ICIPANDE CA KUSAMBILILAMO 14
Bushe Mulebombesha Umulimo Wenu?
“Bomba umulimo wa kwa kabila wa mbila nsuma, bombesha umulimo obe onse.”—2 TIM. 4:5.
ULWIMBO 57 Ukushimikila ku Bantu Aba Misango Yonse
IFYO TWALASAMBILILAa
Ilyo Yesu abuushiwe, alikumene na basambi bakwe kabili abebele ati: “Kabiyeni, kalengeni . . . abasambi” (Moneni paragrafu 1)
1. Cinshi ababomfi ba kwa Lesa bonse bafwaya ukulacita, kabili mulandu nshi? (Moneni icikope pa nkupo.)
KRISTU YESU aebele abasambi bakwe ukuti: “Kabiyeni, kalengeni aba nko shonse ukuba abasambi.” (Mat. 28:19) Ababomfi ba kwa Lesa bonse aba cishinka balafwaya ukwishiba ifyo ‘bengalabombesha’ uyu mulimo babapeela. (2 Tim. 4:5) Na kuba uyu e mulimo uwacindamisha, kabili e ulingile ukubombwa bwangu ukucila imilimo yonse. Lelo kuti cayafya ukubomba uyu umulimo pa maawala ayengi ukulingana ne fyo twingafwaya.
2. Mafya nshi tukwata ilyo tulebomba umulimo wesu?
2 Kwaliba imilimo na imbi iyacindama iyo tulingile ukupoosapo inshita na maka. Nalimo tulabomba amaawala ayengi cila bushiku pa kuti tulekwata indalama sha kushitamo ifyo tukabila e lyo ne fyo ulupwa lwesu lukabila. Nalimo kuti cayafya ukubomba imilimo yonse iya mu lupwa nelyo nalimo twalilwala, twalikwata amasakamika, nelyo umubili ulakalipa pa mulandu wa kuti natukota. Finshi twingacita pa kuti tuleshipikisha amafya ya musango uyu ilyo tulebomba umulimo wesu apapela amaka yesu?
3. Finshi tulesambilila ku mashiwi Yesu alandile ayaba pali Mateo 13:23?
3 Tatufwile ukufuupuka nga ca kuti fimo fyalenga twalafilwa ukubombesha umulimo wa kwa Yehova. Yesu alishibe ukuti fwe babomfi ba kwa Lesa te kuti tulingane mu fyo tutwala ifisabo fya Bufumu. (Belengeni Mateo 13:23.) Yehova alatasha nga nshi pa milimo yonse iyo tumubombela kulila fye tulebomba no mweo onse. (Heb. 6:10-12) Nalimo kuti twalamona ukutila kuti twabombesha pa mulandu wa kuti ifintu mu mikalile yesu filiko bwino. Muli cino cipande twalalanda pa fyo twingacita pa kuti tulebika sana amano ku mulimo wesu, pa kuti twangushe imikalile yesu, e lyo na pa kuti tulewamyako ifyo tubila imbila nsuma e lyo ne fyo tusambilisha. Nomba bushe calola mwi ukubombesha umulimo wesu?
4. Bushe calola mwi ukubombesha umulimo wesu?
4 Mu kwipifya fye kuti twatila ukubombesha umulimo wesu, kubomba umulimo wa kubila imbila nsuma no wa kusambilisha abantu apapela amaka yesu. Nomba ukubombesha umulimo wesu te kupoosa fye inshita iikalamba mu kubila imbila nsuma. Yehova alibika amano na ku cilenga tulebila imbila nsuma. Icilenga tulebomba umulimo wesub no mweo onse ni co twalitemwa Yehova na bantu banensu. (Marko 12:30, 31; Kol. 3:23) Ukubombela Lesa no mweo onse cipilibula ukubomfya amaka yesu ukulingana na apo twingapesha ku kumubombela. Nga twaishiba ukuti Yehova alitucindamika ifi atupeela umulimo wa kubila imbila nsuma, tukalabila ku bantu abengi nga nshi.
