nshi! Ni bani bakalubulwa? Ukulubuka kulepalama kuli abo abangwa ku fishibilo fya kusoka kabili ababombelapo mu kulinga. Yohane wa Kubalilapo 2:17 alangilila icifwile ukucitwa ati: “Pano isonde [imicitile ya fintu iya kwa Satana] paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.”—Moneni na 2 Petro 3:10-13.

13, 14. Ni shani fintu Yesu akomaile pa kukabila kwa kuba abalola?

¹³ Yesu asobele ukuti ubwikashi bwa lelo nomba line fye buli no kusendwa mu nshita ya bwafya “ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) E mulandu wine asokele ati: “Muyangwe, epali imitima yenu yalemenenwa ku buliili no kukolwakolwa na masakamika ya bwikashi buno, no bushiku bulya bwaisa pali imwe no kupumikisha kwati citeyo; pantu cikesa pali bonse abaikala pano nse ponse. Lelo loleni mu nshita yonse, mube abapaapaata ukuti mukose ku kupusuka kuli ifi fyonse ifikesapona.”—Luka 21:34-36.

¹⁴ Abo ‘abangwa’ no kutwalilila ‘ukulola’ bali no kusapika ukufwaya kwa kwa Lesa no kukucita. (Amapinda 2:1-5; Abena Roma 12:2) Aba e ‘bakapusuka’ ubonaushi buli no kuletwa nomba line pa micitile ya kwa Satana. Kabili kuti bacetekela umupwilapo ukuti bakalubulwa.—Ilumbo 34:15; Amapinda 10:28-30.

Kalubula Mukalamba

15, 16. Bushe Kalubula mukalamba ni ani, kabili mulandu nshi twashininkishisha ukuti amapingushi yakwe yakaba ayalungama?

¹⁵ Pa kuti ababomfi ba kwa Lesa bakalubulwe, Satana alekabila ukufumishiwapo kumo ne micitile yakwe iya fintu iya mu calo yonse. Ici cifwaya ukuti uwa kulubula acilepo amaka sana pa bantunse. Uyo ni Yehova Lesa, Shikulu Mulopwe Wapulamo, Kabumba wa maka yonse uwa bubumbo bwa kutiinya. E Kalubula mukalamba: “Ine, ine ndi Yehova, kabili tapali mupusushi umbi kano ine.”—Esaya 43:11; Amapinda 18:10.

¹⁶ Muli Yehova e mwaba amaka yonse, amano, ubulungi, no kutemwa. (Ilumbo 147:5; Amapinda 2:6; Esaya 61:8; 1 Yohane 4:8) E co lintu abombelapo pa mapingushi yakwe, kuti twashininkisha ukuti imibombele yakwe ikaba ya bulungami. Abrahamu aipwishe ati: “Bushe Kapingula wa pano isonde ponse takacite icalungama?” (Ukutendeka 18:24-33) Paulo abilikishe ati: “Bushe tutile kuli ukuulungana kuli Lesa? Nakalya!” (Abena Roma 9:14, 15) Yohane alembele ati: “Ifyo fine, mwe Shikulu Lesa wa maka yonse: ifya bupingushi bwenu fya cine kabili fya bulungami.”—Ukusokolola 16:7.

17. Ni shani fintu ababomfi ba kwa Yehova aba ku numa balangishe ukuti balicetekele amalayo yakwe?

¹⁷ Lintu Yehova alaya ukulubula, ukulubula akalubula ukwabula ukufilwa. Yoshua atile: “Tapawilepo nangu cimo ca mu fintu fyonse fisuma ifyo Yehova asosele.” (Yoshua 21:45) Solomone alondolwele ati: “Tapashele cintu nangu cimo ica pa fintu fisuma fyonse ifyo [asosele].” (1 Ishamfumu 8:56) Umutumwa Paulo atile ‘ukukanatetekela takwanenwine [Abrahamu]; . . . ashininkisho kuti [Lesa] wa maka ku kucite co alaile.’ Sara na o “atungile [Lesa] ukuti Wa cishinka uwalaile.”—Abena Roma 4:20, 21; AbaHebere 11:11.

