Muletiina Sana Lesa nga Filya Obadia Alemutiina

Obadia e waleangalila ing’anda ya Mfumu Ahabu iyalecita ifyabipa kabili iyalengele abantu mu Israele balapepa sana Baali. Lelo Obadia aletiina Yehova ukufuma ku bwaice bwakwe. (1 Isha. 18:​1-13) E ico ilyo Namfumu Yesebele alandile ukuti bepaye bakasesema ba kwa Yehova bonse, Obadia alishipile kabili alicitilepo cimo pa kuti abapusushe. Calikosele ukufisa nangu fye ni kasesema umo; nomba Obadia afishile bakasesema 100 kabili alebapeela ifya kulya ninshi mu calo mwali icipowe icikalamba! Elenganyeni ifyo calekosela Obadia ukucita ifi ukwabula ukuti bakasesema ba bufi abengi abalebombela imfumu na namfumu bamumone.—1 Isha. 18:19.

Finshi twingasambililako kuli Obadia? Nangu ca kuti Obadia aletiina Ahabu, uo aletiina sana ni Lesa. Ifyo aletiina Lesa fyalengele abe uwashipa kabili aibike mu kapoosa mweo pa kuti acingilile bakasesema. Nga ca kuti uko twikala balibinda ukupepa kwa cine, na ifwe bene tufwile ukulatiina Lesa. Nga tuletiina Lesa, tukakwata amaka ya kwafwa bamunyinefwe na bankashi abakwete amafya.