“Tufwile Ukunakila Lesa Nga Kateeka Ukucila Ukunakila Abantu”

Ukulubulwa ku “Mulopa Uwaumo Mutengo”

UKUTEMWA kwapulamo ukwa kwa Yehova kwa kutuma Umwana wakwe uwafyalwa eka ukwisapeela umweo wakwe uwapwililika icilubula. Apo tuli babembu, tulakabila sana icilubula ca musango uyo ica kutulubula ku lubembu, pantu takwaba umubembu “uwingalubula nangu fye ni munyina, nelyo ukupeela kuli Lesa ica kumulubwilako . . . Pa kuti ekale umuyayaya no kukanamone nindi.” (Amalumbo 49:6-9) Ifyo tutasha pa kuti Lesa “apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya”!—Yohane 3:16.

Bushe icilubula citulubula shani? Natulande pa nshila shine isho Yehova Lesa atulubwilamo ukubomfya icilubula.

Ukulubulwa ku Cilubula

Inshila ya kubalilapo, ilambo lya kwa Yesu kuti lyatulubula ukufuma ku lubembu twapyana. Bonse ifwe twafyalwa mu lubembu. Ee, tuli babembu na lintu fye tatulati tutobe ifunde lya kwa Yehova. Mulandu nshi? Pa Abena Roma 5:12 patila: “Ulubembu lwaingilile mu muntu umo [Adamu] pano calo ne mfwa yaingilile mu lubembu.” Kanshi, apo tuli bana ba kwa Adamu twalipyana ulubembu lwakwe. Lelo nangu cibe fyo, ukulipila icilubula, kwalenga ukuti tulubulwe ukufuma ku busha bwa lubembu ulo twapyene. (Abena Roma 5:16) Yesu “asondele umuntu onse imfwa,” no kusenda amacushi ayo ulubembu lwaleta pa bufyashi bwa kwa Adamu.—AbaHebere 2:9; 2 Abena Korinti 5:21; 1 Petro 2:24.

Inshila ya bubili ya kuti icilubula cilatulubula ku macushi yaletwako no lubembu. Baibolo itila: “Icilambu ca lubembu ni mfwa.” (Abena Roma 6:23) Ukupitila mu mfwa ye lambo lyakwe, Umwana wa kwa Lesa alengele ukuti canguke ku bantu bacumfwila ukuba no bumi bwa muyayaya. Ca cine, “Uutetekelo Mwana aba no bumi bwa muyayaya; uushumfwila Mwana takamone ubumi.”—Yohane 3:36.

Kuti twalubuka ukufuma ku lubembu nga ca kuti fye twatetekela Umwana wa kwa Lesa. Ici cisanshamo ukwalula imibele yesu no kucita ifintu ukulingana no kufwaya kwa kwa Lesa. Tufwile ukuleka ifyabipa ifyo twalecita no kutendeka ukucita ifitemuna Lesa. Umutumwa Petro alandile ukutila tufwile ‘ukulapila kabili no kupilibuka pa kuti imembu shesu shifuutwe.’—Imilimo 3:19.

Inshila ya butatu ya kuti ilambo lya kwa Yesu litulenga ukuba na kampingu uwasanguluka. Bonse abaipeela kuli Yehova kabili ababa basambi babatishiwa aba Mwana wakwe balipuupuutulwa ku mupashi. (Mateo 11:28-30) Te mulandu no kukanapwililika kwesu, tulaba ne nsansa isha cine cine lintu tubombela Lesa na kampingu musuma. (1 Timote 3:9; 1 Petro 3:21) Nga twasokolola imembu shesu no kuleka ukushicita, tulabelelwa uluse kabili kampingu wesu takaletucusha.—Amapinda 28:13.

Icilubula Cilatwafwa no Kutupeela Isubilo

Mu kulekeleshako, ukutetekela mu cilubula, kulapwisha umwenso ilyo tulebombela Lesa. Umutumwa Yohane alembele ukuti: “Ngo muntu acita ulubembu, natukwata kaafwa kuli Shifwe, Yesu Kristu.” (1 Yohane 2:1) Ukulanda pa mulimo Yesu abomba uwa kwafwa abantu, umutumwa Paulo alembele ukuti: “Kuti apususha umupwilapo na bonse abalepalamina kuli Lesa muli wene, pantu aba umumi pe ku kubapaapaatilako.” (AbaHebere 7:25) Ukufikila fye tukapwililike, tukatwalilila ukukabila ukwafwa kwa kwa Shimapepo Mukalamba Yesu Kristu pa kuti tukabe abalungama kuli Lesa. Finshi Yesu uwaba shimapepo mukalamba atucitila?

Mu 33 C.E., ilyo papitile inshiku 40 pa numa ya kubuushiwa, Yesu aile ku muulu, ku kupeela “umulopa waumo mutengo” kuli Lesa. Icafumamo ca kuti, Yesu nomba line ali no kulubula abantu abacumfwila ukufuma ku lubembu ne mfwa.a (1 Petro 1:18, 19) Kanshi calicindama nga nshi kuli ifwe bonse ukutemwa Yesu Kristu no kumumfwila!

Mu kulundapo, tukabila ukutemwa Yehova Lesa no kumumfwila. Pa mulandu wa kutemwa kwakwe ‘twalishishiwa no kulubulwa.’ (1 Abena Korinti 1:30) Twaba ne misha kuli wena te ya bumi fye tuli nabo, lelo ne subilo lya kuipakisha ubumi bwa muyayaya. Kanshi cili icalinga ukuti ‘tunakile Lesa nga kateka ukucila ukunakila abantu.’—Imilimo 5:29.

[Futunoti]

[Akabokoshi ne Fikope pe bula 9]

BUSHE MWALISHIBE?

• Ilyo Yesu asendelwe ukuya ku muulu ali pa Lupili lwa Miolife.—Imilimo 1:9, 12.

• Batumwa fye aba cishinka e bamweneko ilyo Yesu alesendwa ukuya ku muulu.—Imilimo 1:2, 11-13.