Tulakoseleshanya

 1. Busuma nshi bwaba mu kutandala kwa bakangalila benda?

¹ Umutumwa Paulo alembeele icilonganino ca ku Roma ati: “Ndefuluka ukumumona, pa kuti imupeeleko ica bupe ca bumupashi ku kumwikasha; nelyo, ntile, pa kuti kube ukukoseleshanya pamo na imwe, umo na umo ku citetekelo ca mubiye, fyonse pamo icitetekelo cenu ne candi.” (Rom. 1:11, 12) E fyo muno nshiku no kutandala kwa bakangalila benda kwaba. Nga batandala tulakoseleshanya nga nshi.

 2. Mulandu nshi babilishisha ukutandala kwa kwa kangalila wa muputule ilyo kucili inshita?

² Icilonganino: Ilingi line ukutandala kwa kwa kangalila wa muputule babilisha ku cilonganino ninshi kucili imyeshi itatu. Ici cilenga twatantika bwino imilimo yesu pa kuti tukabombeshe muli uyo mulungu. (Efes. 5:15, 16) Nga mulabomba, napamo kuti mwalomba inshiku shimo isha kuti mwikaya ku ncito pa kuti mukabombeko umulimo wa mwi bala mu mulungu waibela. Bamo balatantika ukubomba bupainiya bwa kwafwilisha muli uyo wine mweshi. Nga mwalipekanya kale ukuyapo kumo, nalimo kuti mwayalula inshiku pa kuti mwikafumapo muli uyo mulungu waibela.

 3. Nga tulefwaya ukukoshiwa mu mulungu wa kutandala kwa kwa kangalila wa muputule, finshi twingacita?

³ Icikalamba ico kangalila wa muputule atandalila kutukoselesha umo umo no kutukansha mu mulimo wa mwi bala. Nga mulefwaya kuti mwatantika ukubomba nankwe nangu ukubomba no umwina mwakwe nga ca kuti alyupa. Kangalila wa muputule alatemwa ukubomba na bakasabankanya abapusanapusana, ukubikako na bashabelesha nangu abalefwaya ukulashimikila bwino. Bonse kuti basambilila ku fyo ashimikila no kubomfya ukufunda konse uko engabafunda. (1 Kor. 4:16, 17) Ukumwitako ku ca kulya ku ng’anda ku mwenu na ko kukalenga mwakoseleshanya nankwe. (Heb. 13:2) Amalyashi alanda yakomaila sana pa kukabila kwa cilonganino ico alebombela. Kanshi mulekuutikisha nga nshi.

 4. Bushe kuti twakoselesha shani kangalila wesu uwa muputule?

⁴ Kangalila wa Muputule: Umutumwa Paulo tapuseneko ku babwananyina alebombela pantu na o alekwata amafya kabili kwali ifyalemusakamika. Kanshi alekabila aba kumukoselesha kabili alebatasha nga nshi. (2 Kor. 11:26-28) Ilyo icilonganino ca mu Roma caumfwile ukuti Paulo nomba alaya ku mwabo, bamo baendele amakilomita 74 ukuya ku Mushiika wa Api ku kumukumanya! Pali iyi nshita ninshi Paulo mufungwa. “Paulo, atile ashibamona fye, [atootele] na Lesa kabili alikoshiwe.” (Imil. 28:15) Na imwe kuti mwakoselesha kangalila wenu uwa muputule. Mupeeleni “umucinshi ubili” ukupitila mu kwafwilisha ukutandala kwakwe. (1 Tim. 5:17) Mwebeni ukuti mulatasha pa fyo amubombela kabili langeni ico ukupitila mu fyo mucita. Ena no mwina mwakwe bakaba ne nsansa nga balemona icitetekelo cenu, ukutemwa kwenu, no kushipikisha kwenu.—2 Tes. 1:3, 4.

 5. Mulandu nshi ifwe bonse muno nshiku tukabila ukutukoselesha?

⁵ Muli shino “nshita ishaibela ishayafya,” nani pali ifwe bonse uushikabila ukumukoselesha? (2 Tim. 3:1) Pekanyeni nomba ukulabombesha mu mulungu waibela ilyo kangalila wa muputule atandala. Ifwe bonse, bakangalila benda na bakasabankanya kumo, kuti twakoseleshanya. Nga tulecita ifyo na ifwe ‘tukalasansamushanya no kukuulana.’—1 Tes. 5:11.