Mwilasakamikwa Sana Kabili Muletetekela Yehova

 1. Cipusho nshi ico nalimo twingepusha ico Imfumu Davidi yaipwishe?

BONSE fye tulafwaya ukulaikala ukwabula ukusakamikwa. Takwaba umuntu uufwaya ukulasakamikwa. Nomba inshita shimo kuti twasakamikwa sana. Na kuba ababomfi ba kwa Yehova bamo kuti baipusha icipusho ico Imfumu Davidi yaipwishe Yehova. Yatile: “Kufika lilali ndi [no kusakamikwa], no kuba no bulanda mu mutima wandi ubushiku bonse?”—Amalu. 13:2.

 2. Finshi twalalandapo muli cino cipande?

² Nangu ca kuti inshita shimo bonse fye tulasakamikwa, kwaliba ifingi ifyo twingacita pa kuti twilasakamikwa sana. Muli cino cipande, twalabalilapo ukulanda pali fimo ifingalenga twasakamikwa. Lyena twalalanda pa fintu 6 ifyo twingacita pa kuti twilasakamikwa sana nga twaba na mafya.

 3. Finshi nalimo ifingalenga twasakamikwa, kabili bushe kuti twalesha ifi fintu?

³ Kwaliba ifintu ifingi ifingalenga twasakamikwa, kabili fimo pali ifi te kuti tufileshe. Ku ca kumwenako, te kuti tuleshe umutengo wa fya kulya, ifya kufwala, no mwakwikala ukulailako fye pa muulu cila mwaka; kabili te kuti tucefyeko imiku abo tubomba nabo nelyo abo tusambilila nabo bengatutunka ukukanaba ne cishinka nelyo ukucita ubulalelale. Na kabili te kuti tuleshe abantu baba mu cifulo twikala ukulacita ubunkalwe. Tulaba na ya amesho pa mulandu wa kuti twikala mu calo umo abantu abengi bashitontonkanya pa mashinte ya mafunde ya mu Baibolo. Satana lesa wa cino calo, alishiba ukuti abantu bamo bakalaleka “amasakamika ya muli cino calo” yalenga baleka ukubombela Yehova. (Mat. 13:22; 1 Yoh. 5:19) E mulandu wine mu calo mwabela amafya ayalenga abantu basakamikwa sana!

 4. Finshi nalimo twingacita nga twaba na mafya?

⁴ Limo kuti twasakamikwa sana nga twaba na mafya ica kuti twafilwa no kutontonkanyako pa fintu fimbi. Ku ca kumwenako, nalimo kuti twasakamikwa sana pa mulandu wa kuti tatwishibe uko tukafumya indalama sha kushitamo ifyo tulekabila. Nelyo kuti twasakamikwa ukuti nalimo tukalwala sana ica kuti tukalefilwa no kuya ku ncito, nangu ukuti bakatutamfya incito. Na kabili nalimo kuti twasakamikwa nga tuletontonkanya ukutila tukafilwa ukuba aba cishinka nga twatunkwa ukutoba ifunde lya kwa Lesa. Nomba line fye Satana akalenga abo atungulula ukusansa abantu ba kwa Lesa. Kanshi kuti twasakamikwa pa fyo tukacita ilyo bakatusansa. Nalimo kuti twalayipusha ukuti, ‘Bushe calibipa ukusakamikwa pali ifi fyonse twalandapo?’

 5. Ni mwi Yesu aloseshe ilyo alandile ukuti: ‘Mwilasakamikwa’?

⁵ Twalishiba ukuti Yesu aebele abasambi bakwe ati: ‘Mwilasakamikwa.’ (Mat. 6:25) Nomba bushe ifi alandile fyalepilibula ukuti tatulingile ukulasakamikwa nangu fye panono? Awe! Pantu na kuba ababomfi ba kwa Yehova bamo aba cishinka aba ku kale balesakamikwa, lelo Yehova talekele ukubatemwa.b (1 Isha. 19:4; Amalu. 6:3) Ico Yesu alefwaya kutusansamusha. Talefwaya ukuti tulesakamikwa sana pa mulandu ne fyo tukabila ica kuti twaleka no kubika amano ku kubombela Yehova. Nomba finshi twingacita pa kuti twilasakamikwa sana?—Moneni akabokoshi akaleti “Ifyo Mufwile Ukucita.”

