Mulandu Nshi Cibelele Icayafya Ukucetekelo Muntu?

‘BUSHE kuti wacetekelo uli onse shino nshiku?’ Nakalimo mwalyumfwapo umo uwakalifiwe uko aipwishe ubo bwipusho. Nangu pambi imwe bene mwalipushapo ubo bwipusho ilyo mwafulilwe pali cimo icamucitikile.

Kwena, isonde fye lyonse apo lyapela kuliko ukukanacetekela amateyanyo na bantu bambi. Ilingi line, ca nsambu ukuti uku kukanacetekela kubeko. Bushe cine cine uuli onse alenekela ubwingi bwa bapolitishani ukucita fintu balaile ilyo bashilabasala? Ukufwailisha kwa mu 1990 pa bana be sukulu 1,000 aba mu Germany kwalangilile ukuti ilintu palipo amaperesenti 16.5 abacetekele ukuti bapolitishani bali no kupwisha amafya ya mu calo, ukufika ku maperesenti 33 bena balitwishike sana. Kabili icinabwingi batile tabacetekele ifyo bapolitishani kuti baba na maka ya kupwisha amafya kabili tabacetekele fyo kuti baitemenwa ukuyapwisha.

Inyunshipepala ya Stuttgarter Nachrichten yailishenye ukuti: “Bapolitishani abengi sana batontonkanya fye ntanshi pa kuisekesha abene, e lyo pa numa, nakalimo e lyo basakamanako ababasalile.” Aba mu fyalo fimbi na bo e fyo balanda. Inyunshipepala ya The European yalandile pa calo cimo ukuti: “Pa kuti imisepela isuule bapolitishani paliba umulandu wine wine uwalenga kabili na bakalamba bene balasuminishako.” Iyi nyunshipepala yalandilepo kuti ‘bakasala ilingi line balafwampula ifilonganino fya mashiwi ya calo pa buteko.’ Iyi nyunshipepala na kabili yatile: “Uuli onse uushingashinga apali abacaice [muli cilya calo] tacipoosa na nshita aleshibe fyo tabacetekela muntu nangu umo no kuti bayumfwa ababulo buyo.” Lelo ukwabulo kucetekelwa ku cintubwingi, nangu fye buteko bwa demokrasi tabwingacita icili conse. Uwali kale presidenti wa ku United States of America, John F. Kennedy inshita imo atile: “Apashintilila ubuteko ukuti bubombe bwino ni pa kucetekelwa ne cintubwingi.”

Ukubongoloka kwa kupumikisha kwa fya bunonshi e lyo no kufulungana kwa mitukuto ya kufwayo kunonka bwangu fyalilenga abengi ukushimunuka ukucetekela ifya bunonshi. Lintu ubukwebo bwa fipe ubwa mu calo conse bwafulungene mu October 1997, magazini umo alandile pa lwa “kubulwo kucetekela ukwa cipesha mano kabili limo limo ukwabulamo amano,” e lyo na pa “lwambu lwa kukanacetekela.” Na kabili magazini atile “[mu calo cimo ica mu Asia] ukucetekela nakucepa sana ica kuti no buteko bwine bulipo . . . katwishi nga bukatwalilila.” Mu kusupula, magazini alandile fye cishinka ati: “Ubunonshi bwashintilila pa kucetekelwa.”

Imipepele na yo ilefilwa ukulenga abantu ukukwata ukucetekela. Ulupapulo lwa fya mipepele ulwa ku Germany ulwa Christ in der Gegenwart ku ca bulanda lwalandapo ukuti: “Ukucetekela kuntu Icalici lyacetekelwa ku bantu kuleya kulebwelela fye pa nshi.” Pa kati ka 1986 na 1992, abena Germany abakwete nelyo abacetekele icalici eyefilya, impendwa yabo yabwelele pa nshi ukufuma ku maperesenti 40 ukufika kuli 33. Na kuba, mu calo caleitwa East Germany, impendwa yaishilefika fye na pe samba lya maperesenti 20. Lubali lumbi, impendwa ya bantu abacetekeleko panono nelyo abashacetekele fye nangu panono mwi calici yena yalikulile ukufuma pa maperesenti 56 ukufika ku maperesenti 66 mu calo caleitwa West Germany na maperesenti 71 mu calo caleitwa East Germany.

