Ukusesema kwa kwa Hosea Kulatwafwa Ukulaenda na Lesa

“Bakesakonka Yehova.”—HOSEA 11:10.

 1. Cilangililo nshi icisangwa mwi buuku lya kwa Hosea?

BUSHE mulomfwa bwino ukutamba ifisela fya bantu baishibisha ukucite fisela? Mwi buuku lya mu Baibolo ilya kwa Hosea mwaliba icilangililo ca musango yo.a Cilya cilangililo cilanda pa lupwa lwa kwa kasesema wa kwa Lesa Hosea kabili calipalana ne cupo ca mampalanya ico Yehova acitile na Israele wa ku kale ukupitila mu Mafunde ya kwa Mose.

 2. Finshi twaishiba pali Hosea?

² Intendekelo ya ici cilangililo isangwa mu cipandwa ca kubalilapo ice buuku lya kwa Hosea. Hosea afwile aleikala mu musumba wali mu bufumu bwa mikowa 10 ubwa kwa Israele (ubwaleitwa no kuti Efraimu, umukowa ukalamba mu Israele). Ali kasesema lintu ishamfumu sha kulekelesha 7 isha mu Israele shaleteka e lyo na lintu Ishamfumu sha mu Yuda Usia, Yotamu, Ahasi, na Hisekia shaleteka. (Hosea 1:1) Kanshi Hosea ali kasesema pa myaka ukucila 59. Nangu ca kutila Hosea apwile ukulemba ibuuku lyainikwa ishina lyakwe pa numa fye ya 745 B.C.E., ili buuku lyalicindama na muli shino nshiku, pantu abantu abengi nga nshi balekonkelela imikalile iyapala ilya yasobelwe mu mashiwi yatila: “Bakesakonka Yehova.”—Hosea 11:10.

Ifyo Ukusupawila Kulanga

3, 4. Supawileni ilyashi lyaba mu fipandwa 1 ukufika ku 5 ifye buuku lya kwa Hosea.

³ Ukusupawila icipandwa 1 ukufika ku 5 kwalalenga tupampamine pa kulaenda na Lesa, ukumutetekela no kulakonkelela inshila yalingana no kufwaya kwakwe. Nangu ca kuti aba mu bufumu bwa Israele bali no mulandu wa bulalelale bwa ku mupashi, Lesa ali no kubekatilwa inkumbu nga ca kuti balapila. Ici calangililwe ne fyo Hosea acitile ku mukashi wakwe Gomere. Ilyo Gomere afyele umwana umo kuli Hosea, ailefyala abana babili mu bulalelale. Lelo, Hosea alimuupile na kabili, kwati fye ni filya Yehova aitemenwe ukubelela abena Israele balapile inkumbu.—Hosea 1:1–3:5.

⁴ Yehova ali no kulubulwisha abena Israele pantu babulilwe icishinka, uluse, no kwishiba Lesa. Ali no kupingula Israele pantu alepepa utulubi na Yuda pa mulandu wa bucipondoka bwakwe. Lelo, lintu abantu ba kwa Lesa bali “mu kumanama,” balefwaya Yehova.—Hosea 4:1- 5:15.

Icilangililo Catendeka

5, 6. (a) Bushe ni pi aba mu bufumu bwa mikowa 10 ubwa kwa Israele bafikile mu kucito bulalelale? (b) Mulandu nshi amashiwi ya kusoka ayasoselwe ku bena Israele ba ku kale yacindamina kuli ifwe?

⁵ Lesa aebele Hosea ukuti: “Kabiye, kaibuulile umukashi umulalelale na bana ba mu bulalelale, pantu icalo ukufuma nacifuma ku kukonka Yehova pa mulandu wa bulalelale.” (Hosea 1:2, NW) Bushe abena Israele bafikile pi mu kucita ubulalelale? Baibolo itweba ukuti: “Umupashi wa bulalelale naubalubansha [aba mu bufumu bwa mikowa 10], kabili nabafuma kuli Lesa pa mulandu wa bulalelale. . . . E co abana benu abanakashi bacitilo bulalelale na banafyalenwe bacitilo bucende. . . . Pantu abaume bena, baipaatula ku kuba na bacilende, no kupeela amalambo pamo na banakashi bacilende aba mwi tempele.”—Hosea 4:12-14, NW.

