‘Ukupikintika mu Mulimo wa kwa Shikulu’

¹ Mu cine cine natukwata imibombele yapamfiwa iya teokrasi intu tuleloleshako mu kati ka April na May! Pa April 14 tukasefya Icibukisho ca mfwa ya kwa Kristu. Abantu abengi nga nshi balingile ukukoseleshiwa ukusangwako pali kalya kashita kacindama: aba kwishibana na bo mu bukwebo, abantu besu abashasumina, abanensu ba ku sukulu, abalesekelela abapya, na basambi ba Baibolo. Bika pa mutande abo ulepanga ukulaalikako pa kuti pekapuswa nangu umo.

² Umulungu ukakonkapo tukakoselesha bonse abakasangwa ku Cibukisho ukwisaumfwako ilyashi lya cintubwingi ilyaibela pa April 23, pa mutwe wa kuti “Impela ya Kupepa kwa Bufi Naipalama.” Cileenekelwa ukuti abalesekelela abengi abakomfwa ubu bukombe bwa kulungatika bakamona ukukabila kwa kubishanya ne cilonganino lyonse, te pa tushita twaibela fye peka.

³ Trakiti Waibela uwa Imbila ya Bufumu ali no Kukakulwa: Akalume ka kulongana kwa pa April 23 kakaba kukakulwa kwa pa nshita yalinga ukwa trakiti wa mabula yane uwa Imbila ya Bufumu No. 34 uukaananishiwa mu kusaalala ukufika pa May 14. Bushe taulesumina ukuti kukabako ‘ukupikintika mu mulimo wa kwa Shikulu’ muli ici ciputulwa ca nshita ica cibukisho?—1 Kor. 15:58.

⁴ Icikako ca matrakiti ya Imbila ya Bufumu cikatumwa ku cilonganino cimo na cimo. Ifibokoshi ifikabamo amatrakiti ya Imbila ya Bufumu filingile ukusungwa mu ncende iyafisama kabili tafilingile ukwisulwa ukufikila ukusondwelela kwa programu pa April 23. Pali iyo nshita trakiti wa Imbila ya Bufumu akapeelwa kuli bamunyina na ku cintubwingi. Pa kusondwelela ukulongana kwa cilonganino, ukulongana kwa muputule, nelyo amaprogramu ya bushiku bwa kulongana kwaibela pa April 23, bonse umo umo abakasangwako bakapokelela trakiti pa kuti bengabeleshanya ne filimo no kuipangasha ku kushalika wene.

⁵ Baeluda Bakaba Abapikintika: Mu kubangilila kwa uno mweshi ibumba lya baeluda lilingile ukukumana ku kulanshanya ifyebo fya uyu kampeni waibela. Ifilonganino filingile ukutukusha ukufimba icifulo cabo conse ica kubombelamo. Ilyo uyu kampeni talapwa, bombesheni mu kuibela ku kubomba muli ifyo fifulo ifishafimbwa mu myeshi mutanda iyapita. Mu cilolwa ca bucindami bwa mulimo, tukafwayo kupaatwila ku butumikishi inshita ikalamba ukufika pantu twingapesha. Ukwabulo kutwishika bakasabankanya bafulilako bakalembeshako nga bapainiya ba kwafwilisha ukucila pa balembeshako lyonse. Mu kupalishako abasambi abengi aba Baibolo na bo bakailunda kuli ifwe nga bakasabankanya bapya bashabatishiwa abasuminishiwa. Fintu ikaba ni nshita ya kuipakisha iyo tukakwata ilyo tukalacucutika capamo mu mulimo wa kwa Shikulu!

