Ukuipekanishisha ku Cupo Catunguluka

1, 2. (a) Ni shani fintu Yesu akomaile pa kucindama kwa kupekanya? (b) Ni muli cinshi maka maka umo ukupekanya kwaba ukwakatama?

UKUKUULA icikuulwa cifwaya ukupekanya kwasakamanisha. Ilyo umufula taulaimbwa, impanga ya kukuulapo ifwile ukusangwa na maplani ukushilwa. Nangu cibe fyo, kwalibako na cimbi icakatama. Yesu atile: “N’ ani pali imwe, uutila pa kufwayo kukuulo lupungu, tabala ekala alinge shingapooswapo, amone nga akwete isha kulupwishisha?”—Luka 14:28.

² Ifyo ciba pa kukuula icikuulwa e fyo na kabili caba na mu kukuula icupo catunguluka. Abengi batila: “Ndefwaya uwa kuupana nankwe.” Lelo bushe ni banga abatala baikala pa nshi no kulanguluka icikabimbwamo? Ilintu Baibolo ilalanda bwino pa lwa cupo, na kabili ilalolekesha pa mafya yantu icupo ciletako. (Amapinda 18:22; 1 Abena Korinti 7:28) Kanshi, abo baletontonkanya pa cupo balekabila ukwishibe cine pa lwa fyonse fibili amapaalo e lyo ne fyabimbwa mu kwingila mu cupo.

 3. Mulandu nshi Baibolo yabela ica kwaafwa cacindama kuli abo balepekanishisha icupo, kabili fipusho nshi fitatu ili no kutwaafwa ukwasuka?

³ Baibolo kuti yaafwilisha. Ukufunda kwa iko kwalipuutwamo na Katendeka wa cupo, Yehova Lesa. (Abena Efese 3:14, 15; 2 Timote 3:16) Ukubomfya ifishinte ifisangwa muli ici citabo ca kutungulula icakokwesha lelo icendela pamo ne nshita, natumone (1) Ni shani fintu umuntu engeshiba nampo nga naipekanya ukuupa nelyo ukuupwa? (2) Cinshi umuntu alingile ukufwaya mu munankwe? kabili (3) Ni shani fintu ukwishisha kwingasungwa ukwa mucinshi?

 4. Cinshi cakatama sana icifwaikwa ku kusungilila icupo catunguluka, kabili mulandu nshi?

⁴ Ukukuula icikuulwa kuti kwafwaye ndalame shingi, lelo ukucisakamana kwa pa nshita yalepa na ko kwine kuti kwaba ukwa mutengo. E fyo caba na ku cupo. Ukuupana kweka kweka kumoneka ukuletako ukushomboka ukwalinga fye; nangu cibe fyo, ukusungilila ukwampana kwa mu cupo umwaka no mwaka na ko kufwile ukulangulukwapo. Cinshi cintu ukusungilila ukwampana kwa musango yo kusanshamo? Icakatama sana caba kukakililwako kwa mutima onse. Ifi e fyo Baibolo ilondolola ukwampana kwa mu cupo itila: “Umwaume [akaleka] wishi na nyina, alambatila na ku mukashi wakwe, na bo babo mubili umo.” (Ukutendeka 2:24) Yesu Kristu apeele icishinte ca mu Malembo cimo fye ica kulekaninapo mu kuba no kucitikako kwa kuupa nelyo ukuupwa cipya cipya, ne co caba “bulalelale,” uko e kuti, ukwampana kwa bwamba ukwa ku nse ya cupo. (Mateo 19:9) Nga uletontonkanya pa lwa kwingila mu cupo, uleibukisha ifi fipimo fya mu Malembo. Nga ca kuti tauipekenye ukupokelela uku kukakililwako kwafina, ninshi tauli uwaipekanya ku kwingila mu cupo.—Amalango 23:21; Lukala Milandu 5:4, 5.

