Bushe mu April 2000 Kuti Twabomba Ifyo Tushabala Atubombapo Kale?

¹ Pali Citatu icungulo bushiku, pa April 19, pakacitika icintu caibela nga nshi muli uno mwaka wesu uwa mulimo. Bulya bushiku, ilyo akasuba kakalawa mwi sonde lyonse, ifilonganino fyonse na mabumba ya Nte sha kwa Yehova mpanga yonse bakalongana ku kusefya Icibukisho ca mfwa ya kwa Kristu. Te mulandu na kuntu twikala, ukusefya imfwa ya kwa Yesu Kristu kukaba cintu caibela nga nshi muli uno mwaka. Ubushiku bwa Cibukisho bwalishilwapo pali Kalenda wa Nte sha kwa Yehova uwa mu 2000 mu mweshi wa April.

² Mu mweshi onse uwa April tukaba ne shuko lishaiwamina ilya kulanga no mweo onse ukuti tulatasha pa luse lwa kwa Yehova ulo alangile ukupitila mwi lambo lya Mwana wakwe. Mu nshila nshi? Umutumwa Paulo alembele ukuti: “Ukutemwa kwa kwa Kristu e ko twaobelwa; pa kupingule ci, ukuti apo umo afwilile bonse, ninshi bonse balifwile, kabili afwilile bonse ukuti abali no mweo beikalila abene, lelo bekalile uwabafwilile no kubuuka pa mulandu wabo.” (2 Kor. 5:14, 15) Cine cine, mu April kuti twalangisha ukuti, tatuleikalila fwe bene, lelo tuleikalila uwatufwilile, ukupitila mu kubomba muli uyu mweshi imibombele iyo tushabala atubombapo kale nga batumikishi ba Bufumu!

³ Lembesheniko Bupainiya bwa Kwafwilisha mu April: Umutumwa Paulo atwimikile ica kumwenako cishaiwamina lintu atile: “Nshilinga mweo wandi cintu cikankaala kuli ne mwine, kano kupwisho mulimo wandi na bukapyunga ubo napokelele kuli Shikulu Yesu ku kushimikishe mbila nsuma ya kusenamina kwa kwa Lesa.” (Imil. 20:24) Na ifwe bene e shuko twakwatako ilya kushimikishe mbila nsuma pa lwa kwa Yehova Lesa. Pali uyu mulandu, tulefwaya ukubombesha mu mweshi wa April ifyo tushabala atubombapo kale ukukuma kuli bupainiya bwa kwafwilisha!

⁴ Apo mu April 2000 mukaba impela sha milungu shisano, ikaba ni nshita ishaiwamina ku bengi ukubombako bupainiya. Mu May 1997, ilyo abengi sana babombeleko bupainiya bwa kwafwilisha, nga kulinganya ku babombeleko 7,695 kuti twatila iyi mpendwa ileimininako amapesenti 8 aya bakasabankanya bonse. Imyaka ibili iyakonkelepo, impendwa yonse pamo iya bakasabankanya abatumine lipoti mu May 1999 yalingilishiweko amapesenti ukucila pali yasano. Ici cilepilibula ukuti natukwata sana amaka ya kucila pa mpendwa ya babombeleko bupainiya bwa kwafwilisha umwaka wapwile. Ukulundapo, amaawala yalicefiwako, kabili ici calilenga ukuti abengi mu cilonganino bengabombako uyu mulimo. Kasabankanya umo na umo uwabatishiwa afwile ukutontonkanyapo no kupepa sana nga kuti abombako bupainiya bwa kwafwilisha mu April uno mwaka.

⁵ Ukubomfya umweshi wa April pali Kalenda uwa mu 2000, moneni ifyo mwingatantika ifya kubomba mu mweshi uleisa. Saleni inshiku muli no kubombako mu mulimo wa mwi bala, kabili sansheni amaawala yonse ayo mulemona ukuti mukabombako umulimo wa kushimikila muli uyu mweshi. Mwilaba ukusanshako inshita mwingashimikila kuli bambi ku ng’anda ne ng’anda na mu bunte bwa mu lyashi. Bushe icipendo mwasanga cilepalamako ku maawala 50 ayafwaikwa kuli bapainiya ba kwafwilisha? Nga tayafikile ku yakabilwa, bushe kuti mwateululako ifintu fimbi ifyo mucita pa kuti mwingalubula inshita ya kubombako bupainiya bwa kwafwilisha? Ico mulekabila fye kulabomba iawala limo na baminiti 40 cila bushiku pa kukumanisha amaawala 50 ayakabilwa pa mweshi.

