Ifya Kupanga Abasambi pa Kubomfya Icitabo ca Ukwishiba

¹ Ico Abena Kristu bonse bafwaisha kusambilisha bambi icine no kupanga abasambi ukufuma muli abo “abasontelwe ku kuya mu mweo wa muyayaya.” (Imil. 13:48; Mat. 28:19, 20) Ukuteyanya kwa kwa Yehova kwalitupayanishisha icibombelo cishaiwamina ica kutwaafwa ukupwishishisha ici—cili citabo ca Ukwishiba Uko Kutungulula ku Mweo wa Muyayaya. Umutwe wa ciko webekesha ukucindamisha kwa masambililo ya Baibolo aya mu ŋanda, apantu umweo wa muyayaya washintilila pa kwishiba Yehova, Lesa wine wine eka, no Mwana wakwe, Yesu Kristu.—Yoh. 17:3.

² Icitabo ca Ukwishiba nomba cili e lupapulo lukalamba ulwa Sosaite ulwa kubomfya mu kutungulula amasambililo ya Baibolo. Kuti twasambilisha icine mu nshila yayanguka, iyaumfwika, kabili mu nshita fye iinono pa kubomfya ici citabo. Ici cili no kwaafwa ukufika pa mitima ya balesambilishiwa. (Luka 24:32) Kwena, cili icakabilwa kuli katungulula ukubomfya inshila sha kusambilishishamo ishisuma. Cino ica mu kati cipekanishiwilwe ku kupayanya imitubululo ne fya kucinkulako ukukuma ku nshila sha kusambilishishamo isho shashininkisha ukuba ishibomba. Mu kushilimuka, kabili ukulingana ne mibele ya muntu umo umo, panono panono kuti pambi mwabomfya ifilandilwe muno fimo fimo nelyo fyonse fye. Sungeni ici ica mu kati, kabili muleloshako libili libili. Ifishinka fyalekanalekana muli cene kuti fyamwaafwa ukuba abacilapo kufumamo cimo mu kupanga abasambi, pa kubomfya icitabo ca Ukwishiba.

³ Tungululeni Isambililo lya Baibolo Ilya mu Ŋanda Ililunduluka: Kwateni ubuseko bwine bwine mu musambi pamo ngo uleenekelwa ukuba umusambi wa Bwina Kristu kabili munyina nelyo nkashi wa ku mupashi. Beni aba cikabilila, aba bucibusa, kabili abacincimuka. Pa kuba kakutika musuma, kuti mwasuka mwaishiba bwino uyo muntu—icikulilo cakwe ne mikalile yakwe—ifili no kumwaafwa ukwishiba ifya kumumumunga lwa ku mupashi mu nshila yawamisha. Beni abaitemenwa ukuipeelesha mwe bene pa mulandu wa musambi.—1 Tes. 2:8.

⁴ Lintu isambililo lyaimikwa, cili bwino ukuti mulesambilila ifipandwa fya mu citabo ca Ukwishiba umo fyakonkanina. Ici cikalenga umusambi ukumfwikisha icine panono panono, apantu icitabo cilanda pa milandu ya mu Baibolo mu mukonkano ushaiwamina. Lekeni isambililo libe ilyayanguka kabili ilya buseko pa kuti lileba ilyacincimuka kabili ililelunduluka. (Rom. 12:11) Ukushintilila pa mibele no kulamuka kwa musambi, kuti cacitikako ukupwisha ifipandwa ifingi mu fiputulwa fya nshita ifye awala fye limo nelyo ukucilapo, ukwabula ukukwankwanya fye. Abasambi bali no kulunduluka bwino nga ca kuti bonse babili kasambilisha no musambi balekonka icipangano caimikwa ica nshita ya kusambilila cila mulungu. Muli fyo, ku bantu abengi, kuti pambi cacitikako ukupwisha ifipandwa 19 ifya mu citabo mu myeshi 6 nelyo ukucilapo panono.