 5. Nangu cingatila ukukakililwako kwafina ukwaba mu cupo bamo kulabatiinya, mulandu nshi mu cifulo ca ico kulingile ukumwenwa ngo kwakatama kuli abo balefwaya ukwingila mu cupo?

⁵ Ukutontonkanya ulwa kukakililwako kwafina kulatiinya abengi. Umulumendo umo alisumine ati: “Ukwishibo kuti ifwe babili tuli no kuba pamo mpaka fye ne mfwa kwalenenga ukuyumfwa uwakakwa, uwaisalilwa, uwashinshibikwa umupwilapo.” Lelo nga ca kuti cine cine fye walitemwa umuntu muli no kuba nankwe mu cupo, ukukakililwako takwakamoneke kwati cisendo. Mu cifulo ca kuba nge cisendo, kukaba nge ntulo ya mutelelwe. Ukuyumfwa ukukakililwako ukumfwika mu cupo kukalenga abaupana ukufwaya ukwikala pamo ilyo balepita mu nshita ishisuma ne shabipa no kulaafwana te mulandu ne cingesa. Umutumwa wa Bwina Kristu Paulo alembele ukuti ukutemwa kwa cine “kushipikisha fyonse” kabili “kushishimisha fyonse.” (1 Abena Korinti 13:4, 7) Umwanakashi umo atila: “Ukukakililwako ukwaba mu cupo kunenga ukuyumfwa uwacingililwa. Ndeyumfwa uwasansamushiwa pa kuti twaliilangishe ku cintubwingi ukuti tulefwaya ukwikalilila pamo.”—Lukala Milandu 4:9-12.

 6. Mulandu nshi cabele cawamisha ukukaanakwankwanya ukwingila mu cupo pa mushinku wacaice?

⁶ Ukwikatilila kuli uko kukakililwako cifwaya ukukosoka. E co, Paulo afunda ukuti Abena Kristu kuti cawama ukukanaupa ukufikila lintu “bacila pa kutemfuma kwa bwaice,” ilya nshita lintu ukubimbuka kwa bwaume no bwanakashi fibe fyaluma sana kabili kuti kwanyonganya umucetekanya wa muntu. (1 Abena Korinti 7:36, NW) Abacaice balaaluka bwangu bwangu ilyo balekula. Abengi abengila mu cupo lintu bali abaice sana basango kuti pa numa fye ya myaka inono, ifyo bakabila na fintu bafwaya, pamo pene na fintu abanabo ba mu cupo bakabila no kufwaya, fyonse nafyaluka. Ifipendo fisokololo kuti abapungwe abengila mu cupo cilamonekesha sana ukuti tabakabe ne nsansa kabili balafwaya ukulekana ukucila pali abo abalolelako panono. E co wikwankwanya ukwingila mu cupo. Imyaka imo iipooswa ukwikala ngo mukalambako umushimbe, kuti yakupeela ukubelesha kwawamisha ukukakulenga ukuba uwacilapo ukukosoka kabili uwacilapo kuipangasha ku kuba umunankwe wa mu cupo uwalinga. Ukulolelako ilyo ushilaingila mu cupo kuti na kabili kwakwaafwa ukuishiba we mwine bwino—icaba icifwaikwa pa kulundulula ukwampana kwatunguluka mu cupo cenu.

