Bushe Mwalikwata Umutima wa Kuipeelesha?

¹ Ukutasha pa fintu Yesu Kristu acitiile abantunse ukwabula bukaitemwe kulingile ukutulenga ukuipeelesha mu kubomfya ukulamuka kwesu, amaka yesu, no bukose bwesu. Amalembo yatupaapaata ukuti: “Tuuleni imibili yenu bulilambo bwa mweo, ubwa mushilo, ubwa kutemuna Lesa; e kupepa kwenu.” (Rom. 12:1) Ukuiceeceeta mu nshita mu nshita kukamwafwa ukumona nga ca kuti mwaliba ne co cibelesho ukufika pantu imibele ya pa lwenu ingamusuminisha.

² Mu Kufwaisha Ukwishiba kwa mu Baibolo: Bushe mwalilubulako inshita ya kubelenga Baibolo pa lwenu no kusambilila lyonse? Bushe tamupusa uko kutantika kwenu? Bushe mwalikwata ukutantika kwa kupekanishisha bwino ukulongana? Nga muli mutwe wa lupwa, bushe mulatungulula isambililo lya lupwa ukwabula ukupusa? Ukucite fi fintu kuti cafwaya ukubomfya inshita intu mwingapoosa ukutamba televishoni nelyo ukubomfya kompyuta nelyo iyo mubomfya mu fintu fimbi. Lelo, uko kuipusula kunono nga nshi, pantu twalishiba ukuti inshita tupoosa mu kubelenga Icebo ca kwa Lesa ikamutungulula ku mweo wa muyayaya!—Yoh. 17:3.

³ Mu Kukansha Abana Benu: Inshita yawama sana iya kuti abacaice batampe ukusambilila ukuipeelesha ni ku bwaice. Sambilisheni abana benu ukuti nangu ca kuti kwaliba inshita ya kwangala, kufwile kwaba ne nshita ya kubomba, ne ya kucita ifya bulesa. (Efes. 6:4) Batumeni ukubomba imilimo ya pa ng’anda ingafwa bambi. Teyanyeni inshita yashintililwapo bwino iya kubombako mu butumikishi pamo na bo. Lengeni ukufunda kwenu ukuti kube na maka ukupitila mu micitile yenu.

⁴ Mu Milimo ya Cilonganino: Icilonganino cilamwenamo nga nshi ilyo bonse ababamo baleitemenwa ukuipeelesha ku kubomba ifintu ifingawamina bambi. (Heb. 13:16) Bushe kuti mwalundako inshita mupoosa mu mulimo wa kushimikila Ubufumu no kupanga abasambi? Bushe kuti mwaitemenwa ukwafwako abalwele nelyo abakoloci, napamo ukubafwilishako mu myendele ukuti balesangwa ku kulongana?

⁵ Ilyo Yesu ashilatuula ilambo lya kulekeleshako ilya bumi bwakwe ubwa buntunse, afundile abasambi bakwe ukutangishako ifya Bufumu, ne fyashala fyonse ukuba ifya cibili mu mikalile yabo. (Mat. 6:33) Ukutinamina icibelesho ca musango yo ica kuipeelesha kukatuletela insansa ishingi ilyo tuletwalilila ukubombela Yehova no kusekelela.