5-6. Langilileni ifyo umuntu uwakwata ifya kucita ifingi engacita pa kuti abike sana amano ku kubila imbila nsuma.
5 Natulangilile: Tontonkanyeni pa mulumendo uwatemwa ukulisha icilimba ca nsale. Alitemwa ukulisha ici cilimba lyonse ilyo alefwaya. Mu kupita kwa nshita, aingila incito ya kulisha ici cilimba pa mpela ya mulungu pa cikuulwa apo abantu baliila ifya kulya. Nomba indalama isho bamulipila shinono, te kuti ashitemo fyonse ifyo alekabila. E ico aingila incito ya kushitisha ifipe mwi tuuka ukufuma pali Cimo ukushinta pali Cisano. Nangu ca kuti alapoosa inshita iikalamba mwi tuuka, ico atemwisha kulisha icilimba ca nsale. Alafwaisha ukwishiba sana ifya kulisha ici cilimba pa kuti akalebomba incito ya kulisha ifilimba. E ico nga akwata inshita, alaibomfya ku kulisha icilimba nangu icepe shani.
6 Nalimo na imwe te kuti mukwate inshita iikalamba iya kubila imbila nsuma. Lelo apo e mulimo mwatemwisha ukubomba, kuti mwalaesha apapela amaka yenu pa kuti mulefika abantu pa mutima ilyo mulebila. Pa mulandu wa kuti mwalikwata ifya kucita ifingi, nalimo kuti mwalatontonkanya ifyo mwingacita pa kuti mulebika sana amano ku kubila imbila nsuma.
IFYO MWINGACITA PA KUTI MULEBIKA SANA AMANO KU KUBILA IMBILA NSUMA
7-8. Finshi tulingile ukulacita pa kuti tulemona umulimo wa kubila imbila nsuma nga fintu Yesu aleumona?
7 Yesu alemona umulimo wa kubila imbila nsuma ukuti walicindama nga nshi. Na ifwe e fyo tulingile ukulaumona. Ico Yesu abikileko sana amano mulimo wa kubila pa Bufumu bwa kwa Lesa. (Yoh. 4:34, 35) Aleenda intamfu iitali pa kuti abile ku bantu abengi nga nshi. Alebila ku bantu bonse abo alesanga pa mayanda na mu fifulo fimbi umwaleba abantu abengi. Yesu abikishe amano ku kubila imbila nsuma.
8 Nga ca kuti tulebila imbila nsuma lyonse ilyo twakwata inshita nelyo konse uko tuli, ninshi tulepashanya Kristu. Tulaitemenwa ukuipusula fimo pa kuti tulebila imbila nsuma. (Marko 6:31-34; 1 Pet. 2:21) Bamo mu cilonganino balabomba bupainiya bwaibela, ubwa nshita yonse, nelyo ubwa kwafwilisha. Bambi balisambilila ululimi lumbi nelyo balikuukila uko ababila pa Bufumu bacepa. Kwena ababomba umulimo uukalamba uwa kubila imbila nsuma ni bakasabankanya abashingabombako imilimo iyo twalandapo lelo ababomba apapela amaka yabo. Nampo nga kuti twabombesha nelyo nga kuti twabombako fye panono, Yehova atwenekela ukumubombela apapela amaka yesu. Afwaya bonse tulesekelela ilyo tulebila “imbila nsuma iya bukata iya kwa Lesa wa nsansa.”—1 Tim. 1:11; Amala. 30:11.
9. (a) Cinshi twingalandila ukuti Paulo alibikile sana amano ku kubila imbila nsuma na lintu alingile ukubomba imilimo ya kwikalilamo? (b) Bushe amashiwi yaba pa Imilimo 28:16, 30, 31 yalanga shani ifyo Paulo alemona umulimo wa kubila pa Bufumu?