 7. Mulandu nshi abo balepanga ukwingila mu cupo balingile ukuibebetela abene intanshi?

⁷ Bushe cilakwangukila ukutantike mibele ufwaya umunobe wa mu cupo ukukwata? Ku bengi calyanguka. Nangu cibe fyo, ni shani pa lwa mibele yobe iwe wine? Misango nshi imo intu wakwata iikakulenga ukusangwilako ukuti icupo cikatunguluke? Musango nshi uwa mulume nelyo umukashi untu ukaba? Ku ca kumwenako, bushe ulaitemenwa ukusumino kuti naulufyanya no kupokelela ukupandwa amano, nelyo bushe nga balekulungika ulaicingilila lyonse fye? Bushe ilingi line waba uwasansamuka kabili uwenekele fisuma, nelyo bushe wakongamina fye ku kuba uwabombomana, libili libili ukulailishanya? (Amapinda 8:33; 15:15) Ibukisha, icupo tacakaalule ubuntu bobe. Nga ca kuti lintu uli umushimbe waliba uwa cilumba, uukuntukilwa bwangu, nelyo uushenekela busuma, ukaba fye cimo cine nangu waingila mu cupo. Apo calyafya ukuimona fwe bene mu nshila abantu bambi batumwenamo, mulandu nshi tawingepushisha umufyashi nelyo cibusa uo wacetekela pa kuti engalandapo ukwabulo kukufisa no kupeelako imitubululo? Nga waishiba umulekabila ukwaluka, bombelapo ilyo ushilatendeka ukulola ku kwingila mu cupo.

8-10. Kufunda nshi Baibolo ipeela ukwingaafwa umuntu ukuipekanishisha ku cupo?

⁸ Baibolo itukoselesha ukuleka umupashi wa mushilo uwa kwa Lesa ukubombela muli ifwe, ukuletako imibele pamo ngo “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” Na kabili itweba “[ukulengwa] abapya ku myeo ya mitima [yesu],” kabili no “kufwalo buntu bupya, ubwalengelwe mu cipasho ca kwa Lesa mu kulungama no kushila kwa Cine.” (Abena Galatia 5:22, 23; Abena Efese 4:23, 24) Ukubomfya uku kufunda ilyo ucili umushimbe cikaba kwati kubike ndalama mu banki—pantu cikesaba ica kwaafwa sana ku nshita ya ku ntanshi, lintu waingila mu cupo.

⁹ Ku ca kumwenako, nga uli mwanakashi, sambilila ukupoosesha amano ku “muntu uwabelama uwa mu mutima” ukucila fintu usakamana imimonekele yobe iya ku mubili. (1 Petro 3:3, 4) Ubufuuke no kutekanya fikakwaafwa ukukwata amano, ayaba e “cilongwe icayemba.” (Amapinda 4:9; 31:10, 30; 1 Timote 2:9, 10) Nga uli mwaume, sambilila ukusunga abanakashi mu cikuuku na mu mucinshi. (1 Timote 5:1, 2) Ilyo ulesambilila ifya kuipingwila no kubombela pa fishingamo, sambilila na kabili ukuba umufuuke kabili uwaicefya. Imibele ya mutitikisha ikatungulula ku malanda mu cupo.—Amapinda 29:23; Mika 6:8; Abena Efese 5:28, 29.

¹⁰ Nangu cingatila ukwalula umuntontonkanya muli ifi twalandapo tacabe cayanguka, cintu cimo ico Abena Kristu bonse balingile ukubombelapo. Kabili cikakwaafwa ukuba umunankwe wacilapo kuwama uwa mu cupo.

11, 12. Ni shani fintu abantu babili bengasanga nampo nga baliba abayana kuli umo no munankwe nelyo iyo?