 6. Ukulingana ne lembo lya Abena Filipi 4:6, 7, finshi fingatwafwa ukuleka ukusakamikwa sana?

⁶ (1) Mulepepa lyonse. Abena Kristu abali na mafya kuti baumfwako bwino nga bapepa kuli Yehova ukuti abafwe. (1 Pet. 5:7) Pa kwasuka amapepo yenu, Yehova kuti amupeela “umutende wa kwa Lesa uwacila amatontonkanyo yonse” aya bantunse. (Belengeni Abena Filipi 4:6, 7.) Pa kutupeela uyu umutende, Yehova abomfya umupashi wakwe uwa mushilo uwa maka.—Gal. 5:22.

 7. Finshi tufwile ukulaibukisha ilyo tulepepa kuli Lesa?

⁷ Ilyo mulepepa kuli Yehova, mulemweba fyonse ifili ku mutima. Mulemweba mu kulungatika. Mule-eba Yehova ubwafya mukwete kabili mulemulondolwela ifyo muleumfwa pali ubo ubwafya. Nga ca kuti ubwafya mukwete kuti bwapwa, mulelomba Yehova ukuti amupeele amano pa kuti mwishibe ifya kucita no kuti amupeele amaka ya kucita ifingapwisha ubo ubwafya. Nga ca kuti ubwafya mukwete te kuti bupwe, mufwile ukulomba Yehova ukuti amwafwe pa kuti mwilasakamikwa sana. Nga mule-eba Yehova mu kulungatika ilyo mulepepa kuli ena, cikalamwangukila ukumona ifyo aleasuka amapepo yenu. Nga ca kuti Yehova tamwaswike apo pene, tamufwile ukunenuka. Yehova tafwaya fye ukuti mulepepa amapepo ya mukulungatika, lelo afwaya mwatwalilila no kupepela pa co mulefwaya.—Luka 11:8-10.

 8. Finshi fimbi ifyo tufwile ukulandapo ilyo tulepepa kuli Yehova?

⁸ Ilyo mulepepa no kupoosa amasakamika yenu pali Yehova, mulemutasha no ku mutasha. Calicindama ukulatontonkanya na pa fisuma ifyo Yehova atucitila, nangu ca kuti tuli na mafya. Nga ca kuti inshita shimo cilamukosela ukusanga amashiwi ayasuma ayo mwingabomfya pa kweba Yehova ifyo muleumfwa, muleibukisha ukuti Yehova kuti aasuka ipepo lyenu nangu mwamweba fye ukuti ‘napapaata ngafweni!’—2 Imila. 18:31; Rom. 8:26.

 9. Finshi tufwile ukucita nga twaumfwa umwenso?

⁹ (2) Muleshintilila pa mano ya kwa Yehova, mwilashintilila pa mano yenu. Mu nshiku sha kwa kasesema Esaya, abaYuda baletiina ukubasansa ku bena Asiria. Pa mulandu wa kuti tabalefwaya ukubacimfya ku bena Asiria, balombele abena Egupti abashalepepa Yehova ukuti babafwe. (Esa. 30:1, 2) Yehova alibasokele ukuti ukucetekela mu bena Egupti kwali no kubaletelela. (Esa. 30:7, 12, 13) Yehova abomfeshe Esaya pa kubeba ifyo balingile ukucita pa kuti bacingililwe. Atile: “Amaka yenu yakaba mu mutende na mu kutetekela” Yehova.—Esa. 30:15b.

10. Ni muli finshi fimo umo twingalanga ukuti twalicetekela Yehova?

¹⁰ Ni lilali twingalanga ukuti twalicetekela Yehova? Tontonkanyeni pa fya kumwenako fyakonkapo. Elenganyeni ukuti mwasanga incito iisuma kabili iyo mukalafola indalama ishingi, lelo iikalamusendela sana inshita ica kuti mukalefilwa no kubombela bwino Yehova nge fyo mumubombela pali ino nshita. Nelyo tutile uo mubomba nankwe alelanga icintemwa kuli imwe, lelo te mubomfi wa kwa Lesa uwabatishiwa. Nangu tutile lupwa lwenu amweba ukuti: “Salapo pali ine na pa kupepa Yehova.” Nga mwakwata amesho ya musango uyu, tacanguka ukusala bwino ifya kucita. Lelo mu bwesho bumo na bumo, Yehova akamwafwa ukwishiba ifya kucita. (Mat. 6:33; 10:37; 1 Kor. 7:39) Nomba bushe mukacetekela Yehova no kukonka ifyo amweba ukucita?