9 Umutumwa Paulo na o alibikile sana amano ku kubila imbila nsuma. Ilyo alebila mu musumba wa Korinti pa bulendo bwa bumishonari ubwalenga bubili, ashele fye ne ndalama ishinono, e ico inshita shimo alepanga amatenti. Na lyo line, Paulo talemona umulimo wa kupanga amatenti ukuti e mulimo uwacindamishe. Ico alefwaya kulakwata indalama sha kubomfya ilyo alebila imbila nsuma ku bena Korinti pa kuti e bapeela umulimo wa kulamushitila ifyo alekabila ilyo alebila muli uyu musumba. (2 Kor. 11:7) Nangu ca kuti Paulo alingile ukubomba incito pa kuti alekwata ifyo alekabila, alitwalilile ukubika sana amano ku kubila imbila nsuma, kabili alebila lyonse pe Sabata. Ilyo ifintu fyaliko bwino, Paulo nomba abikishe amano ku mulimo wa kubila. Baibolo itila “alebila imbila nsuma ku baYuda ukubapeela ubushinkisho bwa kuti Yesu e Kristu.” (Imil. 18:3-5; 2 Kor. 11:9) Ilyo bamukakile pa myaka ibili mu ng’anda yakwe iya kusonkela mu Roma, alebila ku balemutandalila kabili alebila imbila nsuma mu makalata ayo alelembela abantu. (Belengeni Imilimo 28:16, 30, 31.) Paulo talefwaya icintu nangu cimo cimupumbule ku kubila imbila nsuma. Alembele ati: “Apo twalipeelwa uyu mulimo . . . , tatunenuka.” (2 Kor. 4:1) Na ifwe kuti twalabika sana amano ku mulimo wa kubila pa Bufumu nangu ca kuti tufwile ukubomba imilimo pa kuti tulekwata ifyo tulekabila nga filya fine Paulo alecita.
Finshi twingacita pa kuti tulebombesha umulimo wesu? (Moneni paragrafu 10 na 11)
10-11. Finshi twingacita pa kuti tulebombesha umulimo wesu nga ca kuti tulalwalilila?
10 Nga tulafilwa ukubila ku ng’anda ne ng’anda pa mulandu wa kuti natukula sana nelyo pa mulandu wa kuti tulalwalilila, kuti twabomfya inshila shimbi isha kubililamo imbila nsuma. Abena Kristu ba mu nshita ya batumwa balebila imbila nsuma konse uko baleba. Balesambilisha abantu icine ku ng’anda ne ng’anda, pa cintubwingi, na mu lyashi fye konse uko balebasanga. (Imil. 17:17; 20:20) Nga te kuti tukwate amaka ya kwenda, kuti twaikala pa ncende imo apo twingalabila ku bapita nshila. Nelyo nalimo kuti twalabila ilyo tuleshimika fye ilyashi, kuti twalabila mu makalata, nangu kuti twalabila pa mafoni. Bakasabankanya abengi abashakwata amaka ya kubila ku ng’anda ne ng’anda pa mulandu wa kulwalilila na mafya yambi, balabomfya ishi nshila kabili balasekelela ilyo balebila.
11 Kuti mwalabombesha umulimo wenu nangu ca kuti mwalilwalilila. Na kabili tontonkanyeni pali Paulo. Alandile ati: “Muli fyonse ndi na maka pantu kuli uulenkosha.” (Fil. 4:13) Paulo alekabila uwa ku mukosha ilyo alwele ninshi ali pa bulendo bwa bumishonari. Aebele Abena Galatia ati: “Lelo mwalishiba ukuti ni mu bulwele bwandi e mo nabilile imbila nsuma kuli imwe umuku wa ntanshi.” (Gal. 4:13) Na imwe bene ukulwalilila kuti kwalenga mwakwata inshita ya kubila imbila nsuma ku bantu, pamo nga kuli badokota, kuli banasi, na ku babomfi bambi aba mu cipatala. Abengi pali aba baba ku ncito ilyo tuya mu kubila pa mayanda yabo.
