Muletuula Yehova Amalambo no Mweo Wenu Onse
“Conse ico mulecita, mulebomba no mweo onse kwati mulebombela Yehova.”—KOL. 3:23.
1-3. (a) Bushe imfwa ya kwa Yesu pa cimuti ca kucushiwilwapo ipilibula ukuti Yehova tafwaya ifwe ukumutuula amalambo yonse? Londololeni. (b) Cipusho nshi pa malambo ico twingepusha?
MU NSHITA ya batumwa, Yehova alyebele abantu bakwe ukuti ilambo lya cilubula ilya kwa Yesu lyalifumishepo Ifunde lya kwa Mose. (Kol. 2:13, 14) Amalambo yonse ayo abaYuda baletuula pa myaka iingi tayali no kulapeelwa na kabili e lyo tayali no kuba ayacindama. Ifunde lya kwa Mose lyalibombele umulimo waliko uwa “kututungulula kuli Kristu.”—Gal. 3:24.
2 Ici tacipilibula ukuti Abena Kristu tabafwaya ukutuula amalambo. Lelo umutumwa Petro alandile ukuti Abena Kristu balingile “ukutuulila Lesa amalambo ya ku mupashi ayapokelelwa muli Yesu Kristu.” (1 Pet. 2:5) Na kabili umutumwa Paulo na o alandile ukuti Umwina Kristu onse uwaipeela aba kwati ‘lilambo’ kuli Lesa.—Rom. 12:1.
3 Kanshi Umwina Kristu alatuula amalambo ilyo aletuula ifintu fimo nelyo nga aleka ukucita fimo pa kuti asekeshe Yehova. Ukulingana ne fyo twaishiba pa malambo ayo abena Israele baletuula, kuti twaishiba shani nga ca kuti amalambo yonse ayo tutuula kuli Yehova yalapokelelwa?
AMALAMBO TUTUULA
4. Finshi tulingile ukulaibukisha ilyo tulecita ifili fyonse?
4 Nalimo kuti cayafya ukwishiba nga ca kuti ifyo tucita kuti fyalenga twatuula kuli Yehova amalambo. Ilyo tulebomba imilimo pa ng’anda, nga tuli ku sukulu, nga tuli ku ncito nelyo tuleshitako fimo nelyo nga tulecita ifintu fimbi, nalimo kuti twamona kwati ifi te kuti fyonaule bucibusa bwesu na Lesa. Lelo nga mwali-ipeela kuli Yehova nelyo mulafwaya ukuipeela, ninshi mufwile ukutontonkanyapo pa fyo mumona ifintu ifishacindama. Tuli Bena Kristu inshita yonse fye. Ilyo tulecita ifili fyonse tufwile ukukonka ifyo Baibolo ilanda. E mulandu wine Paulo atukonkomeshe ukuti: “Conse ico mulecita, mulebomba no mweo onse kwati mulebombela Yehova te bantu iyo.”—Belengeni Abena Kolose 3:18-24.
5, 6. Finshi tulingile ukulaibukisha ilyo tulecita icili conse e lyo na lintu tulesala ifya kufwala?
5 Imilimo iyo Umwina Kristu abomba cila bushiku, te milimo ya kwa Lesa. Lelo apo Paulo alitukonkomeshe ukulabomba “no mweo onse kwati tulebombela Yehova,” kanshi tufwile ukutontonkanyapo bwino pa fyo tucita ilyo tulebomba imilimo yonse. Nomba cinshi twingasambililako kuli ici? Bushe ifyo tucita ne fyo tufwala filalanga ukuti tuli Bena Kristu? Ilyo tulecita fintu, bushe kuti twaumfwa insoni ukweba abantu ukuti tuli Nte sha kwa Yehova pa mulandu wa fyo twacilacita nelyo ifyo tufwele? Awe te fyo cifwile ukuba! Abantu ba kwa Yehova tabafwaya ukucita icili conse icingaleta umuseebanya pe shina lya kwa Lesa.—Esa. 43:10; 2 Kor. 6:3, 4, 9.
6 Natulande pa fyo ukufwaya ukubomba “no mweo onse kwati tulebombela Yehova” kwingakuma imilimo iyalekanalekana iyo tubomba. Ilyo tulebomba iyi milimo tufwile ukulaibukisha ukuti amalambo yonse ayo abena Israele baletuula Yehova yalingile ukuba ayasuma nga nshi.—Ukufu. 23:19.