⁶ Abena Israele balecita ubulalelale bwa ku mubili no bwa ku mupashi. Kanshi Yehova ali no ‘kulubulwisha’ abena Israele. (Hosea 1:4; 4:9) Aya mashiwi ya kusoka yalicindama na kuli ifwe pantu Yehova akalubulwisha abalalelale ba muno nshiku na baba mu mipepele iishasanguluka. Lelo abenda na Lesa balafika pa fipimo fya kupepa kwasanguluka kabili balishiba ukuti “uwa bulalelale . . . tali na bupyani mu bufumu bwa kwa Kristu no bwa kwa Lesa.”—Abena Efese 5:5; Yakobo 1:27.

 7. Cinshi caleimininwako ne cupo ca kwa Hosea na Gomere?

⁷ Ilyo Hosea aupile Gomere, Gomere ali nacisungu, kabili lintu ‘amufyalile umwana umwaume’ ali mukashi wa cishinka. (Hosea 1:3) Nge fyo tusambilile muli ci cilangililo, pa numa fye ya kulubula abena Israele mu busha bwa mu Egupti mu 1513 B.C.E., Lesa apangene nabo icipingo kwati ni filya ciba ku baleupana. Pa kusuminisha kuli cilya cipangano, abena Israele balaile ukuti bali no kuba aba cishinka kuli Yehova ‘umulume wabo.’ (Esaya 54:5) Kanshi ici cupo ca mampalanya ica kwa Lesa na bena Israele e caleimininwako ne cupo casanguluka ica kwa Hosea na Gomere. Nomba ku ca bulanda ifintu fyalyalwike.

 8. Bushe ubufumu bwa mikowa 10 ubwa kwa Israele bwaishilebako shani, kabili cinshi mwingasosa pa mipepele ya buko?

⁸ Umukashi wa kwa Hosea “aliimite kabili, afyele no mwana mwanakashi.” Ulya mukashana no mwana umbi uwaishilefyalwa pa numa nalimo bali bana ba mu bulalelale. (Hosea 1:6, 8) Apo Gomere aleimininako Israele, limbi kuti mwaipusha amuti, ‘Bushe Israele aishileba shani umulalelale?’ Mu 997 B.C.E., imikowa 10 iya mu Israele yaipatwile ku mikowa ya ku kapinda ka ku kuso iya kwa Yuda na Benyamini. Pa kulesha abantu ukuya ku kupepa Yehova pe tempele lyakwe mu Yerusalemu, imikowa 10 iya kwa Israele yatendeke ukupepa umutepa wa ng’ombe. Ukupepa Baali, ukwalebamo no bulalelale bwa pa lwalala, kwayandile imishila mu Israele.

 9. Nge fyo casobelwe pali Hosea 1:6, cinshi cacitike kuli Israele?

⁹ Lintu umwana wa bubili uwa kwa Gomere afyelwe, nalimo uwa mu bulalelale, Lesa aebele Hosea ukuti: “Umwinike Loruhama [icalola mu kuti “Tabelelwe Inkumbu”], pantu nshakabelele inkumbu aba ng’anda ya kwa Israele na kabili, pantu ukubasenda nkabasenda.” (Hosea 1:6, NW) Yehova ‘alibasendele’ ilyo abena Ashuri basendele abena Israele bunkole mu 740 B.C.E. Na lyo line, Lesa aikatile inkumbu aba mu bufumu bwa mikowa ibili ubwa kwa Yuda kabili alibapuswishe. Lelo tabomfeshe ubuta, ulupanga, ubulwi, bakafwalo, nangu aba pali bakafwalo. (Hosea 1:7) Mu bushiku fye bumo mu 732 B.C.E., malaika umo fye aipeye abashilika abena Ashuri 185,000 abashingile Yerusalemu, umusumba ukalamba uwa mu Yuda.—2 Ishamfumu 19:35.

Yehova Alubulwisha Abena Israele

10. Ubulalelale bwa kwa Gomere bwalelanga cinshi?

¹⁰ Gomere ashile Hosea no kuba “umukashi umulalelale,” aleulungana no mwaume umbi. Ici calelanga ifyo abena Israele baumene akapi ne nko ishalepepa utulubi no kushintilila pali shena. Mu nshita ya kuti batashe Yehova pa lubanda bakwete, abena Israele batashishe imilungu ya shilya nko. E co bapulile mu cipingo ico bapangene na Lesa no kutendeka ukupepa imilungu imbi. Kanshi e mulandu wine Yehova alubulwishishe abena Israele pantu balecita ubulalelale bwa ku mupashi.—Hosea 1:2; 2:2, 12, 13.

