Temweni Ubulungami no Mutima Wenu Onse

“Walitemwa ubulungami.”—AMALU. 45:7.

 1. Finshi fingatwafwa ukulaenda mu “tushila twa bulungami”?

YEHOVA aletungulula abantu bakwe mu “tushila twa bulungami” ukubomfya Icebo cakwe no mupashi wakwe. (Amalu. 23:3) Lelo apo tatwapwililika, ilingi line tulafumamo muli uto tushila. Pa kuti tutampe ukucita ifyalungama na kabili, kano twabikako sana amano. Finshi fingatwafwa ukucite fyo? Tufwile ukutemwa ukucita ifyalungama nga Yesu.—Belengeni Amalumbo 45:7.

 2. Bushe “utushila twa bulungami” e finshi?

² Bushe “utushila twa bulungami” e cinshi? Utu “tushila” twa mampalanya twimininako amafunde yalungama ayo Yehova abikako. Mu ciHebere ne ciGriki, “ubulungami” cipilibula ukukonka sana amafunde. Apo muli Yehova e “mwaikala ubulungami,” bakapepa bakwe bacetekela ukuti e walinga ukubeba inshila yalungama iyo bafwile ukwendamo.—Yer. 50:7.

 3. Kuti twacita shani pa kuti twishibe sana ubulungami bwa kwa Lesa?

³ Nga tule-esha no mutima wesu onse ukulakonka amafunde yalungama aya kwa Lesa, e lyo twingamutemuna sana. (Amala. 32:4) Pa kuti tulekonka aya mafunde, tufwile intanshi ukusambilila pali Yehova Lesa ukubomfya Icebo cakwe, Baibolo. Nga tulesambilila sana pali ena, no kulapalama kuli ena cila bushiku, e lyo tukatemwa sana ubulungami bwakwe. (Yako. 4:8) Kabili tufwile ukukonka ifilanda Icebo ca kwa Lesa ilyo tulesala ifya kucita pa fintu ifyacindama.

Fwayeni Ubulungami bwa kwa Lesa

 4. Bushe mu kufwaya ubulungami bwa kwa Lesa mwasansha na finshi?

⁴ Belengeni Mateo 6:33. Ukufwaya ubulungami bwa kwa Lesa te kuya fye mu kubila imbila nsuma iya Bufumu. Pa kuti Yehova alesekelamo mu mulimo tumubombela, lyonse tufwile ukulakonka amafunde yakwe ayalungama sana. Finshi bonse abafwaya ubulungami bwa kwa Yehova bafwile ukulacita? Bafwile “[ukufwala] ubuntu bupya ubwalengelwe ukulingana no kufwaya kwa kwa Lesa mu bulungami bwa cine na mu cishinka.”—Efes. 4:24.

 5. Cinshi cingatwafwa ukukanafuupulwa?

⁵ Ilyo tule-esha na maka ukulakonka amafunde ya kwa Lesa ayalungama, inshita shimo tulafuupulwa pa mulandu wa filubo fyesu. Finshi fingatwafwa ukukanafuupulwa e lyo no kusambilila ukutemwa ifyalungama no kulacifita? (Amapi. 24:10) Tufwile ukulapepa kuli Yehova lyonse “ne mitima ya cine no kucetekela nga nshi.” (Heb. 10:19-22) Nampo nga tuli Bena Kristu basubwa nangu twakwata isubilo lya kwisaikala pe sonde, twalitetekela icilubula ca kwa Yesu Kristu ne fyo atucitila nga Shimapepo Mukalamba. (Rom. 5:8; Heb. 4:14-16) Muli magazini yabalilepo ukufuma mwali icilangililo pa fyo umulopa wa kwa Yesu wakwata amaka. (1 Yoh. 1:6, 7) Icipande casosele ukuti: “Calishibikwa ukuti nga mwamwena icintu icakashika mwi galasi ilyakashika ilyo muli apali ulubuuto, cimoneka icabuuta; e ico nangu imembu shesu shingakashika ce, Lesa nga ashilolesha ukupitila mu mulopa wa kwa Kristu, shimoneka ishabuuta.” (July 1879, ibu. 6) Ala caliwama sana ukuti Yehova alitulubula ukupitila mwi lambo lya Mwana wakwe uo atemwa!—Esa. 1:18.

