Mulandu Nshi Mulingile Ukusambilila Baibolo?

BILL ali wacaice, uwakosa, uwasambilile kabili alikwete ndalama sha kwikalilamo. Lelo, tali ne nsansa. Tapali icalemusekesha mu mikalile yakwe, kabili ico calemucusha sana. Pa kwesha ukusanga ifingamusekesha mu mikalile, abebetele imipepele yalekanalekana, lelo tasangile ico alefwaya. Mu 1991 akumene ne Nte ya kwa Yehova, uwamushilile icitabo calelanda pa fyo Baibolo isosa pa co ubumi bwabelako. Bill atendeke ukusambilila Baibolo kabili alyumfwikishe umulandu ubumi bwabelako kabili ne fintu fimbi.

Bill ebukisha ukuti: “Nasambilile Baibolo pa muku wa kubalilapo, kabili apo cila nshita twalebelenga muli Baibolo, nalishibe ukuti ici e co nalefwaya. Ifyasuko fya mu Baibolo fyaliweme sana. Pa numa ye sambililo lilya, naenseshe icimbayambaya candi ukuya ku mpili, nalikile, kabili nawelesha no kwanga. Nalitemenwe ukuti kuli pele pele nalesanga ifyasuko ku mepusho yandi.”

Lelo, te bonse abasange cine ca mu Baibolo abawelesha no kwanga. Nalyo line, ukwishiba ifyasuko ku mepusho yacindama aya mu bumi kulasansamusha abengi. Bayumfwa ngo mwaume uwa mu mulumbe wa kwa Yesu, uwasangile icuma cafiswa mu cilime. Yesu atile: “Mu kusekelela kwakwe aya apoosa conse ico akwete, no kushite cilime cilya.”—Mateo 13:44.

Ifyo Mwingakwata Imikalile Isuma

Bill alitontonkenyepo pa cipusho cacindama ica kuti, Mulandu nshi ubumi bwabelako? Aba mano ya pano nse, abasoma ifya mapepo, na basayantisiti balibombesha ukufwaya ukwasuka ici cipusho pa myaka iingi. Abantu balilemba amabuuku ayengi ku kufwaya ukwasuka ici cipusho. Ukubombesha kwabo kwaba kwa fye, kabili abengi basondwelela fye ukutila ici cipusho te kuti casukwe. Nalyo line, icasuko e ko caba. Nangula ca kuti icasuko calishika sana, tacapikana iyo. Calilondololwa muli Baibolo. Icingaleta insansa no kuwamya imikalile ni ci: Tufwile ukukwata bucibusa busuma na Yehova, Kalenga wesu kabili Shifwe wa mu muulu. Kuti twacita shani ico?

Kwaba ifintu fibili ifikabilwa pa kupalama kuli Lesa ifimoneka kwati filaipilika. Abapalamina kuli Lesa balamutiina kabili balimutemwa. Natulande pa malembo yabili ayasuminisha ici cishinka. Kale sana, Imfumu ya mano Solomone yabebetele sana umuntunse no kulemba ifyo yasangile mwi buuku lya mu Baibolo ilya kwa Lukala Milandu. Asupwile ifyo abebetele ilyo alembele ati: “Ukusupula kwa mulandu onse; fyonse nafyumfwika. Bela Lesa akatiina, baka amafunde yakwe; pantu ici e ca buntunse bonse.” (Lukala Milandu 12:13) Imyanda ya myaka pa numa, Ilyo bamwipwishe ilyaba ifunde lyakulisha mu Malango ya kwa Mose, Yesu ayaswike ati: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse.” (Mateo 22:37) Bushe camusungusha ukuti tufwile ukutiina no kutemwa Lesa? Natumone ubusuma bwa kutiina no kutemwa ne fyo ifi fibili fyafwa umuntu ukukwata bucibusa busuma na Lesa.

Umo Ukutiina Lesa Kwalola

Akatiina kalafwaikwa sana pa kupepa Lesa mu nshila asuminisha. Baibolo itila: “Akatiina ka kuli Yehova e kutendeka kwa mano.” (Amalumbo 111:10) Umutumwa Paulo alembele ati: “Tube abatootela pa kupokelelo bufumu ubushitenshiwa; kabili e fyo tupyungile Lesa ukumutemuna no bufuuke na katiina.” (AbaHebere 12:28) E lyo na malaika uo umutumwa Yohane amwene mu cimonwa mu kati ka muulu atendeke ukubila imbila nsuma na mashiwi ya kuti: “Tiineni Lesa, no kumupeelo mucinshi.”—Ukusokolola 14:6, 7.