⁵ Tendekeni iciputulwa cimo na cimo mu mashiwi yanono ayaleimya ubuseko mu fyebo. Muli no kumona ukuti umutwe wa cipandwa cimo na cimo e upulilemo, e co ulekabilwa ukukomailwapo. Akamutwe kanono kamo na kamo kalondolola icishinka cikalamba cimo, ukumwaafwa ukutontomesha pa mutwe wa ico cipandwa. Mube abapempwila ukukanalanda sana. Mu cifulo ca ico, esheni ukuleka umusambi aleilumbulwila. Ukwipusha umusambi ifipusho fyalundwapo, ukushimpwa pa fyo aishiba kale, kuli no kumwaafwa ukupelulula no kufika ku nsondwelelo yalungama. (Mat. 17:24-26; Luka 10:25-37; moneni Icitabo ca Kutungulule Sukulu, ibula 54, paragrafu 10.) Kakatileni mu kupalamisha ku fyebo fyalembwa mu citabo ca Ukwishiba. Ukuletamo ifyebo fyalundwapo kuti kwapumbula nelyo ukufimbilikisha ifishinka fikalamba no kutantalisha isambililo. (Yoh. 16:12) Nga ca kuti kwaima icipusho icishikumine ku filesambililwa, ilingi line kuti mwayasuka cene pa mpela ye sambililo. Ici cikalenga ukuti mulepwisha isambililo lyenu ilya cila mulungu ukwabula ukupumbulwa. Londolweleni umusambi ukuti mu kuya kwa nshita ifipusho fyakwe ifingi fikasukwa ukupitila mu kusambilila.—Moneni Icitabo ca Kutungulule Sukulu, ibula 95, paragrafu 14.

⁶ Nga ca kuti umusambi alisumina sana muli Bulesa Butatu, bumunshifwa bwa mweo, ukuti muli helo mwaliba umulilo, nelyo ifisambilisho fya bufi fimbi ifya musango yo, kabili icalondololwa mu citabo ca Ukwishiba tacimulengele ukumfwikisha, kuti mwamupeela icitabo ca Ukupelulula nelyo ulupapulo lumbi ululanda pali ico cisambilisho. Mwebeni ukuti muli no kulanshanya nankwe ico cisambilisho pa numa abe natontonkanya pa lwa co abelengele.

⁷ Ukutendeka no kupwisha isambililo pa kupepela ubutungulushi bwa kwa Yehova ne paalo kulacindamika aka kashita, ukulenga umo ukubwesha amatontonkanyo, kabili kutonta pali Yehova nga Kasambilisha wine wine. (Yoh. 6:45) Nga ca kuti umusambi acili alapeepa fwaka, mu kuya kwa nshita kuti pambi mwamulomba ukukanapeepa ilyo mulesambilila.—Imil. 24:16; Yako. 4:3.

⁸ Sambilisheni mu Kufumamo Cimo pa Kubomfya Amalembo, Ifilangililo, ne Fipusho fya Kupitulukamo: Te mulandu no bwingi bwa nshita aabelenga ifyebo, kasambilisha walamuka ali no kupituluka mwi sambililo limo na limo mu kuba no musambi umo mu muntontonkanya. Ici cilaafwa ukwenekela ifipusho fimo ifyo umusambi engepusha. Pa kusambilisha mu kufumamo cimo, umfwikisheni bwino bwino ifishinka fikalamba ifili mu cipandwa. Moneni amalembo ku kusanga ifyo yampene ne fyebo, kabili salenipo ayalingile ukubelengwa mwi sambililo. Tontonkanyeni pa fyo mwingasambilisha pa kubomfya ifilangililo ne fipusho fya kupitulukamo pa mpela ya cipandwa cimo na cimo.

⁹ Ukupitila mu kubomfya amalembo mu kufumamo cimo, muli no kwaafwa umusambi ukutesekesha ukuti mu cine cine alesambilila Baibolo. (Imil. 17:11) Pa kubomfya umukululo uleti “Beleshanya na Baibolo Yobe,” pe bula 14 ilya citabo ca Ukwishiba, musambilisheni ifya kusanga amalembo. Mulangeni ifya kwishiba ifikomo fyayambulwa ifili mwi sambililo. Nge nshita yasuminisha, fwayeni no kubelenga amalembo yaloshiweko ayashambwilwe. Lekeni umusambi alandepo ukukuma ku fyo amalembo yaleafwilisha nelyo ukulengamika icilondolwelwe muli paragrafu. Komaileni pa fiputulwa fya mpikwe ifya malembo pa kuti omfwikishe imilandu ifishinka fikalamba ifya mwi sambililo fibelele ifyo. (Nehe. 8:8) Mu cinkumbawile, tacilekabilwa kuli kafundisha ukuletamo amalembo yafulilako mwi sambililo ukucila pali ayo yali mu citabo. Landeni pa bucindami bwa kwishiba amashina ya mabuuku ya mu Baibolo na fintu yakonkana. Kuti pambi caba ica kwaafwa ku musambi ukubelenga amabula 27-30 aya Ulupungu lwa kwa Kalinda ulwa June 15, 1991.