11. Malyashi nshi aya mu Baibolo ayo twingabelenga ayengatukoselesha ilyo baletukaanya?

¹¹ (3) Mulesambililako ku batetekele Yehova na bashamutetekele. Mu Baibolo mwaliba amalyashi ayengi ayalanda pa co cacindamina ukutekanya no kutetekela Yehova. Ilyo mulebelenga aya amalyashi mulemona ica-afwile ababomfi ba kwa Lesa ukutwalilila ukuba abatekanya ilyo balebakaanya. Ku ca kumwenako, ilyo icilye cikalamba ica baYuda caleseshe abatumwa ukubila imbila nsuma, tabatiinine. Lelo balishipile. Balandile ukuti: “Tufwile ukunakila Lesa ukucila ukunakila abantu.” (Imil. 5:29) Na lintu babafopawile ifikoti, abatumwa balitwalilile ukuba abashipa. Cinshi calengele? Ni co balishibe ukuti Yehova alebafwa. Alitemenwe ifyo basalilepo ukucita. E co balitwalilile ukubila imbila nsuma. (Imil. 5:40-42) Ifi fine e fyo cali na ku musambi Stefani. Ilyo bali pa kumwipaya tasakamikwe sana, kabili icinso cakwe calemoneka “nge ca kwa malaika.” (Imil. 6:12-15) Cinshi calengele esakamikwa? Ni co alishibe ukuti ifyo alecita fyalesekesha Yehova.

12. Nga fintu Baibolo ilanda pali 1 Petro 3:14 na 4:14, finshi fingalenga twaba ne nsansa ilyo baletucusha?

¹² Abatumwa balishininkishe ukuti Yehova alebafwa. Alibapeele amaka ya kucita ifipesha amano. (Imil. 5:12-16; 6:8) Muno nshiku Yehova tatupeela amaka ya kucita ifipesha amano. Na lyo line, Yehova alitweba mu Cebo cakwe ukuti nga twacula pa mulandu wa kuba abalungami, alatemwa kabili alatupeela umupashi wakwe. (Belengeni 1 Petro 3:14; 4:14.) Kanshi mu cifulo ca kulatontonkanya sana pa fyo nalimo tukacita nga balatucusha ku ntanshi, tulingile ukubika sana amano ku kucita ifingalenga twacetekela ukuti Yehova akalatwafwa kabili akatupususha. Nga filya abasambi bakubalilapo bacitile, tufwile ukucetekela ifyo Yesu alaile ukuti: “Nkamupeela amashiwi ya kulanda e lyo na mano, ayo bonse abalemulwisha tabakabe na maka ya kukaanya nelyo ukucincintila.” Yesu atulaile no kuti: “Nga mwashipikisha e lyo mukaba aba mweo.” (Luka 21:12-19) Na kabili mwilalaba ukuti Yehova alebukisha fyonse pa babomfi bakwe abafwa aba cishinka kuli ena. Ici cikalenga ukuti akese babuusha.

13. Busuma nshi bwaba mu kubelenga amalyashi ya bantu abashatekenye kabili abashatetekele Yehova?

¹³ Kuti twasambililako na ku malyashi ya bantu abafililwe ukutekanya no kutetekela Yehova. Ukubelenga aya malyashi kuti kwalenga twaishiba ifilubo bacitile ifyo tushilingile ukucita. Ku ca kumwenako, ilyo Imfumu Asa iya baYuda yatendeke fye ukuteka, yalicetekele sana Yehova ilyo ibumba ilikalamba ilya bashilika lyaishile mu kubasansa, kabili Yehova alibafwile ukucimfya abalwani babo. (2 Imila. 14:9-12) Pa numa, ilyo ibumba lya bashilika ilinono ilya Mfumu Baasha iya bena Israele lyaishile mu kubasansa, Asa alipiile abena Siria ukuti bamwafwe mu cifulo ca kucetekela Yehova nga fintu acitile mu kubalilapo. (2 Imila. 16:1-3) Na lintu Asa alwele sana, tacetekele Yehova ukuti amwafwe.—2 Imila. 16:12.

14. Finshi twingasambilila ku fyo Asa alufyenye?

¹⁴ Ilyo Asa atendeke fye ukuteka, aleshintilila sana pali Yehova nga aba na mafya. Lelo pa numa alilekele ukulomba Lesa ukuti alemwafwa. Alefwaya ukulapwisha amafya ku maka yakwe. Filya Asa alombele abena Siria ukuti bamwafwe ukulwisha abena Israele, pa kubalilapo fyamoneke kwati fyalibombele bwino. Lelo ifyo acitile fyamwafwile fye pa nshita inono. Yehova abomfeshe kasesema ukumweba ukuti: “Apo washintilile pa mfumu ya bena Siria kabili tawashintilile pali Yehova Lesa obe, pali uyu mulandu amabumba ya bashilika aya mfumu ya ku Siria nayafulumuka mu minwe yobe.” (2 Imila. 16:7) Tufwile ukucenjela pa kuti tatuicetekele sana no kulamona kwati kuti twapwisha amafya ku maka yesu ica kuti twaleka no kulakonka ifyo Yehova atweba mu Cebo cakwe. Na lintu kwacitika ifilekabila ukuti tupingulepo mu kampampa, tulingile ukutekanya no kushintilila pali Yehova, kabili akatwafwa ukusala bwino ifya kucita.