18. Mulandu nshi ababomfi ba kwa Yehova ilelo bengacetekela ukuti bakalubulwa?

¹⁸ Yehova apusanako na bantunse, wena kuti acetekelwa umupwilapo, alafikilisha amashiwi yakwe. “Yehova wa milalo nalapa, ati: Cine cine ifyo napangile, e fyo cikaba, cine cine ifyo napandile amano, e fyo cikeminina.” (Esaya 14:24) E co lintu Baibolo yasosa ati “Shikulu aishibo kupokolola bakapepa ku ca kwesha, no kulinda abashalungama ukufika ku bushiku bwa bupingushi,” kuti twacetekela umupwilapo ukuti ici cikacitika. (2 Petro 2:9) Nelyo fye lintu batiinishiwa ukonaulwa ku balwani ba maka, ababomfi ba kwa Yehova balashipa pa mulandu wa mibele ya mutima iyo alangishe mu bulayo bwakwe kuli umo uwa bakasesema bakwe iya kuti: “Bene bakalwa na iwe, lelo bakakufilwa; pantu ine ndi na iwe ku kukupokolola, cisemo ca kwa Yehova.”—Yeremia 1:19; Ilumbo 33:18, 19; Tito 1:2.

Ukulubulwa mu Nshiku sha ku Numa

19. Ni shani fintu Yehova alubwile Lote, kabili cinshi capala kuli ci mu nshiku shesu?

¹⁹ Kuti twakoseleshiwa apakalamba ilyo twapituluka mu fya kupusushapususha fimo ifya kwa Yehova ifya ku numa. Ku ca kumwenako, Lote ‘aleba no bulanda’ ku bubifi bwa mu Sodomu na Gomora. Lelo Yehova alyumfwile “ukukuutila” ilya misumba. Pa nshita yalinga, atumine inkombe ukucincisha Lote no lupwa lwakwe ukufuma muli ilya ncende ilyo line fye. Cinshi cafuminemo? Yehova ‘alipokolwele Lote umulungami,’ “alengele imisumba ya Sodomu na Gomora ukube mito.” (2 Petro 2:6-8; Ukutendeka 18:20, 21) Ilelo nalyo, Yehova alomfwa ukukuuta pa lwa bubifi bwa kapela makufi ubwa cino calo. Lintu inkombe shakwe isha muno nshiku shapwishishisha umulimo wa shiko uwa kushimikila uwe pamfya ukufika apo Lesa umwine alefwaya, cino calo akacicita kantu no kulubula ababomfi bakwe nga fintu alubwile Lote.—Mateo 24:14.

20. Londololeni ifyo Yehova alubwile Israele wa pa kale ukufuma mu Egupti.

²⁰ Mu Egupti wa pa kale amamilioni ya bantu ba kwa Lesa balitekelwe ubusha. Yehova asosele pa lwa bene ati: “Naumfwa ne nkuuta yabo . . . Naishibo kukalipwa kwabo; kabili [ndeika] ku kubapokolola.” (Ukufuma 3:7, 8) Nangu cibe fyo, pa numa abe naleka abantu ba kwa Lesa ukuya, Farao alyalwike kabili alibasupile no mulalo wakwe uwa maka. Camoneke kwati abena Israele balicilikilwe kuli Bemba Wakashika. Lelo Mose atile: “Mwitiina, iminineni ndi, no kumono kupususha kwa kwa Yehova, uko alecita kuli imwe lelo.” (Ukufuma 14:8-14) Yehova ayakenye Bemba Wakashika, na bena Israele balipuswike. Imilalo ya kwa Farao yaile fye ilebasupila, lelo Yehova abomfeshe amaka yakwe ica kuti ‘bemba alibebishe: baibile ngo mutofwe mu menshi ayakankaala.’ Pa numa, Mose alimbile ulwimbo lwa kusekelela kuli Yehova ati: “Ni ani uwaba nga imwe, umukankaala ku mushilo, uwa kutiinwa ku milimo ya lulumbi, uucite fipesha amano.”—Ukufuma 15:4-12, 19.