⁶ Bakatungulula be Sambililo lya Citabo pa Cilonganino balingile ukucita ukutantika kwashininkishiwa ukwa bunte bwe bumba pa Fibelushi na pa Mulungu. Uuli onse alingile ukukoseleshiwa ukwakanamo mu kucincila. Mu kusansha ku mibombele ya pa mpela ya mulungu, ubunte bwa mu cungulo bushiku bulingile ukutantikwa nangu fye umuku umo mu kati ka kampeni. Bamo kuti pambi bafwaya ukukumana ku mulimo pa numa ye sukulu ku kusuminishako abana be sukulu abengatemwa ukukwatako ukwakanamo kwalundwako.

⁷ Ukukumana kwa mulimo wa mwi bala kulingile ukutantikwa mu nshila ya kuti bakasabankanya na bapainiya bengatendeka mu kubangilila mu butumikishi ubushiku bumo na bumo. Uku kukumana kulingile ukuba ukwipi. Kumo na kumo kulingile ukulangilila imipeelele iipi iya trakiti wa Imbila ya Bufumu. Ukukumana kwa mulimo ukwa cungulo kasuba kuti pambi kwasanshamo imitubululo imo nelyo ibili pa kupanga ifipempu fya kubwelelamo kuli abo abapokelele trakiti wa Imbila ya Bufumu. Nangu cibe fyo, bakasabankanya bamo kuti pambi basoobolapo ukuibimba muli uku kwananya ulucelo ne cungulo kasuba. Nga ni fyo, kangalila wa mulimo akafwaya ukushininkisho kuti icifulo cakumanina ica kubombelamo e po cili. Ishina ne cifulo ifya uli onse uwalanga ubuseko filingile ukulembwa pa calembwa ca ku ŋanda ne ŋanda. Ifishinka fikalamba ifya fyo mwalanshanya mu kwipifya kuti fyasanshiwa mu mukululo wa fya kulandapo. Ici cikapekanishishe nshila ku cipempu ca kubwelelamo pa numa muli uyo mulungu nelyo umweshi.

⁸ Nga ca kuti icilonganino cimo caafwilishako cimbi ukufimba icifulo ca ciko ica kubombelamo, amashina ne fifulo fya balesekelela filingile ukupeelwa ku cilonganino icisakamana ico cifulo.

⁹ Mwe bafyashi, bushe abana benu balebombela ukulola ku kuba bakasabankanya bashabatishiwa? Calimonwa ukuti mu filonganino fimo, abana ba myendele isuma balishindika abafyashi babo abaipeela mu butumikishi pa myake ingi, kabili abana balabomba bwino nga nshi, nangu cingati tabalati babe bakasabankanya ba mbila nsuma. Abafyashi balekabila ukulanguluka nampo nga abana babo mu cituntulu balifikapo kuli ili shuko. Babili aba muli baeluda kuti balanshanya ifya kusangwilako fyonse no mutwe wa lupwa no kupima nampo nga umwana kuti apendwa nga kasabankanya uushabatishiwa.—om-CW amabu. 99-100.

¹⁰ Bushe kuliko bakasabankanya abali bonse mu cifulo cobe ica kubombelamo abashili na kabili abacincila mu kupeela ilambo lya malumbo kuli Yehova? (Heb. 13:15) Bamo abaleko kubomba kuti pambi balifuupwilwe nelyo amasakamika ya bumi yalibacimfishe, nangu cingati balitwalilila ukwikatilila ku fipimo fya Baibolo ifya mibele isuma. Ukutandala kwa bucibusa kuli umo uwa baeluda kuti kwabasesesha ku kubishanya kwa lyonse ne cilonganino kabili, pa nshita yalinga, ku mibombele yabukululwa mu butumikishi.

¹¹ Bonse Abafikapo Kuti Baakana Muli uyu Mulimo Wabamo Kuipakisha: Bushe bamo aba muli imwe mwe bana banono nelyo abapungwe mulacisanga ukuba icaafya ukwakana mu butumikishi bwa ku ŋanda ne ŋanda? Inga imwe mwe bapya, mwe bo ukubelesha kwenu mu mulimo wa kushimikila kwaba ukwapelela? Mukasanga ukubomba no yu trakiti waibela uwa Imbila ya Bufumu ukwa kuipakisha nga nshi! Icikabilwa mipeelele fye yaanguka.