¹¹ Bushe kuntu wikala waliba mwata umuntu ukuisalila umwine untu alefwaya ukuupana nankwe? Nga ifyo e fyo caba, ni shani ulingile ukubombapo nga wasanga umo uwa bwamba bwapusana umusuma icata? Ica kubalilapo, ipushe we mwine ukuti, ‘Bushe cine cine amapange yandi yali ya kwingila mu cupo?’ Ukwangala ku nkuntu sha muntu umbi ukupitila mu kumulenga ukucetekela ico tushakamucitile caba bunkalwe. (Amapinda 13:12) Lyene, ipushe we mwine ukuti, ‘Bushe mu mibele intu ndimo kuti naingila mu cupo?’ Nga watila ee, ku fipusho fyonse fibili, imibombele uli no kukonkeshapo ikaba iyapusana ukulingana no mwata wa ku mwenu. Mu fyalo fimo, pa numa ya kubebeta uyo muntu pa nshita yatantalilako, kuti pambi walansha uyo muntu no kusoso kuti ulefwaisha ukubeleshanya nankwe. Nga ca kuti akaana, wimupamfya ica kuti wamufiisha na ku mutima. Ibukisha, uyo muntu umbi na o alikwata insambu sha kupingulapo muli uyo mulandu. Nangu cibe fyo, nga ca kuti asumina, kuti pambi mwatantika ukupoosako inshita pamo mu mibombele iisuma. Ici cikakupeela ishuko lya kumona nampo nga kuti cabamo amano ukuupana no yu muntu.a Cinshi cintu wingalafwailisha pali iyi nshita?

¹² Pa kwasuke co cipusho, elenganya ukuti pali ifilimba fibili, nakalimo piano ne cilimba ca nsale. Nga nafisumbwa bwino, cimo ica ifi filimba ceka fye kuti cafumye ciunda cisuma ica lwimbo. Lelo, cinshi cingacitika nga fyalishiwa fyonse capamo? Nomba fifwile ukusumbwa mu kumfwana cimo ne cinankwe. Cili icapalako na kuli iwe no uli no kuba umunobe wa mu cupo. Umo umo uwa imwe kuti pambi alibombeshe pa “kusumba” imisango ya buntu bwenu ngo muntu umo umo. Lelo nomba icipusho cili ca kuti: Bushe muli mu kumfwana kuli umo no munankwe? Mu mashiwi yambi, bushe muli abayana kuli umo no munankwe?

13. Mulandu nshi cishabela ca mano ukwishisha umuntu uo mushakwata nankwe ifisumino fya mipepele fimo fine?

¹³ Calicindama imwe bonse babili ukukwata ifisumino fimo fine ne fishinte. Umutumwa Paulo alembele ati: “Mwiba aba kwi koli limo na ’bashatetekela.” (2 Abena Korinti 6:14; 1 Abena Korinti 7:39) Ukuupana no muntu uushaba ne cisumino cintu iwe wakwata muli Lesa kuti capalishako ukuti kuli no kuba ukukanaumfwana ukwabipisha. Ku lubali lumbi, ukuipeelesha kwa bonse babili kuli Yehova Lesa e shinte lyakosa ilya kwikataninapo. Yehova afwaya iwe ukuba uwa nsansa no kuipakisha icikakilo capalamisha no yo untu ukoopana nankwe. Afwaya iwe ukukakililwa kuli Wene na kuli umo no munankwe ku cikakilo ca kutemwa ica mbali shitatu—Lukala Milandu 4:12.

14, 15. Bushe ukukwata icisumino cimo cine e lubali fye lweka ululeta ukwikatana mu cupo? Londolola.

¹⁴ Ilintu kwena ukupepa Lesa capamo e lubali lwacindamisha ku kwikatana, na fimbi fyalibimbwamo. Pa kuti pabe ukumfwana, iwe no ulesubilwa ukuba umunobe mulingile ukuba na mabuyo yapalana. Finshi fyaba e mabuyo yobe? Ku ca kumwenako, muyumfwa shani pa lwa kukwata abana? Finshi fyaba pa ntanshi mu bumi bwenu?b (Mateo 6:33) Mu cupo icatunguluko kufikapo, abaupana baba fibusa fisuma kabili balaipakisha ukuba pamo. (Amapinda 17:17) Pa kuti cibe fi, balekabila ukusekelela mu fintu fimo fine. Nakaana nga te ifyo, kuti cabe cakosa ukusungilila bucibusa—pali bufi icupo. Nalyo line, nga ca kuti uulesubilwa ukuba umunobe alaipakisha imibombele imo intu iwe ushatemwa, pamo nga ukwendauka ku koololako fye amolu, bushe ico cilepilibulo kuti kanshi tamulingile ukuupana? Awe te lyonse cili no kube fyo. Nakalimo mulabombela pamo mu fintu fimbi, ifyacilapo kucindama. Mu kulundapo, kuti pambi waletela insansa ku ulesubilwa ukuba umunobe ukupitila mu kubombela pamo nankwe mu fintu fimo ifisuma pa kuti uyo muntu umbi alaipakisha fyene.—Imilimo 20:35.

