Bushe Kwaliba Umuntu Uunsakamana?

Bushe mwalyumfwapo ukupelelwa, ica kuti mwamona kwati tapali no muntu uwishibe amafya mukwete? E lyo nga ca kuti kuli abeshibe amafya mukwete, imwe mulemona kwati tabapooseleko amano.

ILYO fwe bantu twakwata amafya, ilingi line tumona kwati tayakapwe nakalya. Inshita shimo kuti twaumfwa kwati ifiletucitikila nafikulisha kabili lufyengo fye ica kutila te kuti tukumemo ukushipikisha. E fyo ciba ilingi line nga ca kutila kuli iciletucusha ku mutima, tuli no bulanda, tulecula pa mulandu wa busanso twalimo, nelyo amalwele yashipola, nangu fye amafya yambi. Limbi kuti twaumfwa abapelelwa ica kuti twamona kwati tapali no wa kutusansamusha. Bushe kwaliba umuntu uutusakamana?

“Lesa wa Cisansamushi Conse” Alatusakamana

Baibolo ilondolola Lesa ukuti ni “Shifwe wa nkumbu kabili Lesa wa cisansamushi conse.” (2 Abena Korinti 1:3) Lesa uwakwata ishina lya kuti Yehova, alishiba ukutila tulakabila ukusansamushiwa. Mu Baibolo, ili ishiwi lya kuti “icisansamushi” balilibomfya mu nshila shalekanalekana kabili imiku iingi, kabili litulanga ukutila Lesa aleshiba bwino bwino amafya tukwata kabili alafwaisha ukutusansamusha. Ukwishiba ici cishinka, kulenga twashininkisha ukutila nangula abantu bambi bamoneke kwati tabeshibe ifyo tulepitamo, nangu kwati tabaposeleko amano, Yehova Lesa ena alatusakamana.

Icishinka ca kutila Yehova alasakamana umuntu umo umo, cilamoneka sana mu Malembo. Baibolo itila, “Amenso ya kwa Yehova yali mu ncende shonse, yalamona ababi na basuma.” (Amapinda 15:3) E fyo ne lembo lya kwa Yobo 34:21 lilanda. Tubelengapo ukuti: “Amenso yakwe yali pa mibele ya muntu. Kabili alamona intampulo shakwe shonse.” Yehova alamona ifyo tucita ifisuma ne fyabipa kabili aleshiba bwino bwino ne fyo ifintu fili mu bumi bwesu, pa kuti atwafwe mu nshila iyo umwine alemona ukuti e ilingile. Kuti twashininkisha ici cishinka nga twabelenga amashiwi Hanani kamona, nelyo kasesema, alandile kuli Asa Imfumu ya baYuda ilyo atile: “Amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.”—2 Imilandu 16:7, 9.

Kwaliba umulandu na umbi Yehova abikila amano ku bantunse. Yesu alondolwele ukuti: “Takuli uwingesa kuli ine kano Tata uwantumine, amukula.” (Yohane 6:44) Yehova alibika sana amano ku bantu ica kutila alafwayafwaya mu mutima wa muntu pa kuti amone nga ca kuti alefwaisha ukumwishiba nelyo iyo. Nga ca kuti uyo muntu alefwaisha, Lesa kuti amwafwa icine cine. Ku ca kumwenako ku calo ca Dominican Republic, umwanakashi umo uwalwele kansa ali mu cipatala kabili alekabila ukumubombela. Apaapete Lesa ukuti amulange ukupepa kwa cine. Ilyo apwile fye ukupepa, abena mwakwe bamuletele akatabo akatila Cinshi Cintu Lesa Afwaya Kuli Ifwe?a ako bapokele ku Nte sha kwa Yehova ababatandalile pa ng’anda ulucelo. Uyu mwanakashi alibelengele aka katabo kabili ailwike ukuti Lesa alyaswike ipepo lyakwe. Alisumine ukulasambilila Baibolo na baNte, kabili ne myeshi 6 tayakumene ali-ipele kuli Lesa kabili alibatishiwe.