¹⁰ Isambililo 34 mu Citabo ca Kutungulule Sukulu lya Butumikishi bwa Teokratiki cilondololo kuti ifilangililo filabalamuna ukutontonkanya kwa muntu no kucilenga ukuba icayanguka ukumfwikisha imfundo shipya. Ukucebusha itontonkanyo no kwambukilwa kwa nkuntu filalundana ne filangililo, ica kuti ubukombe bulacilapo kuluma icishingacitwa ilingi line pa kubomfya fye amashiwi. (Mat. 13:34) Icitabo ca Ukwishiba calikwata ifilangililo fya kusambilisha ifishaifulila ifyo fyabe fyayanguka lelo ifya maka. Ku ca kumwenako, icilangililo cabomfiwa mu cipandwa 17 cilenga umo ukumfwikisha fintu, mu mano ya ku mupashi, Yehova apayanya ifya kulya, ifya kufwala, no mwa kwikala ukupitila mu cilonganino ca Bwina Kristu. Ifikope fyayemba ifya mu citabo ca Ukwishiba kuti fyabomfiwa mu kufumamo cimo ku kwambukile nkuntu. Pe samba lya kamutwe kanono akaleti “Ukwima ku Bafwa Ukwa Kulengo Buseko,” pe bula 185, amaka ya paragrafu 18 yali no kuluminako nga ca kuti umusambi aebwa ukubwelela ku numa no kumona icikope cisangwa pe bula 86. Ici kuti pambi camusesha ukutontonkanya pa lwa kwima ku bafwa ukuti cintu ca cine cine icikacitikako pe samba lya Bufumu bwa kwa Lesa.

¹¹ Abasambi ba Baibolo balekabila ukulunduluka lwa ku mupashi mwi sambililo limo limo. Pali uyu mulandu, mwilaba ukwipusha ifipusho fya kupitulukamo mu mukululo wa “Mona nga Nawishiba” uusangwa pa mpela ya cipandwa cimo na cimo. Mwiikushiwa fye ne casuko calungama ica fisambililwe. Ubwingi bwa ifi fipusho bwapekanishiwa ku kulenga umusambi ukuilumbulwila ifili ku mutima. Ku ca kumwenako, moneni ibula 31, apo umusambi epushiwa ukuti: “Mibele nshi iya kwa Yehova Lesa iyo watemwapo sana?”—2 Kor. 13:5.

¹² Kansheni Abasambi Ukupekanishisha Isambililo: Umusambi uubelengela libela isambililo, ukushila ifyasuko, no kutontonkanya ifya kwasuka fyene mu mashiwi yakwe yene akalunduluka bwangu lwa ku mupashi. Ukupitila ku ca kumwenako cenu no kukoselesha, kuti mwamukansha ukupekanishisha isambililo. Mulangeni icitabo cenu, umo mwashila amashiwi ya mpikwe na basentensi. Londololeni ifya kusanga ifyasuko fya kulungatika ku fipusho fyalembwa. Ukupekanishisha icipandwa capamo kuti kwaba ukwa kwaafwa ku musambi. Mukoselesheni ukuilumbulwila umwine mu mashiwi yakwe yene. E lyeka fye lintu cishibikwa bwino ukuti aleumfwikisha ifyebo. Nga ca kuti alebelenga fye icasuko ukufuma mu citabo, kuti mwamulenga ukutontonkanya pa kumwipusha ifyo engalondolwela umuntu umbi ico cishinka mu mashiwi yakwe yene.