IFYO FIKUMA UBUMI BWENU
7. Bushe ukuipeela kuli Yehova kupilibula cinshi?
7 Ilyo mwaipeele kuli Yehova, mwali-itemenwe. Cilepilibula ukuti mwalisumine ukuti mulecita, intanshi mwakulakonka ifyo Yehova alefwaya. (Belengeni AbaHebere 10:7.) Mwalisalile ukucita icintu icisuma. Ukwabula ukutwishika, mwalimona ukuti ilyo mulefwaya ukuti Yehova amwafwe e lyo mwacita ifyo fintu ukulingana ne fyo afwaya, ififumamo filawama. (Esa. 48:17, 18) Abantu ba kwa Lesa ba mushilo kabili baliba ne nsansa pantu bapashanya imibele ya kwa Yehova, kasambilisha wabo.—Lebi 11:44; 1 Tim. 1:11.
8. Busuma nshi bwaba mu kutontonkanya pa fyo Yehova alemona amalambo ayaletuula abena Israele ukuba aya mushilo?
8 Yehova alemona amalambo abena Israele baletuula ukuba aya mushilo. (Lebi 6:25; 7:1) Ishiwi lya ciHebere ilyapilibulwa ati “bumushilo” lipilibula ukupaatukako, ukufumishiwako nelyo ukushishiwa kuli Lesa. Pa kuti Yehova alepokelela amalambo yesu, tulingile ukutaluka ku fintu fyonse ifingatukowesha. Tatufwile ukutemwa ifintu ifyo Yehova apata. (Belengeni 1 Yohane 2:15-17.) Cipilibula ukuti tatufwile ukula-ampana na bantu nelyo ukucita ifili fyonse ifingalenga Lesa alatumona abakowela. (Esa. 2:4; Ukus. 18:4) Cipilibula no kuti tatulingile ukulatamba ifintu fyakowela nelyo ifyabipa nangu ukulafitontonkanyapo.—Kol. 3:5, 6.
9. Cinshi Umwina Kristu alingile ukukwatila umutima usuma kabili mulandu nshi?
9 Paulo akonkomeshe Abena Kristu banankwe ukuti: “Mwilaba ukucita icisuma no kupeelana ifintu, pantu amalambo ya musango yu e yasekesha Lesa.” (Heb. 13:16) Kanshi ukukwata umutima uusuma no kulacitila bambi ifisuma, malambo ayo Yehova apokelela. Ukutemwa bambi kulanga ukuti tuli Bena Kristu ba cine.—Yoh. 13:34, 35; Kol. 1:10.
AMALAMBO TUTUULA KULI LESA
10, 11. Bushe Yehova amona shani umulimo wesu uwa kushimikila e lyo no kumupepa, kabili finshi tulingile ukulacita?
10 Inshila iyaishibikwa sana iyo fwe Bena Kristu tucitilamo ifisuma kuli bambi ‘kulanda pe subilo lyesu.’ Bushe mulashimikila lyonse ilyo mwakwata ishuko lya kulanda na bantu? Paulo aitile uyu mulimo ukuti “ilambo lya kulumbanya Lesa, e kutila, icisabo ca milomo iilumbula apabuuta ishina lya kwa [Lesa].” (Heb. 10:23; 13:15; Hos. 14:2) Kuti cawama ukulatontonkanya pa butali bwa nshita iyo tupoosa mu kushimikila imbila nsuma e lyo ne fyo twingacita pa kutila tuwamyeko ifyo tushimikila. Amalyashi ayengi pa kulongana kwa Mulimo yalatwafwa ukwishiba bwino ifya kushimikila. Imilimo pamo nga ukuya mu kushimikila e lyo ukubombako ubunte bwa mu lyashi fyabelako “ukulumbanya Lesa” kabili fyaba lubali lwa kupepa kwesu, kanshi tulingile ukubikako sana amano ku kutuula aya malambo. Nangu ca kutila ifyo tucita filapusanapusana, inshita tupoosa mu kushimikila imbila nsuma ifwile ukulanga ukuti tulatasha pa fyo Lesa atweba ukulacita.
11 Abena Kristu balabomfya nshita yabo lyonse ku mapepo ya lupwa nelyo ukulongana kwa cilonganino. E fyo Yehova afwaya ukuti tulecita. Nangu ca kuti ino nshita tatusunga Isabata nelyo ukuya ku Yerusalemu ku kusefya kumo, na lyo line tulasambililako fimo kuli yalya mafunde. Fimo ifyo balecita kale na muno nshiku mwine Abena Kristu balacita. Twalikwata ifingi ifya kucita lelo Lesa alatwenekela ukubomfyako inshita yesu ku kusambilila Icebo cakwe, ukupepa, e lyo no kulongana kwa Bwina Kristu. Imitwe ya ndupwa balabikako amano ukutungulula amapepo ya lupwa. (1 Tes. 5:17; Heb. 10:24, 25) Ilyo tulebomba imilimo ya Bwina Kristu tulingile ukuyipusha atuti, ‘Bushe kuti nacita shani pa kuti ningawamyako imibombele yandi mu fya ku mupashi?’
