Bushe Muntu Umwine Afwile Ukuisalila Ukufyalwa Libili?

NANI alenga ukuti umuntu afyalwe libili? Ilyo bashimapepo bamo balekoselesha Abena Kristu ukufyalwa libili, balabwekeshapo amashiwi ya kwa Yesu aya kuti: “Mufwile ukufyalwa libili.” (Yohane 3:7) Ciba kwati aba bashimapepo balapangila abantu ifunde ukuti bafwile fye ukufyalwa libili. Kanshi bena basambilisha ukuti cila muntu afwile ukusalapo umwine nampo nga kumfwila amashiwi ya kwa Yesu no kucitapo fimo pa kuti afyalwe libili nelyo iyo. Basambilisha ukuti abantu abene e bafwile ukusalapo ukufyalwa libili. Nomba bushe ifi e fyo Yesu aebele Nikodemo?

Nga twabelenga bwino amashiwi ya kwa Yesu, kuti twamona ukuti Yesu tatile umuntu umwine kuti asalapo ukufyalwa libili nangu ukukanafyalwa libili. Cinshi twalandila ifi? Amashiwi ya ciGriki ayo bapilibula ati “ukufyalwa libili” kuti yapilibulwa no kuti “ukufyalwa kwa ku muulu.”a Kanshi ukufyalwa libili kufuma “ku muulu,” e kutila ‘kuli Lesa.’ (Yohane 19:11; Yakobo 1:17) Ca cine Lesa e ulenga umuntu ukufyalwa libili.—1 Yohane 3:9.

Nga ca kuti tuleibukisha amashiwi ya kuti “ukufyalwa kwa ku muulu,” kuti twaishiba bwino bwino umulandu umuntu umwine ashingasalilapo ukufyalwa libili. Tontonkanyeni pa fyo cali pa kuti mufyalwe. Bushe ni mwe mwe bene mwasalilepo ukufyalwa? Awe! Abafyashi benu e balengele ukuti mufyalwe. E fyo caba na ku kufyalwa libili. Umuntu kuti afyalwa libili nga ca kuti fye Lesa, Shifwe wa ku muulu, amulenga ukufyalwa libili. (Yohane 1:13) E ico umutumwa Petro alilondolwele bwino ukutila: “Abe uwacindikwa Lesa kabili Wishi wa kwa Shikulwifwe Yesu Kristu, pantu pa kubuusha Yesu Kristu ku bafwa, Lesa atukwatile uluse ulukalamba no kutufyala cipya cipya.”—1 Petro 1:3.

Bushe Ukufyalwa Libili Lifunde?

Nomba bamo kuti baipusha abati, ‘Nga ca kuti ca cine takuli nangu umo uwingaisalila umwine ukufyalwa libili, mulandu nshi Yesu apeelele ifunde lya kuti: “Mufwile ukufyalwa libili”?’ Ici cipusho cisuma. Pantu kwena amashiwi ya kwa Yesu nga lifunde, ninshi aletweba ukucita icintu ico tushingacita. Kwena te kuti cilolemo ukucita ica musango yu. Ninshi amashiwi ya kuti mufwile “ukufyalwa libili” yalola mwi?

Nga twakonka sana aya mashiwi mu ciGriki, umo balembeele ili ilembo, kuti twamona ukuti te funde. Ilyo Yesu atile mufwile “ukufyalwa libili,” alelanda fye ifyo caba, talepeela ifunde iyo. Atile: “Muli no kufyalwa ukufyalwa kwa ku muulu.”—Yohane 3:7, Diocese of Mbala.

Natulangilile ubupusano bwaba pe funde na mashiwi ayo umuntu engalanda fye, ukubomfya icilangililo ca muntu uwaya ku calo cimbi mu kushita impanga. Muli ici calo, batila uwingashitamo fye impanga, muntu ekalamo. Nomba umuntu umo uushikala muli ici calo, aya ku maofeshi ya buteko no kutila alefwaya ukushita impanga. E lyo umulashi wa buteko amweba ukuti, “Nga wikala muno calo, e lyo wingashitamo impanga.” Aya mashiwi ya mulashi te funde iyo. Alelanda fye icifwaikwa pa kushita impanga muli ici calo. Talepatikisha uyu muntu ati, “Utampe ukwikala muno calo.” Kanshi Yesu na o ilyo atile “mufwile ukufyalwa libili,” alelanda fye icifwaikwa pa ‘kwingila mu Bufumu bwa kwa Lesa.’

Amashiwi ya kuti Ubufumu bwa kwa Lesa yalyampana na cimbi icacindama pa kufyalwa libili. Bushe cinshi kwabela ukufyalwa libili? Ukwishiba icasuko kuli ici cipusho kwalicindama nga tulefwaya ukumfwikisha umwalola ukufyalwa libili.

[Futunoti]

[Icikope pe bula 6]

Bushe ukufyalwa libili no kufyalwa kwa mwana fyapalana shani?