¹³ Koselesheni umusambi ukulamona amalembo yashayambulwa ilyo alepekanya isambililo lyakwe ilya cila mulungu, apantu te kuti pambi kubeko inshita ya kuyabelenga yonse mwi sambililo. Mutasheni pa kubombesha uko alebombesha mu masambililo yakwe. (2 Pet. 1:5; moneni Ulupungu lwa kwa Kalinda ulwa August 15, 1993, amabula 13-14, ku mitubululo yalundwapo pa cingacitwa kuli kasambilisha no musambi ku kwingilishako ukusambilila mwi sambililo lya Baibolo.) Muli iyi nshila, umusambi alekanshiwa ukupekanishisha ukulongana kwa cilonganino no kwasukapo mu nshila yabamo ubupilibulo. Akasambilila ifya kulundulula ifibelesho fye sambililo lya pa lwakwe ifisuma ifyo fili no kumupangasha ukutwalilila ukulunduluka mu cine pa numa ya kupwisha isambililo lyakwe ilya Baibolo mu citabo ca Ukwishiba.—1 Tim. 4:15; 1 Pet. 2:2.

¹⁴ Tungululeni Abasambi ku Kuteyanya kwa kwa Yehova: Caba cishingamo ca kwa kapanga wa basambi ukutungulula ubuseko bwa musambi ku kuteyanya kwa kwa Yehova. Umusambi ali no kulunduluka mu kwangufyanya nga nshi ukufika ku kukosoka kwa ku mupashi nga ca kuti aishiba no kutesekesha ukuteyanya no kwiluka ifyo alekabila ukuba ulubali lwa kuko. Tulefwaya wene ukusanga ubuseko mu kubishanya na bantu ba kwa Lesa no kulafwaisha ukulaba na ifwe pa Ŋanda ya Bufumu, apo engatungililwa lwa ku mupashi na lwa mu nkuntu ifyo fintu icilonganino ca Bwina Kristu cipayanya.—1 Tim. 3:15.

¹⁵ Broshuwa wa kuti Inte sha kwa Yehova—Mu Kwikatana Shicito Kufwaya kwa kwa Lesa mu Kusalala kwa Calo alipekanishiwa ku kulenga abantu ukubeleshanya no kuteyanya kumoneka kumo fye mpo uko Yehova alebomfya ilelo ku kupwishishisha ukufwaya kwakwe. Lintu isambililo lyaimikwa, mulandu nshi uwa kukanapeelelako umusambi uyu broshuwa? Pa kutampa fye pene, laalikeni umusambi ku kulongana. Londololeni ifyo kutungululwa. Kuti mwamweba umutwe wa lyashi lya cintubwingi ilili no kupeelwa nelyo ukumulanga icipande cili no kusambililwa mwi Isambililo lya Ulupungu lwa kwa Kalinda. Napamo kuti mwamusenda ku kuyamona Iŋanda ya Bufumu lintu kushili ukulongana pa kuti umwenso uyo akwete uwa kuya ku cifulo icipya pa muku wa kubalilapo wingacepako. Kuti pambi mwamusendako no kumusenda pa kuya ku kulongana. Lintu asangwako, mulengeni ukuyumfwa uwayangukilwa no kuti nasengelwa. (Mat. 7:12) Mulondololeni kuli baNte bambi, ukusanshako na baeluda. Muli ifyo, akatendeka ukumona icilonganino ngo lupwa lwakwe ulwa ku mupashi. (Mat. 12:49, 50; Marko 10:29, 30) Kuti mwamwimikila ubuyo, pamo ngo bwa kusangwa ku kulongana kumo cila mulungu, kabili panono panono ukulalundako kwene.—Heb. 10:24, 25.

¹⁶ Ilyo isambililo lya Baibolo ilya mu ŋanda lilesululuka mu citabo ca Ukwishiba, komaileni pa fiputulwa ifyo fyebekesha ukukabila kwa kubishanya lyonse ne cilonganino pa kulongana. Ukucilisha moneni amabula 52, 115, 136-9, 159, ukusanshako ne cipandwa 17. Lumbululeni fintu imwe mwe bene mwatesekesha ukuteyanya kwa kwa Yehova mu kushika. (Mat. 24:45-47) Landileniko icilonganino cenu na pa lwa cintu mulesambilila mu kulongana mu nshila isuma. (Ilu. 84:10; 133:1-3) Kuti cawama nga ca kuti umusambi engatamba bavidio ba Sosaite bonse, ukutendekelako na Jehovah’s Witnesses—The Organization Behind the Name. Ku fyebo fyalundwako pa fya kutungulula abalesekelela ku kuteyanya, moneni Ulupungu lwa kwa Kalinda ulwa July 15, 1985, amabula 25-9, ne ca mu kati ica mu Ubutumikishi Bwesu Ubwa Bufumu ubwa April 1993.

