Bombela Yehova Ukwabula Ukupumbulwa

¹ “[Ba nsansa, NW] abantu abo Yehova e Lesa wabo.” (Amalu. 144:15) Bushe aya mashiwi ya Mfumu Davidi yacili aya cine, nangu fye ni muli shino nshiku sha bubifi? (Efes. 5:16) Ee! Abena Kristu bacili balasanga ubuseko mu kubombela Yehova. Ifintu tafitwangukila lyonse. Satana atuletela amafya mu kati ka ishi “nshita ishayafya,” lelo nalyo line tatupopomenwa. (2 Tim. 3:1, 2) Imibele ilebipilako ili bushininkisho bwalundwapo ubwa kuti inshita ili mupepi ku Bufumu bwa kwa Lesa ukupyangapo cino calo cikote icilebola no kupyanikapo icalo cipya icasanguluka. (2 Pet. 3:13) Imfifi ya ici calo tainashako nelyo ukushimya ulubingu lwe subilo lyesu ilya nsansa; ukucila, isubilo lyesu ilya Bufumu lilaaka mu kucilapo kubengeshima. Bushe tauli uwa nsansa ukulabombela Yehova nge cengelo muli cino calo ca mfifi?—Fil. 2:15.

² Nga bantu umo umo, tufwile ukusakamana lyonse mu nshila tulebombelamo Yehova. Mulandu nshi? Pantu Satana ni Kapumbula mukalamba. Dikishonari imo ilondolola “ukupumbula” nga “ukwalwila pa mbali,” “ukulosha nelyo ukutonta (pamo nga ukusakamana kwa umo) ku buyo bwapusanako nelyo mu ntunga shapusana pa nshita imo ine,” kabili “ukufundawila nelyo ukupelenganya mu kuba no kukuntwa nelyo inkuntu shipinkana.” Ukutula pa kupooswa kwakwe kuli lino isonde, Satana alitunguluka mu ‘kulufya’ umutundu wa muntu. Abomfya ifibombelo ifingi ku kwalula ukusakamana kwa muntu ukufuma ku fikansa fya cine ifya kasuba kesu. (Ukus. 12:9) Nangu cingati Inte sha kwa Yehova baliibikilishako abene mu kushimikila Ubufumu pa myaka umwanda umo iyapitapo, bantu banga abatesekesha ifikansa fyacindamisha ifya kushishiwa kwe shina lya kwa Lesa no kwebelwa kwa bumulopwe bwakwe ukupitila mu Bufumu bwa kwa Lesa? Mu kulinganyako banono fye. (1 Yoh. 5:19) Nga ca kuti Satana kuti apumbula amakana ya mamilioni ya bantu ba pali ili sonde, ubusanso bwabako lyonse bwa kuti kuti atupumbula nelyo ukupoka ukusakamana kwesu ica kuti twalekelesha umulimo wa kwa Yehova. Ku ca bulanda, bamo muli bamunyinefwe balipelenganishiwa ku fya kupumbula fya kwa Satana. Balisuminisha imintontonkanya yabo ukukobwa mu ntunga shapusana. Kwalibako imisango yonse iya fya kupumbula ilelo. Languluka fye iinono iya yene.

³ Impika sha mu fya Bunonshi no Kutemwa Ifintu fya ku Mubili: Mu fyalo ifingi ifya pe sonde, ukubulwe ncito ne mitengo yasumbana iya mikalile filenga amasakamika ayengi. Ca cine, tufwile ukuipayanishisha ifya kulya, ifya kufwala, no mwa kusendama fwe bene ne ndupwa shesu. Lelo nga ca kuti twaisuminisha fwe bene ukuba abacishamo kusakamikwa pa lwa fikabilwa fya bumi, aya masakamika yakalama ukutontonkanya kwesu. Ubwikashi bwesu ubwa ku mubili kuti bwasanguka e cintu cacindamisha mu bumi ukucila ukwafwilisha kwesu ifikansa fya Bufumu. Umutumwa Paulo apeele ukufunda muli kuno kuloshako pa AbaHebere 13:5, 6. Yesu Kristu alatwebekesha ukuti abo bafwaya intanshi Ubufumu tabakabila ukusakamikwa; Yehova alapayanya cintu mu cituntulu tukabila. (Mat. 6:25-34) Bapainiya na babomfi bambi aba nshita yonse ukupulinkana icalo kuti bashininkisha ukuti ici e fyo caba.

