Bushe ni kwi Inte sha kwa Yehova Bafumya Indalama babomfya mu Mulimo Wabo?

Umulimo wesu uwa mwi sonde lyonse utungililwa ne ndalama isho Inte sha kwa Yehova basangula mu kuitemenwa.a Apo tulonganina palaba utubokoshi twa kubikamo imisangulo, kabili kuti mwasanga inshila na shimbi isho mwingabomfya pa kusangwilako ishaba pa jw.org (moneni apatila: Imisangulo). Paliba inshila ishalekanalekana isho twingabomfya nga tulefwaya ukusangwilako ku mulimo wa mwi sonde lyonse, ku cilonganino, nelyo konse kubili.

Inte sha kwa Yehova tabatuula ica pe kumi kabili tabemika icipendo ca ndalama ico cila muntu afwile ukusangwilako. (2 Abena Korinti 9:7) Tatupishamo imbale ya mutuulo kabili tatulipilisha abesa mu kulongana na ifwe. Na kabili abatungulula mu cilonganino tabalipilisha abantu pa kubabatisha, pa kubafwilisha pa fililo, pa menga, nelyo pa kulongana ukuli konse. Tatuya mu kubombela indalama nge cilonganino pamo ngo kuya mu kubomba mu mabala ya bantu, kabili tatuya mu kulombelesha indalama nelyo ukupatikisha abantu ukusangula. Tatusabankanya amashina ne fyebo pa basangwilako indalama ku mulimo wesu. (Mateo 6:2-4) Tatusuminisha abantu ukusabankanya amakwebo yabo pa webusaiti yesu na mu mpapulo shesu.

Kulaba ukubelenga lipoti ya ndalama cila mweshi mu filonganino fyonse ifya Nte sha kwa Yehova pa kulongana uko uuli onse engasangwako. Ifyalembwa fya ndalama ifya cilonganino cimo na cimo balafipitulukamo lyonse pa kuti bashininkishe ukuti indalama abantu basangula shilabomba ukulingana ne fyo shifwile ukubomba.—2 Abena Korinti 8:20, 21.

• Utubokoshi twa misangulo: Kuti mwabika indalama nelyo ama cheki mu tubokoshi twa misangulo utuba mu Mayanda ya Bufumu, pa Fikuulwa fya Kulonganinamo Ukulongana Kukalamba, nelyo pa fifulo fimbi apo tulonganina.

• Ukusangwilako ukubomfya Intaneti: Mu fyalo ifingi, nga mwaya pa webusaiti yesu apatila “Sangwileni ku Nte sha kwa Yehova,” kuti mwasangwilako ukubomfya kardi mukongwelapo ifintu nelyo kardi ya ku banki, bank transfer e lyo ne nshila shimbi isha kusangwilamo ukubomfya Intaneti.b Ba Nte bamo ‘balapaatulapo fimo’ cila mweshi pantu balibika icipendo ico basangwilako cila mweshi ukubomfya inshila imo pali ishi.—1 Abena Korinti 16:2.

  

• Ubupe Mufwaya Ukupa: Limo kuti mwatantikila limo ifyo mulefwaya ukusangwilako. Ukutantikila libela kuti kwamwafwa ukukanalipila imisonko iingi mu calo cenu. Ukwishiba ifyebo pa fya bupe fyalekanalekana kwalyafwa abantu abengi ukwishiba ifya bupe bengapeela ilyo bali aba mweo nelyo ifya cishale ifyo bengapeela pa numa ya mfwa yabo. Nga mulefwaya ukupeela ubupe ukubomfya inshila shakonkapo, mukwai ipusheniko iofeshi lya musambo:

  • akaunti ya ku bank

  • Inshuwalansi

  • Impanga ne Fikuulwa

  • Nsonsela

  • Ifya Cishale no Kuseekesha

Nga mulefwaya ukwishibilapo na fimbi pa nshila mwingapelelalamo ubupe ishaba uko mwikala, moneni icipande citila “Sangwileni ku Nte sha kwa Yehova.”