Mulebebeta Ifya Kufwala Fyenu Ifya Bulwi

 6. Mulandu nshi ukulabebeta ifya kufwala fyesu ifya bulwi kwacindamina?

⁶ Lyonse fye tufwile ukufwala “ubulungami nge ca kucinga icifuba,” pantu ubulungami ca kufwala cacindama ica bulwi icafuma kuli Lesa. (Efes. 6:11, 14) Nampo nga ni nomba line twaipeele kuli Yehova nangu nga twalimubombela pa myaka iingi, calicindama ukuti tulebebeta ifya bulwi fyesu ifya ku mupashi. Mulandu nshi? Pantu Satana ne fibanda fyakwe balipooswa ukufuma mu muulu kabili baba pe sonde. (Ukus. 12:7-12) Satana alikalipa, kabili alishiba ukuti inshita ashele na yo inono. Kanshi, alifundumana mu kusansa abantu ba kwa Lesa. Bushe mwamona ifyo cacindamina ukuti lyonse tulefwala “ubulungami nge ca kucinga icifuba?”

 7. Nga twaishiba ubucindami bwa kufwala “ubulungami nge ca kucinga icifuba,” finshi tushakulacita?

⁷ Ica kucinga icifuba cicingilila umutima. Apo tatwapwililika, umutima wesu uwa mampalanya waba uwa bucenjeshi kabili walipelelwa. (Yer. 17:9) Apo walemenena ku kucita ifyabipa, calicindama ukuti tuleusambilisha no ku-usalapula. (Ukute. 8:21) Nga twaishiba ubucindami bwa kufwala “ubulungami nge ca kucinga icifuba,” tatwakulasala ifya kuleseshamo icitendwe ifyo Lesa apata; kabili tatwakulatontonkanya pa kucita ifyabipa, pantu ukucite fyo cimo no kufuula ica kucinga icifuba. Tatwakulapoosa inshita iikalamba ku kutamba TV. Lelo, tukalaesha na maka ukucita ifisekesha Yehova. Na lintu twacita fimo ifishalungama no kuwa pa kashita kanono, Yehova kuti atwafwa ukwima na kabili.—Belengeni Amapinda 24:16.

 8. Mulandu nshi tulingile ukukwatila “inkwela iikalamba iya citetekelo”?

⁸ Pa fya bulwi fyesu ifya ku mupashi, paba ne “nkwela iikalamba iya citetekelo.” Ilalenga ‘tuleshimya imifwi yonse iya mulilo iya mubifi.’ (Efes. 6:16) E lyo icitetekelo no kutemwa Yehova no mutima onse kulatwafwa ukucita ifyalungama no kukanafuma mu musebo uutwala ku mweo wa muyayaya. Nga twatemwa sana Yehova, e lyo tukatemwa sana ubulungami bwakwe. Inga kampingu yesu? Bushe itwafwa shani ukutemwa ubulungami?

Beni na Kampingu Musuma

 9. Bushe ukukwata kampingu musuma kutunonsha shani?

⁹ Ilyo twabatishiwe, twalombele Yehova ukutupeela “kampingu musuma.” (1 Pet. 3:21) Apo twalitetekela mu cilubula, umulopa wa kwa Yesu ulafimba pa membu shesu ne co cilenga tube abasanguluka kuli Lesa. Lelo, pa kuti tutwalilile ukuba abasanguluka kuli Lesa, tufwile ukusungilila kampingu musuma. Nga ca kuti nshita shimo kampingu yesu iletupeela imilandu no kutusoka, tufwile ukutemwa pantu ninshi ilebomba bwino. Nga kampingu iletucinkulako muli uyo musango ninshi tayakunkuma, icili ilatwafwa ukwenda mu nshila sha kwa Yehova ishalungama. (1 Tim. 4:2) Lelo kampingu kuti ya-afwa balya abafwaya ukutemwa ubulungami, na muli fimbi.

10, 11. (a) Shimikeni icacitike icilelanga ico tulingile ukumfwila kampingu yesu nga twali-isambilisha ifya mu Baibolo. (b) Mulandu nshi ukutemwa ubulungami kwingatuletela insansa ishingi nga nshi?

¹⁰ Ilyo twalufyanya, kampingu kuti yatuseka nangu ukutucusha. Umulumendo umo alifumine mu “tushila twa bulungami.” Alikunkwime mu kutamba ifye shiku kabili atampile no kupeepa ibange. Nga aya mu kulongana aleumfwa ububi kabili ilyo aya mu mulimo wa mwi bala aleimona uwa bumbimunda, e ico alilekele ukulongana no kushimikila. Atile: “Lelo nshaishibe ukuti kampingu yandi yali no kulanshinina pa fyo nalecita.” Asosele no kuti: “Nalecita ifintu ifya buwelewele pa myaka ine.” Lyena atampile ukutontonkanya pa lwa kubwelela mu cine. Nangu ca kuti aletontonkanya ati Yehova teti omfwe amapepo yakwe, ukupepa kwena alipepele no kulomba ubwelelo kuli Lesa. Tapapitile na mamineti 10 ukufuma apo apepeele, banyina balishile no kumukoselesha ukutampa ukulongana na kabili. Aile ku Ng’anda ya Bufumu no kulanda na eluda umo ukuti alemutungulula isambililo. Mu kuya kwa nshita, alibatishiwe kabili alatasha sana Yehova pa kupususha ubumi bwakwe.