Kuti pambi wasosa icapale fi:

◼ “Uno mweshi tuleananya ubukombe bwacindama mu fyalo 232 ukushinguluke calo conse. Ubukombe buli ubwacindama pantu buletupeela imilandu ine ine iya kusuminino kuti kwalibako ukupikulula ku mpika tulolenkene na sho ilelo. Kuti twafwaya ukuti mukwateko trakiti wa pa lwenu.”

Nelyo kuti waeshako iyi nshila:

◼ “Uno mweshi mupepi na mamilioni yasano aya ba kuitemenwa baleananya ubukombe bwacindama mu ndimi ishafulilako. Bupekanishiwilwe abantu abengatemwa ukumona impika shintu ifwe bonse tulolenkana na sho ukupwa. Uyu ni trakiti wenu.”

Iyi mipeelele yaanguka kuti pambi yakulinga:

◼ “Tulekoselesha uuli onse ukubelenga ubu bukombe bwacindama ubukwete umutwe wa kuti [belenga umutwe wa Imbila ya Bufumu]. Moneni fintu ubukombe bulelondolola pano pe bula 2 ukukuma ku mpika shileingilishiwako isha . . . [belenga sentensi asalilwe ukufuma mu Imbila ya Bufumu]. Tulesubila muli no kuipakisha ukubelenga ifyashala muli ubu bukombe bwalingana ne nshita. Uyu ni trakiti wenu.”

¹² Bo wasekelela muli umo umo uwapokelela Imbila ya Bufumu. Landa mu kutekanya kabili mu kumfwika; imipeelele yobe tailekabila ukupeelwa mu lubilo. Tulefwaya ukukumanya bwino icifulo cesu ica kubombelamo no kumono kuti bonse abalangisha ubuseko mu kubelenga trakiti wa Imbila ya Bufumu bapeelwako kope wa pa lwabo. Lintu pa ŋanda pashili nangu umo, mu kusakamanisha conga pa calembwa cobe ica ku ŋanda ne ŋanda pa kuti wingabwelelako pa nshita yalinga ku kupeela mwine ŋanda trakiti wa Imbila ya Bufumu. Uyu trakiti wa Imbila ya Bufumu kuti pambi abomfiwa mu bunte bwa mu musebo lintu abantu balanga ubuseko mu kubelenge fyebo. Amakope tayalingile ukupeelwa fye icipeelepeele kwati mahandibilu. Ukucila, tununuka abapita nshila, no kulondolola ubucindami bwa bukombe ubulepeelwa. Bomfya trakiti wa Imbila ya Bufumu mu bunte bwa mu lyashi, pamo nga lintu uli pa bulendo, nelyo lintu ulecitilo bunte ku bantu ubomba na bo incito pa nshita ya kutuusha kwa kasuba pa kati. Ku balemana abashenda nelyo mu nshila imbi abashileyumfwa bwino kuti pambi bashalika yene ku batandashi, badokota na banasi, bakashisha wa fipe, na bambi abesa ku mayanda yabo.

¹³ Fipempu fya kubwelelamo finga ukacita muli kampeni? Ukwabulo kutwishika fikaba ifingi, apantu bonse abakalangisha ubuseko muli trakiti wa Imbila ya Bufumu balingile ukutandalilwa na kabili. Pa kutandala kwa kubalilapo, kuti cawamisha ukulangisha fye Imbila ya Bufumu epela. Lyene, lintu wabwelelako, landapo panono pa lwa kulingana ne nshita ukwa bukombe bwa mu Imbila ya Bufumu. Kutika mu kusakamanisha ilyo mwine ŋanda alelumbulula imimwene yakwe pa co abelengele. Ukulandapo kwakwe kukakwaafwa ukwishiba ica kutambika icili muli magazini wa nomba line kabili nakalimo ifya kupekanishisha ukulanshanya kukakonkapo. Nga wasanga ukwankulako kusuma pa cipempu ca kubwelelamo, esha ukutampa isambililo lya Baibolo.—1 Kor. 3:6, 7.