12. (a) Bushe ifyanunkila ifyo baletuula pa kupepa, kuti fyalinganishiwa kuli finshi muno nshiku? (b) Bushe amapepo yesu kuti yaba shani nge fyanunkila ifyo baletuula mu Israele?
12 Imfumu Davidi yaimbiile Yehova aiti: “Lekeni amapepo yandi yapekanishiwe nge fyanunkila ku cinso cenu.” (Amalu. 141:2) Baleni tontonkanyeni pa miku mupepa e lyo no musango wa mapepo yenu. Ibuuku lya Ukusokolola lilinganya “amapepo ya ba mushilo” ku fyanunkila ukulangilila ukuti amapepo yesu yalapokelelwa kuli Yehova kwati ni filya ifyanunka icisuma fyalenina ukuya ku muulu. (Ukus. 5:8) Kale mu Israele, ifyanunkila ifyo baletuula kuli Yehova pa cipailo balefipekanya bwino sana. Yehova alepokelela fye amalambo nga ca kuti bakonka ifyo abebele ukucita. (Ukufu. 30:34-37; Lebi 10:1, 2) Na ifwe nga natupekanya bwino amapepo yesu, Yehova kuti ayasuka amapepo yesu.
UKUPEELA NO KUPOKELELA
13, 14. (a) Bwafwilisho nshi Epafroditi ne cilonganino ca mu Filipi bapeele Paulo, kabili amwene shani bupe? (b) Kuti twapashanya shani Epafroditi na bena Filipi?
13 Indalama ishipeelwa ku mulimo wa mwi sonde lyonse nangu shibe ishinono nelyo ishingi kuti shapashanishiwa ku malambo ayo baletuula kale. (Marko 12:41-44) Mu nshita ya batumwa, icilonganino ca mu Filipi catumine Epafroditi ukuya ku Roma mu kutwalila Paulo ifyo alekabila. Epafroditi afwile atwaliile Paulo indalama isho icilonganino ca mu Filipi camupeele. Uyu tawali e muku wa kubalilapo abena Filipi balangile icileela kuli Paulo. Pa mulandu wa kuti bali aba cikuuku tabalefwaya ukuti Paulo alesakamana ifya kusanga indalama sha kubomfya lelo balefwaya ukuti alepoosa inshita iikalamba mu mulimo wa kushimikila. Bushe Paulo amwene shani ubupe? Atile “cena icanunkila, ilambo ilyapokelelwa, ilya kusekesha Lesa.” (Belengeni Abena Filipi 4:15-19.) Paulo alitashishe sana pa cileela ca bena Filipi e lyo na Yehova wine alitemenwe.
14 Na muno nshiku mwine Yehova alatemwa sana nga tulesangwilako ku mulimo wa mwi sonde lyonse. Na kabili atulaya ukuti nga twatwalilila ukubika ifya Bufumu pa ntanshi akatusakamana mu fya ku mupashi e lyo ne fyo tukabila.—Mat. 6:33; Luka 6:38.
MULETASHA
15. Finshi fimo ifyo mwingatashishapo Yehova?
15 Te kuti tukumemo ukulanda fyonse ifyo twingatashishapo Yehova. Bushe tatulingile ukumutasha pa fyo atusunga cila bushiku? Alatupeela fyonse ifyo tukabila pa kutila tube abomi. Alatupeela ifya kulya, ifya kufwala no mwakwikala e lyo no mwela uo tupeema. E lyo na kabili icitetekelo twakwata pa mulandu wa kwishiba Icebo ca kwa Lesa cilalenga twaba ne subilo. Kanshi calilinga ukulapepa Yehova no kulatuula amalambo ya kumulumbanya pa mulandu wa fyo aba ne fyo atucitila.—Belengeni Ukusokolola 4:11.