IFYO MWINGACITA PA KUTI MWANGUSHE IMIKALILE
12. Bushe amashiwi ya kuti ‘ukulolesha fye pa cintu cimo’ yalola mwi?
12 Yesu atile: “Ulubuuto lwa mubili menso. E ico amenso yobe nga yalolesha fye pa cintu cimo, umubili obe onse ukaba umwabuuta.” (Mat. 6:22) Ni mwi Yesu aloseshe ilyo alandile aya mashiwi? Aloseshe mu kuti tufwile ukwangusha imikalile nelyo tufwile ukubika fye amano ku cintu cimo pa kuti ifintu fimbi tafitupumbwile. Yesu e o tulingile ukulapashanya. Abikile sana amano ku kubila imbila nsuma, kabili alyebele abasambi bakwe ukubika sana amano ku kubombela Yehova e lyo na ku Bufumu bwakwe. Tulapashanya Yesu nga tulemona umulimo wa kubila imbila nsuma ukuti e mulimo uwacindamisha uo tulingile ukulabomba pa kuti ‘intanshi tulefwaya ubufumu no bulungami bwa kwa Lesa.’—Mat. 6:33.
13. Finshi twingacita pa kuti tulebika sana amano ku mulimo wa kubila imbila nsuma?
13 Cimo ico twingacita pa kuti tulebika sana amano ku mulimo wa kubila imbila nsuma kwangusha imikalile. Lyena tukalakwata inshita iikalamba iya kwafwa abantu pa kuti beshibe Yehova kabili bamutemwe.c Ku ca kumwenako, bushe kuti twacefyako amaawala tubomba incito pa kuti tulebomba inshita iikalamba umulimo wa kubila imbila nsuma mu kati ka mulungu? Bushe kuti twaleka ukucitako fimo ifyo tucita pa kulesha icitendwe ifitupoosela inshita iikalamba?
14. Finshi abaupana bamo bacitile pa kuti balekwata inshita iikalamba iya kubila imbila nsuma?
14 Ifi fine e fyo ba Elias baeluda na bena mwabo bacitile. Balandile abati: “Tatwatendeke bupainiya ilyo line twalefwaya, lelo kwali fimo ifyo twalingile ukucita pa kuti tulebomba inshita iikalamba umulimo wa kubila imbila nsuma. E ico twalicitileko fimo. Ku ca kumwenako, twalilekele ukushita sana ifintu, twalilekele ukucita ifya kuleseshamo icitendwe fimo ifyo pali ino nshita tumona ukuti fyaletupoosela inshita iikalamba, kabili twalyebele abatwingishe incito ukuti batusuminishe ukucefyako amaawala twalebomba pa kuti tulekwata inshita iikalamba iya kubila imbila nsuma. Ifi twacitile fyalengele twalabilako imbila nsuma mu nshita ya cungulo bushiku, twalatungulula amasambililo ya Baibolo ayengi, kabili twalabombako umulimo wa kubila imbila nsuma mu kati ka mulungu imiku ibili cila mweshi. Ala twaleba ne nsansa nga nshi!”
IFYO MWINGACITA PA KUTI MULEBILA BWINO IMBILA NSUMA KABILI MULESAMBILISHA BWINO
Nga tulekonka ifyo tusambilila ilyo tulelongana mu kati ka mulungu, tukalaishibilako ifya kubila imbila nsuma e lyo ne fya kusambilisha (Moneni paragrafu 15 na 16)d
15-16. Ukulingana na mashiwi yaba pali 1 Timote 4:13, 15, finshi tufwile ukucita pa kuti tuleishibilako ifya kubila imbila nsuma? (Moneni na kabokoshi akaleti “Ifyo Ningacita pa Kuti Ndebombesha Umulimo Wandi.”)
15 Na cimbi ico twingacita pa kuti tulebombesha umulimo wesu, kwishibilako ifya kubila imbila nsuma. Abantu bamo ababomba incito shimo balatwalilila ukusambilila ifya kubomba isho incito pa kuti balebomba bwino. Ifi fine e fyo caba na kuli fwe babila pa Bufumu. Tulingile ukutwalilila ukusambilila ifya kulabila bwino imbila nsuma.—Amapi. 1:5; belengeni 1 Timote 4:13, 15.