11. Cinshi cacitike ku cipingo ce Funde lintu Yehova alekele Israele na Yuda ukusendwa bunkole?

¹¹ Bushe abena Israele bakandilwe shani ilyo bashile Umulume Wabo? Lesa alengele ‘baye mu matololo’ ya ku Babiloni, icalo cacimfishe Ashuri, umo abena Israele bali bankole mu 740 B.C.E. (Hosea 2:14) Ilyo Yehova alofeshe ubufumu bwa mikowa 10, tafumishepo icipingo cakwe ico apangene ne mikowa 12 iya mu Israele. Na kuba, lintu Lesa alekele abena Babiloni ukonaula Yerusalemu mu 607 B.C.E. no kusenda abaYuda bunkole, taonawile icipingo ce Funde lya kwa Mose nelyo icupo ca mampalanya ico apangene ne mikowa 12 iya bena Israele. Yehova afumishepo cilya cipingo mu 33 C.E. lintu intungulushi sha baYuda shakeene Yesu Kristu no kumwipaya.—Abena Kolose 2:14.

Yehova Akalipila Israele

12, 13. Bushe amashiwi yaba pali Hosea 2:6-8 yacindama shani, kabili yafishiwepo shani kuli Israele?

¹² Lesa akalipile Israele ‘ukufumya ubulalelale ku cinso cakwe,’ lelo Israele alefwaya ukukonka abacende bakwe. (Hosea 2:2, 5, NW) Yehova atile: “E ico, mona, nkasake nshila yakwe ku myunga, nkakuule cibumba kuli wene, ukuti esanga nshila shakwe. Akasupila [abacende, NW] bakwe, no kubamona iyo, akabasokota, no kubasanga iyo. E lyo akatila, Ndebwelela ku mulume wandi uwa ntanshi, pantu caliweme kuli ine lilya ukucila pali nomba. Kanshi wene taishibe ukuti nine namupeele ing’ano no mwangashi na mafuta, ukuti nine namufushiishe silfere na golde uo abombeeleko kuli Baali [e kuti iyo bapangilemo icipasho ca kwa Baali].”—Hosea 2:6-8.

¹³ Nangu ca kuti Israele alilombele ubwafwilisho ku nko isho alecita na sho “ubucende,” takwali uluko nangu lumo ulwa mwafwile. Ali kwati nabamucingilila icibumba cakosa ica kuti balifililwe ukumwafwa. Abena Ashuri bashingile Samaria umusumba ukalamba uwa Israele pa myaka itatu lyena mu 740 B.C.E. balionawile kabili ubufumu bwa mikowa 10 tabwaimikwe na kabili. Bena Israele abanono fye mu basendelwe bunkole e baleibukisha ifyo ifintu fyaweme ilyo ifikolwe fyabo fyalebombela Yehova. Balya bashalapo bakakaana ukupepa Baali kabili bakafwaya ukucita icipingo na Yehova.

Ukupituluka mu Cilangililo na Kabili

14. Mulandu nshi Hosea abweseshe Gomere?

¹⁴ Pa kwishiba bwino ukupalana kwali pa fyalecitika mu cupo ca kwa Hosea no kwampana kwali pali Yehova na Israele, taleni tontonkanyeni pali aya mashiwi: “Yehova akonkenyepo ukusosa kuli ine ati: ‘Kabiye na kabili, katemwe umwanakashi uwatemwikwa ku munankwe kabili uucito bucende.’” (Hosea 3:1, NW) Hosea alyumfwilile ifyo Yehova amwebele kabili ashitile Gomere ku mwaume aleulungana nankwe. Lyena Hosea akalipile umukashi wakwe, amwebele ati: “Ukekala na ine inshiku ishingi. Wikacita bulalelale, kabili wikaya ku mwaume umbi; na ine nkabo obe.” (Hosea 3:2, 3, NW) Gomere alinakiile ku kusalapula, kabili Hosea alimubweseshe. Bushe ici calingene shani ne fyo Yehova acitile kuli Israele na Yuda?

