“Twalilileni Ukucindika Ababa Ifi”

UKUTULA mu 1992, Ibumba Litungulula lyalisala baeluda abafikapo ukulayafwako amakomiti ye Bumba Litungulula imilimo.a (Moneni utumashiwi utuli pe samba.) Aba bamunyinefwe aba mu “mpaanga shimbi” balafwa sana Ibumba Litungulula. (Yohane 10:16) E lyo na ku kukumana uko komiti iyo bafwilishako ikwata cila mulungu balabako. Nga baya kuli uku kukumana, umulimo wabo wa kweba aba mwi Bumba Litungulula ababa muli iyo komiti ifyebo fyonse ifyo beshibe pa lyashi balelanshanyapo e lyo ne fyo baletontonkanya. Lelo kwena, aba mwi Bumba Litungulula aba muli iyo komiti, e basalapo ifya kucita, lyena aba bamunyinefwe abafwilisha iyo komiti ye Bumba Litungulula, balashininkisha ukuti ifyo aba mwi Bumba Litungulula balandile fyakonkwa. Aba bamunyinefwe balaipeelesha ukubomba imilimo yonse iyo babapeela. Balaya na ba mwi Bumba Litungulula ku mabungano ya citungu ayaibela e lyo na ku mabungano ayasangwako abantu abafuma mu fyalo ifyalekanalekana. Na kabili, limo balabatuma ku maofeshi ya misambo ukuyaimininako amaofeshi yakalamba.

Munyinefwe umo uwabomba umulimo wa kwafwilisha ukutula mu 1992 atile, “Nga ndebomba imilimo iyo bampeela, aba mwi Bumba Litungulula balakwata inshita iikalamba iya kupekanya ifya kulya fya ku mupashi.” Munyinefwe umbi nao uwabomba bukaafwa pa myaka 20 atile, “Ala uyu mulimo usuma ukucila na pa fyo naleenekela.”

Ibumba Litungulula lyalipeela aba bamunyinefwe imilimo iingi kabili lilatasha sana pa fyo babombesha. E ico ifwe bonse ‘natutwalilile ukulacindika ababa ifi.’—Abena Filipi 2:29.