¹⁴ “Ukucucutika Kwenu Te Kwa Fye”: Bushe uyu mulimo onse ukabo wawamina? Paulo aebekeshe abena Korinti ukuti: “Ukucucutika kwenu te kwa fye muli Shikulu.” (1 Kor. 15:58) Mu myaka iyapita, ukubombesha kwesu ukwa kwananya amatrakiti ya Imbila ya Bufumu kwalipaalwa apakalamba. Abaupana babili abalekuukila mu ŋanda ipya basangile kope wa kale uwa Imbila ya Bufumu mu drawer. E cintu cashele fye muli iyo ŋanda. Pa numa ya kubelenga yene, bamonene ne cilonganino ca cikaya no kulombe sambililo lya Baibolo. Batendeke ukusangwa ku kulongana konse kabili pa numa balangishe ukufwaisha kwa kubatishiwa. Nakalimo kope ukasha akaletako ifya kufumamo fyapalako!—Mona Awake!, November 8, 1976, ibula 15.

¹⁵ Natukwata umulimo wakulisha pa ntanshi yesu. Ubuyo bwesu buli bwa kuti icilonganino cimo cimo cikapwishe icifulo cabo ica kubombelamo icapeelwa ukufika pa May 14 nelyo ukufika pa mpela ya uyo mweshi nga cili icafwaikwa ukutanununako inshita ya kwananya trakiti wa Imbila ya Bufumu. Ifikako nafitumwa ica kuti painiya wa nshita yonse umo umo na painiya wa kwafwilisha akapokelele amatrakiti 100 aya Imbila ya Bufumu. Kasabankanya wa pa cilonganino umo umo akapokelela ukufika ku makope 30. Bakasabankanya na bapainiya balingile ukupoka fye ubwingi bwa makope yantu bengaba na maka ya kushalika kabili balingile ukubwesha ayali yonse ayengapulamo pa kuti bambi bengayabomfya. Ukubombela pamo ukusuma muli uku kuloshako kukalenga ukuti tukaananye ubu bukombe bwacindama mu kusaalala ukufika pantu twingapesha. Nga ca kuti pa mulandu wa kukula kwa cifulo ifilonganino fimo tafipwishishe icifulo cabo ukufika pa kati ka May kabili amakope yacilipo, kuti pambi cabomba ukulaalikako ifilonganino fipalemeko ku kwafwilisha. Mu filonganino fimbi uko kukabila kuti kwabombelwapo pa mwabo nga bakasabankanya baingilishako imibombele yabo pa kulembeshako nga bapainiya ba kwafwilisha nelyo pa kuibimba mu butumikishi libili libili.

¹⁶ Ukuipeelesha kwa mweo onse kuli Yehova kukafwaikwa nga tuli no kupwishishisho mulimo wesu. (Kol. 3:23) Ubumi nabubimbwamo. Abantu tabengafyuka ifya kufuma mu kusuula ubupilibulo bwa mibele ya calo ilelo. Inshita naipwa. Bafwile ukulolenkana ne cishinka ca kuti umuntu tengapikulula impika sha ici calo. Ni Lesa e wingapikulula. Abo abalefwaya ukukwata ipaalo lya kwa Lesa bafwile ukupingulapo, ukwabulo kushingashinga, mu kumfwana ne fifwaikwa fyakwe.

¹⁷ Pa kusondwelela kwa kampeni waibela pa May 14, bushe tukaleka ukuboko kwesu kutuushe? Iyo! Tukatwalilila ukuba abapamfiwa mu kumfwana no kufunda kwapuutwamo ukwa kwa Paulo.