21. Ni shani fintu abantu ba kwa Yehova balubwilwe ukufuma kuli Amone, Moabu, na Seiri?

²¹ Pa kashita kambi, inko ishilwani isha Amone, Moabu, na Seiri (Edomu) bapangile ukonaula abantu ba kwa Yehova. Yehova atile: “Mwitiina, nangu kutentuka ku cinso ca kwa cinkupiti [wa balwani] uyu mukalamba; pantu ubulwi te bwenu, kano bwa kwa Lesa. . . . Tamwakalwe . . . Mukeminine, no kumono kupususha kwa kwa Yehova, uwaba na imwe.” Yehova alilubwile abantu bakwe ukupitila mu kuleta icimfundawila mu mulalo wa balwani ica kuti baipayene beka beka.—2 Imilandu 20:15-23.

22. Kulubula nshi ukwa cipesha amano uko Yehova alubwile Israele ukufuma kuli Ashuri?

²² Lintu Icalo Cakwatishe Amaka ica Ashuri caimine Yerusalemu, Imfumu Sankeribu apumishe Yehova ukupitila mu kweba abantu bali pe linga ati: “Ni yani iya mu milungu yonse iya fyalo ifi [ifyo nacimfya] iyapokolole fyalo fya iko mu kuboko kwandi, pa kuti Yehova engapokolola Yerusalemu mu kuboko kwandi?” Aebele ababomfi ba kwa Lesa ati: “Mwileka Hisekia amulenge ukutetekela Yehova, ati, Ukupokolola Yehova akatupokolola.” Hisekia lyene apepele mu kufumaluka ukuti balubulwe, “no kuleka amabufumu yonse ya pano isonde yeshibe ukuti imwe Yehova muli Lesa mweka.” Yehova aumine abashilika ba Ashuri 185,000, na babomfi ba kwa Lesa balilubwilwe. Pa numa, ilyo Sankeribu alepepa imilungu yakwe iya bufi, abana bakwe balimwipeye.—Esaya, ifipandwa 36 na 37.

23. Mepusho nshi pa lwa kulubulwa muno nshiku ayalekabila ukwasukwa?

²³ Mu kushininkisha kuti twashipa lintu twamona ifyo Yehova alubwile abantu bakwe mu cipesha amano ku nshiku sha ku numa. Nga lelo? Ni mu mibele nshi iya busanso ababomfi bakwe aba busumino bali no kuba nomba line iyo ikafwaya ukulubula kwakwe ukwa cipesha amano? Mulandu nshi apembelela na nomba talabalubula? Kufikilishiwa nshi kukabako ukwa mashiwi ya kwa Yesu aya kuti: “Pa kutendeko kubako ifi fintu, inukeni, inuneni imitwe; pantu ukulubuka kwenu nakupalama”? (Luka 21:28) Kabili ni shani fintu ababomfi ba kwa Lesa abo kale kale abafwa bakalubulwa? Icipande cikonkelepo cili no kubebeta ifi fipusho.

Amepusho ya Kupitulukamo

Mulandu nshi kubelele ukukabila kukalamba ukwa kulubulwa?

Mulandu nshi tushilingile ukusuubilila mu bantunse ukuti bakatulubula?

Ni bani bakalubulwa mu kulubuka kupaleme?

Mulandu nshi twingacetekela mu kulubula kwa kwa Yehova?

Fya kumwenako nshi ifya kulubula kwa ku numa ifya kukoselesha?

[Icikope pe bula 10]

Abrahamu aali pali abo abacetekele Yehova mu kukumanina