15, 16. (a) Ni lilali lintu abantu ba kwa Lesa abasalapwilwe bali no kwikatilwa inkumbu? (b) Bushe Hosea 2:18 yafikilishiwa shani?

¹⁵ Ilyo aba mu Israele na mu Yuda bali bankole mu Babiloni, Lesa abomfeshe bakasesema bakwe ‘ukukolopeka imitima yabo.’ Pa kuti Lesa abelele abantu bakwe inkumbu, bali no kulanga ukuti nabalapila no kubwelela ku Mulume Wabo nga filya Gomere abwelele ku mulume wakwe. Lyena Yehova ali no kufumya uluko lwali ngo mukashi wakwe uwasalapulwa mu “matololo” ya mu Babiloni no kulubwesesha ku Yuda na ku Yerusalemu. (Hosea 2:14, 15) Afikilishe ubu bulayo mu 537 B.C.E.

¹⁶ Lesa afikilishe no bu bulayo butila: “Muli bulya bushiku nkabapinganine cipingo ne nama sha mu mpanga, ne fyuni fya mu lwelele, ne fikulika pa nshi; kabili ubuta no lupanga no bulwi nkafuna nkafumya mu calo, no kubalengo kusendamo mutelelwe.” (Hosea 2:18) AbaYuda bashelepo ababwelele ku mwabo baleikala umutelelwe, inama tashalebatiinya. Uku kusesema kwalifikilishiwe na mu 1919 C.E. lintu abashalapo ba muli Israele wa ku mupashi balubwilwe muli “Babiloni Mukalamba,” ubuteko bwa calo ubwa kupepa kwa bufi. Nomba bekala umutelelwe kabili balaipakisha ukuba muli paradaise wa ku mupashi pamo na banabo, abakwata isubilo lya kwikala pe sonde ku ciyayaya. Pali aba Bena Kristu ba cine, tapaba ababa ne mibele iya bunama.—Ukusokolola 14:8; Esaya 11:6-9; Abena Galatia 6:16.

Sambilileniko Kuli Ifi

17-19. (a) Mibele nshi iya kwa Lesa iyo batukoselesha ukupashanya? (b) Bushe nkumbu ne cililishi ca kwa Yehova filingile ukutukuma shani?

¹⁷ Lesa wa nkumbu kabili wa cililishi, na ifwe bene e fyo tufwile ukuba. E sambililo limo ilyo tusambilila mu fipandwa fya kubalilapo ifya kwa Hosea. (Hosea 1:6, 7; 2:23) Imibele ya kwa Lesa iya kuitemenwa ukwikatilwa abena Israele balapile inkumbu yumfwana ne li pinda lyapuutwamo ilitila: “Uufimba pa fya bupulumushi fyakwe takashuke; lelo uufitumbula no kufileka akacitwe nkumbu.” (Amapinda 28:13) Amashiwi na yambi ayasansamusha abalufyenye nga balapila ya kwa kemba wa malumbo uwatile: “Amalambo ya kuli Lesa mutima uwa bulanda; Umutima uwa bulanda kabili uwasakamikwa, tamwakausuule, mwe Lesa.”—Amalumbo 51:17, NW.

¹⁸ Ukusesema kwa kwa Hosea kulanda sana pa nkumbu ne cililishi ca kwa Lesa tupepa. Bamo nga bapumbuka mu nshila shakwe ishalungama, kuti balapila no kupilibuka. Nga bacite fyo Yehova alabalekelela. Aikatile abena Israele balapile inkumbu, uluko ulwali umukashi wa mampalanya. Nangu ca kuti babulilwe icumfwila kuli Yehova no ‘kukalifya Uwa mushilo wa kwa Israele, ali uwa nkumbu kabili lyonse aleibukisha ukuti bantunse fye.’ (Amalumbo 78:38-41) Inkumbu sha musango yo shilingile ukutwafwa ukulaenda na Yehova Lesa wesu uwa cililishi.