⁶ Apo nomba amaawala yafwaikwa kuli bapainiya ba nshita yonse na yo yene yalibweshiwako, bushe mwalitontonkanyapo pa kubombako ubutumikishi bwa nshita yonse? Tamulekabila ukulolela inshita ya lusuba pa kutendekako. Apo nomba amainsa nayapita, umweshi wa April kuti waba bwino sana ukutendekamo bupainiya bwa nshita yonse! Nga muletwishika ifyo pambi te kuti mukumanishe amaawala 70 ayafwaikwa kuli bapainiya ba nshita yonse, napamo kuti mwabombako bupainiya bwa kwafwilisha mu April no kwesha ukufika pa maawala 70. Ilyo mwasanga ifyo kuti mwabomba, kuti pambi mwafwaisha ukulomba ukutendeka bupainiya bwa nshita yonse bwangu bwangu.—Moneni Abateyanishiwa, amabula 113-14.

⁷ Bombeni na Maka Yonse Nga Kasabankanya wa Mbila Nsuma: Ifwe bonse, bakasabankanya na bapainiya kumo, ukutemwa kwa cine cine uko twatemwa Lesa na bantu banensu kutulenga ukubomba no mweo onse ilyo tulecita apapelele amaka yesu mu mulimo wa kwa Yehova ukulingana ne mibele yesu umo umo. (Luka 10:27) Muli fyo, tulalanga ukuti “tucucutikila no kupilikitila ici cine, ica kuti twacetekela kuli Lesa wa mweo, uuli Mupusushi wa bantu bonse, ukucishako wa batetekela.” (1 Tim. 4:10) E mulandu wine tufwile ukwenekela bonse ukubombako mu April, e kutila ukubombako na maka yesu yonse mu mulimo wa Bufumu.

⁸ Shi twilaba ukukonkomesha kwa kwa Yesu ukwa kuti: “Ukulobolola kwena kukalamba, lelo ababomfi nabacepa. E ico lombeni Umwine wa kulobolola, ku kuleka atume ababomfi mu kulobolola kwakwe.” Bwangu bwangu pa numa ya kusosa ayo mashiwi, Yesu aitile abatumwa bakwe 12 no kubatuma ku kushimikila. (Mat. 9:37, 38; 10:1, 5, 7) Pa numa ya mwaka napamo umo, libe ninshi abatumwa 12 nabakanshiwa bwino mu mulimo wa kushimikila, Yesu “asontele na bambi amakumi cinelubali, no kubatuma,” ukubeba cimo cine ukuti: “Ukulobolola kwena nakukula . . . e ico lombeni Umwine kulobolola ukuti atume ababomfi ku kulobolola kwakwe.” (Luka 10:1, 2) Ibuuku lya mu Baibolo ilya Imilimo lilalondolola ifyo Yehova ayaswike yalya mapepo. Ukufika pa Pentekoste 33 C.E., impendwa ya basambi yafikile kuli 120. Lyene, abantu 3,000 basangwike abasambi e lyo pakonkele na bambi 5,000. (Imil. 1:15; 2:41; 4:4) Pa numa ya ico, ‘yalefushiwa apakalamba impendwa ya basambi.’ (Imil. 6:7) Na lelo line, tufwile ukutwalilila ukulomba Umwine wa kulobolola ukutuma bakashimikila ba Bufumu na bambi! Mu kumfwana na mapepo yesu, cila kasabankanya mu cilonganino alingile ukutantikako inshila shimo ishashininkishiwa ku kubombako ubutumikishi cila mweshi.