¹⁵ Mu cituntulu, ukuyana kuli umo no munankwe, kupiminwa apakalamba ku fintu imwe bonse mukaba abaitemenwa ukuteuluka ukucila ukupiminwa ku fintu mwatemwa ne fyo mwapata. Mu cifulo ca kwipusho kuti, “Bushe muli fyonse fye tulasuminishanya?” icipusho cacilapo kuwama kuti pambi caba ca kuti: “Cinshi cicitika nga tatusuminishenye? Bushe kuti twalanshanya iyo milandu mu mutima nteeka, ukupeeleshanya akatiina no mucinshi? Nelyo bushe ukulanshanya ilingi kusanguka ifikansa fya kapuuka?” (Abena Efese 4:29, 31) Nga ca kuti ulefwaya ukwingila mu cupo, cenjela ku uli onse uwaba ne cilumba kabili munshebwa, uushifwaya kunakako, nelyo lyonse alapinda kabili ku mucenjelo afwaya ukuicitila fye ifintu mu nshila yakwe.

16, 17. Cinshi cintu umwaume nelyo umwanakashi engafwaya ukwishiba lintu alelanguluka uulesubilwa ukuba umunankwe wa mu cupo?

¹⁶ Mu cilonganino ca Bwina Kristu, abo baseekeshiwa ifishingamo bali no ‘kubala ukulingwa.’ (1 Timote 3:10) Na iwe wine kuti wabomfyako ici cishinte. Ku ca kumwenako, umwanakashi kuti pambi aipusha ukuti, “Bushe uyu mwaume abantu bamwishiba shani? Ni bani baba e fibusa fyakwe? Bushe alalangisha ukuilama? Abomba shani na bacikalamba? Ni ku lupwa nshi afuma? Bushe alomfwana na bo? Imibele yakwe yaba shani ku ndalama? Bushe alanwesha ubwalwa? Bushe alakuntukilwa bwangu, nangu fye ukupuma? Fishingamo nshi akwata mu cilonganino, kabili ni shani fintu abombapo? Bushe kuti namucindika mu kushika?”—Ubwina Lebi 19:32; Amapinda 22:29; 31:23; Abena Efese 5:3-5, 33; 1 Timote 5:8; 6:10; Tito 2:6, 7.

¹⁷ Umwaume pambi kuti aipusha ati, “Bushe uyu mwanakashi alalangisha ukutemwa no mucinshi kuli Lesa? Bushe alifikapo ku kusakamana iŋanda? Bushe cinshi cintu ulupwa lwakwe lukalaenekela ukufuma kuli ifwe? Bushe aliba uwa mano, bushe alapikintika, bushe alamemenga ifintu? Finshi fintu alandapo? Bushe cine cine alyangwako pa lwa busuma bwa bantu bambi, nangu bushe aba ni kaitemwe, uwa mulomo? Bushe kuti acetekelwa? Bushe kuti aitemenwa ukunakila kuli bumutwe, nelyo bushe aba mumankonso, nakalimo uwingafika fye na ku kupondoka?”—Amapinda 31:10-31; Luka 6:45; Abena Efese 5:22, 23; 1 Timote 5:13; 1 Petro 4:15.