¹¹ Bushe na imwe tamwamona ukuti mu kucita ifyalungama mwaliba insansa ishingi? Ilyo tule-esha na maka ukutemwa ubulungami no kucita ifyalungama, tukasanga ukuti ukucita ifitemuna Shifwe wa ku muulu, kuletuletela sana insansa. Taleni tontonkanyeni! Inshita ileisa ilyo abantu bonse bakakwata kampingu iikalabaletela fye insansa; bakalanga bwino bwino ukuti baba mu cipasho ca kwa Lesa. E ico, ino ine nshita, natutemwe ubulungami ne mitima yesu yonse no kulenga Yehova ukusekelela.—Amapi. 23:15, 16.

12, 13. Kuti twasambilisha shani kampingu yesu?

¹² Kuti twacita shani pa kuti tusambilishe kampingu yesu? Ilyo tulesambilila Baibolo ne mpapulo shesu ishilanda pa fya mu Baibolo, calicindama ukulaibukisha ukuti “umutima wa mulungami ulatontonkanya pa kwasuka.” (Amapi. 15:28) Tontonkanyeni pa fyo ukwibukisha ici cishinka kwingatwafwa ilyo tulefwaya incito ya kwingila. Nga twasanga ukuti incito tulefwaya ukwingila tayawama nga kukonka ifilanda Amalembo, fwe bengi tulakonka bwangu bwangu ifyalanda umusha wa cishinka kabili uwashilimuka. Lelo, nga twafilwa ukwishiba bwino nga kuti twaingila iyo ncito nangu iyo, tufwile ukufwaya ifishinte fya mu Baibolo ifingatutungulula e lyo no kupepelapo.a Ifishinte fimo twingatontonkanyapo ni filya ifilanda pa kukanapunwisha kampingu ya bambi. (1 Kor. 10:31-33) Ifyo tufwile ukwangwako sana, ni filya ifilanda pali bucibusa bwesu na Lesa. Nga ca kuti twalishininkisha ukuti Yehova e ko aba, icikalamba ico tufwile ukuyipusha ca kuti, ‘Bushe nga naingila iyi ncito, ndi no kulungulusha Yehova no kumukalifya?’—Amalu. 78:40, 41.

¹³ Ilyo tulepekanya Isambililo lya Ulupungu lwa kwa Kalinda nelyo Isambililo lya Baibolo Ilya pa Cilonganino, tufwile ukulaibukisha ukuti tulingile ukulaetetula pa fyebo tulesambilila. Bushe lyonse tushila fye ifyasuko lubilo lubilo no kuya kuli paragrafu ikonkelepo? Ukusambilila kwa musango yo takwingalenga twatemwa sana ubulungami nelyo ukulenga kampingu yesu ukulatucinkulako. Nga tulefwaya ukutemwa ubulungami, tulekabila ukubikako sana amano ku kusambilila no kwetetula pa fyo tulebelenga mu Cebo ca kwa Lesa. E nshila fye yeka twingasambililamo ukutemwa ubulungami no mutima wesu onse!

Kwateni Insala ne Cilaka ca Bulungami

14. Bushe Yehova Lesa na Yesu Kristu bafwaya tuleumfwa shani ilyo tulebomba umulimo wa mushilo?

¹⁴ Yehova Lesa na Yesu Kristu bafwaya tuleba ne nsansa ilyo tulebomba umulimo wa mushilo. Finshi fimo ifingalenga tuleba ne nsansa? Mulandu nshi tulingile ukutemenwa ubulungami? Ilyo Yesu alelanda Ilyashi lya pa Lupili, atile: “Balipaalwa abomfwa insala ne cilaka ca bulungami, pantu bakekuta.” (Mat. 5:6) Ni mwi aya mashiwi yalola kuli balya abafwaya ukutemwa ubulungami?

15, 16. Bushe ababa ne nsala ne cilaka ca ku mupashi bakekuta shani?

¹⁵ Icalo twikalamo citekwa no mubifi. (1 Yoh. 5:19) Nga twabelenga inyunshipepala ya mu calo icili conse, tusangamo fye amalyashi ya fya bunkalwe no lukaakala ifilecitika sana. Ilyo abantu abalungami batontonkanya pa bunkalwe ubo abantu balecita ku bantu banabo, cilabapesha sana amano. (Luk. Mil. 8:9) Lelo, fwe batemwa Yehova, twalishiba ukuti eka fye e wingapwisha insala ne cilaka ca ku mupashi ifyo abantu bakwata abafwaya ukusambilila ubulungami. Nomba line fye, bonse abashipepa Lesa bakabafumya pa calo, kabili abatemwa ubulungami tabakalelunguluka na kabili ku mibele ya bampulamafunde na ku micitile yabo. (2 Pet. 2:7, 8) Ala abatemwa ubulungami bakalubuka icine cine!