Aka katiina ka kuli Lesa, akafwaikwa sana pa kukwato bumi busuma, te mwenso wabipa uubombomanika. Kuti twatiina nga ca kuti akapondo ka lucu katutiinya. Lelo, akatiina ka kuli Lesa kaba kucindikisha Kabumba. Kasanshamo ukutiina ukufulwisha Lesa, pantu e Kapingula Wapulamo kabili Uwa maka yonse, uwakwata amaka no bulashi bwa kukanda abashimumfwila.

Akatiina no Kutemwa Fyendela Pamo

Lelo, Yehova tafwaya abantu ukumubombela pa mulandu fye wa kumutiina. Yehova ni Lesa wakwatisha ukutemwa. Umutumwa Yohane acincishiwe ukulemba ati: “Lesa kutemwa.” (1 Yohane 4:8) Yehova Lesa alilanga abantunse ukuti alibatemwa sana, kabili afwaya abantu na bo ukulanga ukuti balimutemwa. Lelo, bushe uko kutemwa kwayampana shani na katiina ka kuli Lesa? Kwena ifi fibili fyalyampana. Kemba wa malumbo alembele ati: “Isenge lya kwa Yehova lili ku bamutiina.”—Amalumbo 25:14.

Tontonkanyeni pa fyo umwana acindika no kutiina wishi uwa maka kabili na mano. Na kabili uyo mwana alankulako ku kutemwa kwa kwa wishi. Umwana akacetekela no kushintilila pa butungulushi bwa kwa wishi, ukucetekela ukuti ubu butungulushi bukamuletela ubusuma. Cimo cine na ifwe, nga twatemwa no kutiina Yehova, tukakonka ubutungulushi bwakwe ne ci cikatuletela ubusuma. Umfweni ifyo Yehova asosele pa lwa bena Israele, atile: “Iye! nga kwabo mutima uyu kuli bene, ku kuntiina no kubaka amafunde yandi yonse inshiku shonse, ku kuleka kuwame kuli bene na ku bana babo umuyayaya!”—Amalango 5:29.

Ca cine, akatiina ka kuli Lesa takaleta busha lelo, kapeela ubuntungwa, te bulanda iyo lelo, kano insansa. Esaya aseseme pa lwa kwa Yesu ati: “Ukupekwa kwakwe kukaba mu katiina ka kuli Yehova.” (Esaya 11:3) Kabili kemba wa malumbo alembele ati: “Alishuko muntu uuli na katiina kuli Yehova, uubekwa apakalamba mu mafunde yakwe!”—Amalumbo 112:1.

Kwena, te kuti tutiine Lesa nelyo ukumutemwa nga tatwamwishiba. E mulandu wine ukusambilila Baibolo kwacindamina. Ukusambilila Baibolo kutwafwa ukumfwikisha ubuntu bwa kwa Lesa no kumona no kutasha ukuti caliwama ukukonka ubutungulushi bwakwe. Ilyo tupalamina kuli Lesa, tufwaya ukucita ukufwaya kwakwe kabili tucincishiwa ukukonka amafunde yakwe, pa kwishiba ukuti yakatunonsha.—1 Yohane 5:3.

Cilalete nsansa ukwishiba ukuti umo aleikala imikalile isuma. E fyo caba kuli Bill, uo tulandilepo pa mubalo. Nomba line fye atile: “Mu myaka 9 iyapita ukutula apo nasambilile Baibolo pa muku wa kubalilapo, bucibusa bwandi na Yehova bwalikula. Ukuwelesha no kwanga ukwa kubalilapo nomba kwaba mikalile ya nsansa sha cine cine. Lyonse mona ukuti ubumi busuma. Mu mikalile yandi ndacita ifisuma, te kufwaya fwaya fye umusamwe uushileta busuma. Yehova aba muntu wa cine cine kuli ine, kabili nalishiba ukuti alafwaisha sana ukuti imikalile yandi iwame.”

Mu cipande cikonkelepo, twalalanda sana pa fyo ukwishiba Yehova kuleta insansa no busuma ku bekala umwabela uko kwishiba.

[Amashiwi pe bula 5]

Ukupalamina kuli Lesa calola mu kuti, tumutemwe no kumutiina

[Icikope pe bula 6]

Yesu alisekelele mu katiina ka kuli Yehova