¹⁷ Koselesheni Abasambi Ukushimikila Kuli Bambi: Ubuyo bwesu mu kusambilila na bantu kupanga abasambi abemininako Yehova ubunte. (Esa. 43:10-12) Ici cilepilibula ukuti kasambilisha alingile ukukoselesha umusambi ukwebako bambi ifyo alesambilila ukufuma muli Baibolo. Ici kuti cacitwa mu kwanguka fye pamo ngo kwipusha ati: “Ni shani fintu mwingalondolola ici cine ku lupwa lwenu?” nelyo “Lilembo nshi mwingabomfya pa kushinine ci kuli cibusa wenu?” Komaileni pa fiputulwa fya mpikwe mu citabo ca Ukwishiba apo ukushimikila kwakoseleshiwa, pamo nga pa mabula 22, 93-5, 105-6, ukusanshako ne cipandwa 18. Pa nshita yalingwa, umusambi kuti pambi apeelwa amatrakiti aya kubomfya pa kushimikila kuli bambi mu bunte bwa mu lyashi. Tubululeni ukuti alelaalikako ifilundwa fya lupwa lwakwe ku kusangwako kwi sambililo. Bushe alikwata ifibusa abengatemwa ukusambilila? Mulombeni ukumulanga abalesekelela.

¹⁸ Ukupitila mu kusangwa kwi Isukulu lya Butumikishi bwa Teokrasi no Ukulongana kwa Mulimo, uuleenekelwa ukuba umusambi kuti apokelela ukukansha kwalundwapo no kukoselesha uko kuli no kumwaafwa ukusanguka kasabankanya wa mbila nsuma. Lintu alumbulula ukufwaisha kwa kulembesha mwi sukulu nelyo ukuba kasabankanya uushabatishiwa, ifishinte ifyalondololwa pa mabula 98 na 99 mu citabo ca Ubutumikishi Bwesu fili no kubomba. Nga ca kuti ulubali lumo ulwa bumi bwakwe lwamulenga ukukanafikapo, kuti wafwailisha mu mpapulo sha Sosaite ku fyebo fya kwaafwa ifilanda pali uyu mulandu no kumwebako. Ku ca kumwenako, kuti pambi cili icakosela umusambi ukucimfya ubulembo nelyo imiti ikola imbi. Icitabo ca Ukupelulula cilondolola imilandu ikalamba iya mu Malembo iyo Abena Kristu basengaukila ifibelesho fya musango yo ifya kucena, kabili pe bula 161 cilondolola inshila iyashininkisha ukuba iibomba ku kwaafwa bambi ukuputukako. Pepeni nankwe pali uyo mulandu, musambilisheni ukushintilila pali Yehova ku kwaafwiwa.—Yako. 4:8.

¹⁹ Inshila ya kukonka pa kupimununa nampo nga umo nafikapo ukubomba mu butumikishi bwa ku cintubwingi yalilondololwa mu Ulupungu lwa kwa Kalinda ulwa January 15, 1996, ibula 16, paragrafu 6. Lintu umusambi afikapo, kuti caba ica kwaafwa ukupituluka na wene mu kupekanishisha ubushiku bwakwe ubwa kubalilapo mu mulimo wa mwi bala. Mu nshila yashininkishiwa, lanshanyeni ifyo abantu mu cifulo cenu ilingi line bankulako ne nshila bakaaninamo. Nga cingacitika lekeni atampilepo no mulimo wa ku ŋanda ne ŋanda, kabili panono panono mukansheni mu mbali shimbi isha butumikishi. Nga ca kuti inshila mulelandilamo ili iipi kabili iyayanguka, cikaba icayanguka kuli wene ukuipashanya. Beni aba kukuulilila kabili abakoselesha, ukulangisha ubuseko mu mulimo, pa kuti engamona umupashi mukwete no kuubelebesha. (Imil. 18:25) Ubuyo bwa musambi mupya bulingile ukuba kusanguka kasabankanya wa mbila nsuma uwa lyonse, kabili uwapimpa. Napamo kuti mwamwaafwa ukutantika bwino bwino imibombele yakwe. Pa kuti engalunduluka mu kulamuka kwakwe ukwa kushimikila kuli bambi, kuti pambi mwatubulula ukuti abelenge bamagazini ba Ulupungu lwa kwa Kalinda aba August 15, 1984, amabula 21-31; July 15, 1988, amabula 9-20; January 15, 1991, amabula 15-20; na January 1, 1994, amabula 20-5.