¹⁶ Fwe babomfi ba kwa Yehova kabili abasambi ba kwa Yesu Kristu, twalishiba ukuti abakwata insala ne cilaka ca bulungami “bakekuta.” Bali no kwikushiwa nga nshi ukupitila mu fyo Lesa apekanya imyulu ipya ne sonde lipya “umukaba ubulungami.” (2 Pet. 3:13) E ico, tatufwile ukufuupulwa nangu ukupapa pa mulandu wa kuti umutitikisha no lukaakala fyalenga mu calo ca kwa Satana mwiba ubulungami. (Luk. Mil. 5:8) Yehova, Uwapulamo, alishiba ifilecitika kabili nomba line fye ali no kulubula abatemwa ubulungami.

Nonkelenimo mu Kutemwa Ubulungami

17. Fisuma nshi fifuma mu kutemwa ubulungami?

¹⁷ Ilembo lya Amalumbo 146:8 lilanda sana pa bunonshi bumo ubwacindama sana ubwaba mu kulaenda mu nshila ya bulungami. Kemba wa malumbo aimbile ukuti: “Yehova atemwa abalungama.” Taleni tontonkanyeni pali co! Mulopwe wa bubumbo bonse alitutemwa pantu twalitemwa ubulungami! Apo Yehova alitutemwa, tatuletwishika ukuti ali no kutupeela ifyo tukabila ilyo tulebika ifya Bufumu pa ntanshi mu mikalile yesu. (Belengeni Amalumbo 37:25; Amapinda 10:3.) Kanshi, abakekala fye pali lino isonde ni balya abatemwa ubulungami. (Amapi. 13:22) Abantu ba kwa Lesa abengi, bakakwata insansa ishingi sana no bumi bwa muyayaya muli paradaise iyayemba pano isonde pa mulandu wa kutemwa ubulungami. Nangu fye, ni pali ino ine nshita, abatemwa ubulungami bwa kwa Lesa tabasakamikwa kabili ici cilenga mu mayanda yabo na mu filonganino baba, muleba ukumfwana.—Fil. 4:6, 7.

18. Finshi tufwile ukutwalilila ukucita ilyo tulelolela ubushiku bwa kwa Yehova?

¹⁸ Ilyo tulelolela ubushiku bukalamba ubwa kwa Yehova, tufwile ukutwalilila ukufwaya ubulungami. (Sefa. 2:2, 3) E ico, natulelanga ukuti twalitemwa inshila sha kwa Yehova Lesa ishalungama no mutima wesu onse. Ico cilesanshamo no kufwala bwino “ubulungami nge ca kucinga icifuba” pa kuti tulecingilila umutima wesu uwa mampalanya. Na kabili tufwile ukusungilila kampingu umusuma, e kutila iingatuletela insansa no kulenga umutima wa kwa Lesa ukusekelela.—Amapi. 27:11.

19. Finshi tufwile ukupampaminapo ukucita, kabili finshi tuli no kusambilila mu cipande cikonkelepo?

¹⁹ “Amenso ya kwa Yehova yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” (2 Imila. 16:9) Ayo amashiwi yalatusansamusha sana ilyo tulecita ifyalungama mu calo umwaba ulukaakala, ububifi na macushi kabili umo ifintu filebipilako! Ca cine ukuti, abantu abataluka kuli Lesa balapapa ilyo balemona tulecita ifyalungama. Lelo tulanonkelamo nga nshi ilyo twatwalilila ukukonka ubulungami bwa kwa Yehova. (Esa. 48:17; 1 Pet. 4:4) E ico, natube ne mitima ya cishinka no kupampamina pa kutemwa ubulungami no kulacita ifyalungama ne mitima yesu yonse pa kuti tuleba ne nsansa. Lelo, pa kuti tuleba no mutima wa cishinka tufwile no kupata ifyabipa. Icipande cikonkelepo cili no kutulanga umo ico calola.

[Futunoti]

Kuti Mwayasuka Shani?

• Mulandu nshi tufwile ukwishibila ubucindami bwa cilubula pa kuti tutemwe ubulungami?

• Mulandu nshi cacindamina ukufwala “ubulungami nge ca kucinga icifuba”?

• Kuti twacita shani pa kuti tusambilishe kampingu yesu?

[Icikope pe bula 26]

Nga twalisambilisha kampingu yesu, ikatwafwa ukwishiba ifya kucita ilyo tuletontonkanya pa ncito twingabomba