⁹ Twamulomba ukulolekesha pa mweshi wa April pali Kalenda uwa mu 2000. Apantu inshiku sha kubalilapo shibili muli uyu mweshi shikaba pa Cibelushi na pa Mulungu, bushe kuti mwatantika ukubangilila ukubomba mu April pa kubombako umulimo pali ilya mpela ya mulungu? Bushe kuti mwabombako lyonse pa “Ubushiku bwa Magazini” mu April ne bumba lyenu ilye Sambililo lya Citabo? Napamo kuti mwasalapo ukulabomba iawala limo no kucilapo pa Mulungu lyonse mu butumikishi. Bushe kuti mwabombako ubunte bwa mu cungulo bushiku? Kabili mwikalaba ukushimikila ubunte bwa mu lyashi lyonse ilyo mwashukila akashita ifili nga lintu muli ku ncito, ku sukulu, nelyo ilyo mulebomba imilimo imbi ya cila bushiku. Saleni no kuconga inshiku mwingabombako mu butumikishi, kabili bomfyeni uno kalenda ku kulembapo amaawala yenu aya mulimo wa mwi bala mu mweshi wa April.

¹⁰ Umweshi wa April ukaba uusuma kuli bonse abafikilepo kabili abasuminishiwa na baeluda ukuba bakasabankanya abashabatishiwa. Nga mulasambilila Baibolo na umo, bushe uyo muntu nalunduluka eyefilya ica kuti kuti mwamona kangalila wa kutangilila pa kuti akabe kasabankanya wa mbila nsuma? Nga mwalikwata abana abashabatishiwa, bushe mwalilanshanya na baeluda pa lwa kulunduluka kwabo ukwa ku mupashi? Bushe ino taingaba inshita isuma ukuti babe bakasabankanya?—Moneni Abateyanishiwa, amabula 97-100.

¹¹ Apantu tulefwaisha ukuti mu mweshi wa April 2000 tukabombeshe ifyo tushabala atubombapo kale, ifwe bonse tufwile ukubombako ubutumikishi no kutuma lipoti wa mulimo wa mwi bala pa mpela ya mweshi. (Linganyeniko Marko 6:30.) Bakasabankanya bashabatishiwa abapya abalebombako umulimo wa mwi bala pa muku wa kubalilapo bafwile ukukoseleshiwa ukutuma lipoti pa nshita ilefwaikwa. Nga ca kuti ifwe umo umo twabomba ukufika apapelele amaka yesu, kuti twalenga lipoti wa April ukuba umusuma kabili kuti twalumbanyako Yehova ukulumba kwakulisha ukukabako ukupitila mu kubombesha kwesu ukwa kushimikila.

¹² Laalikeniko Bambi ku Cibukisho: Bushe te kuti tutemwe ukumona icipimo cakulisha ica bakasangwa ku Cibukisho ca Mfwa ya kwa Kristu mu 2000? Kuti twatemwa! Kuti yaba ni mpendwa yakulisha iya bantu abatala abalongana capamo ku kutasha pa lwa kutemwa uko Yehova Lesa na Yesu Kristu batutemenwe! (Yoh. 3:16; 15:13) Pekanyeni fyonse ifilekabilwa pa kuti imwe no lupwa lwenu mukasangweko ku Cibukisho.

¹³ Ino ine e nshita ya kutendeka ukulaalikako bambi ku Cibukisho. Lembeni amashina ya bantu bonse abo mwingatemwa ukuti bakasangweko. Sanshenipo abali bonse abasambililapo Baibolo ku numa uku, abalesambilila pali nomba, na bonse abo muyako ku fipempu fya kubwelelamo. Lundenipo na bo mwaishibana fye na bo ku ncito, ku sukulu, na mu bwina mupalamano, na bantu mubomba na bo ifili fyonse. Mwilabako na bambi abo mwaishibana fye na bo e lyo na balupwa. Ilyo mwapwisha ukulemba amashina, mu kucincila kabili mwe bene tendekeni ukulaalika abo bantu umo na umo. Londololeni bwino bwino ilyo Icibukisho cikabako na kuntu cikabela. Ilyo ubushiku bwa pa April 19 bulepalamina, cinkuleniko abo mwalaalika, ukubendela nelyo ukubatumina lamya. Bebeni ukwendela pamo na imwe pa kuya ku Cibukisho cilya cungulo bushiku.

