Ilyashi Lya Bakabilisha Ba Bufumu

Abantu ba mu India “Balikatana Nangu Mwaba Imitundu Iingi”

ILYO balelanda pa fyo abantu ba mu India babombela pamo, kwaba insoselo babomfya iitila “balikatana nangu mwaba imitundu iingi.” Ukwikatana muli ici calo umwaba intambi, indimi, imipepele, ifikolwe, imifwalile, ne fya kulya fyalekanalekana tacayanguka. Lelo, ukwikatana kwa musango yo e kwaba pa maofeshi ya butungulushi aya Nte sha kwa Yehova mu India, nangu paba ababomfi ba kuitemenwa abekalapo no kubombelapo abafuma mu fitungu ifingi ne misumba iingi kabili abalanda indimi shalekanalekana ababomba no kwikala palya.

• Twalalanda pali Rajrani—umukashana uwafuma ku Punjab, umusumba wabela pa kati ka kapinda ka ku kuso na masamba ya India. Ilyo Rajrani ali pa sukulu, umukashana alesambilila na o atendeke ukusambilila Baibolo ne Nte sha kwa Yehova. Uyu mukashana aeseshe ukulenga Rajrani ukutemwa Baibolo. Apo ulya mukashana taishibishe iciNgeleshi kabili Ulupungu lwa kwa Kalinda talwalepilibulwa mu ciPunjabi pali ilya nshita, alombele ukuti Rajrani alemupilibwilako ifyalembelwe muli ilya magazini. Ifyebo Rajrani alebelenga mu Ulupungu lwa kwa Kalinda fyalifikile pa mutima sana ica kuti nangu abafyashi bakwe balemukaanya, alilundulwike mpaka aipeela na kuli Yehova Lesa. Apo nomba abomba pa Bethel ya ku India, alebomba umulimo umo wine uwalengele ukuti asambilile icine. Apilibula impapulo sha Bwina Kristu mu ciPunjabi!

• Na kabili tontonkanyeni pali Bijoe, uwafuma ku ncende imbi iya ku India—ku musumba wa Kerala uwabela pa kati ka kapinda ka ku kulyo na masamba ya India. Bijoe atamfiwe pa sukulu lya ku sekondari pantu akene ukusefyako kwa kuipeelesha ku calo. Apo ukupepa kwa cine kwalicimfishe pa numa ya kulubulula mu cilye pa nshita ntali, Bijoe alibwelelemo ku sukulu.a Kabili pa numa aile na ku koleji. Lelo, imibele yabipa iya bantu ba pa koleji yalecusha kampingu wakwe, e co kanshi alekele pa kati. Nomba pa numa ya kubomba imyaka 10 pa Bethel, asumino kuti alinonkelamo nga nshi mu kuba mu lupwa lwa Bethel ulwakwata abantu ba mitundu yalekanalekana lelo abaikatana ukucila ifyo ali no kunonkelamo pa kusambilila sana.

• Norma na Lily bonse bali ne myaka ukucila pali 70 kabili baba ni ba mukamfwilwa pa myaka iingi. Umo umo alibomba ukucila pa myaka 40 mu mulimo wa nshita yonse. Lily abomba pa maofeshi yanono pa myaka 20 nga kapilibula wa lulimi lwa ciTamil. Norma aishile ku Bethel imyaka 13 iyapitapo ilyo umulume wakwe afwile. Baliba fya kumwenako fisuma ifya bakabomba bapimpa kabili ababomba bwino kabili balalenga ulupwa lwa Bethel lonse ukwikatana. Balitemwa ukusekelela abeni, kabili balaipakisha ukuba pamo na baice ababa mu lupwa, ukubebako ukusekelela basanga pa myaka iingi iyo baikala nga Bena Kristu. Abacaice nabo balankulako pa kubalaalika ku miputule yabo no kubafwilisha ilyo bakabila ukwafwiwa. Baba fya kumwenako fisuma icine cine!

Apo balyansha amalekano ayaleta ifikansa no kukanaumfwana mu ncende ishingi, aba babomfi bakuitemenwa ne nsansa balabombela pamo ngo lupwa lwaikatana ulwa Bethel mu India ku kupyungila bambi.—Amalumbo 133:1.

[Futunoti]

[Abatusuminishe Ukubomfya Icikope pe bula 8]

Icikope cilemoneka ku numa: Mountain High Maps® Copyright © 1997 Digital Wisdom, Inc.