⁴ Icalo ca kwa Satana cisumbula ukutemwa kwa fintu fya ku mubili. Ukunonke fikwatwa fyafulilako nelyo ukucingilila fyene e maka yatuninkisha mu bumi bwa mamilioni. Ifya kupumbula fyapalako e ko fyali mu kasuba ka kwa Yesu. Kateka wacaice umukankaala aipwishe Yesu cintu alekabila ukucita pa kupyana ubumi bwa muyayaya. Yesu ayaswike ati: “Nga wafwayo kubo wafikapo [nelyo, uwakumanina], kabiye, ifyo wakwata ushitemo indalama, kapeele na babusu, no kukwate fyuma mu muulu; e lyo wise unkonke.” (Mat. 19:16-23) Mu kumonekesha, ifikwatwa fyakwe ifingi ifya ku mubili fyalipumbwile uyu mulumendo ku kubombela Lesa no mweo onse. Umutima wakwe wayalwililwe ukulola ku fyuma fyakwe. Yesu alishibe ukuti uyu umulumendo ali no kunonshiwa nga engailulula umwine kuli ifi fya kupumbula. Fyalimuleseshe ukuba uwakumanina mu kuipeelesha kwakwe kuli Lesa. Ni shani pa lwa iwe? Bushe uisanga we mwine ukubomba inshita yakulilako ku ncito ya ku mubili pa kusungilila fye umusango wa bumi untu wabelesha? Bushe ici calyambukila umulimo obe kuli Yehova? Bushe ifikwatwa fyobe ifya ku mubili filesunkila pa mbali amabuseko ya Bufumu? (Mat. 6:24) Bushe kuti wayangushako ubumi bobe ku kupeelesha inshita yakulilako ku mabuseko ya ku mupashi?

⁵ Imilandu ya Fye iya Cila Bushiku: Nga ca kuti tatusakamene, kuti twaba abashikamamo nga nshi mu milandu ya fye iya cila bushiku ica kuti twatendeka ukulekelesha ifikonkelelo fya ku mupashi. Ibukisha abantu ba mu kasuba ka kwa Noa. Balabikilwe nga nshi ku milandu ya kwangalila pamo, ukulya no kunwa, ukuupa no kuufya abana babo, ica kuti tabapoosele amano ku bukombe bwa kusoka ubwa kwa Noa pa lwa Mulamba uwaleisa. Ilyo tabalailuka cene, Ilyeshi lyalishile no kusenda bonse. Ukupumbulwa kwapilibwile ukonaulwa kwabo. Yesu atile: “E fyo kukaba no kwisa kwa Mwana wa muntu.” (Mat. 24:37-39) Mu cituntulu, icinabwingi ca bantu ilelo baliba abacishamo kufimbilikishiwa mu bumi bwabo bwine ica kukanapeelo kusakamana ku bukombe bwa kusoka ubo tubatwalila. Balangisha ukukanayangwako kwa kutulumusha ku fintu fya ku mupashi.

