Nalitemenwe Sana pa Kusanga Ifyasuko Muli Baibolo

Nafyalilwe mu musumba wa Székesfehérvár, mu calo ca Hungary, umusumba umwaleikala abantu abakankaala ukucila pa myaka 1,000. Ncili ndebukisha ifyo uyu musumba waonaike pa numa ya nkondo ya calo conse iyalenga bubili.

Abankushishe ni ba mama na ba shikulu. Lyonse ndabebukisha, maka maka ba mama ba Elisabeth. Pantu e balengele ukuti ncetekele sana Lesa. Ilyo nali ne myaka itatu, cila bushiku icungulo twalepepa Ipepo lya We Shifwe. Lelo nshaishibe umo ili ipepo lyalolele mpaka ilyo nali mupepi no kufisha imyaka 30.

Bamama na bashikulu e balensunga ilyo nali umwaice. Abafyashi bandi balefwaya ukushita ing’anda, kanshi balebomba akasuba no bushiku. Lyonse pa cibelushi calenga bubili mu mweshi, ulupwa lonse lwalelongana ku kuliila pamo ica kulya. Naletemwa sana ukuba pamo no lupwa.

Mu 1958, abafyashi bandi balishitile ng’anda iyo balefwaisha, kabili twalitendeke ukwikalamo. Nalitemenwe icine cine pantu natendeke ukwikala na bafyashi! Papitile fye imyeshi 6, insansa twakwete shalipwile pantu batata balifwile ku bulwele bwa kansa.

Nali no bulanda icine cine. Napepele kuli Lesa nati: “Mwe Lesa, nalimulombele ukuti mupusushe batata, mulandu nshi mushabapusushishe? Nalibatemenwe sana. Mulandu nshi mushayasukile amapepo nalepepa?” Nalefwaisha ukwishiba ukwali batata. Naleti, ‘Bushe ni ku muulu baya, nelyo balilobelela fye?’ Nalekumbwa abanandi bambi abakwete bashibo.

Pa myaka iingi, naleya cila bushiku ku manda uko twashikile batata. Nalefukama apo twabashikile kabili nalepepa nati: “Mwe Lesa ngafweni, ndefwaya ukwishiba ukwaya batata.” Nalepepa no kuti angafwe ukwishiba ico fwe bantu twabela pano calo.

Ilyo nali ne myaka 13, natendeke ukusambilila iciGerman. Naletontonkanya ukuti, apo kwali amabuuku ayengi aya mu ciGerman, nalimo kuti nasangamo amasuko ku mepusho nakwete. Mu 1967, natendeke ukusambilila iciGerman mu musumba wa Jena, uwali kale mu East Germany. Nalebelenga amabuuku ayalembele abena German abasambilila sana, maka maka amabuuku yalelanda pa fyo abantu babela pano calo. Nangu ca kuti nalibelengelemo fimo ifyaleumfwika bwino, nshasangile amasuko yene yene ku mepusho nakwete. E ico nalitwalilile ukupepa pa kuti Lesa angafwe ukusanga amasuko.

Mu 1970, nabweleele ku calo ca Hungary uko naileishibana no mukashana Rose. Pali iyi nshita, ba Komyunisti e baleteka ici calo. Tapakokwele twalyupene, no kubutukila ku calo ca Austria. Ico twalefwaisha ca kuti tukayeikala mu musumba wa Sydney, ku Australia, ukwaleikala bayama.

Papitile fye inshita iinono, natendeke ukubomba incito mu Austria. Bushiku bumo, umunandi twalebomba nankwe anjebele ukutila, kuti nasanga amasuko yonse ayo nakwete muli Baibolo, kabili ampeele amabuuku ayalelanda pa fya mu Baibolo. Nalipwishishe ukubelenga aya mabuuku pa nshita fye iinono, kabili nalefwaya no kubelengelapo na yambi. E ico nalembeele Inte sha kwa Yehova, abalembele yalya amabuuku, pa kuti bantumineko na yambi.

Pa bushiku twakumenye umwaka umo mu cupo, Nte umo uwacaice, umwina Austria alitutandaliile. Andeteele amabuuku ayo nalombele, kabili ilyo anjipwishe nga kuti natemwa ukulasambilila Baibolo nankwe, nalisumiine. Apo nalefwaisha ukusambilila, twalesambilila imiku ibili mu mulungu, kabili pe sambililo limo twalepwisha ama awala nalimo 4!

Nalitemenwe sana ifyo ba Nte balensambilisha, ifyalefuma mu Baibolo. Ilyo banangile ishina lya kwa Lesa ilya kuti Yehova, muli Baibolo yandi iya mu ciHungarian, nalipapile sana. Pa myaka 27 iyo naleya ku ceici, nshatalile umfwapo bashimbula ishina lya kwa Lesa. Nalitemenwe sana pa fyo Baibolo yayaswike amepusho nakwete. Ku ca kumwenako, nasambilile ukuti abafwa tabaishiba akantu nangu kamo, baaba fye kwati balilaala utulo. (Lukala Milandu 9:5, 10; Yohane 11:11-15) Nasambilile no kuti mu calo cipya “imfwa tayakabeko na kabili.” (Ukusokolola 21:3, 4) Nalicetekela ukuti nkamona batata na kabili pantu mu calo cipya “kukaba ukubuuka” kwa bafwa.—Imilimo 24:15.

Rose na o alitendeke ukusangwapo nga balensambilisha Baibolo. Twalisambilile ifingi muli Baibolo, kabili twalipwile ukusambilila icitabo mu myeshi fye ibili! Lyonse twaleya mu kulongana ukwa Nte sha kwa Yehova ukwalebela pa Ng’anda ya Bufumu. Twalitemenwe icine cine ukumona ifyo Inte sha kwa Yehova batemwana, ifyo bafwana, e lyo ne fyo baikatana.—Yohane 13:34, 35.

Mu 1976, balitusuminishe ukwingila mu calo ca Australia, kabili twalifwaile ba Nte ilyo fye twafikile. Ba Nte balitupokelele bwino sana. Mu 1978 twaishileba Inte sha kwa Yehova.

Nomba nalisanga amasuko ku mepusho nakwete pa myaka iingi. Ukupalama sana kuli Yehova Lesa kwalilenga naishiba ukuti e Mufyashi wandi umusuma sana. (Yakobo 4:8) Kabili ndafwaya sana ukuti nkesemona batata mu calo cipya ilyo kukaba ukubuuka kwa bafwa.—Yohane 5:28, 29.

Mu 1989, twabwelele ku Hungary pa kuti tuyeshimikilako balupwa ne fibusa na bantu bambi ifyo twasambiliile mu Baibolo. Twalishimikila imbila nsuma ku bantu abengi nga nshi. Abantu ukucila pali 70, balisambilila Baibolo no kuba Inte sha kwa Yehova, kumo na bamayo.

Nalepepa kuli Lesa pa myaka 17 pa kuti nsange amasuko ku mepusho nakwete. Nomba napapita imyaka 39, kabili pali iyi imyaka yonse, “Ndatasha Yehova, Shifwe wa ku muulu, pa fyo ayasuka amapepo ayo nalepepa ukutula ku bwaice.”