“Finshi Twingeshibilako Inshiku sha Kulekelesha, Nelyo ‘Inshita ya Mpela’?”

Baibolo yalilondolola ifikalacitika, ifyo ifintu fikaba, ne mibele abantu bali no kukwata ifikalanga ukuti “icalo cili ku mpela,” nelyo “icalo calapwa.” (Mateo 24:3; Baibolo ya Ishiwi Lyakwa Lesa) Baibolo ita iyi inshita ukuti “inshiku sha kulekelesha” no kuti ni “inshita ya ku mpela,” nelyo “inshiku shakupelekeshako.”—2 Timote 3:1; Daniele 8:19; Baibolo ya Ishiwi Lyakwa Lesa.

Baibolo yalisobela ifintu ifingi ifyali no kuba mu “icishibilo” ca nshiku sha kulekelesha. (Luka 21:7) Moneni amasesemo yakonkapo:

Inkondo mwi sonde lyonse. Yesu asobele ukuti: “Uluko lukemina uluko lubiye no buteko bukemina ubuteko bubiye.” (Mateo 24:7) Ifi fine e fyo ne lembo lya Ukusokolola 6:4 lyasobele, lyalanda pa mwaume uwa mampalanya uwanina pali kabalwe uwimininako inkondo ishali no “kufumya umutende pe sonde.”

Ifipowe. Yesu asobele ukuti: “Kukaba ifipowe.” (Mateo 24:7) Ibuuku lya Ukusokolola lyasobele pa mwaume wa mampalanya na umbi uwanina pali kabalwe uwalelenga mu calo mwaba ifipowe.—Ukusokolola 6:5, 6.

Ifinkukuma ifikalamba. Yesu alandile ukuti kukaba “ifinkukuma mu ncende shimo shimo.” (Mateo 24:7; Luka 21:11) Ifi finkukuma fili no kulenga abantu balacula kabili fyali no kwipaya abantu abengi nga nshi.

Amalwele. Yesu asobele ukuti kwali no kuba “ifikuko.”—Luka 21:11.

Bumpulamafunde. Nangu ca kuti bumpulamafunde ukutula na kale eko bwali, Yesu alisobele ukuti mu nshiku sha kulekelesha kuba “ukufulisha kwa bubi.”—Mateo 24:12.

Ukonaula isonde. Ukusokolola 11:18 kwasobele ukuti abantu ‘bakalaonaula isonde.’ Abantu bali no konaula isonde mu nshila ishalekanalekana, bali no kulacita ubunkalwe na mafisakanwa kabili bali no konaula ne ncende nelyo impanga.

Imibele iyabipa. Pali 2 Timote 3:1-4 Baibolo yasobele ukuti abantu bakaba “abashitasha, abashaba na cishinka, . . . abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba.” Iyi imibele ikalamoneka sana mu bantu ica kuti i-inshita ikalaitwa ukuti “inshita ishayafya nga nshi.”

Indupwa ukupatukana. Pali 2 Timote 3:2, 3 Baibolo yasobele ukuti abantu bakaba “abashatemwa” indupwa shabo “abashumfwila abafyashi babo.”

Abantu ukukanatemwa Lesa. Yesu asobele ukuti: “Ukutemwa kwa bengi kukacepa.” (Mateo 24:12) Yese alepilibula ukuti abantu abengi bakaleka ukutemwa Lesa. Ifi fine e fyo na 2 Timote 3:4 ilanda ukuti, mu nshiku sha kulekelesha abantu ba musango uyu bakaba “abatemwa ukwangala ukucila ukutemwa Lesa.”

Ubumbimunda ya mipepele. Pali 2 Timote 3:5 Baibolo yasobele ukuti abantu bakalaitunga ukuti balepepa Lesa lelo tabakalekonka amafunde yakwe.

Abantu ukwishibilako amasesemo ya mu Baibolo. Ibuuku lya kwa Daniele lyasobele ukuti, “ku nshita ya ku mpela,” abantu abengi bali no kwishiba sana icine ca mu Baibolo, ukubikako fye na ya masesemo.—Daniele 12:4.

Ukubila imbila nsuma mwi sonde lyonse. Yesu asobele ukuti: “Ne mbila nsuma iyi iya bufumu ikabilwa ku bantu bonse aba pe sonde.”—Mateo 24:14.

Abantu abengi bakakaana ukukutika imbila nsuma kabili bakalapumya abalebila. Yesu asobele ukuti abantu tabakabike amano ku bushininkisho ubulanga ukuti impela naipalama. (Mateo 24:37-39) Ilembo lya kwa 2 Petro 3:3, 4 na lyo lyasobele ukuti abantu bamo bakalapumya no kukaninina fye ukusumina ukuti tuleikala mu nshiku shakulekelesha.

Amasesemo yonse yalifikilishiwa. Yesu alandile ukuti amasesemo yonse aya nga yafikilishiwa mukeshibe ukuti tuli mu nshiku sha kulekelesha, talandile ukuti nga mwamona yamo nelyo ayengi yafikilishiwa.—Mateo 24:33.

Ee. Ifyo ifintu fyaba mu calo ukubikako fye ne fyo tupenda inshita ukulingana ne fyo Baibolo ilanda, fyonse filanga ukuti inshiku sha kulekelesha shatendeke mu 1914, ilyo Inkondo ya Calo iya Kubalilapo yatendeke. Pa kuti mumone ifyo ifilecitika mu calo filelangila ukuti tuleikala mu nshiku sha kulekelesha, tambeni iyi vidio:

Mu 1914, Ubufumu bwa kwa Lesa bwalitendeke ukuteka ku muulu, kabili bwabalilepo ukutamfya Satana ne fibanda fyakwe ku muulu no kubasuminisha fye ukucita ifintu pe sonde epela. (Ukusokolola 12:7-12) Imibele abantu bakwata e lyo ne fyo bacita ifyabipa filanga fye kuti ni Satana e ubatungulula kabili ici calilenga inshiku sha kulekelesha ukuba “inshita ishayafya nga nshi.”—2 Timote 3:1.

Abantu abengi balasakamikwa sana pa mulandu wa ishi inshita ishayafya. Balasakamana pantu abantu tabeshibe ifya kwikala na bantu banabo. Bamo balasakamana no kuti abantu bali no kulofya abantu banabo.

Nomba abantu bambi abasakamikwa pa mulandu ne filecitika mu calo bena balikwata isubilo. Balishininkisha ukuti Ubufumu bwa kwa Lesa nomba line buli no kucitapo cimo pa kuti bukafumyepo amafya yonse pano isonde. (Daniele 2:44; Ukusokolola 21:3, 4) Baliba abatekanya ilyo balelolela ukuti Lesa akafikilisha ifyo alaya, kabili amashiwi Yesu alandile yalabasansamusha aya kuti: “Uwashipikisha ukufika na ku mpela, e ukapusuka”—Mateo 24:13; Mika 7:7.