Ukusangwa ku Kulongana ‘Kabili Abacililako Ukucite Fyo’
1 Ukutula na kale, ukulongana kwalikatama ku bantu ba kwa Yehova. Abena Israele baleya ku matempele na masunagoge ku kupepa kwa cine, ukusambilila ifya bulesa, no kubishanya kwa nsansa. Mu kupalako, Abena Kristu ba kwamba tabalekele ukulongana pamo. Muno nshiku sha kulekelesha ishayafya, ilyo amafya ne fya kwesha filefulilako, na ifwe tukabila ukukoselesha kwa ku mupashi ukwishila mu kulongana kwa cilonganino—kabili tulakukabila ‘ukucilanapo.’ (Heb. 10:25, The New Testament in Bemba) Moneni imilandu itatu tusangilwa ku kulongana.
2 Ku Kubishanya: Amalembo yatukonkomesha ati “koseleshanyeni kabili kuulaneni.” (1 Tes. 5:11) Ukubishanya kwa bukapepa kulenga amano yesu ukwisulamo amatontonkanyo yasuma kabili kutukunta ukubomba imilimo isuma. Lelo nga twaitalushako, kuti twalemenena ku kutekelesha amatontonkanyo ya buwelewele, aya bukaitemwe, nelyo fye aya bucisenene.—Amapi. 18:1.
3 Ku Kusambilila: Ukulongana kwa Bwina Kristu kutupeela amasambililo ya mu Baibolo ayatwalilila ayateyanishiwa ku kulenga ukutemwa twatemwa Lesa kwishima. Kupeela imitubululo ingabomba mu kubomfya “[ukufunda, NW] konse kwa kwa Lesa.” (Imil. 20:27) Ukulongana kulatukansha ukulamuka mu kushimikila no kusambilisha imbila nsuma, ukulamuka ukukabilwa ukucilapo nomba pa kuti tukwate ubuseko ubukalamba ubwisa nga twasanga no kwaafwa abapokelela icine ca mu Baibolo.
4 Ku Kutucingilila: Muli cino calo cibifi, icilonganino ca kufisamamo icine cine ica ku mupashi—ica mutende no kutemwa. Ilyo tuli mu kulongana, umupashi wa mushilo uwa kwa Lesa ulaba na maka pali ifwe, ukutwala ifisabo fya “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Gal. 5:22, 23) Ukulongana kulatukosha ukushangila no kukanatelententa mu busumino. Kutupangasha ukulolenkana ne fya kwesha fili ku ntanshi.
5 Pa kusangwa ku kulongana lyonse, tulomfwa cintu kemba wa malumbo alondolwele, icalembwa pa Ilumbo 133:1, 3 ati: “Moneni, ifyo kwawama kabili ifyo kwa nsansa ukwikalilila pamo kwa ba bwananyina!” Apali ponse abantu ba kwa Lesa balebombela no kulongana capamo, “apo e po Yehova aebeele ipaalo, umweo wa kwikalilila umuyayaya.”