Amepusho Ukufuma Ku Babelenga

Pali ifi ifikomo paliba imibele 9 iyo Abena Kristu balingile ukukwata. Patila: “Ifisabo fya mupashi kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, no kuilama.” Lelo iyi te mibele fye yeka iisuma iyo umupashi wa kwa Lesa wingatwafwa ukukwata.

Twaishiba shani? Pantu ilyo umutumwa Paulo talalanda pa fisabo fya mupashi alembele ukuti: “Imicitile ya muntu umubembu yalishibikwa bwino bwino, ni yi, ubulalelale, ukukowela, imibele ya nsoni, ukupepa utulubi, ukupupa imipashi, ukupatana, ifikansa, ubufuba, icipyu, ulubuli, ifyakaniko, amalekano, umufimbila, ukukolwakolwa, iciwowo, ne fyapala ifi.” (Gal. 5:19-21) Paulo alekeleshe na mashiwi ya kuti “ne fyapala ifi,” kanshi talumbwile “imicitile ya muntu umubembu” yonse pamo nge yaba pa Abena Kolose 3:5. Ifi fine e fyo alandile na pa numa ya kulumbula imibele iisuma 9. Atile: “Takuli ifunde nangu limo ililesha ifya musango yu.” Kanshi Paulo talumbwile imibele yonse iyo umupashi wa mushilo wingalenga twaba nayo.

Kuti twaumfwikisha ifi twalandapo nga twalinganya ifisabo fya mupashi ku fisabo fya lubuuto nelyo ifyo Paulo alandilepo muli kalata alembeele icilonganino ca mu Efese. Atile: “Ulubuuto lwena luleta fye ifisuma fyeka fyeka, no bulungami, ne cishinka.” (Efes. 5:8, 9) Kanshi ‘ubusuma,’ pamo no bulungami, e lyo ne cishinka fyaliba pa fisabo fya lubuuto. Kabili ‘ubusuma’ bwaliba na pa “fisabo fya mupashi.”

Na kabili kuti twaumfwikisha ifi nga twalinganya ifisabo fya mupashi ku mibele 6 iyo Paulo aebele Timote ukuba nayo. E kutila “ubulungami, bukapepa, icitetekelo, ukutemwa, ukushipikisha no kufuuka.” (1 Tim. 6:11) Imibele fye itatu pali iyi (icitetekelo, ukutemwa, no kufuuka) e yalumbulwa pa “fisabo fya mupashi.” Na lyo line Timote alekabila umupashi wa mushilo ukumwafwa pa kuti abe na iyi imibele iishaba pa fisabo fya mupashi. E kutila ubulungami, bukapepa no kushipikisha.—Linganyeniko Abena Kolose 3:12; 2 Petro 1:5-7.

Kanshi ilembo lya Abena Galatia 5:22, 23 talyalumbula imibele yonse iyo Abena Kristu balingile ukukwata. Umupashi wa kwa Lesa kuti watwafwa ukuba ne mibele 9 iyo balumbula pa “fisabo fya mupashi.” Lelo kwaliba imibele na imbi iyo tulingile ukuba nayo pa kuti tube abakalamba mu fya kwa Lesa, na pa kuti ‘tufwale ubuntu bupya ubwalengelwe ukulingana no kufwaya kwa kwa Lesa mu bulungami bwa cine na mu cishinka.’—Efes. 4:24.