Baacitile Ukufwaya kwa kwa Yehova

Ica Kumwenako ca Kuipeela Bulilambo na Bucishinka

KULI shibulimi wacaice uwitwa Elisha, ubushiku ubwatendeke ne mibombele ya lyonse iya kulima bwaishilebo bushiku ubwacindamisha mu bumi bwakwe. Ilyo alebomba mwi bala, Elisha mu kukanaenekela atandalilwe na Eliya, kasesema wa ntanshi mu Israele. ‘Cinshi alefwaya kuli ine?’ Nalimo e fintu Elisha alangulwike. Taali na kulolele casuko pa nshita ntali. Eliya apoosele ica kufimbana cakwe pali Elisha, ukulango kuti bushiku bumo Elisha akabe mpyani yakwe. Elisha tayangwishe ubu bwite. Ilyo line fye, ashile ibala lyakwe no kuba kapyunga wa kwa Eliya.—1 Ishamfumu 19:19-21.

Ilyo papitile nalimo imyaka 6, inshita ya kusendwa kwa kwa Eliya yalifikile. Ili lyashi ilya kusendwa kwakwe litwa “ica kushimika icacilapo ukucincimusha” ica mu Amalembo ya ciHebere.

Eliya Apekanishisha Ukusendwa

Eliya alefwayo kutandalila Betele, Yeriko, na Yordani umuku wa kulekelesha. Ici, casanshishemo ukwende ntamfu iyalepa, na mumo mumo ukupita mu mpanga iya mpili kabili iyakalabana. Baleti nga bafika pa cifulo cimo, Eliya akonkomesha Elisha ukushala apo pene. Lelo Elisha apampamine pa kuba na shikulu wakwe ukufika na ku mpela.—2 Ishamfumu 2:1, 2, 4, 6.

Ilyo baali mu Betele na mu Yeriko, “aba bwina kasesema” baishile kuli Elisha.a Bamwipwishe ukuti: “Bushe nuishibo kuti buno bushiku Yehova alesenda sokulu pa mutwe obe?” Abaswike ati: “Na ine ninjishiba, talaleni.”—2 Ishamfumu 2:3, 5.

Eliya na Elisha balungeme ku mumana wa Yordani. Lintu bafikile ku Yordani, Eliya acitile icipesha amano ilyo aba bwina kasesema 50 baletamba akatalamukila. “Eliya abuulile ica kufimbana cakwe, acifungile, no kuuma pa menshi, na yo yalyakanike uku no ku, no kuleka bonse babili baabuke apauma.”—2 Ishamfumu 2:8.

Ilyo baabwike, Eliya atile kuli Elisha: “Lombe cintu ico ndekucitila, ncili nshilasendwa pali iwe.” Elisha alombele “icakaniko ca pabili” ica mupashi wa kwa Eliya—e kutila, icakaniko ca miku ibili icalepeelwa ku mwana mwaume ibeli. Mu cituntulu, Elisha alicindike Eliya nge fyo umwana mwaume ibeli engacindika wishi. Ukulundapo, alisubilwe ukube mpyani ya kwa Eliya pamo nga kasesema wa kwa Yehova mu Israele. E co ukulomba kwakwe takwali ukwa kuitemwa nelyo ukushalinga. Nangu ni fyo, Eliya pa kwiishibo kuti ni Yehova fye e wingaasuka uku kulomba, ayaswike mu bufuuke ati: “Walombe cayafya.” Lyene alundilepo ukuti: “Nga wamona ine ilyo ndesendwa pali iwe, ninshi cilebe fyo kuli iwe; lelo nga taumweneko tacabe ifyo.”—2 Ishamfumu 2:9, 10; Amalango 21:17.

Ukwabulo kutwishika Elisha alipampamine nga nshi pa kulambatila kuli shikulu wakwe ukucila kale lyonse. Lyene kwamoneke, “iceleta lya mulilo, na bakafwalo ba mulilo.” Elisha mu kutulumuka alimweneko lintu Eliya mu cipesha amano asendelwe mu nkuuka no kutwalwa ku cifulo cimbi.b Elisha atoolele ica kufimbana ca kwa Eliya no kubwelela ku lulamba lwa mumana wa Yordani. Aumine pa menshi, no kutila: “Ali kwi Yehova, Lesa wa kwa Eliya?” Amenshi yalyakanikene pa kati, ukushinina ukuti Elisha aletungililwa na Lesa nge mpyani ya kwa Eliya.—2 Ishamfumu 2:11-14.

Ifyo Twingasambililako

Lintu aitilwe ku mulimo waibela pamo na Eliya, Elisha mu kwangufyanya ashile bala lyakwe no kuyapyungila kasesema uwa ntanshi mu Israele. Mu kumonekesha, alebomba imilimo imo imo iyasuulwa, pantu aishibikwe nga umo “uwalesambikisha Eliya amenshi.”c (2 Ishamfumu 3:11) Nangu ni fyo, Elisha amwene umulimo wakwe nge shuko, kabili alambatile kuli Eliya muli bucishinka.

Ilelo ababomfi ba kwa Lesa abengi balangisho mupashi uwapalako uwa kuipeela bulilambo. Bamo balishe “filime” fyabo no bwikalo bwabo ku kuyashimikila imbila nsuma mu fifulo fya kutali nelyo ukubomba nge filundwa fya lupwa lwa Bethel. Bambi baliya ku fyalo fya cilendo mu kubomba pa makuule ya Sosaite. Abengi balisumina nalimo icingetwa imilimo iyasuulwa. Nalyo line, pa bantu abalebombela Yehova tapengaba uubombo mulimo uwasuulwa. Yehova alatasha bonse abamubombela mu kuitemenwa, kabili akapaalo mupashi wabo uwa kuipeela bulilambo.—Marko 10:29, 30.

Elisha alambatile kuli Eliya ukufika na ku mpela. Tafwaile ukusha kasesema umukoloki nelyo fye apeelwe ishuko ilya kucite fyo. Ukwabulo kutwishika, ukwampana kwapalamisha na Eliya uko alundulwile kwalengele ukuti ukutemwa kwakwe ukwa bucishinka kube ukwa nsansa. Ilelo, ababomfi ba kwa Lesa baletukuta mu kukosho kwampana kwabo na Lesa no kupalamisha ku basumina banabo. Icikakilo ica kwikatana cikapaalwa, pantu Baibolo, pa lwa kwa Yehova isoso kuti: “Ku wa bucishinka mukaba aba bucishinka.”—2 Samwele 22:26, NW.

[Amafutunoti]