²⁰ Koselesheni Abasambi Ukulola ku Kuipeela no Lubatisho: Cilingile ukuba icayanguka ku musambi wa mutima wa bufumacumi ukwishiba ifya kumanina ukupitila mu kusambilila icitabo ca Ukwishiba ku kuipeela kuli Lesa no kufikapo ku lubatisho. (Linganyako Imilimo 8:27-39; 16:25-34.) Nangu cibe fyo, ilyo umuntu ashilakuntwa ukuipeela, alekabila ukulundulula uko kuipeelesha kuli Yehova. (Ilu. 73:25-28) Ukupulinkana isambililo lyonse, fwayenino amashuko ya kulundulwilamo ukutesekesha imibele ya kwa Yehova. Lumbululeni ifyo mwe bene muyumfwa pa lwa kwa Lesa. Afweni umusambi ukutontonkanya mu nshila ya kulundulula ukwampana kwa cikabilila, ukwa pa lwakwe na Yehova. Nga ca kuti mu cine cine aishiba Lesa no kumutemwa, lyene ali no Kumubombela muli bucishinka, apantu ukuipeelesha kwa bukapepa kwakuma ku fyo tuyumfwa pa lwa kwa Yehova ngo muntu.—1 Tim. 4:7, 8; moneni Icitabo ca Kutungulule Sukulu, ibula 76, paragrafu 11.

²¹ Tukuteni ukufika pa mutima wa musambi. (Ilu. 119:11; Imil. 16:14; Rom. 10:10) Alekabila ukumona ifyo icine cilemwambukila pa lwakwe no kupingulapo ico alingile ukucita na cintu asambilile. (Rom. 12:2) Bushe mu cine cine alisumina icine icilondololwa kuli wene cila mulungu? (1 Tes. 2:13) Pa kwishibe ci, kuti walenga umusambi ukuilumbulwila pa kwipusha ifipusho fyabamo kushilimuka ifya mimwene yakwe, pamo nga: Ni shani fintu muleyumfwa pa lwa ici? Ni shani fintu mwingabomfya ici mu bumi bwenu? Ukufuma ku fyasuko fyakwe kuti mwapimununa apalekabilwa ukwaafwa kwalundwapo pa kufika pa mutima wakwe. (Luka 8:15; moneni Icitabo ca Kutungulule Sukulu, ibula 54, paragrafu 11.) Amashiwi ya pa fikope fisangwa pa mabula 172 na 174 aya citabo ca Ukwishiba yepusha ukuti: “Bushe waliipeela kuli Lesa mwi pepo?” na “Cinshi cilekulesha ukubatishiwa?” Ifi fipusho kuti fyakunta umusambi ukucitapo cimo.

²² Inshila ya kukonka lintu kasabankanya ushabatishiwa alefwaya ukubatishiwa yalilondololwa mu Ulupungu lwa kwa Kalinda ulwa January 15, 1996, ibula 17, paragrafu 9. Icitabo ca Ukwishiba calembelwe mu kuba ne mifwaile ya kupangasha umuntu ukwasuka “Amepusho ya Balefwayo Kubatishiwa,” ayasangwa mu fyalundwako ifya citabo ca Ubutumikishi Bwesu, ayo baeluda bakapitulukamo nankwe. Nga ca kuti walekomaila pa fyasuko ku fipusho fyapulintwa mu citabo ca Ukwishiba, umusambi alingile ukuba uwaipangasha bwino ku fiputulwa fya fipusho ifyo baeluda bepusha ku kupekanishisha ulubatisho.