18. Nga ca kuti amabunake yanono yamonwa lintu muleishishanya, cinshi ulingile ukwibukisha?

¹⁸ Wilalaba ukuti ulebomba no muntu mubembu uwatuntuka kuli Adamu, tali muntu walumbuka uwa kwelenganya fye uwa mu fitabo fya nshimi sha cintemwa. Uuli onse alapelebela, kabili limo limo kano fye ukulasuulako fye—ku mpuso shobe ne sha ulesubilwa ukuba umunobe. (Abena Roma 3:23; Yakobo 3:2) Ukulundapo, ubunake bumo nga bwamoneka kuti bwakupeela ishuko lya kukosoka. Ku ca kumwenako, tutile lintu muleishishanya nga mwakansana. Languluka: Nangu fye bantu batemwana kabili abacindikana inshita shimo balapusana. (Linganyako Ukutendeka 30:2; Imilimo 15:39.) Bushe kuti caba ukuti ico bonse mulekabila fye kukushako “kukaanyo mutima” no kusambilila ifya kupwishe milandu mu nshila yacilapo kube ya mutende? (Amapinda 25:28) Bushe uuleenekelwo kuba umunobe wa mu cupo alalangisha ukufwaikwa kwa kuti akawamyeko? Bushe nobe wine e kufwaisha ulangisha? Bushe kuti wasambilila ukukaanakuntukilwa bwangu, ukukaanafulwa bwangu? (Lukala Milandu 7:9) Ukusambilila ifya kupwisha impika kuti kwaimika icipasho ca kumfwana kwafumaluka ukukafwaikwa lintu imwe babili mwaupana.—Abena Kolose 3:13.

19. Cinshi cingaba ica mano ukucita nga ca kuti impika shikalamba shamoneka lintu muleishishanya?

¹⁹ Nangu ni fyo, ni shani nga wamonapo ifintu fimo ifyakucusha apakalamba? Ukutwishika kwa musango yo kulingile ukulangulukwapo mu kusakamanisha. Nangu wingaba ne cintemwa cikalamba shani nelyo ukufwaisha kwa kwingila mu cupo, te kwesho kusuulako ifilubo fikalamba. (Amapinda 22:3; Lukala Milandu 2:14) Nga ca kuti muleshishanya no muntu uo uletwishika sana, kuti cawama ukukaanatwalilila ukwishishanya no kutaluka ku kupanga ukukakililwako kwatwalilila no yo muntu.

20. Ni shani fintu abaleishishanya bengasengauka imyendele iingaleta umuseebanya?

²⁰ Ni shani mwingasunga ukwishishanya kwenu ukwa mucinshi? Ica kubalilapo, shininkisheni ukuti umusango wa myendele yenu tauleleta umuseebanya. Uko mwikala, bushe ukwikatana mu minwe, ukufyompana, nelyo ukukumbatana bushe fimonwa nge fyalinga ku bantu bashaupana? Nangu fye nga ukulangisha kwa musango yo ukwa citemwishi kumonwa fye bwino, kulingile ukusuminishiwa lyeka fye lintu ukukobekelana kwafika pa cipimo pantu icupo nacitantikwa ukwabulo kutwishika. Sakamana ukuti ukulangisha icitemwishi takufikile ku myendele yakowela nelyo fye ubulalelale. (Abena Efese 4:18, 19; linganyako Ulwimbo lwa Nyimbo 1:2; 2:6; 8:5, 9, 10.) Apo umutima waliba uwa kufutika, kuti caba ica mano kuli imwe bonse babili ukusengauka ukuba mweka mu ŋanda, mu muputule, muli motoka emikwe, nelyo ukuli konse ukwingamupeela akashita ka kwingila mu myendele yalubana. (Yeremia 17:9) Ukusungilila ukwishishanya kwenu ukwasanguluka kulangilila mu kulengama ukuti mwaliilama no kuti mu kubulwa akaso mwangwa ku busuma bwa uyo muntu umbi ukucila pa kufwaisha kwenu mwe bene. Icacilapo kucindama, ukwishishanya kwasanguluka kukateemuna Yehova Lesa, uukambisha ababomfi bakwe ukutaluka ku kukowela na ku bulalelale.—Abena Galatia 5:19-21.