15. Finshi nalimo twingacita ilyo tulebelenga Baibolo?

¹⁵ (4) Mulesungilako ifikomo fimo ifya mu Baibolo. Ilyo mulebelenga Baibolo, nga mwasanga ifikomo fimo ifilelanga umulandu cacindamina ukutekanya no kutetekela Yehova, mule-esha na maka ukufisungila. Pa kuti musungile ifi fikomo nalimo kuti mulefibelengamo mu kupongomoka, nelyo kuti mwafilembako pamo no kulapitamo libili libili. Yehova aebele Yoshua ukuti lyonse alebelenga ibuuku lya Mafunde no kulatontonkanyapo sana pa kuti abe na mano. Ifyo alebelenga mwi buuku lya Mafunde fyali no kumwafwa ukukanaba no mwenso ilyo aletungulula abantu ba kwa Lesa. (Yosh. 1:8, 9) Amashiwi ayengi ayaba mu Cebo ca kwa Lesa kuti yalenga mwateka umutima nga mwakwata amafya ayengalenga mwasakamikwa sana nelyo mwaumfwa umwenso.—Amalu. 27:1-3; Amapi. 3:25, 26.

16. Bushe Yehova abomfya shani aba mu cilonganino ukutwafwa ukuteka imitima no kumutetekela?

¹⁶ (5) Muleba pamo na bantu ba kwa Lesa. Yehova alabomfya bamunyinefwe na bankashi pa kulenga twateka imitima no kumutetekela. Ilyo tuli pa kulongana, tulanonkelamo mu malyashi bamunyinefwe balanda, mu masuko ayo aba bwananyina basuka, e lyo na mu fyo tulanshanya na bamunyinefwe na bankashi ilyo ukulongana kushilatendeka na lintu kwapwa. (Heb. 10:24, 25) Na kabili kuti twakoseleshiwa sana nga twaebako bamunyinefwe na bankashi abo twacetekela ifyo tuleumfwa. “Amashiwi ayasuma” ayo cibusa wesu engatweba, kuti yalenga twaleka ukulasakamikwa sana.—Amapi. 12:25.

17. Nga fintu Baibolo ilanda pa AbaHebere 6:19, bushe isubilo kuti lyalenga shani twaba abakosa na lintu twaba na mafya?

¹⁷ (6) Mulekosha isubilo lyenu. Isubilo lyesu “lyaba nge nanga ya mweo,” iilenga twatwalilila ukuba abakosa te mulandu na mafya nelyo amasakamika ayo twingakwata. (Belengeni AbaHebere 6:19.) Muletontonkanya pa fisuma ifyo Yehova atulaya ukutucitila ku ntanshi. Pali ilya nshita takwakabe ifikalatusakamika. (Esa. 65:17) Mule-elenganya ukuti muli mu calo cipya umukaba umutende, umushakabe ifyabipa nangu fimo. (Mika 4:4) Na kabili isubilo lyenu likakoselako nga mule-ebako abantu pa calo cipya. Mule-esha na maka ukulabombako umulimo wa kushimikila no kulenga abantu baba abasambi. Nga mulecita ifi, ‘mukacetekela sana isubilo ukufika na ku mpela.’—Heb. 6:11.

18. Mafya nshi twingenekela ukukwata ku ntanshi, kabili finshi tufwile ukucita pa kuyashipikisha?

¹⁸ Apo tuli ku mpela ya nshiku sha kulekelesha, tukalaba na mafya ayengi ayengalenga twasakamikwa. Ilembo lya mwaka wa 2021 kuti lyatwafwa ukushipikisha aya amafya no kukanalasakamikwa sana. Kabili kuti lyatwafwa no kukanalaicetekela, lelo ukutetekela Yehova. Kanshi mu mwaka wa 2021, lekeni tukalecita ifilanga ukuti twalicetekela amashiwi Yehova atulaya aya kuti: “Amaka yenu yakaba mu mutende na mu kutetekela.”—Esa. 30:15.