²³ Afweni Abapwisha Isambililo lya Baibolo Ilya mu Ŋanda: Cilingile ukwenekelwa ukuti ukufika pa nshita umuntu alepwisha ukusambilila icitabo ca Ukwishiba, ukufumaluka kwakwe no kushika kwa buseko bwa kubombela Lesa fikaba nafimonekesha. (Mat. 13:23) E mulandu wine akamutwe kanono aka kupelako aka citabo kepushisha ukuti, “Cinshi Uli no Kucita?” Amaparagrafu ya kwisalila yepukisha umusambi ukutontomesha pa kwampana na Lesa uko alingile ukulundulula, ukukabila kwa kubomfya ukwishiba uko asambilile, no kukabila kwa kubombelapo mu kwangufyanya ku kulangisha ukutemwa kwakwe kuli Yehova. Takuli ukusambilila impapulo shalundwapo na bapwisha icitabo ca Ukwishiba. Mu cikuuku kabili mu kumfwika londolweleni umusambi uwafilwa ukwankula ku kwishiba Lesa ico alekabila ukucita pa kulunduluka lwa ku mupashi. Kuti mulepitako limo limo, ukumushiila inshila iyaisuka kuli wene ukucitapo fimo ifitungulula ku mweo wa muyayaya.—Luk. Mil. 12:13.

²⁴ Umusambi mupya uwafukatila icine no kubatishiwa akakabila ukutwalilila ukulunduluka mu kwishiba kwakwe no kumfwikisha pa kuti engaba uwaikashiwa ku kutetekela. (Kol. 2:6, 7) Mu cifulo ca kutwalilila isambililo lya Baibolo mu ŋanda pa numa ya kupwisha icitabo ca Ukwishiba, kuti waipeelesha we mwine ukumupayanishisha ukwaafwa kwa pa lwakwe ukuli konse uko pambi engakabila pa kuti engafika ku kukosoka lwa ku mupashi. (Gal. 6:10; Heb. 6:1) Umusambi kuti aongeleshapo ukumfwikisha kwakwe ukupitila mu kubelenga Baibolo cila bushiku, ukusambilila Ulupungu lwa kwa Kalinda pa lwakwe ne mpapulo shimbi isha “musha wa cishinka,” ukupekanishisha ukulongana no kusangwako, no kulanshanya icine na basumina banankwe. (Mat. 24:45-47; Ilu. 1:2; Imil. 2:41, 42; Kol. 1:9, 10) Nga ca kuti abelenga icitabo ca Ubutumikishi Bwesu no kubomfya ifyabamo cili no kumwaafwa apakalamba nga nshi ukumulenga ukuba uwateyanishiwa mu nshila ya teokrasi ku kufishapo bukapyunga bwakwe.—2 Tim. 2:2; 4:5.

²⁵ Lundululeni Amaka ya Kusambilisha: Twalitumwa ku ‘kulenga aba nko shonse ukuba abasambi, . . . ukubasambilisha.’ (Mat. 28:19, 20) Apantu amaka ya kusambilisha yalisuntinkana nga nshi no mulimo wa kupanga abasambi, tufwile ukutukuta ukuwamyako nga bakasambilisha. (1 Tim. 4:16; 2 Tim. 4:2) Ku mitubululo yalundwapo ukukuma ku fya kulundulula amaka ya kusambilisha, kuti mwatemwa ukubelenga: “Ukulundulula Amano ya Kusambilisha” na “Ukufika pa Mutima wa Balekukutika” mu Icitabo ca Kutungulule Sukulu, amasambililo 10 na 15; “Teacher, Teaching” (Kasambilisha, Ukusambilisha) muli Volyumu 2 uwa Insight; ne fipande fya mu Ulupungu lwa kwa Kalinda ifya mitwe ya kuti “Ukukuulila ne Fisolobelo Fishingapya ku Mulilo,” March 1 1985; “Lintu Ulesambilisha, Fika pa Mutima,” March 15, 1985; “Bushe mu Kufumamo Cimo Ulapelulula Ukufuma mu Malembo?,” March 1, 1986; na “Ifya Kusanga Ubuseko mu Kupanga Abasambi,” February 15, 1996.

²⁶ Ilyo muletukuta ukupanga abasambi, pa kubomfya icitabo ca Ukwishiba, lyonse mulepepa ukuti Yehova, “uumesha,” akapaale ukubombesha kwenu ku kufika pa mitima ya bantunse ne mbila nsuma iya Bufumu. (1 Kor. 3:5-7) Shi mwingasanga ubuseko bufuma mu kusambilisha bambi ukumfwikisha, ukutesekesha, no kubombela pa kwishiba uko kutungulula ku mweo wa muyayaya!