⁶ Bushe ubumi bobe bulecishamo kwisulamo ne mibombele ya kwangalila pamo ica kuti imilandu ya ku mupashi ilekwata ukusakamana kwacepelako? Pa kashita kamo, Yesu alaalikwe ukuba umutandashi mu ŋanda ya kwa Marita na Maria. Maria alekutika mu kufindamina ku cintu Yesu alelanda. Pa lubali lumbi, Marita “alipumbwilwe ku kwangwa ku milimo iingi.” Marita akwete ukusakamikwa kushalinga pa lwa kuba kapokelela musuma uwa beni. Afililwe ukutesekesha ukukabila kwa kubuulako akashita ukukutika kuli Yesu. Mu cikuuku alondolwele kuli Marita ukuti ukupayanya kwapikana takwali ukwafwaikwa; ukusakamana kwacishapo kulingile ukupeelwa ku milandu ya ku mupashi. Bushe ulekabila ukubomfya kulya kufunda? (Luka 10:38-42, NW) Yesu na kabili asokele ukuti tufwile ukuyangwa fwe bene pa kuti tatuleliisha no kunwesha, ukufinya amano yesu. Pali ino nshita yakakala mu lyashi lya buntunse, tulekabila ukuba abalola mu kukumanina.—Luka 21:34-36.

⁷ Ukukonkelela Amangalo: Cimo ica fya kupumbula fyakulisha cintu Ciwa abomfya ku kufumya ukusakamana ku fikansa fya Bufumu caba kukonkelela ukwangala. Amamilioni mu Kristendomu balibika ukwangala mu cifulo ca kwa Lesa. Balasoobolapo ukusekeshiwa ku kukookoloka kumo ukucilo kubuula ubuseko bwa cine cine mu Cebo ca kwa Lesa. (2 Tim. 3:4) Kwena, ifya kusekesha fyayana no kukookoloka tafyabipa mu fine fyeka. Lelo ukupoosa inshita yacishamo cila mulungu pa fintu fya musango yo pamo nga televisioni, ifikope fisela, amavideo, ifyangalo, ukubelenga ifya ku calo, nelyo ifya kuleseshako icitendwe kuti pambi fyasuminisha umutima wa kufutika ukulunduluka no kutukulila pa mbali ukufuma kuli Yehova. (Yer. 17:9; Heb. 3:12) Ni shani ico cingacitika? Mu kati ka kulongana kwa Bwina Kristu, kuti pambi wasange fyo umuntontonkanya obe ulelulumba; kuti pambi wafwaya fye no kulongana ukupwa pa kuti wingabwelelamo ku kukonkelela amangalo. Mu kwangufyanya, kuti waisanga we mwine ukulafwaya imilandu ya kwikalila ku ŋanda ukucila ukusangwa ku kulongana nelyo ukuibimba mu mulimo wa mwi bala. Nomba e nshita ya kupima mu kulengama nga ifi fikonkelelo fyalisanguka ifya kupumbula mu bumi bobe. (Luka 8:14) Bushe te kuti amaawala yamo ayaumo mutengo ayapooswa ku fya kusekesha yabomfiwe mu kuwaminako ku kulunduluka kwa ku mupashi?

⁸ Imilandu ya pa Mbali Iyonaule Nshita: Bamo balikatwa mu kubombesha kwa kupikulula impika sha munsaunte isha muli sosaite wa muno nshiku. Abena Kristu balekabila ukusengauka ukuba ababimbwamo mu kukansana kushipwa ukwa mu calo pa lwa milandu ya kwangalila pamo nelyo ukushomboka kwa kuicusha fye ukwa kulungika ulufyengo. (Yoh. 17:16) Conse ici caba lubali lwa kwelenganya kwa kwa Satana ku kwalula ukusakamana ukufuma ku kufunda kwa Baibolo ne cishinka cikalamba ica kuti kwabako fye ukupikulula kumo ukukekalilila—Ubufumu bwa kwa Lesa. Nga ca kuti twalipita mu kucenwa kwa pa lwesu nelyo ulufyengo, tufwile ukuibaka ku kuba aba kulandula nelyo abapelenganishiwa mu nkuntu ica kuti twalaba bantu twaba—Inte sha kwa Yehova. Pali fyonse, ni Yehova e untu balufyanyako, kabili lishina lyakwe e lyo tufwile ukushisha.—Esa. 43:10-12; Mat. 6:9.

