Ukuba Abafuuke mu Mifwalile ne Misakwile
1 Ilyashi limo lyatile: “Bonse abaume abakalamba na balumendo, nabafwala inkolo. Banamayo bonse na bakashana, abapungwe na banono, nabafwala ilaya nelyo siketi. Nshimwenepo nelyo umo uufwele jeans nelyo ishati umwabula inkolo. Bonse bali ne nsansa.” Ni bani ili lyashi lyalelandapo? Bushe lyalelanda pa kubungana kwa bamapolitiki? Aba mangalo? Aba ciila? Awe te bo! Lyalelanda pe bumba lya bamunyina na bankashi abali pe bungano likalamba ilya citungu uyu mwaka wapwile.
2 Pe bungano limbi, kalemba wa lyashi ashimike ilyashi pa lwa cinkupiti wa baNte ukuti: “Abaume bonse balemoneka ubusaka kabili bafwele na masuti ne nkolo. Banamayo nabafwala ifya mucinshi kabili ifyayemba.” Umbi uwalemonako, malonda, atile: “Mwaliba ne misango isuma, aba mucinshi, aba busaka, kabili muli bantu abapepenkana. Ndemona fye ukuyemba kweka kweka. Muli ici calo ca busali, imwe namufumyapo ubusali!” Mwandi mashiwi yasuma ayo abantu balanda pali ifwe! Bushe tatuletasha ukuti abantu balilanda ifisuma pa lwa bwananyina bwesu? Ukwabula ukutwishika bonse mwi bumba balilengeleko ukuti kube amalipoti yasuma pa mulandu wa mimonekele yabo iisuma.
3 Twalishibikwa mu calo conse pa mimonekele yesu iyapusanako. (Mal. 3:18) Mulandu nshi? Pantu tuumfwila ukufunda kwa mu Malembo ukwa ‘kufwala kuyene, pamo no bufuuke no kutekanya; . . . imilimo isuma iiyene [abo] abatila tutiina Lesa.’—1 Tim. 2:9, 10.
4 Cinshi Imifwalile Yenu ne Misakwile Filanga? Ica kufwala tufwele ne fyo tucifwele filanga ifyo twaba—ifyo twasuminamo, imibele yesu, na mapange yesu. Imifwalile ne misakwile tusala filalanga ifyo twaba ne co twimininako. Tatufwile ukutungilila imitontonkanishishe yabipa ne misango yaseeka mu calo. Ico twangwako te kucishamo kwa busuma bwa fya kufwala lelo kumona nga nafilinga ku muntu uuleitunga ukuba umutumikishi wa kwa Lesa. (Rom. 12:2) Ukucila ukusala imimonekele ya mupashi wa bucaibela nelyo iya muntu wakwata imibele yabipa, tulefwaya ukulanga ukuti cine cine ‘tulacindika Lesa.’—1 Pet. 2:12.
5 Limo limo, umuntu umupya, uushilabelesha, nelyo uwanaka lwa ku mupashi kuti akonkelela fyonse ifyo icalo cilanga pa lwa mifwalile ne misakwile ukwabula intanshi ukutontonkanya pa fyo ico cintu cilekuma Yehova no kuteyanya kwakwe. Ifwe bonse kuti twatendeka ukuiceeceeta ukumona nga ca kutila natusongwa ne mitontonkanishishe ya ku calo. Kuti twaipusha munyina nelyo nkashi uwacindikwa, kabili uwakosoka lwa ku mupashi no kubepusha ifyo mu bufumacumi bamona imifwalile yesu ne misakwile lyena kuti twabikako amano sana ukupimununa imitubululo batweba.
6 Bamo balasumina ukuti bafwile ukwangwa ku mifwalile yabo ilyo bali pe bungano. Lelo lintu programu ya bushiku bumo yapwa tabangwako ku mifwalile yabo ilyo baletuusha. Twalilileni ukuba ne fipimo fya pa muulu ifyo abatumikishi ba Bwina Kristu bafwile ukukwata. (2 Kor. 6:3, 4) Konse uko bambi bengatumona, amabaji yesu aye bungano ne mifwalile yalinga ne misakwile filatwishibisha ukuti tuli Nte sha kwa Yehova. E ico, ifya kufwala fyesu fifwile lyonse ukuba ifyalinga kabili ifya mucinshi, ukulanga ukuti tatuli “ba pano isonde.”—Yoh. 15:19.
7 Shi natubombeshe pe Bungano lya Citungu ilya uno mwaka ilileti “Bakabila ba Bufumu Abapimpa” pa kulanga ukuti tuli “uluko lwa mushilo kuli Yehova Lesa [wesu].” Ubusuma bukafuma mu kucite fyo bukalundako “kutashiwa, kabili mu lulumbi, kabili mu kulumbuka” kwa kwa Yehova.—Amala. 26:19.
[Akabokoshi pe bula 6]
Ifyo Twingacindika Yehova:
■ Imifwalile yesu ifwile yalinga umutumikishi wa kwa Lesa.
■ Tufwile ukutaluka ku mifwalile
ya mupashi wa ku calo.
■ Langeni ubufuuke, ubulanga amano yasuma.