Bushe Mulatootela?

Pa ng’anda ya bamishonari ku west Afrika, kale pali mbwa yalelonda intu baletila Teddy. nga baipoosela umupusa wa nama, yalemina ilyo line, ukwabula no kununshako nelyo ukusheta. Kuti ilepeemekesa fye ku mulandu wa kukaba, ilelolela baipoosele umupusa na umbi. Cilya baleka ukuipoosela, yaya no kuya.

Teddy no kuti atasheko na panono pa fya kulya nakalya. Takuli no waleenekela wene ukutasha. Pantu Teddy ali ni mbwa.

TWENEKELA abantu banensu ukutasha, pantu inama tashitasha. Nomba ilingi line na bantu bene tabatasha. Abengi balafuuba uto bashukila muno calo no kushala balefwaya na fimbi. Ico na co te kuti citupapushe. Baibolo yasobele ukuti mu nshiku sha kulekelesha abantu bakaba abashitootela.—2 Timote 3:1, 2.

Lelo ababomfi ba kwa Lesa bena balipusanako. Balomfwila ukufunda kwa mutumwa Paulo, uwakonkomeshe aba bwananyina ukuti: “Mube abatootela.”—Abena Kolose 3:16.

Yehova Alatootela

Yehova e ca kumwenako capwililika mu kutasha. Tontonkanyeni fintu amona ababomfi bakwe aba busumino. Paulo apuutilwemo ukulembela Abena Kristu abaHebere ukuti: “Lesa tali uushalungama; takalabe umulimo wenu, no kutemwa uko mwalangile kwi shina lyakwe, apo mwalepyungila aba mushilo, kabili mucili mulebapyungila.”—AbaHebere 6:10.

Ifya kumwenako fyalifula ifilanga ukuti Yehova alatasha ababomfi bakwe aba busumino. Apaalile Abrahamu pa kufusha ubufyashi bwakwe, ica kuti bwabele “nge ntanda sha mu muulu, kabili ngo musensenga uuli pa nembenembe ya bemba.” (Ukutendeka 22:17) Pa kutasha pali bumpomfu bwa kwa Yobo uwaeshiwe, Yehova alipaalile wene pa kumupa ifyuma ifingi kabili “[amubweseshe] imiku ibili.” (Yobo 42:10) Imibombele ya kwa Yehova na bantu bakwe ukutula fye na kale yalilanga ukuti aya mashiwi ya cine cine, ayatila: “Amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.”—2 Imilandu 16:9.

Imibele ya kwa Lesa iyapulamo yaba kutasha no kufwaisha ukulambula abafwaya ukumubombela. Ukwishiba ici kwalicindamisha ku citetekelo ca Mwina Kristu. Paulo alembele ukuti: “Ukwabulo kutetekela te kuti kube ukutemuna, pantu uupalamina kuli Lesa ali no kutetekelo kuti . . . aba kalambula wa bamufwayafwaya.”—AbaHebere 11:6.

Yehova nga aba umukalushi, nelyo uulengulula, bonse kuti atukanda. Kemba wa malumbo ku kale alandile pali ici cine cishinka lintu atile: “Amampuulu nga mwayamwensekesha, mwe Yehova, mwe Shikulu, nani uwingeminina?” (Ilumbo 130:3) Yehova taba uushitootela nelyo uulengulula. Alateesa abamubombela. Alatootela.

Yesu Alatasha Nga Nshi

Apo alipwililika mu kulanga imibele ya kwa Wishi wa ku muulu, Yesu Kristu aletootela imilimo abantu balebombela mu citetekelo. Tontonkanyeni pa cacitike kasuba kamo pe tempele mu Yerusalemu: “Awe [Yesu] pa kwinuna amenso, amwene aba fyuma balepoosa ifya bupe fyabo mu cipao. Kabili amwene mukamfwilwa mubusu alepoosamo utunyampuku tubili twa ndalama. E lyo atile, Ndemwebe cine cine, nati, uyu mukamfwilwa mubusu apooselemo icacilamo kuli bonse; pantu bonse bene ni ku fipakile fyabo bapooselemo ifya bupe, lelo wene ni ku kubulwa kwakwe apooselemo fyonse ifya maliila ifyo akwete.”—Luka 21:1-4.

Nga kupenda fye indalama, umusangulo wali uunono, pali bufi nga kulinganya ne shalepoosamo aba fyuma. Abengi abalipo nga tabamumwene na kumumona. Nomba Yesu alimwene ulya mukamfwilwa. Alilwike ne mikalile yakwe. Yesu alimumwene no kumutasha.