Mwi buuku lya mu Baibolo ilya Amalumbo, mwaliba amashiwi ya kutukoselesha ayengi ayo abaHebere ba kale pamo nge Mfumu Davidi balembele, ayalondolola ifyo Yehova asakamana ababomfi bakwe mu citemwiko. Pa Amalumbo 56:8, tusangapo amashiwi ya Mfumu Davidi ilyo yalepapata kuli Lesa ukuti: “Bikeni ifilamba fyandi mu nyambi yenu. Bushe tafyalembwa mwi buuku lyenu?” Nga fintu twamona muli aya mashiwi, Davidi alishibe ukuti Yehova alemona amacushi alepitamo ne fyo umutima wakwe walecula. Yehova alishibe ifyo Davidi aleumfwa ububi kabili alibukishe ne fyo apitilemo ifyalelenga ukutila alelukusha ifilamba. Cine cine Kabumba wesu alibika amano kuli bonse abafwaisha ukucita ifyo afwaya, “ababa ne mitima ya cishinka kuli ena.”

Mu Amalumbo 23, namo balilondolola bwino sana ifyo Lesa asakamana abantu mu citemwiko. Amashiwi ya ntanshi yapashanya Lesa kuli kacema musuma. Yatila: “Yehova e mucemi wandi. Tapali ico nkabulisha.” Bakacema baba ku calo ca Israele ne fyalo fyapalamako balasakamana impaanga imo imo, no kwinika cila mpaanga ishina. Cila bushiku kacema aleta impaanga imo na imo kabili alaiceceeta bwino bwino no kumona nga ca kuti naicenwa. Nga asanga ili ne cilonda, alabikapo umuti pa kuti cipole bwangu. Nga ca kutila impaanga nailwala kacema kuti ayasamuna akanwa no kuipatikisha ukumina umuti no kuikatilila pa kuti ipona no kufwa. Ala mwandini, ici cilangililo cisuma, cilatulanga ifyo Yehova asakamana bonse abamucetekela.

Ipepo no Kubuuka—Filenga Twashininkisha Ukuti Lesa Alatusakamana

Aya malumbo twalandapo e lyo na yambi ayasuma ayaba muli Baibolo, tayalembelwe ukuti tuleumfwa fye bwino nga twayabelenga. Lelo yalenga twaishiba ifyo ababomfi ba cishinka aba kwa Lesa balelondolwela Yehova ifyali ku mitima yabo ne fyo balemulomba ukuti abafwe, e lyo ne fyo baletasha Lesa pa fyo alebatungulula no kubapaala. Ifyo balembele fitulanga bwino bwino ukuti balya babomfi ba kwa Lesa balicetekele icine cine ukuti Lesa alebasakamana. Nga tulebelenga no kutontonkanya sana pali ifi fyebo fyalefuma pa nshi ya mitima ya balya bantu, na ifwe bene kuti twacetekela no kutemwa Lesa. Ifi Lesa afwaya ukuti tulepepa kuli ena, bushininkisho bwine bwine ubwa kuti alatusakamana.

Inshita shimo ubwafya bulakula sana ica kuti tulafilwa no kwishiba ifya kupepa kuli Lesa. Bushe ica musango yo cilalenga Yehova afilwa ukwishiba ubwafya bwesu? Icasuko caba pa Abena Roma 8:26 apatila: “Umupashi . . . ulatwafwako mu kunaka kwesu; pantu ubwafya tulingile ukupepela ilyo tulefwaya ukupepa tatubwishiba, lelo umupashi wine ulatupapaatilako ilyo tuleteta ukwabula ukulanda.” Ili lembo liletulanga ukutila amapepo ayo ababomfi ba kwa Lesa aba kale balepepa ayalembwa muli Baibolo, kuti yalenga Yehova aishiba ifyo na ifwe bene tuleumfwa no kutwafwa pantu ‘e umfwa ipepo.’—Amalumbo 65:2.

Isubilo lya kubuuka na lyo line lilalenga twashininkisha ukuti cine cine Lesa alibika amano ku muntu umo umo. Yesu Kristu atile: “Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe [Yesu] no kufumamo.” (Yohane 5:28, 29) Amashiwi ya ciGriki babomfya pali ili lembo yatila “ababa mu nshiishi bakebukishiwa,” tayalanda fye ati ababa mu “nshishi.” Aya mashiwi yalola mu kuti Lesa alebukisha umuntu uufwile ukulingana ne fyo alecita ilyo talafwa.

