Bushe Kuti Mwa-asuka Ifi Fipusho?

Mulandu nshi 1 Abena Korinti ilandila pa nama isho baletuula ku tulubi?

▪ Umutumwa Paulo alembele ukuti: “Conse ico bashitisha pa maliketi ya nama mulelya, mwilaipusha iyo pa mulandu wa kampingu wenu.” (1 Abena Korinti 10:25) Bushe ishi nama shalefuma kwi?

Ukutuula amalambo ya nama kwali ukwacindama sana mu kusefya ukwalecitika mu matempele ya baGriki na bena Roma. Lelo tabalepwisha ukulya inama shonse isho baletuula amalambo. Inama ishaleshalako mu matempele ya basenshi baleshitwala pa maliketi mu kushitisha. Icitabo ca Idol Meat in Corinth citila: “Limo bashimapepo . . . babeta ukuti aba kwipika nangu abashitisha inama. Pa nama balebapeela nga baipaya isha kutuula amalambo, e po balefumya isha kushitisha pa maliketi.”

Kanshi te nama shonse baleshitisha pa maliketi ishaleshala kuli shilya balebomfya pa kusefya ukwaleba mu matempele. Ilyo bashulile apali maliketi baleshitishishapo inama mu musumba wa Pompeii (ici Latini, macellum), balisangile amafupa ya mpaanga. Uwasambilila sana Henry J. Cadbury, atile ifi filanga ukuti “inama baleshitisha shaleba ishituntulu nelyo baleshipaila mu macellum e lyo shimbi shaleipailwa limo nelyo shali sha kutuula amalambo pe tempele.”

Ico Paulo alelandapo ca kuti nangu ca kutila Abena Kristu teti bapepe mu mipepele ya cisenshi, inama isho baletuula mwi tempele kuti bashita pantu shena tashalekowela.

Cinshi abaYuda na bena Samaria bashaleumfwanina pa nshita Yesu ali pa calo?

▪ Yohane 4:9 itila ‘abaYuda tabaleumfwana na bena Samaria.’ Uku kukanaumfwana kwatampile kale sana ilyo Yeroboamu atendeke ukupepa ifilubi mu bufumu bwa mikowa 10 ubwa ku kapinda ka ku kuso aka Israele. (1 Ishamfumu 12:26-30) Abena Samaria baleikala mu musumba wa Samaria, umusumba ukalamba uwa bufumu bwa ku kapinda ka ku kuso aka Israele. Ilyo iyi mikowa 10 baicimfishe ku bena Asiria mu 740 B.C.E., abena Asiria basendele bankole mu fyalo ifyo balecimfya, abalepepa utulubi, no kubaleta mu Samaria. Aba bantu batampile ukulaupana na bena Israele abaleikala mu Samaria, kabili ici calengele ukuti imipepele ya bena Samaria ibipileko.

Ilyo papitile imyaka iingi, abena Samaria balefuupula abaYuda abalekuula itempele lya kwa Yehova ne fibumba fya musumba wa Yerusalemu ilyo babwelele ukufuma mu Babiloni umo babasendele bunkole. (Esra 4:1-23; Nehemia 4:1-8) Ukukanaumfwana mu fya mipepele kwalibipileko ilyo abena Samaria bakuulile itempele lyabo pa Lupili lwa Gerisimu mu ma 300 B.C.E.

Ilyo Yesu ali pano calo, nga babomfya ishiwi lya kuti “umwina Samaria” ninshi balelanda pa mipepele ya bena Samaria. Na pali iyi yine nshita, abena Samaria balepepela pa Lupili lwa Gerisimu, kabili abaYuda balisuulile sana abena Samaria.—Yohane 4:20-22; 8:48.

[Icikope pe bula 12]

Icikope icilelanga baletuula ilambo lya nama, mu ma 500 B.C.E.

[Abatusuminishe]

Musée du Louvre, Paris

[Icikope pe bula 12]

Yeroboamu e watendeke ukupepa ifilubi