Icacitike cimbi ni lilya umwanakashi umukankaala Maria aitiile Yesu amafuta yene yene aya mutengo ukalamba ku makasa na pa mutwe, ilyo Yesu akuweme ku kulya. Bamo balifulilwe pali ifi acitile, batile amafuta nga yalishitishiwe no kusangamo indalama sha kwaafwa ababusu. Nga Yesu ayankwileko shani? Atile: “Mulekeni. Cinshi ico mulemupamfisha? Mulimo usuma abombele pali ine. Awe ndemwebe cine, nati, konse uko ikabilwe mbila nsuma pano isonde, ne co uyu mwanakashi acita cikalandwa ku kube ca kumwibukisha.”—Marko 14:3-6, 9; Yohane 12:3.

Yesu tailishenye ukuti amafuta yauma umutengo nga yalibomfiwe kuli fimbi. Alitashishe bukapekape bwa kwa Maria ubwa kutemwa ne citetekelo. Ili lyashi lyalilembwa mu Baibolo ku kumwibukisha pa mulimo usuma abombele. Ifi fintu fibili ukulundapo na fimbi filanga ukuti Yesu aletasha nga nshi.

Nga muli babomfi ba kwa Lesa, mufwile ukushininkisha ukuti Yehova na Yesu Kristu balatasha nga nshi ukubombesha kwenu ukwa kutwala pa ntanshi ukupepa kwasanguluka. Ukwishiba ifi kulatupalamika kuli bene no kutucincisha ukubapashanya pa kuba abatootela.

Satana Alalengulula

Lekeni tulandeko pali umo uushitootela, ni Satana Kaseebanya. Ukukanatasha kwa kwa Satana e kwamulengele no kuba cumyalutwe wa bucipondoka bwa kulwisha Lesa ubwalenga amacushi.

Pantu alitekeleshe imibele ya bucipondoka iya kukanaikushiwa, atendeke ukwambukisha iyi mibele kuli bambi. Tontonkanyeni pa fyacitike mwi bala lya Edene. Yehova alengele umwaume wa ntanshi no mwanakashi no kubabika mwi bala lya paradise, kabili abebele no kuti: “Umuti onse wa mwi bala, ukulya ulelyako.” Kwali fye cimo ico Lesa ababindile, atile: “Lelo umuti wa kulengo kwishibo busuma no bubi te kuti ulyeko; pantu mu bushiku walyako ukufwa ukafwa.”—Ukutendeka 2:16, 17.

Lelo, bwangu bwangu, Satana asonsombele bucishinka bwa kwa Yehova. Cimo ico alefwaya cali kulenga Efa ukuba uushitasha kuli Yehova no kupondoka, nga filya wene apondweke. Satana aipwishe ukuti: “Lesa asosele, ati, Mwilalyako ku muti onse wa mwi bala, mwa?” (Ukutendeka 3:1) Caliilanga fye apabuuta ukuti aloseshe mu kuti Lesa alifishile Efa icintu cimo icisuma nga nshi, icingamwisula amenso no kumulenga ukuba nga Lesa. Mu cifulo ca kutootela pa mapaalo ayengi ayo Yehova amupaalile, Efa atendeke ukukumbwa icabindilwe.—Ukutendeka 3:5, 6.

Twaliimwena ubulanda bwafumamo. Nangu line ainikwe ishina lya kuti Efa “pantu wene ali ni nyina wa ba mweo bonse,” mu nshila imbi abele nyina wa bena kufwa bonse. Ukufuma kuli Adamu, abantu bonse balipyana ulubembu lulete mfwa.—Ukutendeka 3:20; Abena Roma 5:12.

Pashanyeni Lesa na Kristu

Tontonkanyeni ubupusano pali Satana na Yesu. Baibolo itila Satana ni “kashinina wa bamunyinefwe, uubashinina ku cinso ca kwa Lesa wesu akasuba no bushiku.” (Ukusokolola 12:10) Yesu “aba na maka pe aya kupusushisha abeshila muli wene kuli Lesa, pa kuba no mweo pe ku kubapaapaatila.”—AbaHebere 7:25.

Satana ni kashinina wa babomfi ba kwa Lesa. Yesu alabatesekesha no kubapaapaatilako. Apo bapashanya Kristu, Abena Kristu bafwile ukubombesha ukumona ubusuma mu ba bwananyina, ukubatasha no kubacindika. Ukucite fyo, kulalanga ukuti balatootela Yehova Lesa, uwaba ica kumwenako casumbukisha ica kutootela.—1 Abena Korinti 11:1.

[Icikope pe bula 17]

Yesu alitashishe umulimo usuma uwabombele Maria