16 Nomba finshi tufwile ukucita pa kuti tulebila bwino imbila nsuma? Tulingile ukulakonka sana ifyo batweba ilyo tulelongana ukulongana kwa Imikalile ya Bwina Kristu no Mulimo Tubomba. Ifyo tusambilila ilyo tukwata uku kulongana, filenga tuleishibilako ifya kubila imbila nsuma. Ku ca kumwenako, ilyo ceyamani alefunda abasambi abakwete amalyashi ilyo tulelongana, kuti twasambililako ifyo twingalacita pa kuti twishibileko ifya kubila imbila nsuma. Ilyo twaya mu kubila imbila nsuma ku muntu, kuti twabomfya ifyo twasambilile. Nga tulefwaya uwa kutwafwako pa kuti twishibileko ifya kubila imbila nsuma, kuti twaeba kangalila we bumba twabamo nelyo kuti twaya nankwe mu kubila, nangu kuti twaya mu kubila na kasabankanya uwaishiba sana ifya kubila, nelyo painiya, nangu kangalila wa muputule. Nga tuleishibilako ifya kubomfya fyonse ifyaba pa Impapulo Tubomfya Sana pa Kusambilisha Abantu, tukalatemenwako ukubila imbila nsuma kabili tukalatemenwako ukusambilisha abantu.
17. Finshi fikacitika nga mulebombesha umulimo wenu?
17 Ifi Yehova atusuminisha ukulabombela pamo nankwe alitucindika nga nshi! (1 Kor. 3:9) Nga ‘mwaishiba bwino bwino ifyacilapo ukucindama’ kabili mwabika sana amano ku mulimo wa kubila imbila nsuma, ‘mukalabombela Yehova no kusekelela.’ (Fil. 1:10; Amalu. 100:2) Apo muli babomfi ba kwa Lesa, kuti mwacetekela ukuti akamupeela amaka pa kuti mulebombesha mu mulimo wenu nangu mwingakwata amafya ya musango shani. (2 Kor. 4:1, 7; 6:4) Nampo nga ifyo ifintu fyaba mu mikalile yenu filenga mulebila sana nelyo mwilabila sana, kuti mwalasekelela nga mulebila no mweo onse. (Gal. 6:4) Nga mulebombesha umulimo wenu, mulanga ukuti mwalitemwa Yehova na bantu banenu. ‘Nga mulecita ifi mukaipususha mwe bene na balemumfwa.’—1 Tim. 4:16.
ULWIMBO 58 Tulafwaya Abantu Abafwaya Umutende
a Yesu alitupeela umulimo wa kubila imbila nsuma ya Bufumu no wa kulenga abantu baba abasambi. Muli cino cipande twalasambilila ifyo tulingile ukucita pa kuti tulebombesha umulimo wesu, nangu ca kuti tulakwata amafya ayengi. Twalasambilila ne fyo twingacita pa kuti tulebila bwino imbila nsuma kabili tulesekelela nga nshi ilyo tulebila.
b UBULONDOLOSHI: Pa milimo yesu fwe Bena Kristu paba ukubila no kusambilisha, ukukuula no kuwamya ifikuulwa tubomfya pa kubombela Lesa, e lyo no kwafwilisha abali na masanso ayakalamba.—2 Kor. 5:18, 19; 8:4.
c Moneni ifintu 7 ifyaba mu kabokoshi akatila “Ifyo Mwingangusha Imikalile Yenu” mu Ulupungu lwa kwa Kalinda ulwa July 2016, ibu. 10.
d UBULONDOLOSHI BWA FIKOPE: Nkashi alelangilila ifya kucita icipempu ca kubwelelamo ilyo balelongana ukulongana kwa mu kati ka mulungu. Pa numa, ilyo ceyamani alemufunda, nkashi alelemba fimo muli broshuwa yakwe iitila Ukusambilisha. Ilyo alebila imbila nsuma pa mpela ya mulungu, alebomfya ifyo asambilile ilyo balelongana.