16. Kuti twalanga shani ukuti tulatasha pe lambo lya cilubula ilya kwa Kristu?
16 Nga fintu twasambilile mu cipande cafumineko, ubupe ubushaiwamina ubo Lesa apeela abantu lilambo lya cilubula ilya kwa Kristu. Ili ilambo e lilanga sana ifyo Lesa atutemwa. (1 Yoh. 4:10) Finshi twingacita pa fyo Lesa atucitila? Paulo atile: “Ukutemwa kwa kwa Kristu e kutucincisha, pa kuti ici e co twapingula, atuti apo umuntu umo afwilile bonse; . . . kabili afwilile bonse pa kuti aba mweo belaikalila abene beka kano ukulaikalila uwabafwilile kabili uwabuushiwe.” (2 Kor. 5:14, 15) Kanshi Paulo alelanda fye ukuti nga tulatasha pa cikuuku ca kwa Lesa, tufwile ukucindika Yehova no Mwana wakwe. Tulanga ukuti twalitemwa Lesa na Kristu no kuti tulabatasha nga tulebomfwila no kubombako umulimo wa kushimikila no kupanga abasambi.—1 Tim. 2:3, 4; 1 Yoh. 5:3.
17, 18. Bushe bamo bacita shani pa kuti baletuula sana amalambo ya kutasha Yehova? Shimikeni ica kumwenako.
17 Bushe te kuti muwamyeko amalambo ya kutasha Lesa? Bamunyinefwe bamo nga batontonkanya pa fyo Yehova abacitila, abengi balafwayako inshita no kwishiba ifya kubomba imilimo yabo pa kuti balepoosa inshita iikalamba mu mulimo wa kushimikila ne milimo imbi iya kwa Lesa. Bamo balabombako bupainiya bwa kwafwilisha umweshi umo nelyo imyeshi iingiko cila mwaka, e lyo bambi nabo balitendeka bupainiya bwa nshita yonse. Bambi nabo balabombako umulimo wa makuule ya fikuulwa fya kupepelamo. Bushe ishi, te nshila shisuma nga nshi isha kulangilamo ukutasha? Lesa alapokelela amalambo ya musango uyu nga ca kuti tulepeela ne mitima isuma no kutasha pa fyo atucitila.
18 Abena Kristu abengi bayumfwa kwati tabafikapo ukutasha Yehova, e cilenga balefwaya sana ukucitapo cimo. Ifi e fyo ba Morena bayumfwa. Balefwaya sana ifyasuko pa fya kwa Lesa mwi calici lya Katolika umo bakuliile e lyo na mu fitabo fyaba mano ya bantunse aya abena Asia. Lelo tabasangile ifyasuko. Nomba ilyo batampile ukusambilila Baibolo ne Nte sha kwa Yehova e lyo basangile ifyasuko. Ba Morena balitemenwe nga nshi pa kusanga ifyasuko balefwaya na pa fyo ifyasuko fyabalengele ukuba abashikatala mu bumi ica kuti balefwaya ukulabomba sana umulimo wa kwa Yehova pa kuti bengalanga ukutasha pa fyo abafwile. Ilyo babatishiwe, batampile ukulabombako bupainiya bwa kwafwilisha libili libili kabili ilyo ifintu fyali bwino balitampile bupainiya bwa nshita yonse. Nomba napapita ne myaka 30 apo batendekele umulimo wa nshita yonse na nomba bacili mu mulimo wa nshita yonse.
19. Kuti mwacita shani pa kuti mulebombesha ukutuula Yehova amalambo?
19 Kwena kwaliba ababomfi ba kwa Yehova aba cishinka abo cafya ukubomba bupainiya. Kanshi fyonse ifyo bonse twingabomba mu mulimo wakwe, Yehova alapokelela. Mu mikalile yesu cila bushiku, tufwile ukulakonka amafunde ya kwa Yehova, no kulaibukisha ukuti inshita yonse tuleimininako Yehova. Nga tuli ne citetekelo, tulacetekela sana ukuti Lesa akafikilisha ubufwayo bwakwe. Nga tulebomba imilimo isuma, abantu abengi balasambilila icine. Pa mulandu wa fyo twaishiba ubwingi, na pa mulandu wa fyo Yehova atucitila, natutwalilile ukulatuula amalambo ne myeo yesu yonse.
BUSHE KUTI MWAYASUKA IFI IFIPUSHO:
․․․․․
Bushe kuti twacindika shani Yehova ilyo tulebomba imilimo cila bushiku?
․․․․․
Malambo nshi tutuula ilyo tulebombela Lesa?
․․․․․
Ni nshila nshi twingapeelelamo Yehova ifyuma fyesu?
[Amashiwi pe bula 25]
Bushe ubusuma bwa kwa Yehova bulalenga mwafwaya ukuwamyako amalambo yenu aya kumutasha?
[Icikope pe bula 23]
Bushe lyonse ilyo ishuko lya kushimikila lyamoneka mulashimikila?