⁹ Ilintu uuli onse alafwaya ukusungilila icipimo ca butuntulu busuma ubwa bumi, ukupeelako ukusakamana kushalinga ku mfundo shimoneka ukukanakwate mpela no kuposha ukutambikwa kuti kwalenga umo ukwikatililwa mu milandu ya fya butuntulu bwa bumi. Kwalibako abengi nga nshi abafwilisha ukulekanalekana kwasaalala ukwa miliile, ukundapa, ne nshila sha kubombelamo ne mpika sha ku mubili ne sha mu nkuntu, ishingi isha shene ishipinkana kuli imo ne inankwe. Cintu umuntu acita mu milandu ya butuntulu bwa bumi ciba kupingulapo kwa pa lwakwe, kulila takuliko kupinkana ne fishinte fya Baibolo. Natusungilile lyonse ukucetekela kwesu kwakumanina mu Bufumu bwa kwa Lesa pamo ngo kuposha kwa cine ku ntenda sha mutundu wa muntu.—Esa. 33:24; Ukus. 21:3, 4.

¹⁰ Ba Uwashangila, Uushitelententa: Nga fintu impela ilepalamina, Satana akengilishako ukubombesha kwakwe ku kupumbula iwe ukufuma ku mulimo obe uwa kuli Yehova. ‘Mukaanye; iminina uwakosa ndi mu citetekelo.’ (1 Pet. 5:9) Shani? Ufwile ukuiliisha we mwine na matontonkanyo ya kwa Lesa. (Mat. 4:4) Wileka ifya kupumbula fya ku calo fipusule inshita yobe ne ya lupwa lobe iyo mukabila ku kwetetula no kubelebesha mu mutalalila pa Cebo ca kwa Lesa. Pa ca kulya ca lupwa, lanshanyeni capamo ifya kukumanya fya kukuulilila ne milandu imbi iya ku mupashi. Kakatila ku kutantika kwa lyonse ukwe sambililo lya pa lobe no kupekanishisho kulongana.

¹¹ Lintu amasakamika yamoneka ukupuusaula umuntontonkanya obe, poosa icisendo cobe pali Yehova mwi pepo. Bo waebekeshiwa ukuti alakusakamana. (1 Pet. 5:7) Leka umutende wa kwa Lesa ulinde umutima obe na maka yobe aya muntontonkanya. (Fil. 4:6, 7) Wileka ifya kupumbula fishimaishe ukumona kobe ukwa ku mupashi. Sunga Yehova pa cinso cobe pe, nge fyacitile Yesu. (Imil. 2:25) Leka amenso yobe ukutontwa mu kulungatika pa buyo bobe, nga fintu Amapinda 4:25-27 yatukoselesha ukuti: “Leka amenso yobe yaloleshe ku ntanshi, ne nkopyo shobe shitambalale ku mulola obe; uleangwe kuba lya makasa yobe, leka ne mibele yobe yonse ipampamikwe; wialukila ku kwa kulyo nangu ku kwa kuso.”

¹² Mu busumino sangwa ku kulongana konse, kabili isalapule we mwine pa kuti ulepeelako kusakamana ku Cebo ca kwa Lesa. (Heb. 2:1; 10:24, 25) Kabili ukucila ukufwaya amangalo ayatambikwa ne ci calo cabola, cipange ubuyo bobe ukusungilila ubutumikishi bwa kusandulula. Ici e cileta ubuseko bubelelela no kwikushiwa. (1 Tes. 2:19, 20) Mu kulekelesha, wileka icili conse nelyo uuli onse akupumbule ukufuma ku mulimo obe uwashila. ‘Ba uwashangila, uushitelententa; ukupikintika pe mu mulimo wa kwa Shikulu, pa kwishibo kuti ukucucutika kobe te kwa fye muli Shikulu.’—1 Kor. 15:58.