¹⁹ Nangu ca kuti imembu pamo nga ukwipaya, ukwiba, no kucito bulalelale shalicililemo mu Israele, Yehova ‘akolopeke imitima yabo.’ (Hosea 2:14; 4:2) Ilyo tule-etetula pa nkumbu sha kwa Yehova ne cililishi, imitima yesu ifwile ukusekelela kabili bucibusa bwesu na Lesa bulingile ukukoselako. Kanshi tulingile ukuipusha atuti: ‘Bushe kuti napashanya shani Yehova, ukuba uwa nkumbu kabili uwa cililishi kuli bambi? Bushe Umwina Kristu munandi uunkalifye nga alomba ubwelelo, kuti naitemenwa ukumwelela nge fyo Lesa elela?’—Amalumbo 86:5.

20. Peeleni ica kumwenako icilanga ukuti tulingile ukucetekela isubilo Lesa atupeela.

²⁰ Lesa alapeela isubilo. Ku ca kumwenako, alaya ukuti: “Nkamupeela . . . amawanga ya Akore ku kubo mwinshi we subilo.” (Hosea 2:15) Abali mu kuteyanya kwa kale ukwa kwa Yehova ukwali kwati mukashi bali ne subilo lya kubwelela ku mwabo, uko “amawanga ya Akore” yali. Ukufikilishiwa kwa ubu bulayo mu 537 B.C.E., kutulenga ukucetekela no kulasekelela mwi subilo ilyo Yehova atupeela.

21. Bushe ukwishiba kwacindama shani ilyo tule-enda na Lesa?

²¹ Pa kuti tule-enda na Lesa lyonse, tulingile ukulasambilila pali wena no kulacita ifyo tulesambilila mu mikalile yesu. Mu Israele tamwali ukwishiba Lesa. (Hosea 4:1, 6) Lelo, bamo balicindamike sana amasambilisho ya kwa Lesa, balecita ifyo balesambilila, kabili balilambwilwe apakalamba. Umo pali aba ni Hosea wine. E fyali na bambi 7,000 abo amakufi yabo yashafukamine Baali mu nshiku sha kwa Eliya. (1 Ishamfumu 19:18; Abena Roma 11:1-4) Ukucindamika sana amasambilisho ya kwa Lesa ku katwafwa ukulaenda na Lesa lyonse.—Amalumbo 119:66; Esaya 30:20, 21.

22. Bushe tulingile ukumona shani ubusangu?

²² Yehova enekela abaume abatungulula abantu bakwe ukukaana ubusangu. Kabili, Hosea 5:1 [NW] itila: “Umfweni ici, mwe bashimapepo, kabili kutikisheni, mwe ba ng’anda ya kwa Israele, na mwe ba ng’anda ya mfumu, kutikeni, pantu ni mwe ubupingushi buleishila; pantu muli lukose pali Mispa kabili nge sumbu ilyateyewa pa Tabore.” Abasangu bali kwati citeyo kabili isumbu ku bena Israele, balebabeleleka ukulapepa utulubi. Nalimo ku Lupili lwa Tabore ne cifulo caleitwa ukuti Mispa e kwalelongana bakapepa ba bufi.

23. Bushe mwanonkelamo shani mu kusambilila Hosea icipandwa 1 ukufika ku 5?

²³ Ukufika pano, ukusesema kwa kwa Hosea kwatusambilisha ukuti Yehova ni Lesa wa nkumbu uupeela isubilo no kupaala abomfwila amafunde yakwe e lyo na bakaana ubusangu. Ukupala abena Israele ba ku kale, shi natulefwaya Yehova no kulamutemuna lyonse. (Hosea 5:15) Nga tulecite fyo, tukalobolola ubusuma kabili tukaipakisha insansa no mutende ifyo bonse abenda na Lesa mu cishinka baipakisha.—Amalumbo 100:2; Abena Filipi 4:6, 7.

[Futunoti]

Bushe Kuti Mwayasuka Shani?

• Bushe icupo ca kwa Hosea kuli Gomere caleimininako cinshi?

• Mulandu nshi Yehova alubulwishishe abena Israele?

• Lisambililo nshi mwatemwamo sana muli Hosea icipandwa 1 ukufika ku 5?

[Icikope pe bula 18]

Bushe mwalishiba abo umukashi wa kwa Hosea aleimininako?

[Icikope pe bula 19]

Abena Samaria balibacimfishe ku bena Ashuri mu 740 B.C.E.

[Icikope pe bula 20]

Abantu abalesekelela babwelela ku mwabo