Ukubwelela pa nshi mu kucetekela kulemonekesha sana mu mbali shimbi ishishili sha mapolitiki, ifya ndalama, ne mipepele—impanda shitatu ishaikatilila ubwikashi bwa buntunse. Ica kumwenako cimbi cili bantu babombela pa kukoshe funde. Inshila sha kuleukilamo ukukandwa ishaba mu mafunde ya fya bumpula mafunde, ubwafya mu kubomfye funde mu bulungi, ne nshila shatwishikwa isho ifilye fipingwilamo imilandu fyalilenga abantu ukukanacetekela uuli onse. Ukulingana no kushimika kwa magazini wa Time, “ukukalifiwa kwa bekashi na bakapokola nakufika pa cipimo ca kuti tabalecetekela ifilye ifyo libili libili fileka incitatubi ukubwela na kabili ukulacusha abantu.” Pa mulandu wa kuti bakapokola balapeelwe milandu ya mafisa kanwa no kukaluka, kanshi na bakapokola bene tabalecetekelwa sana.

Ukulosha ku mapolitiki ya pa kati ka fyalo, ukubongoloka kwa kulanshanya ifya mutende no kutobe fipangano fya kuleke nkondo e filango kubulwo kucetekela. Umwiminishi wa United States of America ku United Nations, Bill Richardson asontele icikalamba icicilikila ukusango mutende mu Middle East, ukulanda mu kwanguka fye ati: “Takwaba ukucetekelana.”

Ilintu tulelande fyo, abantu abengi tabacetekela fye nangu ni balupwa lwabo abapalamisha ne fibusa, abantu bene abo abantunse ilingi line babutukilako abengabalangulukilako no kubasansamusha lintu baba na mafya. Cili kwati fintu kasesema wa ciHebere Mika acilondolwele ati: “Mwitetekela munenu, mwisuubila cibusa; bake miinshi ya kanwa kobe ku usendamina pa cifuba cobe.”—Mika 7:5.

Icishibilo ca Nshita Tufikilepo

Umwina Germany uwasambilile fya mitontonkanishishe Arthur Fischer pali nomba line bamwambwile ngo walesoso kuti: “Mu mbali fye shonse ukucetekela kwa kuti kukabako ubuyantanshi mu mikalile ya ku ntanshi iya muntu nakubwelela pa nshi icine cine. Abacaice baletwishika nga amateyanyo ya mu bwikashi kuti yabafwilisha. Tabakwete ukucetekela na kabili, cibe ni mu fya mapolitiki, ifya mipepele, nelyo mu kuteyanya fye ukuli konse.” E mulandu wine uwaishiba ifya mu bwikashi Ulrich Beck alandile pa lwa “lutambi lwa kutwishika” ulutwishika amaka ya kuteka ayabako kale na kale, amateyanyo, ne ncenshi.

Mu lutambi lwa musango yo, abantu bamoneko kuti baleitalushako, ukukaana ubutungulushi bonse, no kwikalila ku fipimo fyabo, ukulaipingwila fye ukukanakonka ukutungulula kwa bantu bambi. Bamo bamona bambi no mutunganya wacishamo, napamo no kukanalangulukilako pa kubomba na bo bantu bashingabacetekela na kabili. Iyi mibele ya mutima itwala pa ntanshi imibele yabipa, pamo nga ilya yalondololwa muli Baibolo ukuti: “Mu nshiku sha kulekelesha mukesaba inshita ishayafya. Pantu abantu bakaba abaitemwa, abatemwe ndalama, aba mataki, aba miiya, aba miponto, aba bucintomfwa ku bafyashi, abashitootela, abashashila, abaumalala, abatalama, aba lwambo, ababulo kuiteka, abankalwe; bakaba abashatemwa busuma, bashikamfutu, bacintalika, abatuumikwa, abatemwo kwangala ukucisho kutemwa Lesa; abantu abakwate mimonekele ya bukapepa, lelo abakaana amaka ya buko.” (2 Timote 3:1-5; Amapinda 18:1) Cine cine ukwafya kwa kucetekelo muntu ilelo kuleishibisha inshita tulipo, kuleishibishe “nshiku sha kulekelesha.”

Mu calo umo cayafya ukucetekelo muntu kabili umwafula abantu pamo nga abo balumbwilwe pa muulu, takwingabako ukuipakisha ubumi mu kufikapo. Lelo bushe kuti cabomba ukutontonkanye fyo ifintu fikaaluka? Bushe ubwafya bwa lelo ubwa kucetekelo muntu kuti bwacimfiwa? Nga kuti bwacimfiwa, kuti bwacimfiwa shani kabili ni lilali bukacimfiwa?