¹⁴ Mu kumfwana ne fyebo fya Sosaite ifyapeelwe ku numa, ibumba lya baeluda lili no kubombesha nga nshi ukukoselesha bakasabankanya bonse abanaka ababa mu cifulo cabo ica kubombelamo ukusangwa ku Cibukisho. (Mat. 18:12-14) Baeluda bafwile ukupituluka muli kalata wafumine ku Sosaite uwa pa February 2, 1999. Kalemba wa pa cilonganino ali no kulemba amashina ya bakasabankanya bonse abanaka, kabili kangalila wa mulimo ali no kutantika baeluda ukubatandalila no kubalaalika ku Cibukisho. Napamo ilyo bakoseleshiwa kuli bakacema ino ine nshita, aba bakasabankanya abanaka kuti bayafwiwa ukutendeka ukubomba na kabili mu mulimo wa mwi bala, nelyo fye mu April. Kuti bakuulililwa sana ukubomba na kasabankanya wabelesha mu mulimo wa mwi bala.

¹⁵ Koselesheni Bonse Ukubombako mu April! Baeluda bonse, ababomfi batumikila, ne mitwe ya ndupwa bakakabila ukubombesha mu mweshi wa April 2000 ifyo bashabala ababombapo kale. Baeluda bakabombesha ku kuteyanya no kutungulula fyonse bwino bwino. (Heb. 13:7) Kufwile ukubako imitantikile iingakonkwa bwino iya kukumana kwa mulimo wa mwi bala mu kati ka mulungu na pa mpela sha milungu ukusanshako pa nshiku sha mwikalwe. Kuti kwabako ukukumana na kumbi ukwa mulimo wa mwi bala mu cungulo kasuba ne cungulo bushiku. Ukutantika konse ukwa mibombele ya mu April kulingile ukubikwa pa cipampa ca fyebo. Mufwile ukutantika umuntu wa kutungulula ukukumana kwa mulimo wa mwi bala kumo na kumo. Kufwile ukubako icifulo ca kubombelamo icikalamba ukulingana ne bumba limo na limo.

¹⁶ Mu April tukalashalika bamagazini ba Ulupungu lwa kwa Kalinda na Loleni! Tufwile ukwesha sana ukutendeka amasambililo ya Baibolo ku balefwaisha ukusambilila ukubomfya broshuwa wa Cintu Lesa Afwaya. E co, kufwile ukubako bamagazini na babroshuwa abengi.

¹⁷ Pa mpela ya mweshi, bakatungulula bonse aba masambililo ya citabo na bakaafwa wabo bali no kukoselesha bonse ababa mwi bumba lyabo ilye sambililo lya citabo ukutuma lipoti wa mulimo bwangu bwangu fye ilyo umweshi wapwa. Napamo ici kuti cacitwa nangu fye pa Mulungu, pa April 30. Lyene, ilyo kalemba alesansha amalipoti, kabili amona ukuti bakasabankanya bamo tabatumine lipoti wabo, mu cikuuku kuti abacinkulako ukucite fyo ilyo ubushiku bwa pa May 6 bushilafika, ilyo kalemba afwile ukutuma lipoti wa cilonganino ku Sosaite. Pambi kuti alomba bakatungulula ba masambililo ya citabo ukumwafwako ukupoka amalipoti kuli bakasabankanya bashilatuma.

¹⁸ Inshita ya Cibukisho e nshita yacindamisha mu mwaka ku bantu ba kwa Lesa. Ifwile ukuba inshita ya kubombesha kuli ifwe bonse mu mulimo wa kwa Yehova. E fyo ili no kuba nga ca kuti bonse twabombako apapelele amaka yesu nga bakasabankanya ba mbila nsuma, nga ca kuti abengabombako bupainiya bwa kwafwilisha bacite co, kabili nga twabombesha ukulaalikako bambi ku Cibukisho ca mfwa ya kwa Kristu. No mutima onse shi natupepele ipaalo lishaiwamina ilya kwa Yehova ilyo tulebombesha mu mweshi wa April 2000 ifyo tushabala atubombapo kale, ne ci conse cikaleta ilumbo no bukata kuli Lesa!—Heb. 13:15.

[Akabokoshi pe bula 3]

Bapainiya ba Kwafwilisha

Icipimo Cesu Icakulisha: 7,695

(May 1997)

[Akabokoshi pe bula 4]

Bakasabankanya Bonse Pamo

Icipimo Cesu Icakulisha: 107,233

(August 1999)

[Akabokoshi pe bula 5]

Abasangilwe ku Cibukisho

Icipimo Cesu Icakulisha: 428,697

(1997)