Tontonkanyeni pali ici cishinka, pa kuti Lesa abuushe umuntu uwafwa, afwile ukwishiba fyonse pali uyu muntu, ifyo alemoneka, imibele yakwe na mano akwete e lyo ne fintu asambilile, afwile aishiba na matontonkanyo yakwe! (Marko 10:27) Lesa te kuti alabe umuntu nangu papite imyaka amakana ayengi. (Yobo 14:13-15; Luka 20:38) Kanshi Yehova Lesa alebukisha bwino bwino iminshipendwa ya bantu abafwa, kabili ici cilenga twashininkisha ukuti cine cine Lesa alatusakamana umuntu umo umo!

Yehova Alalambula

Finshi twingacita pa kuti Lesa aletupoosako amano no kutusakamana? Icikalamba ico tufwile ukucita, kucetekela Lesa, ukulamunakila no kukwata icitetekelo. Umutumwa Paulo alangile ukuti umuntu uwaba ne citetekelo Lesa alamusakamana. Alembele ati: “Ukwabula icitetekelo te kuti tusekeshe Lesa, pantu uupalamina kuli Lesa afwile ukusumina ukuti e ko aba no kuti alalambula abamufwaisha.”—AbaHebere 11:6.

Ishibeni ukutila pa kuti tube ne citetekelo ca kulenga Lesa ukusekelela kano twacita ifintu fibili. Ica ntanshi tufwile “ukusumina ukuti e ko aba,” e kutila tufwile ukusumina ukuti Lesa wa cine cine, no kutila e Kateka wesu Umukalamba, uo tufwile fye ukulaumfwila no kupepa. Ica bubili, tufwile ukusumina ukuti “alalambula abamufwaisha.” Nga tuli ne citetekelo ca cine, tukacetekela ukuti Lesa alasakamana imikalile ya bantu bonse abafwaisha ukucita ifyo afwaya kabili alabalambula. Nga ca kuti mwalasambilila Icebo ca kwa Lesa no kulasangwa na bantu abomfwila Lesa, na imwe bene kuti mwaba ne citetekelo icingalenga Lesa ukumulambula no kulamusakamana bwino bwino.

Abantu abengi muno calo bamona kwati Lesa tapoosako amano ku ficitikila abantunse. Lelo nga fintu twamona, Baibolo ilatulanga bwino bwino ukuti Lesa alasakamana sana abakwata icitetekelo ca cine. Nangula shino nshiku fwe bantu tulaba sana na macushi, amasakamika, tulafuupulwa, no kukalipwa, tatufwile ukulamona kwati twalipelelwa. Yehova Lesa alatusakamana. Na kuba, alatukoselesha ukutila tufwile ukulamulomba ukuti aletwafwa. Uwaimbile amalumbo atile: “Poosa icisendo cobe pali Yehova, na o akakukosha. Takaleke uwalungama ukutelententa.”—Amalumbo 55:22.

[Futunoti]

[Akabokoshi ne Cikope pe bula 29]

Amalembo ya Kukosha Icitetekelo Cenu Muli Lesa Uumusakamana Bwino Bwino

“Amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.”—2 IMILANDU 16:9

“Bikeni ifilamba fyandi mu nyambi yenu. Bushe tafyalembwa mwi buuku lyenu?”—AMALUMBO 56:8

“Yehova e mucemi wandi. Tapali ico nkabulisha.”—AMALUMBO 23:1

“Mwe bomfwa ipepo, kuli imwe e ko abantunse bakesa.”—AMALUMBO 65:2

“Muketa, na ine nkaasuka. Pantu mukafuluka umulimo wa minwe yenu.”—YOBO 14:15

“Uupalamina kuli Lesa afwile ukusumina ukuti e ko aba no kuti alalambula abamufwaisha.”—ABAHEBERE 11:6

“Poosa icisendo cobe pali Yehova, na o akakukosha. Takaleke uwalungama ukutelententa.”—AMALUMBO 55:22