Abena Roma 12:2—“Amano Yenu Ayapya Yamwalule”

“Mwipalana no bwikashi buno, lelo mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.”—Abena Roma 12:2, Amalembo ya Calo Cipya.

“Mwilapashanya imisango ya bapanonse; nomba amano yenu ayapya yamwalule, e pakuti muleshininkisha ifyo Lesa atemwa; mwishibe ne fyawama, ifyatemwikwa kabili, ifyapwililika.”—Roma 12:2, Amashiwi ya kwa Lesa Bible, Diocese of Mbala.

Abantu abafwaya ukucita ifilenga Lesa alasekelela tabalingile ukukonkelela ifyabipa ifyo bambi bacita kabili balingile no kwalula imibele yabo. Lesa tapatikisha abantu ukwaluka; abantu abene balaitemenwa ukwaluka pantu balimutemwa kabili balishiba ukuti ifyo afwaya balecita fisuma. Na kuba kuti bakumanisha ukufita. Na kabili balishiba ukuti kuti fyalenga baba ne nsansa.—Esaya 48:17.

“Mwipalana no bwikashi buno.” Amashiwi ya kuti buno bwikashi, yalosha ku bantu baba muli cino calo, kanshi ifyo abantu muli cino calo bacita, ifyo bakonka tafilanga ukuti balicindika ifyo Lesa afwaya balecita nelyo baletontonkanyapo. (1 Yohane 2:15-17) Abantu ba muli cino calo balacita ifilenga bambi bayaluka mu fyo batontonkanya, ifyo bacindika, ifyo bacita ne fyo baba. Nomba pa kuti umuntu alepepa Lesa ukulingana ne fyo afwaya, alingile ukulwisha pa kuti talekonkelela ifyo abantu mu calo bacita, pantu nga tacitile ifyo kuti akwata imibele iibi iingalenga aba na mafya kabili acita ne fya kukalifya Lesa.—Abena Efese 2:1-3; 4:17-19.

“Mupilibuke pa kwalula amatontonkanyo yenu.” Umuntu alingile ukwesha na maka ukwaluka mu fyo amona ifintu ne fyo omfwa pa fintu. Kuti twamona ukuti uku kwaluka kukalamba sana pantu ishiwi lya ciGriki ilyo bapilibula ukuti “mupilibuke” kuti lyalosha na ku kwaluka nga filya icishimu calukila mu cipelebesha. Bonse abapepa Lesa balingile ukufwala “ubuntu bupya.”—Abena Efese 4:23, 24; Abena Kolose 3:9, 10.

“Mushininkishe mwe bene ico Lesa afwaya, icisuma, icapokelelwa kabili icapwililika.” Lesa afwaya aba mupepa baleshininkisha ukuti ifyo basuminamo e cine. Icingabafwa ukushininkisha, kulasambilila sana Icebo ca kwa Lesa, ukulacita ifyo cilanda no kumona ubusuma bwaba mu kukonka amafunde ya kwa Lesa. Kanshi nga balecita ifi bakashininwa ukuti nga balecita ifintu ukulingana ne fyo Lesa alanda bakanonkelamo.—Amalumbo 34:8.

Icipandwa 12 ica Abena Roma cilondolola ifyaba mu kupepa Lesa mu nshila afwaya. Ukupepa Lesa mu nshila afwaya, kulakuma fyonse ifyo umuntu acita, kabili alingile ukubomfya “maka [yakwe] aya kupelulula” mu cifulo ca kulacita fye fintu ukulingana ne fyo aleumfwa. (Abena Roma 12:1, 3) Muli ici cipandwa mwaliba no kufunda ukulanda pa fyo twingaba ne mibele iyo Lesa afwaya, ifyo twingalaumfwana na bambi, e lyo ne fyo tulingile ukucita nga batukalifya.—Abena Roma 12:9-21.