Mulandu Nshi Inte Sha Kwa Yehova Basalilapo Ukukanaibimba mu Kusefya kwa Kulumbilisha Icalo Bekalamo?

Inte sha kwa Yehova balacindika amabuteko e lyo ne fishibilo ifimininako icalo bekalamo. Twalishiba ukuti bamo kuti basalapo ukulapa ukuti bakulatungilila fye icalo babamo, ukwimba ulwimbo lwa cishipa nelyo ukupika salute kuli flagi.

Na lyo line, fwe Nte sha kwa Yehova twasalapo ukukanaibimba muli fyonse ifingalanga ukuti tulelumbilisha icalo twikalamo pantu twalishiba ukuti ifi te fyo Baibo isambilisha. Tulatemwa sana na ifwe abantu nga balecindika ifyo twasuminamo nga filya fine twabacindika te mulandu ne fyo basalapo ukucita.

Ifili muli cino cipande

• Mashinte nshi aya mu Baibo ayalandapo pali ili lyashi?

• Tucita shani nga kwaliba ifunde mu calo ilya kuti bonse balingile fye ukusefyako?

• Bushe Inte sha kwa Yehova baliba ku lubali ululi lonse ulwa fikansa fya calo?

Amashinte ya mu Baibo yabili ayakonkapo yalatwafwa ukusalapo bwino:

• Lesa eka e o tufwile fye ukulapepa. Baibo itila: “Yehova Lesa obe e o ulepepa, kabili eka fye e o ulebombela.” (Luka 4:8) Umuntu nga alapa ukuti akulatungilila fye icalo abamo nelyo aleimba ulwimbo lwa cishipa ninshi alelaya ukuti akulatungilila no kutemwa ico calo ukucila icintu icili conse. E calenga Inte sha kwa Yehova balemona ukuti tacawama ukulaibimba mu kusefya kwa musango uyu.

  Na kabili Inte sha kwa Yehova bamona ukuti ukupika salyuti kuli flagi cimo no kupepa akalubi, icintu ico Baibo yakaanya. (1 Abena Korinti 10:14) Abasambilila amalyashi ya kale bamo batila amaflagi ya calo yemininako ifishibilo fya mipepele. Ba Carlton J. H. Hayes,a abasambilila sana amalyashi ya kale balembele ukuti: “Ukutemwisha icalo umuntu abamo kwaba kwati mipepele e lyo ico babomfya pa kupepa ni flagi.” Ba kalemba we lyashi ba Daniel P. Mannix balandile pa Bena Kristu baliko mu nshiku sha batumwa ukuti: “Abena Kristu balekaana . . . ukutuula amalambo ku mupashi uwalelinda kateka [umwina Roma] kabili muno nshiku ifyo kuti twafilinganya ku kukaana ukupika salyuti kuli flagi.”b

  Nangu ca kuti fwe Nte sha kwa Yehova tatupika salyuti kuli flagi, tatuyonaula nelyo ukuyoca kabili tatulanga ukuti tatwaicindika nelyo ukukanacindika ifishibilo fimbi ifya calo.

• Abantu bonse baba fye cimo cine kuli Lesa. (Imilimo 10:34, 35) Baibo itila “mu muntu umo e mo [Lesa] alengeele inko shonse isha bantunse.” (Imilimo 17:26) Ici e calenga Inte sha kwa Yehova bamone ukuti te kuti ciwame ukucindikishapo ibumba limo ilya bantu nelyo icalo cimo no kusula cimbi. Twalicindika abantu bonse te mulandu no ko bafuma nelyo uko bekala.—1 Petro 2:17.

Inte sha kwa Yehova tabalwisha ubuteko. Twalishiba ukuti amabuteko yaba “kupekanya kwa kwa Lesa” no kuti e wayasuminisha ukuti yabeko. (Abena Roma 13:1-7) Kabili twalishiba no kuti Abena Kristu bafwile ukulaumfwila abalashi ba buteko.—Luka 20:25.

Nomba kuti twacita shani nga ca kuti amafunde ya buteko yapusana na mafunde ya kwa Lesa? Inshita shimo, kuti twalembela ku buteko no kulomba ukuti bwaluleko amafunde.c Nga ca kuti ubuteko tabwalwile amafunde, Inte sha kwa Yehova mucinshi mucinshi balasalapo “ukunakila Lesa ukucila ukunakila abantu.”—Imilimo 5:29.

Awe. Inte sha kwa Yehova tabatungilila ifikansa fya calo kabili tabaibimba mu fya calo. Nga tulekaana ukulapa ukuti twakulatungilila fye icalo twabamo, ukupika salyuti kuli flagi nelyo ukwimba ulwimbo lwa cishipa tacipilibula ukuti ninshi twaliba mu kabungwe kamo akafwaya ukwalula ifintu. Lelo ninshi tulekonka fye ifyo Baibo ilanda pali uku kusefya.