21. Kumfwana nshi ukwa bufumacumi pambi kwingakabilwa pa kusungilila ukwishishanya ukwa mucinshi?

²¹ Ica cibili, ukwishishanya kwa mucinshi na kabili kusanshamo ukumfwana kwa bufumacumi. Ilyo ukwishishanya kwenu kulepalamina ku cupo, imilandu imo ikakabila ukulandwapo ukwabulo kulamba. Ni kwi mukekala? Bushe bonse mukalabomba? Bushe mulefwaya ukukwata abana? Na kabili, calibe cisuma ukusokolola ifintu, nakalimo ifyacitikile umo ku numa, ifingambukila icupo. Ifi kuti pambi fyabimbamo ubwingi bwa nkongole wakwata nelyo ifyo wakakililwako ukucita nelyo imilandu ya fya butuntulu bwa bumi, pamo nga ubulwele bwabipisha nelyo ifyo pambi waba ukukuma ku butuntulu bwa bumi. Apantu ku bantu abengi ababa na HIV (akashishi akaleta ubulwele bwa AIDS) tabamoneka bwangu ukuti balikwata, tacingaba cilubo kuli umo nelyo abafyashi abasakamana nga bengepusha umo uwaipoosele mu nshila sha bulalelale isha bucitobo ukuyapimwa ukumona nga mu mulopa wakwe muli AIDS nangu nga aalebomfya imiti ikola ukuipompela mu mishipa. Nga ca kuti ukupima kwashinina ukuti nakwata AIDS, te kuti cibe icalinga ku usangilwe no bulwele ukupatikisha uwali no kubo mwina mwakwe ukutwalililo kwishishanya nga ca kuti uuleenekelwa ukuba umunankwe wa mu cupo alefwaya ukupwisha kwene. Kwena, uuli onse uwaibimbapo mu bumi bwa busanso kuti caba bwino ukusalapo mu kuitemenwa ukuyapimwa ukumona nga mu mulopa muli AIDS ilyo talatendeka ukwishishanya.

22, 23. (a) Ni shani umo engalufya ukushikatala lintu alepekanishisha ubwinga? (b) Mimwene nshi yashikatala iilingile ukusungililwa pa kulanguluka pa bwinga ne cupo?

²² Mu myeshi ya kulekelesha pa ntanshi ya bwinga, imwe bonse babili nakalimo mukapamfiwa sana ukuteyanya ifya bwinga. Kuti mwacefyako ukukanshika pa kupekanya kwenu mu kulinga. Ubwinga bwaluma umutengo no kufulamo imitabotabo kuti pambi bwateemuna ba lupwa na ba mu bwikashi, lelo kuti bwalenga aboopene ne ndupwa ukufunshika lwa ku mubili pamo pene no kukanashalako ne ndalama nangu shimo. Ukukonkelela imyata imo iya cikaya kwaliba fye bwino, lelo ukwikatilila ku ntambi ukwa kuteko busha ukumoneka ngo kucimfyanya kuti kwalenga ako kashita ukumoneka nga kashikwete ubuyo no kumupusula ubuseko buntu mulingile ukukwata. Ilintu kwena mufwile ukutontonkanya pa fyo bambi baleyumfwa, shibwinga maka maka e washingamwa ukupingula icikalacitwa pa mutebeto wa bwinga.—Yohane 2:9.

²³ Ibukisheni ukuti ubwinga bupwa fye ubushiku bumo, lelo icupo cenu cikabapo ubumi bwenu bonse. Sengaukeni ukutontomesha sana pa bushiku bwa kuupana. Mu cifulo ca ico, shintilileni pali Yehova Lesa ukumupeela ubutungulushi, kabili ipekanishisheni ku mikalile ya kuba abaupana. Lyene mukaba namuipekanishisha bwino ku cupo catunguluka.