Ukupeela kwa Kufuma pa Nshi ya Mutima

ILYO umutumwa Paulo alelanda pa kupeela, alembele ati: “Onse acite umo apangile mu mutima wakwe,” kabili alembele no kuti: “Te kupeela na mutimako nangu mu kupatikishiwa, pantu Lesa atemwa uupeela ne nsansa.” (2 Kor. 9:7) Yehova tapatikisha nangu umo ukutungilila ukupepa kwasanguluka. Aleka ababomfi bakwe ukulanga ifyo baipeelesha ukupitila mu kuitemenwa ukupeela no mutima wa nsansa. Ukutula na kale, abantu bakwe balaitemenwa ukupeela. Tontonkanyeni pali ifi fya kumwenako fitatu.

Ilyo Yehova afumishe abena Israele mu Egupti, abebele ukuti bapange icikuulwa ca mushilo. Ifya kupangila ici cikuulwa fyalekabilwa. E ico abena Israele babebele ukuti balete umusangulo wa fipe fyalekabilwa. Kabili “bonse abo umutima waimishe” baletele golde na silfere, ifibekobeko, ne fipe fimbi. Abantu balepeela fye ica kuti basukile babeba ati capwa lekeni.—Ukufu. 35:5, 21; 36:6, 7.

Pa numa ya myaka iingi ilyo balepekanya ukuti bakuule itempele, abantu ba kwa Lesa na kabili balikwete ishuko lya kulanga ukuti balatungilila ukupepa kwasanguluka. Imfumu Davidi yapeele ifyuma fya iko ifingi nga nshi kabili yakoseleshe abantu ukuti nabo bapeele. Awe abantu nabo bapeele no mutima onse. Umusangulo fye wa golde na silfere wacilile pa madola 100 bilioni ukulingana no mutengo wa dola pali ndakai! Abantu balisekelele pa bupe bapeele Yehova.—1 Imila. 29:3-9; 2 Imila. 5:1.

Umutima wa kupeela ne nsansa walimoneke na ku basambi ba kubalilapo aba kwa Yesu Kristu. Pa bushiku bwa mutebeto wa Pentekoste mu 33 C.E., abantu nalimo 3,000 balibatishiwe, kabili abengi pali aba tabaleikala mu Yerusalemu. Pa kutila bafwilishe aba bantu abakwete fye utunono ukutwalilila ukwikala mu musumba pa kutila beshibilepo na fimbi pa cisumino cabo icipya, kwali amapekanyo ya kuti Abena Kristu basangule ifya kusangilamo indalama. Aba bwananyina bashitishe ifipe fyabo no kutwala indalama ku batumwa pa kutila shingabomfiwa ukwafwilisha abalekabila. Afwile Yehova alitemenwe nga nshi ukumona ukutemwa ne citetekelo ca balesangula!—Imil. 2:41-47.

Pali lelo, Abena Kristu balikonkanyapo ukutungilila ukupepa kwasanguluka ukupitila mu kupeela ne nsansa inshita yabo, amaka yabo, ne ndalama. Amashiwi yali mu kabokoshi, yaletulanga inshila shimo isho na imwe mwingapeelelamo.

[Akabokoshi pe bula 18, 19]

IFYO BAMO BASANGULA

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Umulimo wa mwi Sonde Lyonse.”

Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society, Attention Treasury, Akabokoshi 33459, Lusaka?10101. (Imisangulo ilandilwepo pe samba kuti yatumwa na ku maofeshi ya Nte sha kwa Yehova ayabela mu calo mwikala.) Umuntu nga atuma cheke kuli iyi adresi, alingile ukulemba ukuti abakapoka indalama ni ba “Watch Tower.” Abalefwaya kuti basangula ne fibeekobeeko nelyo ifipe fimbi ifya mutengo. Uulepeela ifya musango uyu, afwile ukutumina pamo na kalata iyalinga fye no kulondolola ukuti ubo bupe atumine ku maofeshi ya Nte sha kwa Yehova.

UKUPEKANYA UKUPEELA MU KUITEMENWA

Ukulunda pa kupeela indalama fye ishine, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower Society ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Society. Nangu kuti alembesha ukuti ba Watch Tower Society e bakapoka indalama ilyo umwine akafwa. Kuti acite fyo ukukonka na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsosela wabo aleya ku Watch Tower Society nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku Watch Tower.

Ubupe bwa Kulapeelwako Akanono: Ubu bupe umo umuntu engakuushisha indalama mu kabungwe akabomfiwa ne Nte sha kwa Yehova. Ena nangu umuntu umbi uo alefwaya kuti alepokelelako akandalama kalinga cila mwaka mpaka akafwe.

Impanga ne Fikuulwa: Impanga ne fikuulwa ifyo bengashitisha kuti fyasangulwa ngo bupe, nangu nga ni ng’anda, kuti balemba fye icipangano ca kuti ba Watch Tower Society e bakaba abene ba ng’anda ilyo umwine akafwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo ba Watch Tower Society impanga nelyo ifikuulwa.

Ifya Cishale no Kuseekesha: Umuntu kuti alemba no kusuminishanya na ba Watch Tower Society ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Society. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela.

Nga mulefwaya ukupeela mu kuitemenwa, mulingile ukulembela ku maofeshi ya Nte sha kwa Yehova no kwipusha nelyo ukubatumina lamya ukubomfya inambala ili pe samba.

Treasury

Watch Tower Society

Box 33459,

Farm 23a, Makeni

Lusaka 10101

Lamya: (021) 1 272062